អ្នកដឹកនាំសហជីពបួននាក់ និងបុរសពីរនាក់ដែលបានរងរបួសដោយការវាយដំអំឡុងពេលបាតុកម្មករណីក្រុមហ៊ុនកាពីតូល ត្រូវបានចោទប្រកាន់
ចេញផ្សាយ ថ្ងៃទី៨ ខែកុម្ភៈ ឆ្នាំ២០១៦លោក ណន វណ្ណា អតីតអ្នកបើកបររថយន្តក្រុងទេសចរណ៍កាពីតូល និងលោក រស់ ស៊ីផៃ បុគ្គលិកនៃសមាគមសេដ្ឋកិច្ចក្រៅប្រព័ន្ធកម្ពុជា ត្រូវបានបញ្ជូនទៅកាន់ពន្ធនាគារ ម១ ព្រៃស នៅរសៀលនេះ បន្ទាប់ពីអ្នកទាំងនោះត្រូវបានចោទប្រកាន់ពីបទបង្កហិង្សាដោយចេតនាមានស្ថានទម្ងន់ទោស បទរារាំងដល់មន្ត្រីរាជការសាធារណៈ និងបទបង្កឧបសគ្គរារាំងដល់ចរាចរណ៍សាធារណៈ។ ប្រធានសហជីពរួមមាន លោក អាត់ ធន លោក គង់ អាទិត្យ លោក សុខ ឈុនអឿង និងលោក អ៊ាន គឹមហុង ត្រូវបានចោទប្រកាន់ពីបទដូចគ្នានេះដែរ ប៉ុន្តែមិនទាន់ត្រូវបានឃុំខ្លួន។
លោក ណន វណ្ណា និងលោក រស់ ស៊ីផៃ ត្រូវបានចាប់ខ្លួនកាលពីថ្ងៃសៅរ៍ នៅពេលដែលមានការវាយដំយ៉ាងហិង្សាទៅលើអតីតអ្នកបើកបររថយន្តក្រុងទេសចរណ៍កាពីតូល ខណៈដែលអ្នកទាំងនោះបានតវ៉ាដោយមានការគាំទ្រពីសហជីពសមាគមសេដ្ឋកិច្ចក្រៅប្រព័ន្ធកម្ពុជា។ បុរសទាំងពីរនាក់នេះបានរងរបួសអំឡុងពេលការចាប់ខ្លួនពីសំណាក់នគរបាលបង្រ្កាបបាតុកម្ម ដែលភាគច្រើនជាអ្នកឈរត្រៀមនៅខណៈពេលដែលសមាជិករបស់សមាគមរួបរួមគ្នាដើម្បីអភិវឌ្ឍន៍កម្ពុជាបានចាប់ផ្តើមវាយដំយ៉ាងហិង្សាទៅលើអ្នកបើកបររថយន្តក្រុង និងអ្នកគំាទ្ររបស់អ្នកទាំងនោះដោយប្រើប្រាស់ញញួរ និងដំបង។ មិនមានសមាជិករបស់សមាគមរួបរួមគ្នាដើម្បីអភិវឌ្ឍន៍កម្ពុជាដែលបានប្រព្រឹត្តអំពើហិង្សានោះត្រូវបានចាប់ខ្លួនឡើយ។ ម្យ៉ាងវិញទៀត ប្រធានសហជីពទាំងបួនដែលបានចោទប្រកាន់ខាងលើនេះ មិនមានវត្តមានអំឡុងពេលកើតហិង្សានោះឡើយ។
អ្នកគាំទ្រប្រមាណជា ៧០នាក់ បានជួបជុំគ្នានៅខាងក្រៅសាលាដំបូងរាជធានីភ្នំពេញតាំងពីពេលព្រឹក ដើម្បីអំពាវនាវស្នើសុំដោះលែងអ្នកទាំងពីរ។ នារសៀលនេះ អ្នកទាំងប្រាំមួយនាក់ រួមទាំង “បុគ្គលផ្សេងទៀតដែលមិនបានបញ្ជាក់អត្តសញ្ញាណ” ប្រឈមនឹងការដាក់ពន្ធនាគារចន្លោះពី ២ឆ្នាំ ទៅ ៦ឆ្នាំ បន្ទាប់ពីត្រូវបានចោទប្រកាន់តាមមាត្រា ២១៨ និងមាត្រា ៥០៣ នៃក្រមព្រហ្មទណ្ឌ និងមាត្រា ៨០ នៃច្បាប់ចរាចរណ៍។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម សិទ្ធិការងារ