សាលាឧទ្ធរណ៍តំកល់សេចក្តីសំរេចដែលគ្មានមូលដ្ឋានប្រឆាំង បុគ្គលិកអង្គការលីកាដូ
ចេញផ្សាយ ថ្ងៃទី១៤ ខែកក្កដា ឆ្នាំ២០១១សម្ព័ន្ធខ្មែរជំរឿន និងការពារសិទ្ធិមនុស្ស(លីកាដូ) សូមប្រកាសមិនយល់ព្រមចំពោះសាលក្រមតុលាការសាលាឧទ្ធរណ៍របស់លោក លាង សុខជឿន ដោយតំកល់សេចក្តីសំរេចអោយជាប់ពន្ធនាគាររយៈពេល ២ឆ្នាំ និងកែប្រែបទចោទដោយប្រើប្រាស់បទប្បញ្ញត្តិច្បាប់ដែលមិនមានក្នុងកំឡុងពេលនៃការចោទប្រកាន់បទល្មើសដោយគ្មានភស្តុតាង។
នៅថ្ងៃទី៣០ ខែសីហា ឆ្នាំ២០១០ តុលាការខេត្តតាកែវ បានកាត់ទោសលោកសុខជឿន អោយជាប់ពន្ធនាគាររយៈពេល ២ឆ្នាំ ពីបទផ្សព្វផ្សាយព័ត៌មានមិនពិត។ ខាងអយ្យការ មិនបានបង្ហាញជូននូវចម្លើយសាក្សី ឬភស្តុតាងដែលគួរជឿទុកចិត្តបាននៅចំពោះមុខតុលាការឡើយ។ ចៅក្រមជំនុំជម្រះ ផ្អែកទាំងសុ្រងលើសេចក្តីថ្លែងជាលាយលក្ខណ៍អក្សររបស់ចម្លើយសាក្សី៤នាក់ ប្រកបដោយភាពមន្ទិលសង្ស័យ ដែលបានមកពីភាពគ្មានទោសកំហុសរបស់លោក សុខជឿន សោះឡើយ។
នៅថ្ងៃព្រហស្បត៏ ទី១៤ ខែកក្កដា ឆ្នាំ២០១១ ចៅក្រមសាលាឧទ្ធរណ៍ លោក ប៉ុល សំអឿន បានប្រកាសសាលដីកា ដោយតំកល់សេចក្តីសំរេចរបស់តុលាការសាលាដំបូង លើលោកសុខជឿន បន្ទាប់ពីសវនាការរយៈពេល ២ម៉ោង ប្រព្រឹត្តិទៅកាលពី ថ្ងៃទី៣០ ខែមិថុនា ឆ្នំា២០១១ ដែលសវនាការនោះ ខកខានមិនបានបង្ហាញភស្តុតាងណាមួយពី ទោសកំហុសរបស់លោក សុខជឿន នោះឡើយ។
នៅក្នុងការវិវឌ្ឍដែលមិននឹកស្មានដល់នាថ្ងៃនេះ លោកចៅក្រម ប៉ុល សំអឿន បានផ្លាស់ប្តូរសេចក្តីសំរេចពីដំបូងទៅលើលោកសុខជឿន ឲ្យជាប់ទោសពីបទផ្សាព្វផ្សាយព័ត៌មានមិនពិត តាមមាត្រា ៦២ នៃច្បាប់ព្រហ្មទណ្ឌអន្តរកាល ទៅ ជាបទញុះញង់ តាមមាត្រា៤៩៥ នៃក្រមព្រហ្មទណ្ឌថ្មីទៅវិញ។
ការសំរេចនេះផ្ទុយយ៉ាងច្បាស់ក្រលែតទៅនឹងគោលការណ៍ច្បាប់ព្រហ្មទណ្ឌ ដែលក្នុងន័យនេះតុលាការកាត់សេចក្តីលោកសុខជឿន ក្រោមបទប្បញ្ញត្តិច្បាប់ដែលមិនមាននៅក្នុងពេលចោទប្រកាន់ “បទល្មើសដោយគ្មានភស្តុតាង”។
លោកស្រីវេជ្ជបណ្ឌិត ពុង ឈីវកេក ប្រធានអង្គការ លីកាដូ បានមានប្រសាសន៍ថា “ការផ្លាស់ប្តូរសេចក្តីសំរេចលើបទចោទដ៍គួរភ្ញាក់ផ្អើលនេះ ដូចជាគ្មានឈរលើមូលដ្ឋានច្បាប់ទេ ពីព្រោះចំនុចនេះ មិនមានលើកឡើងក្នុងកំឡុងពេលសវនាការឧទ្ធរណ៍ នាថ្ងៃទី៣០ ខែមិថុនា”។
តាមមាត្រា៦៧១ នៃក្រមព្រហ្មទណ្ឌថ្មី ករណីរបស់លោកសុខជឿន គួរតែត្រូវបានពិនិត្យមើលឡើងវិញ លើមូលដ្ឋានច្បាប់ព្រហ្មទណ្ឌដែលមានអានុភាពអនុវត្តនាពេលដែលបទល្មើសត្រូវបានចោទប្រកាន់ នាថ្ងៃទី៤ ខែមករា ឆ្នាំ២០១០ ដែលនោះគឺ ច្បាប់ព្រហ្មទណ្ឌអន្តរកាល។ តុលាការបានរំលោភលើមាត្រានេះ (៦៧១) ដោយសារតុលាការបានផ្លាស់ប្តូរសាលក្រមពីដំបូង ទៅលើលោកសុខជឿន ទៅជាបទញុះញង់ ក្រោមក្រមព្រហ្មទណ្ឌថ្មី ដែលក្រមថ្មីនេះមានអានុភាព អនុវត្ត ពីខែធ្នូ ឆ្នាំ២០១០ គីជិតមួយឆ្នាំបន្ទាប់ពីមានការចោទប្រកាន់បទល្មើស។
ជាងនេះទៅទៀត វិធានការណ៍របស់តុលាការ រំលោភលើមាត្រា៥ នៃក្រមព្រហ្មទណ្ឌថ្មីដែលចែងថា ចៅក្រមមិនអាចពង្រីកវិសាលភាពអនុវត្ត ឬប្រព្រឹត្តិតាមសទិសភាពបានឡើយ។ ក្នុងករណីនេះចៅក្រម ប៉ុល សំអឿន បានព្យាយាម បង្ហាញហេតុផលនៃការផ្លាស់ប្តូរ បទចោទប្រកាន់លើលោកសុខជឿន ដោយពង្រីកដែលកំណត់របស់មាត្រា១០ នៃក្រមព្រហ្មទណ្ឌថ្មី ដែលកំណត់សេចក្តីថា បទប្បញ្ញិត្តិថ្មីដែលចែងអំពីទោសដែលស្រាលជាងត្រូវអនុវត្តភា្លម។ អំណះអំណាងនេះអាចមានតម្លៃ បើក្នុងករណីដែលតុលាការសាលាដំបូងបានចោទប្រកាន់លោក សុខ ជឿន ពីបទញុះញង់ក្រោមច្បាប់ព្រហ្មទណ្ឌអន្តរកាល ដែលតុលាការសាលាដំបូងមិនបានចោទប្រកាន់ពីបទនេះទេ។
អង្គការលីកាដូ ជឿជាក់ថា វិធានការណ៍ដ៍គួរព្រួយបារម្ភនេះ ដោយសាលាឧទ្ធរណ៍ទទួលស្គាល់ថា សេចក្តីសំរេចពីបទផ្សព្វផ្សាយព័ត៌មានមិនពិត ទៅលើលោកសុខជឿន គ្មានមូលហេតុច្បាស់លាស់តាំងពីដំបូងមក ហើយដែលតុលាការសាលាដំបូងមិនគួររកឃើញថាគាត់មានកំហុសឡើយ។
កញ្ញា ណាលី ពីឡូក នាយិកាអង្គការលីកាដូ មានប្រសាសន៍ថា “សុខជឿន នៅតែរក្សាថាខ្លួនគាត់គ្មានកំហុស ដូចដែលយើងជឿជាក់ផងដែរ”។ “ជាខ្លឹមសារ ចៅក្រមបានសំរេចដោយប្រសិទ្ធិភាពអោយលោកសុខ ជឿន រួចផុតពីការចោទប្រកាន់ដោយសេចក្តីសំរេចពីដំបូង លើរូបលោក ប៉ុន្តែ មិនផ្តល់អោយគាត់មានសេរីភាពឡើយ។”
សម្រាប់ព័ត៌មានបន្ថែម សូមទាក់ទង៖
▪ Dr. Pung Chhiv Kek, President of LICADHO, 012 802 506
▪ Naly Pilorge, Director of LICADHO, 012 803 650
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម