សកម្មជនអង្គការមាតាធម្មជាតិ ត្រូវបានផ្តន្ទាទោស ប៉ុន្តែត្រូវបានដោះលែងដោយទោសនៅសល់ព្យួរ
ចេញផ្សាយ ថ្ងៃទី១ ខែកក្កដា ឆ្នាំ២០១៦សកម្មជនបរិស្ថានចំនួនបីនាក់មកពីអង្គការមាតាធម្មជាតិ នឹងត្រូវបានតុលាការដោះលែងនៅរសៀលនេះ បន្ទាប់ពីអ្នកទាំងនោះត្រូវបានជំនុំជម្រះ និងផ្តន្ទាទោសអោយជាប់ពន្ធនាគាចំនួន១៨ខែ កាលពីព្រឹកនេះ។ ការជាប់ឃុំបណ្តោះអាសន្នរង់ចាំសវនាការអស់រយៈពេល ១០ខែ និង ១៥ថ្ងៃរបស់អ្នកទាំងនោះ ត្រូវបានចាត់ទុកជាទោសដែលបានអនុវត្តរួច ហើយទោសដែលនូវសល់ត្រូវបានព្យួរ។
លោក ទ្រី សុវិគា អាយុ ២៦ឆ្នាំ លោក សាន់ ម៉ាឡា អាយុ ២៤ឆ្នាំ និងលោក ស៊ីម សំណាង អាយុ ២៩ឆ្នាំ ត្រូវបានជំនុំជម្រះដោយសាលាដំបូងខេត្តកោះកុងរយៈពេលពីរថ្ងៃកាលពីដើមសប្តាហ៍នេះ។ ព្រឹកនេះ អ្នកទាំងបី ត្រូវបានផ្តន្ទាទោសដោយចៅក្រមលោក មិន មករា ពីបទផ្តើមគំនិតគម្រាមកំហែងថានឹងធ្វើឱ្យខូចខាតដែលភ្ជាប់មកនូវបញ្ជាអ្វីមួយ ដោយយោងទៅតាមមាត្រា ២៨និងមាត្រា ៤២៤ នៃក្រមព្រហ្មទណ្ឌ (បទចោទនេះ ត្រូវបានធ្វើឡើង បន្ទាប់ពីអ្នកទាំងបីត្រូវបានចាប់ខ្លួនកាលពីឆ្នាំមុន នៅពេលមានយុទ្ធនាការជាបន្តបន្ទាប់ដើម្បីបញ្ឈប់ការបូមខ្សាច់ខុសច្បាប់ នៅក្នុងខេត្តកោះកុង)។ នៅក្នុងសវនាការ មិនសូវមានភស្តុតាងដាក់បន្ទុកច្រើន ត្រូវបានបង្ហាញនោះទេ។
អ្នកទាំងបី ត្រូវបានឃុំខ្លួនបណ្តោះអាសន្នរង់ចាំសវនាការចាប់តាំងពីមានការចាប់ខ្លួនក្នុងខែសីហា ឆ្នាំ២០១៥ (ការឃុំខ្លួននេះមានរយៈពេលលើសការកំណត់ដោយច្បាប់ ចំនួន ១១ថ្ងៃ នៃរយៈពេលឃុំខ្លួនបណ្តោះអាសន្នដែលមានចែងក្នុងនីតិវិធីក្រមព្រហ្មទណ្ឌ)។ បន្ថែមលើការផ្តន្ទាទោសជាប់ពន្ធនាគារ អ្នកទាំងបីត្រូវបានតុលាការបង្គាប់ឲ្យបង់ពិន័យជាទឹកប្រាក់ចំនួន ២លានរៀល និងបង្គាប់ឲ្យសងសំណងការខូចខាតរួមគ្នាចំនួន ១០០លានរៀល។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម មាតាធម្មជាតិ