អង្គការសង្គមស៊ីវិល ស្តីពីការត្រៀមរៀបចំការបោះឆ្នោតជ្រើសតាំង អ្នកតំណាងរាស្ត្រឆ្នាំ២០១៣
ចេញផ្សាយ ថ្ងៃទី២ ខែឧសភា ឆ្នាំ២០១៣; ក្រុមសង្គមស៊ីវិល
យើងខ្ញុំជាអង្គការសង្គមស៊ីវិល ដែលមានរាយឈ្មោះដូចនៅខាងក្រោម សូមគាំទ្រការបោះឆ្នោតដែលប្រប្រព្រឹត្តទៅដោយសេរី និងយុត្តិធម៌ នីត្យានុកូលភាព និងការជឿទុកចិត្តដោយពេញលេញពីគណបក្សនយោបាយសំខាន់ៗដែលចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រឆ្នាំ២០១៣នេះ។
យើងខ្ញុំមានការព្រួយបារម្ភជាខ្លាំង អំពីទំនាស់នយោបាយទៅលើទីលានប្រកួតប្រជែងបោះឆ្នោត មិនស្មើគ្នា ពិសេស ការមិនផ្តល់ឱកាសឲ្យមេដឹកនាំគណបក្សប្រឆាំង ឯកឧត្តម សម រង្ស៊ី ចូលប្រកួតបោះឆ្នោតដោយសុវត្ថិភាព និងខ្វះតម្លាភាពទៅលើការត្រៀមរៀបចំនូវដំណើរការបោះឆ្នោតជាច្រើន ពិសេសការជ្រើសរើស និងតែងតាំងនៃសមាជិកនៃគណៈកម្មការរៀបចំការបោះឆ្នោតគ្រប់លំដាប់ថ្នាក់ និងការខ្វះគុណភាពនៃបញ្ជីឈ្មោះបោះឆ្នោតដែលប៉ះពាល់ដល់សិទ្ធិអ្នកបោះឆ្នោត។
យើងខ្ញុំសូមស្នើយ៉ាងទទូចទៅគណៈកម្មាធិការជាតិរៀបចំការបោះឆ្នោត (គ.ជ.ប) សូមដោះស្រាយ និងកែសម្រួលនូវអនុសាសន៍គន្លឺះពីរ យ៉ាងហោចដូចខាងក្រោម៖
១. បញ្ជីឈ្មោះបោះឆ្នោត និង សិទ្ធិអ្នកបោះឆ្នោត : គ.ជ.ប សូមបិទបញ្ជីឈ្មោះបោះឆ្នោតផ្លូវការនៅតាមភូមិ ចាប់ពីពេលនេះតទៅ ដើម្បីផ្តល់ឱកាសដល់អ្នកដែលបាត់ ឬខុសឈ្មោះក្នុងបញ្ជីបោះឆ្នោតផ្លូវការរបស់គ.ជ.ប ដើម្បីស្នើសុំការចេញលិខិតបញ្ជាក់អត្តសញ្ញាណសម្រាប់បម្រើឲ្យការបោះឆ្នោត ដើម្បីកែតម្រូវ និងកែអត្តសញ្ញាណ។ នីតិវិធីនៃការចេញលិខិតនេះ គឺឲ្យអ្នកបាត់ ឬខុសឈ្មោះក្នុងបញ្ជីផ្តល់ភស្តុតាងដូចជា បង្កាន់ដៃនៃការចុះឈ្មោះ។ ដើម្បីបង្កើនការទុកចិត្ត ការចេញលិខិតបញ្ជាក់អត្តសញ្ញាណសម្រាប់បម្រើឲ្យការបោះឆ្នោត មិនត្រូវឲ្យលើសពីថ្ងៃទី២៦ ខែមិថុនា ឆ្នាំ២០១៣។ ឯកសារពាក់ព័ន្ធទាំងនេះ ត្រូវបានគ្រប់គ្រងដោយ គណៈកម្មការឃុំ សង្កាត់រៀបចំការបោះឆ្នោត គឃ/សប ហើយត្រូវបិទផ្សាយជាសាធារណៈ។
ម្យ៉ាងទៀត ដើម្បីបន្ថយទំនាស់ គណៈកម្មាធិការជាតិរៀបចំការបោះឆ្នោត(គ.ជ.ប) សូមអនុញ្ញាតឲ្យភា្នក់ងារគណបក្សនយោបាយឈរពីក្រោយលេខាធិការនៃការិយាល័យបោះឆ្នោត ដែលអាចមើលឃើញច្បាស់ ហើយមានសិទ្ធិស្នើការផ្ទៀងផ្ទាត់ទិន្នន័យអ្នកបោះឆ្នោត នៅក្នុងបញ្ជីបោះឆ្នោតជាមួយនឹងឯកសារ ឬលិខិតបញ្ជាក់អត្តសញ្ញាណដែលយកមកបោះឆ្នោត។
២. ការជ្រើសរើស និងតែងតាំងនៃសមាជិកនៃគណៈកម្មការរៀបចំការបោះឆ្នោត: បង្កើតគណៈកម្មការជ្រើសរើស និងត្រួតពិនិត្យការតែងតាំងសមាជិក គណៈកម្មការឃុំ សង្កាត់រៀបចំការបោះឆ្នោត (គឃ/សប) និងគណៈកម្មការការិយាល័យបោះឆ្នោត និងរាប់សន្លឹកឆ្នោត (គកប/គករ) ដោយមានការចូលរួមពីគណបក្សនយោបាយដែលមានអាសនៈក្នុងរដ្ឋសភា ដែលបានចុះឈ្មោះប្រកួតប្រជែងបោះឆ្នោតឆ្នាំ២០១៣។ គណបក្សនយោបាយ ទាំង នេះ (មានអាសនៈក្នុងរដ្ឋសភា ដែលចុះឈ្មោះប្រកួតប្រជែងការបោះឆ្នោតជ្រើសតាំងតំណាងរាស្រ្តឆ្នាំ២០១៣នេះ គួរត្រូវបានលើកទឹកចិត្តឲ្យដាក់តំណាងរបស់ខ្លួន ដើម្បីឲ្យក្លាយជា សមាជិកគឃ/សប និងគបក/គករ។
យើងខ្ញុំជឿជាក់ថា គ.ជ.ប នឹងបើកការពិភាក្សាជាមួយគណបក្សនយោបាយ និងអង្គការសង្គមស៊ីវិលដើម្បីរៀបចំការសម្រេចមួយសមស្រប និងដាក់ផែនការសកម្មភាពជាក់លាក់ និងបន្ទាន់ ដើម្បីដោះស្រាយអនុសាសន៍ខាងលើនេះ។ ប្រសិនបើមិនបានយកអនុសាសន៍ទាំងពីរខាងលើនេះទៅដោះស្រាយឲ្យបានមុនថ្ងៃបោះឆ្នោតនោះទេ យើងមានការបារម្ភថា ដំណើរការបោះឆ្នោតនាពេលខាងមុខ អាចទទួលការបាត់បង់ជំនឿពីភាពត្រឹមត្រូវ និងយុត្តិធ៌មរបស់ខ្លួន និងអាចបាត់បង់នូវនីត្យានុកូលភាពទាំងមូលនៃការបោះឆ្នោតនេះពីសំណាក់មតិជាតិ និងអន្តរជាតិជាច្រើន។
សម្រាប់ព័ត៌មានបន្ថែម សូមទាក់ទង៖
▪ លោក ធន សារាយ ប្រធានគណកម្មាធិការនាយកខុមហ្វ្រែល និងជាប្រធានសមាគមអាដហុក ទូរស័ព្ទលេខ៖ ០១៦ ៤៤០ ០៤៤
▪ លោកស្រីវេជ្ជបណ្ឌិត ពុង ឈីវកេក ប្រធានគណកម្មាធិការនាយកនិកហ្វិច និងជាប្រធានអង្គការលីកាដូ ទូរស័ព្ទលេខ៖ ០១២ ៨០២ ៥០៦
▪ លោកបណ្ឌិត ហង្ស ពុទ្ធា នាយកប្រតិបត្តិអង្គការនិកហ្វិច ទូរស័ព្ទលេខ៖ ០១២ ៩៥៩ ៦៦៦
▪ លោក គល់ បញ្ញា នាយកប្រតិបត្តិអង្គការខុមហ្វ្រែល ទូរស័ព្ទលេខ៖ ០១២ ៩៤២ ០១៧
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- ការបោះឆ្នោត
