អ្នកស្រី ទេព វន្នី ត្រូវបានបញ្ជូនមកសាកសួរនៅតុលាការពាក់ព័ន្ធនឹងការតវ៉ាកាលពីបីឆ្នាំមុន
ចេញផ្សាយ ថ្ងៃទី១៩ ខែសីហា ឆ្នាំ២០១៦នារសៀលនេះ អ្នកស្រី ទេព វន្នី ដែលត្រូវបានចោទប្រកាន់ពីបទញុះញង់កាលពីពីរថ្ងៃកន្លងទៅនោះ ត្រូវបានបញ្ជូនខ្លួនមកសាលាដំបូងរាជធានីភ្នំពេញដើម្បីសាកសួរពាក់ព័ន្ធនឹងការតវ៉ាមួយនៅខាងក្រៅគេហដ្ឋានរបស់សម្ដេចនាយករដ្ឋមន្រី្ត ហ៊ុន សែន កាលពីឆ្នាំ២០១៣។
សារព័ត៌មានដែលមាននិន្នាការគាំទ្ររាជរដ្ឋាភិបាលឈ្មោះថា Fresh News បានហៅឈ្មោះអ្នកស្រី ទេព វន្នី ដោយមិនសមរម្យថាជា “សកម្មជនបដិវត្តន៍ពណ៌”។ សារព័ត៌មាននេះបានធ្វើការចុះផ្សាយថា ការសាកសួរអ្នកស្រី ទេព វន្នី នេះគឺពាក់ព័ន្ធទៅនឹងសំណុំរឿងអំពើហិង្សាដោយចេតនាដែលមានស្ថានទម្ងន់ទោស។ អ្នកស្រីត្រូវបានសាកសួរដោយចៅក្រម នូ វាសនា ដោយមិនមានវត្តមានមេធាវីរបស់អ្នកស្រីមកចូលរួមនោះទេ (ចៅក្រម នូ វាសនា ជាចៅក្រមម្នាក់ក្នុងចំណោមចៅក្រមមួយចំនួនទៀតដែលបានជំនុំជម្រះសំណុំរឿងកុបកម្មរបស់គណបក្សសង្រ្គោះជាតិ កាលពីឆ្នាំមុន)។
អ្នកស្រី ទេព វន្នី ត្រូវបានចាប់ខ្លួន កាលពីថ្ងៃច័ន្ទជាមួយសកម្មជនដីធ្លីម្នាក់ទៀតគឺអ្នកស្រី បូវ សោភា អំឡុងពេលអ្នកទាំងពីរចូលរួមការប្រមូលផ្ដុំដោយសន្ដិវិធីនៅក្នុងសហគមន៍ដើម្បីគាំទ្រយុទ្ធនាការថ្ងៃច័ន្ទពណ៌ខ្មៅ។ អ្នកទាំងពីរត្រូវបានចោទប្រកាន់ និងបានបញ្ជូនខ្លួនចូលសវនាការ កាលពីថ្ងៃពុធ ដែលបន្ទាប់មកសវនាការនោះត្រូវបានផ្អាក និងត្រូវបន្តជំនុំជម្រះនៅថ្ងៃច័ន្ទ ទី២២ ខែសីហា។ ស្រ្តីទាំងពីររូបត្រូវបានបញ្ជូនទៅឃុំខ្លួនបណ្ដោះអាសន្នរង់ចាំសវនាការនៅមណ្ឌលអប់រំកែប្រែទី២នៃពន្ធនាគារព្រៃស។
- ឯកសារទាក់ទង
- ចំណងជើង & មូលបទ
- យុទ្ធនាការថ្ងៃច័ន្ទពណ៌ខ្មៅ តុលាការ និង នីតិរដ្ឋ សិទិ្ធបញ្ចេញមតិ និងចូលរួម សិទ្ធិដីធ្លី