តំណាងរាស្រ្តគណបក្សជំទាស់ត្រូវបានសម្រេចផ្តន្ទាទោសពីបទញុះញង់
ចេញផ្សាយ ថ្ងៃទី១០ ខែតុលា ឆ្នាំ២០១៦
នារសៀលនេះ សាលាដំបូងរាជធានីភ្នំពេញសម្រេចផ្តន្ទាទោសតំណាងរាស្ត្រគណបក្សសង្រ្គោះជាតិ ឯកឧត្តម អ៊ុំ សំអាន ដាក់ពន្ធនាគាររយៈពេល២ឆ្នាំកន្លះ និងពិន័យជាប្រាក់ចំនួនបួនលានរៀល ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងបទញុះញង់ឲ្យមានការរើសអើង តាមមាត្រា៤៩៥ និងមាត្រា៤៩៦នៃក្រមព្រហ្មទណ្ឌនៃព្រះរាជាណាចក្រកម្ពុជា។
អំឡុងពេលសវនាការ ឯកឧត្តម អ៊ុំ សំអាន និងមេធាវីការពាររបស់លោកបានធ្វើកំណត់សម្គាល់សារជាថ្មីម្តងទៀតដោយលើកឡើងថា សវនាការនេះបានរំលោភបំពានយ៉ាងធ្ងន់ធ្ងរលើអភ័យឯកសិទ្ធិតំណាងរាស្រ្តដែលមានចែងក្នុងរដ្ឋធម្មនុញ្ញ និងសេរីភាពក្នុងការបញ្ចេញមតិ មុនពេលដែលអ្នកទាំងនោះចាកចេញពីបន្ទប់សវនាការ។ ចៅក្រមជំនុំជម្រះ លោក ហេង សុខណា នៅតែបន្តនីតិវិធីសវនាការរហូតដល់ចប់ ទោះបីជាអវត្តមានជនជាប់ចោទ និងមេធាវីការពារក៏ដោយ។
ករណីនេះពាក់ព័ន្ធនឹងការបញ្ចេញមតិតាមប្រព័ន្ធអ៊ីនធឺណេត និងការបង្ហោះព័ត៌មានតាមបណ្តាញសង្គម ហ្វេសប៊ុក ដោយ ឯកឧត្តម អ៊ុំ សំអាន កាលពីរយៈពេលជាងមួយឆ្នាំកន្លងទៅទាក់ទងនឹងបញ្ហាផ្នែកនយោបាយដែលបន្តកើតឡើងរវាងគណបក្សកាន់អំណាចនិងគណបក្សជំទាស់ លើបញ្ហាព្រំដែនជាមួយនឹងប្រទេសវៀតណាម។ អាជ្ញាធរបានបកស្រាយថា ការបង្ហោះព័ត៌មានតាមបណ្តាញសង្គម ហ្វេសប៊ុក កាលពីមួយឆ្នាំមុន គឺជា “បទល្មើសជាក់ស្តែង” ដែលជាមូលហេតុនាំឲ្យមានការដកអភ័យឯកសិទ្ធិតំណាងរាស្រ្តរបស់ឯកឧត្តម អ៊ុំ សំអាន។
- ឯកសារទាក់ទង
- ចំណងជើង & មូលបទ
- តុលាការ និង នីតិរដ្ឋ សិទិ្ធបញ្ចេញមតិ និងចូលរួម
