តុលាការកំពូលប្រទេសកម្ពុជា បានសម្រេចឲ្យឃាតករសប្បនិម្មិតទាំងពីររួចផុតពីបទចោទ
ចេញផ្សាយ ថ្ងៃទី២៥ ខែកញ្ញា ឆ្នាំ២០១៣; ក្រុមសង្គមស៊ីវិលយើងខ្ញុំជាអង្គការសង្គមស៊ីវិល មានរាយនាមដូចខាងក្រោម សូមអបអរសាទរសេចក្តីសម្រេចដ៏យឺតមួយ ដែលត្រូវបានចេញដោយតុលាការកំពូលនារសៀលថ្ងៃនេះ ក្នុងការដោះលែង ប៊ន សំណាង និងសុក សំអឿន និងឲ្យអ្នកទាំងពីររួចផុតពីការចោទប្រកាន់។
ប៊ន សំណាង និងសុក សំអឿន បានក្លាយជាឃាតករសប្បនិម្មិត នៅឆ្នាំ២០០៤ ពីបទឃាតកម្មលើមេដឹកនាំសហជីព លោក ជា វិជ្ជា។ ទោះជាមិនមានភស្តុតាងណាមួយដែលគួរឲ្យជឿក៏ដោយ ក៏អ្នកទាំងពីរនៅតែត្រូវបានផ្តន្ទាទោសដាក់ពន្ធនាគារចំនួន ២០ឆ្នាំ ពីបទឃាតកម្ម នៅក្នុងសវនាការសាលាដំបូងរាជធានីភ្នំពេញ កាលពីឆ្នាំ ២០០៥។ អ្នកទាំងពីរ ត្រូវបានដោះលែងឲ្យនៅក្រៅឃុំ និងដាក់ឲ្យស្ថិតក្រោមការត្រួតពិនិត្យរបស់តុលាការ នៅខែធ្នូ ឆ្នាំ២០០៨ ដោយតុលាការកំពូល ដែលបានបញ្ជាឲ្យមានបើកការស៊ើបអង្កេតឡើងវិញ ទៅលើការសំលាប់នេះ នៅខណៈពេលដែលមានភស្តុតាងជាច្រើនបង្ហាញពីភាពគ្មានទោសរបស់អ្នកទាំងពីរ។
អ្នកទាំងពីរ ត្រូវបានចាប់ខ្លួនម្តងទៀតកាលពីថ្ងៃទី២៧ ខែធ្នូ ឆ្នាំ២០១២ បន្ទាប់ពីសាលាឧទ្ធរណ៍ បានធ្វើសេចក្តីសម្រេចយ៉ាងតក់ស្លុតមួយ ដោយតម្កល់សាលដីការដំបូងរបស់ខ្លួន ហើយបញ្ជាឲ្យបញ្ជូនអ្នកទាំងពីរត្រឡប់ចូលពន្ធនាគារវិញ ដើម្បីជាប់ទោសដែលនៅសល់របស់អ្នកទាំងពីរ។ សវនាការសាលាឧទ្ធរណ៍នៅឆ្នាំ ២០១២ មិនបានផ្តល់ភស្តុតាងថ្មីណាមួយដាក់បន្ទុកទៅលើ ប៊ន សំណាង និងសុក សំអឿន នោះទេ ហើយបានបដិសេធជាប្រព័ន្ធ និងព្រងើយកន្តើយនូវសាក្ខីកម្ម និងភស្តុតាងនានា ដែលបង្ហាញពីភាពគ្មានទោសរបស់អ្នកទាំងពីរទៀតផង។
ជារួម អ្នកទាំងពីរបានជាប់ពន្ធនាគារអស់រយៈពេលជាង ៥ឆ្នាំ។
ចៅក្រម នាថ្ងៃនេះ បានលើកឡើងនូវភាពខ្វះខាតភស្តុតាងដែលគួរឲ្យជឿបាន ជាមូលហេតុនៃការអនុញ្ញាតឲ្យអ្នកទាំងពីររួចផុតពីការចោទប្រកាន់ និងដោះលែងអ្នកទាំងពីរវិញ។ នៅពេលដែលការសម្រេចនេះ ត្រូវបានគេអបអរសាទរយ៉ាងច្រើនលើសលុប ចៅក្រមបែរជាហាមឃាត់ជាឱឡារិកដល់អ្នកទាំងពីរ ក្នុងការមិនអនុញ្ញាតឲ្យទាមទារការជុសជុលផ្នែកហិរញ្ញវត្ថុទៅលើទោសពន្ធនាគារដែលខ្លួនបានជាប់អស់រយៈពេល ៥ឆ្នាំ និងបទល្មើសដែលខ្លួនត្រូវបានចោទប្រកាន់អស់រយៈពេល ៨ឆ្នាំ ដោយមិនត្រឹមត្រូវ និងមិនដែលបានប្រព្រឹត្ត។
អ្នកនាង ណាលី ពីឡូក នាយិកាអង្គការសិទិ្ធមនុស្ស លីកាដូ បានមានប្រសាសន៍ថា៖ “ប៊ន សំណាង និងសុក សំអឿន ត្រូវបានដកហូតសិទិ្ធសេរីភាព និងដាក់ឲ្យនៅដាច់ឆ្ងាយពីក្រុមគ្រួសាររបស់អ្នកទាំងពីរអស់ពេលជាច្រើនឆ្នាំ ហើយត្រូវបានចោទប្រកាន់ដោយមិនត្រឹមត្រូវចាប់តាំងពីឆ្នាំ ២០០៥។ អ្នកទាំងពីរ គួរតែត្រូវបានអនុញ្ញាតឲ្យទាមទារសំណងការខូចខាតសម្រាប់ភាពអយុត្តិធម៌នេះ”។
កាលពីថ្ងៃទី២២ ខែមករា ឆ្នាំ២០០៤ ឃាតកម្មលើលោក ជា វិជ្ជា ដែលជាមេដឹកនាំសហជីពល្បីឈ្មោះបំផុតម្នាក់របស់ប្រទេសកម្ពុជា នៅកណ្តាលថ្ងៃ ហើយនៅកណ្តាលរាជធានីភ្នំពេញ បានធ្វើឲ្យមានការមិនពេញចិត្តទូទាំងប្រទេស និងទាមទារឲ្យចាប់ខ្លួនឃាតករដែលបានសម្លាប់លោក ជា វិជ្ជា មកកាត់ទោស។ នៅក្នុងរយៈពេលមួយសប្តាហ៍ នគរបាលបានចាប់ខ្លួនប៊ន សំណាង និងសុក សំអឿន បន្ទាប់ពីមានការធ្វើការស៊ើបអង្កេតដែលមានភាពមិនត្រឹមត្រូវជាច្រើន។
លោក មឿន តុលា ប្រធានកម្មវិធីការងារនៃមជ្ឈមណ្ឌលអប់រំច្បាប់សម្រាប់សហគមន៍ បានមានប្រសាសន៍ថា៖ “យើងខ្ញុំមានសេចក្តីសប្បាយរីករាយយ៉ាងខ្លាំងនូវលទ្ធផលនាថ្ងៃនេះ ប៉ុន្តែនេះមិនមែនជាទីបញ្ចប់នោះទេ។ នេះគួរតែជាឱកាសក្នុងការក្រឡេកមើលឲ្យបានត្រឹមត្រូវនូវការស្លាប់ដ៏សោកសៅបំផុត ក្នុងចំណោមការស្លាប់ដ៏សោកសៅជាច្រើន នៅក្នុងប្រវត្តិសាស្ត្រថ្មីៗនេះរបស់ប្រទេសកម្ពុជា។ ការស៊ើបអង្កេតដ៏ត្រឹមត្រូវមួយ គួរតែត្រូវបានបើកឡើងវិញ មិនត្រឹមតែដើម្បីផ្តល់ភាពយុត្តិធម៌ដល់ក្រុមគ្រួសាររបស់លោក ជា វិជ្ជា ប៉ុណ្ណោះទេ ហើយថែមទាំងដើម្បីប្រយុទ្ធប្រឆាំងនឹងវប្បធម៌និទណ្ឌភាពនៅក្នុងប្រទេសកម្ពុជា”។
បណ្តាញកម្មករធ្វើការងារតាមផ្ទះកម្ពុជា (CDWN)
សហព័ន្ធសហជីព កម្មករចំណីអាហារ និងសេវាកម្ម (CFSWF)
សមាគមមន្ត្រីរាជការកម្ពុជា (CICA)
សម្ព័ន្ធខ្មែរជំរឿន និងការពារសិទិ្ធមនុស្ស លីកាដូ (LICADHO)
បណ្តាញយុវជនកម្ពុជា (CYN)
សម្ព័ន្ធសហគមន៍កសិករកម្ពុជា (CCFC)
មជ្ឈមណ្ឌលអប់រំច្បាប់សម្រាប់សហគមន៍ (CLEC)
បណ្តាញកសាងសន្តិភាពសហគមន៍ (CPN)
សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA)
សមាគមធាងត្នោត (STT)
សេចក្តីថ្លែងការណ៍នេះគាំទ្រដោយ៖
១. Cambodian Domestic Worker Network (CDWN)
២. Cambodian Food and Service Worker Federation (CFSWF)
៣. Cambodia's Independent Civil-Servants Association (CICA)
៤. Cambodian League for the Promotion and Defense of Human Rights (LICADHO)
៥. Cambodian Youth Network (CYN)
៦. Coalition of Cambodian Farmer Community (CCFC)
៧. Community Legal Education Centre (CLEC)
៨. Community Peace-Building Network (CPN)
៩. Independent Democracy of Informal Economy Association (IDEA)
សម្រាប់ព័ត៌មានបន្ថែម សូមទាក់ទង៖
▪ លោក មឿន តុលា ប្រធានកម្មវិធីការងារនៃមជ្ឈមណ្ឌលអប់រំច្បាប់សម្រាប់សហគមន៍, ទូរស័ព្ទលេខ៖ ០១២ ៩២១ ៩៦១
▪ លោក អំ សំអាត អ្នកគ្រប់គ្រងបច្ចេកទេសស៊ើបអង្កេតនៃអង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ, ទូរស័ព្ទលេខ៖ ០១២ ៣២៧ ៧៧០
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- តុលាការ និងនីតិរដ្ឋ ឃាតកម្ម ជា វិជ្ជា