ប៊ន សំណាង និង សុខ សំអឿន អ្នកគ្មានទោស ជាប់ពន្ធនាគារ ១,៧០០ថ្ងៃហើយ
ចេញផ្សាយ ថ្ងៃទី២៣ ខែកញ្ញា ឆ្នាំ២០០៨ថ្ងៃនេះ ជាថ្ងៃទី ១,៧០០ របស់លោក ប៊ន សំណាង និងលោក សុខ សំអឿន ដែលបានជាប់ពន្ធនាគារ ដោយសារតែបទឧក្រិដ្ឋមួយដែលពួកគាត់ទាំងពីរនាក់មិនបានប្រព្រឹត្ត ។
ទោះបីជាមានភស្តុតាងយ៉ាងច្រើនលើសលប់បង្ហាញពីការមិនបានប្រព្រឹត្តខុសរបស់ខ្លួនយ៉ាងណាក្តី បុរសទាំងពីរនាក់នៅតែបន្តទទួលទោសជាប់ពន្ធនាគាររយៈពេល ២០ឆ្នាំ លើករណីឃាតកម្មលោក ជា វិជ្ជា មេដឹកនាំសហជីពកម្មករ ។ បុរសទាំងពីរនាក់បាន និងកំពុងស្ថិតនៅក្នុងពន្ធនាគារ ប៉េហ៊្សី តាំងពីពេលចាប់ខ្លួននៅថ្ងៃទី២៨ ខែមករា ឆ្នាំ២០០៤ មក ។
អ្នកនាង ណាលី ពីឡូក នាយិកាអង្គការ លីកាដូ មានប្រសាសន៍ថា “រយៈពេលជាង ៤ឆ្នាំ និង ៧ខែ នៃការជាប់ពន្ធនាគារ ជារយៈពេលយូរណាស់សំរាប់លោក ប៊ន សំណាង និង សុខ សំអឿន រ៉ាប់រងនូវភាពអយុត្តិធម៌យ៉ាងសំបើមបែបនេះ ដែលពេលវេលានេះត្រូវតែបញ្ចប់និងត្រូវដោះលែងបុរសទាំងពីរនាក់” ។
“ពីមួយថ្ងៃទៅមួយថ្ងៃ កាន់តែយូរទៅៗសំរាប់បុរសទាំងពីរនាក់ដែលកំពុងជាប់ក្នុងពន្ធនាគារនោះ បាននឹង កំពុងទទួលនូវភាពកាន់តែឈឺចាប់ និងលំបាកខ្លាំងឡើងៗចំពោះបុរសទាំងពីរនាក់ និងក្រុមគ្រួសាររបស់គាត់ ។ ករណីនេះ នឹងធ្វើអោយកាន់តែមានការចាប់អារម្មណ៍ខ្លាំងឡើងៗ ទៅលើប្រព័ន្ធយុត្តិធម៌ដែលគួរឲ្យហួសចិត្តរបស់ប្រទេសកម្ពុជា” ។
ដំណោះស្រាយបែបនេះរបស់តុលាការ និងនគរបាលកម្ពុជា បានធ្វើឲ្យមានការរិះគន់យ៉ាងខ្លាំងទាំងខាងក្នុងនិងខាងក្រៅប្រទេស ។ សវនាការនៃករណីបុរសទាំងពីរនាក់ដែលធ្វើឡើងដោយតុលាការក្រុងភ្នំពេញ នៅខែសីហា ឆ្នាំ២០០៥ និងសាលាឧទ្ធរណ៍ នៅខែមេសា ឆ្នាំ២០០៧ ដែលកាត់សេចក្តីឲ្យបុរសទាំងពីរនាក់ជាប់ទោសនោះ បានរំលោភលើនីតិវិធីច្បាប់កម្ពុជា និងបទដ្ឋានសិទ្ធិមនុស្សអន្តរជាតិ ។
តុលាការទាំងពីរកំរិតមិនយកចិត្តទុកដាក់ចំពោះភស្តុតាងសំខាន់ៗ រួមទាំងលិខិតបញ្ជាក់របស់សាក្សីដែលថា លោក ប៊ន សំណាង បានស្ថិតនៅចំងាយ ៦០គីឡូម៉ែត្រ ពីកន្លែងកើតហេតុ នៅខណៈដែលឃាតកម្មកើតឡើងផងដែរ ។ សាលាឧទ្ធរណ៍មិនយកជាបានការនូវលិខិតរបស់ វ៉ា សុធី ជាសាក្សីសំខាន់ម្នាក់ក្នុងករណីឃាតកម្មនោះដែលសរសេរថា លោក ប៊ន សំណាង និង សុខ សំអឿន មិនមែនជាឃាតករដែលគាត់បានឃើញនោះទេ ។ សាលាឧទ្ធរណ៍ក៏មិនបានយកចិត្តទុកដាក់ផងដែរ ចំពោះសេចក្តីសន្និដ្ឋានពីព្រះរាជអាជ្ញារបស់ខ្លួន ដែលបានទទួលស្គាល់ថាការស៊ើបអង្កេតរបស់នគរបាលក្នុងករណីឃាតកម្មនោះមិនទាន់បានធ្វើគ្រប់ជ្រុងជ្រោយនៅឡើយ និងបានផ្តល់អនុសាសន៍ឲ្យមានការស៊ើបអង្កេតបន្ថែមទៀត ។
កញ្ញា ណាលី ពីឡូក មានប្រសាសន៍ថា “ការបន្តអនុវត្តទង្វើអយុត្តិធម៌ទៅលើលោក ប៊ន សំណាង និង សុខ សំអឿន បង្ហាញនូវការកង្វះខាតការរីកចំរើនពិតប្រាកដក្នុងកំណែទំរង់ប្រព័ន្ធយុត្តិធម៌កម្ពុជា” “ប្រព័ន្ធយុត្តិធម៌មិនត្រឹមគ្រាន់តែបានវិនិច្ឆ័យទៅលើ ថាមានច្បាប់ថ្មីៗមួយចំនួនដែលបានអនុម័ត ឬដោយសិក្ខាសាលានិងសន្និសឹទមួយចំនួនដែលបានធ្វើឡើងនោះទេ ប៉ុន្តែគេក៏ត្រូវពិនិត្យ និង ពិចារណាផងដែរក្នុងការអនុវត្តន៍ជាក់ស្តែងលើ ច្បាប់ ឬ នីតិវិធីច្បាប់ទាំងនោះ ដែលតុលាការដោះស្រាយជាមួយអ្នកពាក់ព័ន្ធ ហើយទទួលរងនូវភាពអយុត្តិធម៌ពិតប្រាកដដូចជាលោក ប៊ន សំណាង និង សុខ សំអឿន” ។
បន្ទាប់ពីមានការជំនុំជំរះទោសនៅសាលាឧទ្ធរណ៍ នៅខែមេសា ឆ្នាំមុន បុរសទាំងពីរនាក់បានរង់ចាំតុលាការកំពូលធ្វើសវនាការអំពីករណីរបស់ខ្លួន អស់រយៈពេល ១៧ខែ មកហើយ ។ ទោះជាច្បាប់បានកំណត់ថា តុលាការកំពូលត្រូវសម្រចក្នុងរយៈពេល ៦ខែ គិតពីពេលទទួលសំណុំរឿង ក៏រហូតមកដល់សព្វថ្ងៃនេះ តុលាការកំពូលនៅពុំទាន់បានកំណត់កាលបរិច្ឆេទសវនាការនៅឡើយដែរ ។
កញា ណាលី ពីឡូក មានប្រសាសន៍ថា “យើងសង្ឃឹមថា តុលាការកំពូលនឹងធ្វើសវនាការឆាប់ៗតាមដែលអាចធ្វើទៅបាន និងសង្ឃឹមថា តាមរយៈការដោះលែងលោក ប៊ន សំណាង និង សុខ សំអឿន នឹងផ្តល់ឱកាសសំរាប់ធ្វើឲ្យប្រសើរឡើងវិញ នូវភាពយុត្តិធម៌ចំពោះករណីបុរសទាំងពីរនាក់ និងការជឿជាក់លើផ្តល់ប្រព័ន្ធតុលាការកម្ពុជា” ។
កញ្ញា ណាលី ពីឡូក មានប្រសាសន៍ថា “បើសិនតុលាការកំពូលមិនផ្តល់យុត្តិធម៌ដល់បុរសទាំងពីរនាក់នេះទេ យើងសង្ឃឹមយ៉ាងមុតមាំថា ព្រះមហាក្សត្រនៃព្រះរាជាណាចក្រកម្ពុជា ក្នុងព្រះរាជតួនាទីដូចមានចែងក្នុងរដ្ឋធម្មនុញ្ញ ដែលទ្រង់ជាអ្នកធានាឯករាជ្យនៃអំណាចតុលាការ នឹងប្រទានការលើកលែងទោស ឲ្យបុរសទាំងពីរនាក់” ។
អតីតព្រះមហាក្សត្រ នរោត្តម សីហនុ អង្គការមិនមែនរដ្ឋាភិបាលមួយចំនួន និងបុគ្គលមួយចំនួន និងគ្រួសាររបស់លោក ជា វិជ្ជា បានប្រកាសជាសាធារណៈថា លោក ប៊ន សំណាង និង សុខ សំអឿនជាមនុស្សគ្មានទោស ។
សំគាល់ៈ គ្រួសារ មិត្តភ័ក្រ អ្នកគាំទ្រ របស់លោក ប៊ន សំណាង និង សុខ សំអឿន នឹងជួបជុំគ្នាខាងក្រៅ ពន្ធនាគារ ប៉េហ៊្សី វេលាម៉ោង១០ព្រឹក បង្ហោះប៉េងប៉ោង ដើម្បីសំដែងសាមគ្គីភាពជាមួយបុរសទាំងពីរនាក់ ។ សូមស្វាគមន៍ការចូលរួមរបស់អ្នកសារព័ត៌មាន ។
សម្រាប់ព័ត៌មានបន្ថែម សូមទាក់ទង៖
▪ កញ្ញា ណាលី ពីឡូក នាយិកាអង្គការលីកាដូ ០១២ ៨០៣ ៦៥០
▪ លោក វណ្ណ សូផាត នាយករង ការទំនាក់ទំនង និងតស៊ូមតិ ០១២ ៩៤១ ២០៦
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
- ចំណងជើង & មូលបទ
- តុលាការ និង នីតិរដ្ឋ ឃាតកម្ម ជា វិជ្ជា