អង្គការលីកាដូ សូមធ្វើការបំភ្លឺចំពោះរបាយការណ៍ស្ដីពីការវាយប្រហារនៃអំពើចារកម្មព័ត៌មានវិទ្យា
ចេញផ្សាយ ថ្ងៃទី១៧ ខែឧសភា ឆ្នាំ២០១៨កាលពីសប្តាហ៍មុន បុគ្គលិកអង្គការ លីកាដូ បានរកឃើញភាពមិនប្រក្រតីមួយ នៅពេលអ្នកទាំងនោះ បានចូលទៅមើលគេហទំព័ររបស់កាសែតភ្នំពេញប៉ុស្តិ៍។ អំឡុងពេលចូលទៅមើលគេហទំព័រ ក៏មានលេខកូដចំឡែកដែលបានក្លែងបន្លំខ្លួនជាក្រុមហ៊ុន Google (ប្រើឈ្មោះ Gooogle ស្រដៀងគ្នា) ដោយព្យាយាមបន្លំអ្នកចូលទស្សនាគេហទំព័រ ដើម្បីឱ្យអ្នកទាំងនោះ បើកសិទិ្ធឲ្យជនទីបីដែលជា ជនអនាមិកមានឈ្មោះថា GTransfers អាចចូលទៅគ្រប់គ្រងឬប្រើប្រាស់គណនីអ៊ីម៉ែលរបស់អ្នកចូលទស្សនាទាំងនោះបាន។
អង្គការ លីកាដូ បានធ្វើការវិភាគលេខកូដចំឡែកនោះ ដែលត្រូវបានលាក់ខ្លួននៅក្នុងឯកសារស្របច្បាប់មួយ ឈ្មោះថា theme.js ដែលឃើញមាននៅលើគេហទំព័ររបស់កាសែតភ្នំពេញប៉ុស្តិ៍ និងបានបញ្ជូនបន្តការរកឃើញនោះ ទៅឲ្យអង្គការដៃគូមួយចំនួនក្នុងតំបន់ ដើម្បីធ្វើការពិនិត្យ និងវិភាគ។ ការវាយប្រហារនៅលើគេហទំព័រនេះ ត្រូវបានទទួលស្គាល់ដោយអ្នកជំនាញឯករាជ្យផ្នែកសុវត្ថិភាពនៅលើប្រព័ន្ធអ៊ីនធើណេត នៅក្នុងអត្ថបទសារព័ត៌មានអន្តរជាតិ ABC. របស់ប្រទេសអូស្ត្រាលី ដែលក្នុងនោះក៏មានអ្នកដឹកនាំផ្នែកឧស្សាហកម្មព័ត៌មានវិទ្យា ក្រុម FireEye ផងដែរ។
ការលេចឡើងនូវលេខកូដចំឡែកដែលត្រូវបានបង្កើតឡើងយ៉ាងប៉ិនប្រសប់ នៅលើគេហទំព័រកាសែតភ្នំពេញប៉ុស្តិ៍ នេះ (ត្រូវបានដកចេញវិញនៅក្នុងរយៈពេល ២៤ ម៉ោង ចុងក្រោយនេះ) អាចត្រូវបានបញ្ជាក់បន្ថែមតាមរយៈគេហទំព័រឯករាជ្យមួយ ដែលមានមូលដ្ឋាននៅសហរដ្ឋអាមេរិក ឈ្មោះថា Wayback Machine ដែលអាចឲ្យអ្នកចូលទស្សនាគេហទំព័រភ្នំពេញប៉ុស្តិ៍ មើលឃើញនូវកំណត់ត្រានៃការកែប្រែគេហទំព័រពីមុនៗបាន។
ដូចដែលបានឃើញ នៅក្នុងកំណត់ត្រាប្រចាំថ្ងៃ ក្នុងខែឧសភានេះ ចាប់ពីថ្ងៃទី ៨ ខែឧសភា លេខកូដមិនប្រក្រតីមួយខ្សែ បានលេចចេញឡើងនៅក្នុងឯកសារគេហទំព័រ។ លេខកូដមួយខ្សែនេះ បានបាត់ទៅវិញ នៅថ្ងៃទី១៥ ខែឧសភា។ ចាប់តាំងពីពេលនោះមក អង្គការ លីកាដូ លែងក្លាយជាគោលដៅនៃការវាយប្រហារតាមប្រព័ន្ធព័ត៌មានវិទ្យានេះទៀតហើយ។
កាលបរិច្ឆេទទាំងនេះ គឺគិតតាមពេលវេលាជាសកល ដែលត្រូវបានប្រើប្រាស់ដោយ Wayback Machine។
MP3 format: ស្តាប់សំឡេងជាភាសាខ្មែរ