សំណើសំុនៅក្រៅឃុំរបស់កញ្ញា លី សៀវមិញ ជាសកម្មជនម្នាក់ក្នុងចំណោមសកម្មជនទាំង ១៩នាក់ ត្រូវបានបដិសេធ
ចេញផ្សាយ ថ្ងៃទី១៩ ខែមីនា ឆ្នាំ២០១៥សាលាដំបូងរាជធានីភ្នំពេញនាថ្ងៃនេះ បានបដិសេធសំណើសុំនៅក្រៅឃុំបណ្តោះអាសន្នរបស់កញ្ញា លី សៀវមិញ ជាសកម្មជនម្នាក់ក្នុងចំណោម "សកម្មជនទាំង ១៩នាក់"។ តាមពិត ថ្ងៃនេះគឺជាថ្ងៃបើកសវនាការជំនុំជម្រះ ប៉ុន្តែចៅក្រមបានសម្រេចបើកសវនាការលើសំណើ សុំនៅក្រៅឃុំវិញ។ បន្ទាប់ពីបានស្តាប់អស់រយៈពេល ២០នាទី លើអំណះអំណាងរបស់មេធាវីការពារជនជាប់ចោទ ព្រះរាជអាជ្ញា និងកញ្ញា លី សៀវមិញ ចៅក្រមបានបដិសេធសំណើសុំនៅក្រៅឃុំបណ្តោះអាសន្ន បន្ទាប់ពីចូលទៅធ្វើការពិចារណារយៈពេល ៥នាទី និងដោយមិនមានមូលហេតុអ្វីទាំងអស់។
កញ្ញា លី សៀវមិញ ត្រូវបានចាប់ខ្លួនកាលពីថ្ងៃទី១៨ ខែវិច្ឆិកា ឆ្នាំ២០១៤ ហើយត្រូវបានជាប់ពន្ធនាគារបណ្តោះអាសន្នរង់ចាំសវនាការចាប់តាំងពីពេលនោះមក។ កញ្ញា ត្រូវបានចោទប្រកាន់ពីបទហិង្សាលើអ្នកកាន់កាប់អចលនទ្រព្យ (មាត្រា ២៣ នៃច្បាប់ភូមិបាល) ក្រោយពីមានការប្តឹងពីក្រុមហ៊ុន ឃុន សៀ ជាក្រុមហ៊ុនដែលមានទំនាក់ទំនងល្អជាមួយអាជ្ញាធរ និងបានព្យាយាមបណ្តេញកញ្ញា សៀវមិញ និងគ្រួសាររបស់នាងចេញពីអចលនទ្រព្យរបស់អ្នកទាំងនោះជាយូរណាស់មកហើយ។ បណ្តឹងនេះ ពាក់ព័ន្ធនឹងករណីកាលពីថ្ងៃទី២៩ ខែមេសា ឆ្នាំ២០១៣ ប៉ុន្តែទើបតែត្រូវបានដាក់ចូលតុលាការកាលពីថ្ងៃទី ៥ ខែកញ្ញា ឆ្នាំ២០១៤ ប៉ុណ្ណោះ។
បន្ទាប់ពីចាកចេញពីសាលសវនាការនាថ្ងៃនេះ កញ្ញា លី សៀវមិញ បាននិយាយថា៖ "ថ្ងៃនេះ ខ្ញុំមានអារម្មណ៍សោកស្តាយជាខ្លាំងចំពោះសេចក្តីសម្រេចរបស់តុលាការ ព្រោះខ្ញុំមិនបានទទួលនូវយុត្តិធម៌។ ប៉ុន្តែព្រោះតែខ្ញុំមានការគាំទ្រពីសហគមន៍ និងអង្គការមិនមែនរដ្ឋាភិបាល ដូចនេះខ្ញុំនៅតែមិនអស់សង្ឃឹម និងអាចបន្តតស៊ូដើម្បីភាពយុត្តិធម៌។" សវនាការរបស់នាងត្រូវបានលើកពេលទៅធ្វើនៅវេលាម៉ោង ២រសៀល ថ្ងៃទី២៥ ខែមិនា ឆ្នាំ២០១៥។ មិនមានហេតុផលណាមួយ ត្រូវបានលើកឡើងក្នុងការពន្យារពេលនេះទេ។
- ឯកសារទាក់ទង
- ចំណងជើង & មូលបទ
- បញ្ហាស្ត្រី ដោះលែង ១៩ នាក់ បញ្ហាដីធ្លី