សាលាឧទ្ធរណ៍បើកសវនាការលើសំណុំរឿងបរិហារកេរ្តិ៍របស់បុគ្គលិកអង្គការសមធម៌កម្ពុជា
ចេញផ្សាយ ថ្ងៃទី២២ ខែធ្នូ ឆ្នាំ២០១៧នាព្រឹកនេះ សាលាឧទ្ធរណ៍បានជំនុំជម្រះលើសំណុំរឿងថ្នាក់ដឹកនាំនៃអង្គការសមធម៌កម្ពុជាបីនាក់រួមមាន លោក ឈាង ភា លោក អៀង វុទ្ធី និងលោក ផែន គឹមសុង ដែលត្រូវបានសាលាដំបូងរាជធានីភ្នំពេញផ្ដន្ទាទោសពីបទបរិហារកេរ្តិ៍។ ករណីនេះត្រូវបានប្ដឹងដោយលោក ចាន់ វិចិត្រ (អតីតបុគ្គលិកអង្គការនេះ) ពាក់ព័ន្ធនឹងការព្រមានបុគ្គលិកជាលាយលក្ខណ៍អក្សរនៅក្នុងអង្គការ។
ទាំងលោកវិចិត្រ និងមេធាវីរបស់លោកមិនបានបង្ហាញវត្តមាននៅតុលាការទេ ដែលនាំឱ្យដំណើរការសួរជជីកដេញដោលមិនអាចធ្វើទៅបាន។ តំណាងមហាអយ្យការនៅសាលាឧទ្ធរណ៍ ក៏បានលើកឡើងពីសម្ដីរបស់ព្រះរាជអាជ្ញាអមសាលាដំបូងរាជធានីភ្នំពេញដែលបានថ្លែងពីភាពមិនប្រក្រតីនៅក្នុងសវនាការកាលពីឆ្នាំ២០១៦ថា មិនមានភ័ស្ដុតាងដាក់បន្ទុកដើម្បីបញ្ជាក់ពីកំហុសដោយចេតនារបស់ថ្នាក់ដឹកនាំនៃអង្គការសមធម៌ទេ។
លោក វិចិត្រ បានអះអាងថា លោក ត្រូវបានបញ្ឈប់ពីការងារដោយអយុត្តិធម៌ពីសំណាក់អង្គការក្រៅរដ្ឋាភិបាលដែលធ្វើការលើសិទ្ធិដីធ្លីមួយនេះកាលពីឆ្នាំ២០១៥ ហើយព័ត៌មានឯកជនពាក់ព័ន្ធនឹងការបញ្ឈប់ពីការងារនេះត្រូវបានទម្លាយដោយថ្នាក់ដឹកនាំទាំងនោះ។
ការព្រមាននេះធ្វើឡើងជាលក្ខណៈឯកជនបន្ទាប់ពីការវាយតម្លៃបុគ្គលិក។ មាត្រា៣០៥នៃក្រមព្រហ្មទណ្ឌនៃព្រះរាជាណាចក្រកម្ពុជាបានកំណត់និយមន័យនៃបទបរិហារកេរ្តិ៍ថា “ការអះអាងបំផ្លើស ឬការទំលាក់កំហុសដោយអសុទ្ធចិត្តលើអំពើណាមួយ ដែលនាំឱ្យប៉ះពាល់ដល់កិត្តិយស ឬកិត្តិស័ព្ទនៃបុគ្គល”។ ទោះបីជាយ៉ាងនេះក្ដី អ្នកទាំងបីត្រូវបានសាលាដំបូងរាជធានីភ្នំពេញសម្រេចផ្ដន្ទាទោសនៅថ្ងៃទី២២ ខែសីហា ឆ្នាំ២០១៦ ដោយបង្គាប់ឱ្យបង់ប្រាក់ពិន័យនិងសងថ្លៃខូចខាតជាច្រើន។
សាលាឧទ្ធរណ៍នឹងប្រកាសសាលដីកានៃករណីនេះ នៅថ្ងៃទី១២ ខែមករា ឆ្នាំ២០១៨ ខាងមុខនេះ។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ