កិច្ចព្រមព្រៀងនយោបាយកំពុងរង្គោះរង្គើ នៅពេលមេដឹកនាំគណបក្សជំទាស់ត្រូវបានដកពីតំណែងអនុប្រធានទីមួយរដ្ឋសភា
ចេញផ្សាយ ថ្ងៃទី៣០ ខែតុលា ឆ្នាំ២០១៥នៅព្រឹកនេះ មេដឹកនាំគណបក្សសង្គ្រោះជាតិ ឯកឧត្តម កឹម សុខា ត្រូវបានរដ្ឋសភាដកតំណែងជាអនុប្រធានទីមួយនៃរដ្ឋសភាជាតិ ដោយសម្លេងជាឯកច្ឆ័ន្ធពីសមាជិកសភាមកពីគណបក្សកាន់អំណាចទាំង ៦៨រូប ក្រោយពីសមាជិកសភាមកពីគណបក្សសង្គ្រោះជាតិបានដើរចេញពីសភានៅព្រឹកមិញ។ ការបោះឆ្នោតនាថ្ងៃនេះ ត្រូវបានធ្វើឡើង នៅពេលដែលសមាជិកសភាមកពីគណបក្សសង្គ្រោះជាតិស្ទើរតែពាក់កណ្តាលកំពុងនៅក្រៅប្រទេស។
ការដកតំណែងនេះ ត្រូវបានធ្វើឡើង ៤ថ្ងៃក្រោយពីមានការតវ៉ាដែលត្រូវបានធ្វើឡើងដោយក្រុមគាំទ្រគណបក្សប្រជាជនកម្ពុជានៅក្នុងរាជធានី ដើម្បីទាមទារឲ្យឯកឧត្តម កឹម សុខា ចុះចេញពីតំណែង។ ក្នុងព្រឹត្តិការណ៍នោះ មានសមាជិកសភាមកពីគណបក្សសង្គ្រោះជាតិពីររូបរងរបួសយ៉ាងធ្ងន់ធ្ងរពីការវាយដំនៅក្រៅវិមានរដ្ឋសភា។ ការទាមទារនេះ ក៏ត្រូវបានធ្វើឡើងដោយទាហានប្រដាប់អាវុធនៅភាគពាយ័ព្យក្នុងខេត្តឧត្តរមានជ័យ និងព្រះវិហារផងដែរ។ ពីរថ្ងៃបន្ទាប់ពីការតវ៉ាមក សមាជិកសភាមកពីគណបក្សប្រជាជនកម្ពុជា ឯកឧត្តម ប៉ែន បញ្ញា និងឯកឧត្តម ជាម យៀប បានធ្វើការស្នើសុំជាផ្លូវការឲ្យដក ឯកឧត្តម កឹម សុខា ពីតំណែង។
ការបោះឆ្នោតនាថ្ងៃនេះ ត្រូវបានធ្វើដោយសមាជិកសភាទាំងអស់មកពីគណបក្សប្រជាជនកម្ពុជា នៅពេលដែលសមាជិកសភាមកពីគណបក្សសង្គ្រោះជាតិស្ទើរតែពាក់កណ្តាលកំពុងនៅក្រៅប្រទេស។
- ឯកសារទាក់ទង
- ចំណងជើង & មូលបទ
- កឹម សុខា