១៧នាក់ រងរបួសក្រោយពីមានអំពើហិង្សាបំបែកអ្នកតវ៉ានៅក្បែរគេហដ្ឋានលោកនាយករដ្ឋមន្ត្រី
ចេញផ្សាយ ថ្ងៃទី២០ ខែតុលា ឆ្នាំ២០១៤
បន្ទាប់ពីមានអំពើហិង្សាបំបែកអ្នកតវ៉ានៅក្បែរគេហដ្ឋានសម្តេចនាយករដ្ឋមន្ត្រី ហ៊ុន សែន កាលពីព្រឹកមិញនេះ អង្គការ លីកាដូ បានព្យាបាលអ្នករងរបួសចំនួន ១៧នាក់។ យ៉ាងតិចណាស់មានមនុស្សចំនួន ៤នាក់ក្នុងចំណោមអ្នកទាំងនោះ (ម្នាក់ជាស្ត្រី និងបីនាក់ជាបុរស)រងរបួសធ្ងន់ល្មមពីការវាយដំពីសំណាក់កងសន្តិសុខ។ អ្នករងរបួសម្នាក់ ជាក្មេងមានអាយុ ១៨ ឆ្នាំ ដែលបានរងរបួសចំក្បាល។ ឥឡូវគាត់ត្រូវបានថែទាំ និងព្យាបាលនៅមន្ទីរពេទ្យ។
អ្នកតវ៉ាមកពីឃុំកន្ទួត ស្រុកជាំក្សាន្ត ខេត្តព្រះវិហារ ដែលរួមមានទាំងបុរស ស្ត្រី និងកុមារ បានធ្វើការតវ៉ានៅក្នុងរាជធានីភ្នំពេញ ដើម្បីស្នើសុំជំនួយក្នុងជម្លោះដីធ្លីដ៏រ៉ាំរ៉ៃដែលប៉ះពាល់ដល់ពលរដ្ឋជាង ២០០ គ្រួសារ។
អ្នកទាំងនោះមានបំណងដើរហែរក្បួនទៅកាន់ស្ថានទូតចិន រុស្ស៊ី និងអូស្ត្រាលី មុនពេលដាក់ញ្ញត្តិទៅគេហដ្ឋានលោកនាយករដ្ឋមន្ត្រី។ ប៉ុន្តែអ្នកតវ៉ាត្រូវបានរារាំង ដោយមិនឲ្យចូលទៅក្បែរផ្ទះលោកនាយករដ្ឋមន្ត្រីដែលនៅក្បែរវត្តបុទុមវតី្តនោះឡើយ ហើយថែមទាំងត្រូវបានគេវាយដំនៅទីនោះទៀតផង។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី
