យុទ្ធនាការថ្ងៃច័ន្ទពណ៌ខ្មៅនៅតែបន្ត ទោះជាអ្នកតំណាងសហគមន៍មួយចំនួនត្រូវបានឃាត់ខ្លួន
ចេញផ្សាយ ថ្ងៃទី១៦ ខែឧសភា ឆ្នាំ២០១៦
នាព្រឹកនេះ តំណាងសហគមន៍ដីធ្លីចំនួនប្រាំនាក់ ត្រូវបានឃាត់ខ្លួន នៅពេលដែលប្រជាពលរដ្ឋជាច្រើននៅក្នុងប្រទេស និងក្រៅប្រទេសកម្ពុជា កំពុងបន្តយុទ្ធនាការលើកទីពីរនៃព្រឹត្តិការណ៍ “យុទ្ធនាការថ្ងៃច័ន្ទពណ៌ខ្មៅ” ដើម្បីអំពាវនាវសុំឲ្យមានការដោះលែងអ្នកការពារសិទិ្ធមនុស្សទាំងប្រាំនាក់ ដែលបានជាប់ឃុំអស់រយៈពេលពីរសប្តាហ៍មកហើយ។
ប្រជាពលរដ្ឋរាប់រយនាក់នៅក្នុងប្រទេសកម្ពុជា និងនៅបរទេស កំពុងចូលរួមក្នុងយុទ្ធនាការលើកទីពីរនៃ “យុទ្ធនាការថ្ងៃច័ន្ទពណ៌ខ្មៅ” នៅក្នុងបណ្តាញសង្គមរបស់អ្នកទាំងនោះ ដោយធ្វើការចែករំលែករូបភាពរបស់អ្នកទាំងនោះដោយមានស្លៀកពាក់ពណ៌ខ្មៅ និងរូបអ្នកការពារសិទិ្ធមនុស្សទាំងប្រាំនាក់ដែលកំពុងជាប់ឃុំ។ សហគមន៍បឹងកក់ ក៏បានប្រារព្ធយុទ្ធនាការនេះផងដែរនៅក្នុងសហគមន៍របស់អ្នកទាំងនោះនាព្រឹកនេះ ដើម្បីអំពាវនាវសុំឲ្យមានការដោះលែងអ្នកទាំងប្រាំនាក់។ យុទ្ធនាការតាមបណ្តាញសង្គមនេះ ត្រូវបានធ្វើឡើង ជាច្រើនថ្ងៃក្រោយពេលមានការលើកឡើងរបស់សម្តេចនាយករដ្ឋមន្ត្រី ដោយហាមឃាត់នូវការតវ៉ានានាដែលពាក់ព័ន្ធនឹងពណ៌ខ្មៅ ក្រោយពេលមានព្រឹត្តិការណ៍ “ថ្ងៃច័ន្ទពណ៌ខ្មៅ” កាលពីសប្តាហ៍មុន ដែលនៅពេលនោះអ្នកចូលរួមបានស្លៀកសំលៀកបំពាក់ពណ៌ខ្មៅ ដើម្បីអំពាវនាវសុំឲ្យមានការដោះលែងអ្នកការពារសិទិ្ធមនុស្សទាំងប្រាំនាក់។ អំឡុងពេលព្រឹត្តិការណ៍នាសប្តាហ៍មុន អ្នកការពារ និងសកម្មជនសិទិ្ធមនុស្សចំនួនប្រាំបីនាក់ផ្សេងទៀត ត្រូវបានឃាត់ខ្លួនដោយសារអ្នកទាំងនោះបានស្លៀកសំលៀកបំពាក់ពណ៌ខ្មៅ នៅពេលអ្នកទាំងនោះព្យាយាមចូលរួមក្នុងការតវ៉ាដែលបានគ្រោងទុក ដើម្បីអំពាវនាវសុំឲ្យមានការដោះលែងអ្នកការពារសិទិ្ធមនុស្សទាំងប្រាំនាក់។
ព្រឹត្តិការណ៍ “យុទ្ធនាការថ្ងៃច័ន្ទពណ៌ខ្មៅ” លើកទីពីរ ក៏នៅតែមានការឃាត់ខ្លួនបន្តទៀត។ នៅវេលាម៉ោងប្រហែល ៩ ព្រឹក ស្ត្រីចំនួន ៥នាក់ មកពីសហគមន៍ថ្មគោល បុរីកីឡា និងអតីតតំបន់បឹងកក់ (ដោយអ្នកទាំងអស់គ្នាស្លៀកសំលៀកបំពាក់ពណ៌ខ្មៅ) ត្រូវបានគេឃាត់ខ្លួននៅមុខសាលមហោស្រពចេនឡាក្នុងរាជធានីភ្នំពេញ។ ស្ត្រីទាំងប្រាំនាក់រួមមាន អ្នកស្រី ច្រាយ នីម អ៊ីម ស្រីទូច យីន ស្រ៊ីន ពួក សុភីន និងង៉ូវ ណារី ត្រូវបានឃាត់ខ្លួននៅអធិការនគរបាលខណ្ឌទូលគោក។
ព័ត៌មានចុងក្រោយ៖ ស្ត្រីទាំងប្រាំនាក់ ដែលត្រូវបានឃាត់ខ្លួននាព្រឹកនេះ ត្រូវបានដោះលែងចេញពីអធិការដ្ឋាននគរបាលខណ្ឌទួលគោកហើយនៅត្រឹមម៉ោង ១០យប់។
- ឯកសារទាក់ទង
- ចំណងជើង & មូលបទ
- យុទ្ធនាការថ្ងៃច័ន្ទពណ៌ខ្មៅ តុលាការ និង នីតិរដ្ឋ សិទិ្ធបញ្ចេញមតិ និងចូលរួម
