ប្រធានក្រុមប្រឹក្សាឃុំគណបក្សជំទាស់ត្រូវបានដោះលែងមកវិញហើយ
ចេញផ្សាយ ថ្ងៃទី៨ ខែធ្នូ ឆ្នាំ២០១៦
នាព្រឹកនេះ ប្រធានក្រុមប្រឹក្សាឃុំមកពីគណបក្សជំទាស់លោក ស៊ាង ចែត ត្រូវបានដោះលែងពីពន្ធនាគារហើយ បន្ទាប់ពីបានទទួលការលើកលែងទោសពីព្រះមហាក្សត្រព្រះបាទនរោត្តម សីហមុនី។ ការលើកលែងទោសនេះត្រូវបានធ្វើឡើងរយៈពេល ៤៨ម៉ោង បន្ទាប់ពីលោកត្រូវបានផ្តន្ទាទោសដោយសាលាដំបូងរាជធានីភ្នំពេញ ហើយនេះមានន័យថា លោកនឹងមិនត្រូវបានឲ្យអនុវត្តទោសជាប់ពន្ធនាគាររយៈពេល ៥ឆ្នាំ ពីបទ “សូកប៉ាន់សាក្សី” (សំណុំរឿងដែលត្រូវបានគេយល់ឃើញថាជារឿងនយោបាយ) ដែលបានស៊ើបអង្កេតដោយអង្គភាពប្រឆាំងអំពើពុករលួយ (ACU) នោះទេ។ លោកត្រូវបានឃុំខ្លួនក្នុងពន្ធនាគារអស់រយៈពេល ២២៨ថ្ងៃ រួចមកហើយ។
ការដោះលែងនេះធ្វើឡើងស្របពេលដែលស្ថានភាពនយោបាយហាក់បីដូចជាមានភាពធូរស្រាលរវាងថ្នាក់ដឹកនាំគណបក្សកាន់អំណាច និងគណបក្សជំទាស់ បន្ទាប់ពីមានការលើកលែងទោសស្រដៀងគ្នានេះដែរចំពោះអនុប្រធានគណបក្សជំទាស់ ឯកឧត្តម កឹម សុខា កាលពីថ្ងៃទី២ ខែធ្នូ។ ឯកឧត្តម កឹម សុខា បានចំណាយពេលជាង៦ខែ សម្រាប់ការឃុំខ្លួនឯងក្នុងទីស្នាក់ការកណ្តាលរបស់គណបក្សសង្រ្គោះជាតិ។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ កឹម សុខា
