សកម្មជនដីធ្លី៤រូប ត្រូវបានផ្ដន្ទាទោសឲ្យជាប់ពន្ធនាគារពាក់ព័ន្ធនឹងការតវ៉ា កាលពីឆ្នាំ២០១១
ចេញផ្សាយ ថ្ងៃទី១៩ ខែកញ្ញា ឆ្នាំ២០១៦នាព្រឹកនេះ តំណាងសហគមន៍បឹងកក់ អ្នកស្រី ទេព វន្នី អ្នកស្រី បូ ឆវី អ្នកស្រី គង់ ចន្ថា និងអ្នកស្រី ហេង មុំ ត្រូវបានតុលាការរកឃើញថាមានពិរុទ្ធភាពក្រោមការចោទប្រកាន់ពីបទរារាំងមន្រ្តីរាជការសាធារណៈដែលមានស្ថានទម្ងន់ទោស និងបទប្រមាថមន្រ្តីរាជការសាធារណៈ ពាក់ព័ន្ធនឹងការតវ៉ា កាលពីឆ្នាំ២០១១។
លោកចៅក្រម លី សុខឡេង បានសម្រេចផ្ដន្ទាទោសស្រ្តីបឹងកក់ទាំង៤នាក់ឲ្យជាប់ពន្ធនាគារចំនួន៦ខែ បន្ទាប់ពីសវនាការរយៈពេលប្រហែល៣ម៉ោង នៅសាលាដំបូងរាជធានីភ្នំពេញ។ អ្នកស្រី ទេព វន្នី ត្រូវបានបញ្ជូនទៅឃុំខ្លួនបណ្ដោះអាសន្នបន្ត នៅក្នុងមណ្ឌលអប់រំកែប្រែទី២នៃពន្ធនាគារព្រៃសវិញ (ជាកន្លែងដែលអ្នកស្រី ត្រូវបានឃុំខ្លួនរង់ចាំសវនាការរយៈពេលជិត៥សប្ដាហ៍រួចមកហើយ) លើបទចោទដោយឡែកផ្សេងទៀត ពាក់ព័ន្ធនឹងការតវ៉ារបស់សហគមន៍បឹងកក់នៅខាងមុខគេហដ្ឋានសម្ដេចនាយករដ្ឋមន្រ្តី កាលពីឆ្នាំ២០១៣។ ចៅក្រមមិនបានដាក់បញ្ជាពិសេសណាមួយនៅក្នុងសាលក្រមនេះទេ។ ដូចនេះ អ្នកស្រី បូ ឆវី និងអ្នកស្រី គង់ ចន្ថា (ក៏ដូចជា អ្នកស្រី ហេង មុំ ដែលត្រូវបានផ្ដន្ទាទោសដោយកំបាំងមុខ) មិនត្រូវបានចាប់ខ្លួននោះទេ ដោយសារសាលក្រមផ្ដន្ទាទោសលើស្រ្តីបឹងកក់ទាំងនោះមិនទាន់ចូលជាស្ថាពរ រហូតដល់បណ្ដឹងជំទាស់ទាំងអស់ត្រូវបានធ្វើឡើង។ អំឡុងពេលសវនាការ គ្មានភស្ដុតាងគ្រប់គ្រាន់ត្រូវបានលើកឡើងដើម្បីបញ្ជាក់ពីពិរុទ្ធភាពរបស់ស្រ្តីទាំង៤នាក់នោះទេ។
ប្រជាពលរដ្ឋ និងអ្នកគាំទ្រប្រហែលជា៣០នាក់ មកពីសហគមន៍ដីធ្លីដទៃទៀត រួមទាំងអង្គការសង្គមស៊ីវិលមួយចំនួន បានប្រមូលផ្ដុំគ្នានៅខាងក្រៅតុលាការ អំឡុងពេលសវនាការ។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទ្ធិដីធ្លី