សាលដីកាលើសំណុំរឿងសកម្មជនចំនួន ១១ ក្នុងចំនោម "អ្នកទាំង ១៩" ត្រូវបានពន្យាពេល
ចេញផ្សាយ ថ្ងៃទី២២ ខែមករា ឆ្នាំ២០១៥នារសៀលនេះ សាលាឧទ្ធរណ៍បានបើកសវនាការលើសំណុំរឿងចំនួនពីរករណីលើស្ត្រីជាសកម្មជនសិទិ្ធដីធ្លីចំនួន ១០នាក់ និងព្រះសង្ឃចំនួន ១អង្គ ដែលត្រូវបានឃុំខ្លួនដោយមិនត្រឹមត្រូវ។ បន្ទាប់ពីបើកសវនាការយ៉ាងរហ័សលើសំណុំរឿងទាំងពីរត្រឹមតែជាង ៤ម៉ោង តុលាការបានសម្រេចប្រកាសសាលដីកានៅថ្ងៃទី២៦ ខែមករា ឆ្នាំ២០១៥ ម៉ោង ៨ព្រឹក។
នៅក្នុងករណីទីមួយ អ្នកស្រី ង៉ែត ឃុន, ទេព វន្នី, សុង ស្រីលាភ, គង់ ចន្ថា, ផាន់ ឈុនរ៉េត, ប៉ូ ឆវី និងនង ស្រេង ដែលជាសកម្មជនដីធ្លីតំបន់បឹងកក់រយៈពេលយូរ ត្រុវបានផ្តន្ទាទោសពីបទរារាំងចរាចរណ៍សាធារណៈ កាលពីថ្ងៃទី១១ ខែវិច្ឆិកា ឆ្នាំ២០១៤ និងត្រូវបានដាក់ឲ្យជាប់ពន្ធនាគារចំនួន ១ឆ្នាំ និងពិន័យជាប្រាក់ ៥០០ ដុល្លារអាមេរិក។
ក្នុងករណីទីពីរ សកម្មជនដីធ្លីតំបន់បឹងកក់រយៈពេលយូរចំនួនបីនាក់ គឺអ្នកស្រី ហេង ពេជ្យ, អ៊ឹម ស្រីទូច និងភួង សុភាព និងព្រះតេជគុណ សឿង ហាយ ត្រូវបានផ្តន្ទាទោសកាលពីថ្ងៃទី១២ ខែវិច្ឆិកា ឆ្នាំ២០១៤ ពីបទរារាំងមន្ត្រីរាជការសាធារណៈដែលមានស្ថានទម្ងន់ទោស និងជាប់ពន្ធនាគារចំនួន ១ឆ្នាំ និងពិន័យជាប្រាក់ចំនួន ៥០០ ដុល្លារអាមេរិក។
នៅក្រៅតុលាការ អ្នកគាំទ្រអហិង្សាចំនួន ៣០០នាក់ បានប្រមូលផ្តុំគ្នាដោយសាមគ្គីភាព ដែលរួមមានប្រធានវិទ្យុសំបុកឃ្មុំ លោក ម៉ម សូណង់ដូផងដែរ។
នៅក្នុងសាលសវនាការ សមាជិកសភាមកពីគណបក្សសង្គ្រោះជាតិ លោកស្រី មួរ សុខហួរ និងអ្នករាយការណ៍ពិសេសអង្គការសហប្រជាជាតិសម្រាប់បញ្ហាសិទិ្ធមនុស្សនៅកម្ពុជា លោក សូរិយា ស៊ូបេឌី ក៏មានវត្តមាននៅក្នុងនោះផងដែរ។ អ្នកតំណាងមកពីស្ថានទូតអង់គ្លេស អាល្លីម៉ង់ សហរដ្ឋអាមេរិក ស៊ុយអែត អូស្ត្រាលី និងសហគមន៍អឺរ៉ុប អង្គការឃ្លាំមើលសិទិ្ធមនុស្ស Human Rights Watch ការិយាល័យឧត្តមស្នងការទទួលបន្ទុកសិទិ្ធមនុស្សនៃអង្គការសហប្រជាជាតិនៅកម្ពុជា និងអង្គការសហប្រជាជាតិសម្រាប់ស្ត្រីនៅកម្ពុជា (UN Women) ក៏មានវត្តមាននៅទីនោះដែរ។
- ឯកសារទាក់ទង
- ចំណងជើង & មូលបទ
- សហគមន៍ បឹងកក់ ដោះលែង ១៩ នាក់ តុលាការ និង នីតិរដ្ឋ