អ្នកតំណាងសហគមន៍នៅខេត្តរតនគិរីត្រូវបានដាក់ពន្ធនាគារបន្ទាប់ពីមានការផ្តន្ទាទោសដោយមិនយុត្តិធម៌
ចេញផ្សាយ ថ្ងៃទី២ ខែធ្នូ ឆ្នាំ២០១៥
នៅរសៀលនេះ អ្នកតំណាងចំនួន 3នាក់មកពីសហគមន៍នៅខេត្តរតនគិរី ត្រូវបានសាលាដំបូងខេត្តរតនគិរីផ្តន្ទាទោសឲ្យជាប់ពន្ធនាគារចំនួន ២ឆ្នាំ នៅខណៈដែលអ្នកគាំទ្ររបស់អ្នកទាំងនោះចំនួន ១០០ នាក់ កំពុងប្រមូលផ្តុំគ្នានៅក្រៅតុលាការដើម្បីតវ៉ាជំទាស់នឹងការជំនុំជម្រះនេះ។
អ្នកតំណាងសហគមន៍ទាំងនេះ ត្រូវបានកោះហៅសាកសួរដំបូងនៅខែឧសភា ឆ្នាំ២០១៥ ដែលនេះជាយុទ្ធសាស្ត្រក្នុងការបំភិតបំភ័យនៅក្នុងអំឡុងពេលមានជម្លោះដីធ្លីកើតឡើងចាប់តាំងពីឆ្នាំ ២០១២ នៅពេលដែលកម្មកររបស់អ្នកជំនួញម្នាក់ឈ្មោះ ហ៊ាង សុជាតិ (ដោយមានការគាំទ្រពីនគរបាលប្រដាប់អាវុធ) បានចាប់ផ្តើមឈូសឆាយដីរាប់រយហិកតា ដែលជាដីសម្រាប់ការចិញ្ចឹមជីវិតរបស់មនុស្ស ១០០ គ្រួសារនៅក្នុងស្រុក បរកែវ។
លោក សួត សឿន លោក អែម ចាន់ និងលោកជ្រឹក ទួក ត្រូវបានចោទប្រកាន់ពីបទពាក់ព័ន្ធនឹងការរំលោភលើទ្រព្យជាកម្មសិទិ្ធអ្នកដទៃតាមមាត្រា ២៤៧ ២៤៨ និង២៥៣ នៃច្បាប់ភូមិបាល។ មានតែមាត្រា ២៥៣ ប៉ុណ្ណោះ ដែលមានទោសពន្ធនាគា និងត្រូវបានចែងពីអំពើ “ហិង្សាលើអ្នកកាន់កាប់ទ្រព្យអចលនវត្ថុ”។ ទោះបីជាមានការខ្វះខាតភស្តុតាងនៃអំពើហិង្សាក៏ដោយ ក៏អ្នកទាំងបីទទួលទោសពន្ធនាគារកម្រិតអតិបរមា និងត្រូវបានបញ្ជូនទៅកាន់ពន្ធនាគារខេត្តរតនគិរីភ្លាមៗបន្ទាប់ពីត្រូវបានផ្តន្ទាទោសរួច។ បន្ទាប់ពីសាលក្រមត្រូវបានប្រកាស អ្នកគាំទ្រត្រូវបានរុញចេញពីក្លោងទ្វារតុលាការដោយកងរាជអាវុធហត្ថប្រដាប់ដោយអាវុធ។
- ចំណងជើង & មូលបទ
- តុលាការ និងនីតិរដ្ឋ សិទ្ធិដីធ្លី
