តុលាការកំពូលសម្រេចតម្កល់សាលដីកាសាលាឧទ្ធរណ៍ក្នុងការផ្ដន្ទាទោសអ្នកស្រី ទេព វន្នី
ចេញផ្សាយ ថ្ងៃទី៧ ខែកុម្ភៈ ឆ្នាំ២០១៨នាព្រឹកនេះ តុលាការកំពូលបានសម្រេចតម្កល់សាលដីការបស់សាលាឧទ្ធរណ៍ ដែលបានផ្ដន្ទាទោសលើសកម្មជនដីធ្លី អ្នកស្រី ទេព វន្នី ទុកជាបានការ ខណៈដែលអ្នកគាំទ្រអ្នកស្រីជាច្រើននៅតែបន្តការតវ៉ាអស់រយៈពេលជិត១ឆ្នាំកន្លះមកហើយ ចាប់តាំងពីអ្នកស្រីត្រូវបានចាប់ខ្លួន។
អំឡុងពេលសវនាការ ភាគីដើមបណ្ដឹងនិងសាក្សីដាក់បន្ទុកមិនបានបង្ហាញវត្តមាននៅក្នុងសវនាការនោះទេ ដែលនាំឲ្យភាគីជាប់ចោទគ្មានឱកាសជជីកសួរដេញដោលបាន។ ករណីនេះគឺដូចគ្នាទៅនឹងសវនាការនៅសាលាដំបូងរាជធានីភ្នំពេញនិងសវនាការនៅសាលាឧទ្ធរណ៍ផងដែរ។ មិនតែប៉ុណ្ណោះ សាក្សីដោះបន្ទុកមិនត្រូវបានអនុញ្ញាតឱ្យធ្វើជាកសិណសាក្សីនោះទេ ទោះបីជាពួកគាត់បានបង្ហាញវត្តមាននៅក្នុងសវនាការក៏ដោយ។
អំឡុងពេលតវ៉ាកាលពីថ្ងៃទី១៣ ខែមីនា ឆ្នាំ២០១៣ ក្នុងរាជធានីភ្នំពេញ ដើម្បីទាមទារឲ្យមានការដោះលែង សកម្មជនបឹងកក់មួយរូបផ្សេងទៀត នគរបាលនិងកងសន្ដិសុខជាច្រើននាក់ បានប្រើអំពើហិង្សាលើអ្នកស្រី ទេព វន្នី និងសមាជិកសហគមន៍បឹងកក់មួយចំនួនទៀត បណ្ដាលឲ្យរងរបួស។ ប៉ុន្តែអ្នកស្រី បែរជាត្រូវបានសាលាដំបូងរាជធានីភ្នំពេញផ្ដន្ទាទោសនៅថ្ងៃទី២៣ ខែកុម្ភៈ ឆ្នាំ២០១៧ ពី “បទប្រើអំពើហិង្សាដោយចេតនា មានស្ថានទម្ងន់ទោស” ទៅវិញ ទោះបីជាមិនមានភស្ដុតាងគួរឲ្យជឿទុកចិត្តណាមួយ ត្រូវបានបង្ហាញឡើងនៅក្នុងសវនាការក៏ដោយ។
អ្នកស្រី ទេព វន្នី ត្រូវបានសាលាដំបូងរាជធានីភ្នំពេញនិងសាលាឧទ្ធរណ៍ ផ្ដន្ទាទោសឲ្យជាប់ពន្ធនាគាររយៈពេល២ឆ្នាំកន្លះ និងពិន័យជាប្រាក់ ព្រមទាំងសំណងទៅដើមបណ្ដឹង សរុបទាំងអស់ចំនួន ១៤លានរៀល (ប្រហែល ៣,៥០០ ដុល្លារអាមេរិក)។ គិតចាប់តាំងពីថ្ងៃចាប់ខ្លួន នៅថ្ងៃទី១៥ ខែសីហា ឆ្នាំ២០១៦ អ្នកស្រី ទេព វន្នី ត្រូវបានឃុំខ្លួនក្នុងពន្ធនាគារអស់រយៈពេល៥៤១ថ្ងៃមកហើយ។
សាលដីកាថ្ងៃនេះគឺជាករណីមួយក្នុងចំណោមករណីបីផ្សេងទៀត ដែលអសកម្មអស់រយៈពេលច្រើនឆ្នាំមកហើយ ប៉ុន្តែត្រូវបានសើរើឡើងវិញប្រឆាំងនឹង អ្នកស្រី ទេព វន្នី កាលពីខែសីហា ឆ្នាំ២០១៦ អំឡុងពេលអ្នកស្រីកំពុងស្ថិតក្រោមការឃុំខ្លួនបណ្ដោះអាសន្នរង់ចាំសវនាការលើបទចោទផ្សេងទៀត ពាក់ព័ន្ធនឹងយុទ្ធនាការអហិង្សាថ្ងៃច័ន្ទពណ៌ខ្មៅ ដើម្បីទាមទារឱ្យដោះលែងអ្នកការពារសិទ្ធិមនុស្ស៥នាក់។
- ឯកសារទាក់ទង
- ចំណងជើង & មូលបទ
- សិទ្ធិដីធ្លី