សកម្មជនមួយចំនួនរៀបចំយុទ្ធនាការថ្ងៃច័ន្ទពណ៌ខ្មៅនៅក្នុងរាធានីភ្នំពេញ
ចេញផ្សាយ ថ្ងៃទី៤ ខែកក្កដា ឆ្នាំ២០១៦នាព្រឹកនេះ យុទ្ធនាការថ្ងៃច័ន្ទពណ៌ខ្មៅត្រូវបានធ្វើឡើងនៅក្នុងរាជធានីភ្នំពេញដោយមានការជួបជុំគ្នាពីសំណាក់សកម្មជនដីធ្លី សិស្សនិសិ្សត និងការដើរទិញទំនិញរួមគ្នាជាសាធារណៈរបស់ពលរដ្ឋជាច្រើនក្រុមតាមបណ្តាផ្សារទំនើបធំៗជាច្រើនក្នុងរាជធានី។
ដើម្បីគាំទ្រដល់អ្នកការពារសិទ្ធិមនុស្សទាំងប្រាំនាក់ ដែលបានឃុំខ្លួនអស់រយៈពេល ៩សប្តាហ៍មកហើយ ថ្ងៃនេះក្រុមពលរដ្ឋដើរទិញទំនិញតាមផ្សារបានប្រារព្ធយុទ្ធនាការថ្ងៃច័ន្ទពណ៌ខ្មៅ តាមបណ្តាផ្សារទំនើបជាច្រើននៅក្នុងរាធានីភ្នំពេញ ដោយមានស្លៀកពាក់ពណ៌ខ្មៅក្នុងសាមគ្គីភាពជាមួយអ្នកការពារសិទ្ធិមនុស្សទាំងប្រាំនាក់។ នៅថ្ងៃជាមួយគ្នានេះដែរ នាពេលព្រឹកមានការជួបជុំគ្នាមួយក្នុងសហគមន៍បឹងកក់ដើម្បីគាំទ្រដល់យុទ្ធនាការថ្ងៃច័ន្ទពណ៌ខ្មៅ ប៉ុន្តែត្រូវបានបង្រ្កាបដោយកងកម្លាំងនគរបាល និងកងសន្តិសុខ ដែលបានដកហូតបដា និងសម្ភារៈពីអ្នកចូលរួមយ៉ាងហិង្សា។ ក្រុមសកម្មជនមកពីសហគមន៍បុរីកីឡាបានធ្វើការទាមទារនៅខាងក្រៅសាលារាជធានីភ្នំពេញ ដើម្បីអំពាវនាវស្នើសុំឲ្យដោះលែងអ្នកការពារសិទ្ធិមនុស្សទាំងប្រាំនាក់។ និសិ្សតសាកលវិទ្យាល័យភូមិន្ទភ្នំពេញបានចូលរួមប្រារព្ធយុទ្ធនាការនេះផងដែរ។
ការប្រារព្ធយុទ្ធនាការថ្ងៃច័ន្ទពណ៌ខ្មៅក្នុងរាជធានីភ្នំពេញនាព្រឹកនេះ ឈានដល់សប្តាហ៍ទីប្រាំបួនហើយដែលអ្នកការពារសិទ្ធិមនុស្សចំនួនបួននាក់របស់សមាគមអាដហុក ការពារសិទ្ធិមនុស្ស និងអភិវឌ្ឍន៍នៅកម្ពុជា និងមន្រ្តីម្នាក់របស់គណៈកម្មាធិការជាតិរៀបចំការបោះឆ្នោតត្រូវបានឃុំខ្លួនដោយមិនត្រឹមត្រូវពីបទសូកប៉ាន់។
- ឯកសារទាក់ទង
- ចំណងជើង & មូលបទ
- យុទ្ធនាការថ្ងៃច័ន្ទពណ៌ខ្មៅ តុលាការ និង នីតិរដ្ឋ