នាព្រឹកនេះ យុវជនប្រមាណ ២០០នាក់ ដែលមានអាយុចន្លោះពី ១៨ឆ្នាំ ដល់ ២៥ឆ្នាំ បានប្រារព្ធទិវាយុវជនអន្តរជាតិនៅខេត្តសៀមរាប ដោយរួមមានការជិះកង់ បង្ហោះប៉ោងៗ និងវេទិកាសាធារណៈ ក្រោមប្រធានបទ “យុវជនមានសារៈសំខាន់សម្រាប់ការអភិវឌ្ឍន៍”។

កុមារតូចៗប្រមាណ ២០០នាក់ បានចូលរួមវេទិកាសាធារណៈនេះ ដែលរួមមានទាំងការរាំរបាំប្រពៃណី ការល្បែងប្រជាប្រិយ និងប្រគំតន្រ្តីផងដែរ។ កម្មវិធីសំណួរ-ចម្លើយ បង្ហាញថា បញ្ហាចំបងបំផុតរបស់កុមារ និងយុវជនទាំងនោះ គឺភាពក្រីក្រ ឱកាសការងារ ការសិក្សាអប់រំ អំពើពុករលួយក្នុងប្រព័ន្ធអប់រំ និងការចូលរួមរបស់យុវជនក្នុងវិស័យនយោបាយ សង្គម និងសេដ្ឋកិច្ច។ ព្រឹត្តិការណ៍នាថ្ងៃនេះ ត្រូវបានរៀបចំឡើង ដោយក្រុមយុវជនប្រមាណ ១០ ក្រុម មកពីស្រុក និងអង្គការផ្សេងៗ ជុំវិញខេត្តសៀមរាប។