អង្គការលីកាដូ អំពាវនាវស្នើសុំឱកាសឲ្យបានច្រើនសម្រាប់ស្តារសម្បទាដល់អ្នកទោសជាស្រី្ត
ចេញផ្សាយ ថ្ងៃទី៨ ខែមីនា ឆ្នាំ២០១៤ទិវាសិទ្ធិនារីអន្តរជាតិ អង្គការលីកាដូអំពាវនាវស្នើសុំឲ្យអាជា្ញធរពន្ធនាគារផ្តល់ឱកាសឲ្យបានទូលំទូលាយក្នុងការស្តារសម្បទាដល់អ្នកទោសជាស្រី្ត ជាពិសេសអ្នកទោសស្រី្តជាអនីតិជន ដើម្បីកសាងសមត្ថភាព និងផ្តល់ជំនាញសមរម្យដល់អ្នកទាំងនោះសម្រាប់ស្វែងរកការងារធ្វើបន្ទាប់ពីពួកគេត្រូវបានដោះលែង។
អង្គការលីកាដូ ក៏សូមអំពាវនាវស្នើសុំឲ្យអាជ្ញាធរធានាថា ឆ្មាំពន្ធនាគារជាស្រី្តក៏ទទួលបាននូវឱកាសក្នុងការបណ្តុះបណ្តាលគ្រប់គ្រាន់ដូចឆ្មាំពន្ធនាគារជាបុរសដែរ។
ចំនូនអ្នកទោសស្រី្តនាពេលបច្ចុប្បន្នកើនឡើង ៨% នៃចំនួនអ្នកទោសសរុបក្នុងប្រទេសកម្ពុជា ប៉ុន្តែវគ្គបណ្តុះបណ្តាលវិជ្ជាជីវៈ និងការអប់រំសម្រាប់អ្នកទោសស្រី្តនិងអនីតិជន នៅតែមានការខ្វះខាតក្នុងពន្ធនាគារមួយចំនួន។ ជាពិសេសអ្នកទោសស្រី្តជាអនីតិជន គួរតែទទួលបាននូវសិទ្ធិស្មើនឹងអ្នកទោសបុរសជាអនីតិជន ដើម្បីទទួលបាននូវវគ្គបណ្តុះបណ្តាលវិជ្ជាជីវៈសម្រាប់ពួកគេក្នុងការស្វែងរកការងារនៅពេលអនាគត។
កញ្ញា ង៉ែត សុគន្ធ អ្នកគ្រប់គ្រងគម្រោងពន្ធនាគារនៃអង្គការសិទិ្ធមនុស្ស លីកាដូ មានប្រសាសន៍ថា៖ “ជាក់ស្តែង ពន្ធនាគារណាដែលមានវគ្គបណ្តុះបណ្តាល ទីនោះភាគច្រើនគឺផ្តោតទៅលើអ្នកទោសបុរស ដូចជាវគ្គបណ្តុះបណ្តាលជាងឈើ ជាងផ្សារដែក ឬជាងម៉ាស៊ីន“។ “នៅក្នុងពន្ធនាគារខ្លះ មានកម្មវិធីមួយចំនួនតូចបានរៀបចំឡើងសម្រាប់អ្នកទោសស្រី្តនិងអនីតិជន ប៉ុន្តែអ្នកទាំងនោះមិនទទួលបានឱកាសក្នុងការអប់រំ និងការបណ្តុះបណ្តាលវិជ្ជាជីវៈនោះឡើយ”។
ជាទូទៅនៅក្នុងពិភពលោកក៏ដូចជានៅកម្ពុជា អ្នកទោសស្រី្តនៅក្នុងពន្ធនាគារគឺមកពីសហគមន៍ក្រីក្របំផុត និងមិនត្រូវបានគេយកចិត្តទុកដាក់ និងមានការខ្វះខាតក្នុងការអប់រំជាមូលដ្ឋាន ឬជាជំនាញវិជា្ជជីវៈ។ អ្នកទោសមួយចំនួនត្រូវបានគេចោទប្រកាន់ពីបទល្មើសព្រហ្មទណ្ឌដែលមិនមែនជាការប្រព្រឹត្តអំពើហឹង្សា ប៉ុន្តែមានចំនួនតិចណាស់ដែលត្រូវបានស្ថិតនៅក្រៅឃុំមុនសវនាការ ឬមធ្យោបាយផ្តន្ទាទោសផ្សេងទៀតដោយមិនចាំបាច់មានការឃុំខ្លួនក្រោយសវនាការ ទោះបីជាពួកគេមានកូនដែលត្រូវការពួកគេមើលថែររក្សាក៏ដោយ។
ណាលី ពីឡូក នាយិកាអង្គការសិទ្ធិមនុស្ស លីកាដូ បានមានប្រសាសន៍ថា៖ “ដោយសារតែការមិនមានឱកាសគ្រប់គ្រាន់ក្នុងការសិក្សានូវជំនាញថ្មីៗ ពួកយើងមានការព្រួយបារម្ភថាអ្នកទោសស្រ្តី និងក្មេងស្រីមួយចំនួននឹងធ្វើខុសម្តងទៀត ហើយត្រូវបានគេបញ្ជូនមកកាន់ពន្ធនាគារវិញ“។ “អាជ្ញាធរពន្ធនាគារគួរតែធ្វើការប្រឹក្សាយោបល់ជាមួយនឹងអ្នកទោសស្រី្តទាំងនោះ ដើម្បីធ្វើការវាយតម្លៃពីតម្រូវការអប់រំរបស់ពួកគេ និងរៀបចំនូវកម្មវិធីបណ្តុះបណ្តាលមួយចំនួនដែលទាក់ទងទៅនឹងទីផ្សារការងារក្នុងស្រុក”។
បញ្ហានេះវានឹងកាន់តែធ្ងន់ធ្ងរថែមទៀត ដោយសារតែកម្មវិធីបណ្តុះបណ្តាលក្នុងពន្ធនាគារភាគច្រើនបានរៀបចំឡើងសម្រាប់តែទណ្ឌិតដែលជិតឈានដល់ការរួចទោស ដោយមិនបានគិតពីចំនូនភាគរយដ៏ច្រើននៃអ្នកទោសស្រី្តនោះទេ។ អ្នកទោសដែលពុំសូវមានឱកាសក្នុងការបណ្តុះបណ្តាល ជាញឹកញាប់ពួកគេមានពេលតិចតួចណាស់សម្រាប់ចេញមកក្រៅដើម្បីស្រូបយកខ្យល់អាកាស និងពន្លឺព្រះអាទិត្យ។
នៅចុងឆ្នាំ ២០១៣ មានអ្នកទោសស្រី្តចំនួន ១.១៣៧នាក់ បានឃុំខ្លួនក្នុងប្រព័ន្ធពន្ធនាគារកម្ពុជា។ លើសពីនេះទៀត មានអ្នកទោសស្រី្តជាអនីតិជនដែលមានអាយុ ១៧ឆ្នាំ ឬក្រោមនេះ ចំនួន ១៥នាក់ សិ្ថតក្នុងពន្ធនាគារ។ ក្នុងខណៈដែលមានការបង្ហាញអំពីការថយចុះចំនួន ១០% ចាប់តាំងខែធ្នូ ឆ្នាំ២០១២ អ្នកទោសស្រី្ត និងអនីតិជនជាស្រី្តច្រើនជាង ៧០% ត្រូវបានជាប់ឃុំក្នុងពន្ធនាគារដោយពុំទាន់បានផ្តន្ទាទោស ឬកំពុងតែរង់ចាំសាលដីកាចុងក្រោយ ហើយមានចំនួន ៣០% ទៀតកំពុងតែរង់ចាំសវនាការលើកដំបូង ។
នៅទិវាសិទ្ធិនារីអន្តរជាតិ អង្គការសិទ្ធិមនុស្ស លីកាដូ នឹងផ្តល់កញ្ចប់សម្ភារៈចាំបាច់បន្ថែមមួយចំនួនជូនទៅអ្នកទោសស្រី្ត និងឆ្មាំពន្ធនាគារស្រី្ត នៅតាមពន្ធនាគារចំនួន ១៤កន្លែង ។ សម្ភារៈដែលផ្តល់ជូននោះរួមមាន៖ ផ្លែឈើ ភេសជ្ជៈសម្រាប់បំប៉នសរីរាង្គ ម្សៅសាប៊ូបោកខោអាវ សាប៊ូដុំ ច្រាសដុសធ្មេញ ថ្នាំដុសធ្មេញ និងកន្សែងអនាម័យ។
អង្គការសិទ្ធិមនុស្ស លីកាដូ ក៏នឹងរៀបចំនូវល្បែងកំសាន្តក្នុងពន្ធនាគារទាំង ១២កន្លែងក្នុងចំណោមនោះ និងផ្តល់នូវឧបករណ៍ក្មេងលេងសម្រាប់កុមារដែលរស់នៅជាមួយម្តាយក្នុងពន្ធនាគារ។
នៅក្នុងខែមករា ឆ្នាំ២០១៤ មានអ្នកទោសស្រី្តមានផ្ទៃពោះចំនួន ១១នាក់ និងកុមារចំនួន ៣៨នាក់ កំពុងរស់នៅក្នុងពន្ធនាគារជាមួយម្តាយរបស់ពួកគេ ត្រូវបានតាមដានមើលដោយអង្គការលីកាដូ។ ៨នាក់ក្នុងចំណោមកុមារទាំងនោះមានអាយុលើសពី ៣ ឆ្នាំ កំពុងរស់នៅក្នុងពន្ធនាគារដែលផ្ទុយពីច្បាប់ពន្ធនាគារ។ ច្បាប់នេះត្រូវបានអនុម័តកាលពីខែធ្នូ ឆ្នាំ ២០១១ ដោយបានកាត់បន្ថយអាយុរបស់កុមារដែលអាចស្នាក់នៅក្នុងពន្ធនាគារបាន ពីអាយុប្រាំមួយឆ្នាំមកត្រឹមអាយុបីឆ្នាំ។ ចំនួនកុមាររស់នៅជាមួយម្តាយក្នុងពន្ធនាគារនាពេលបច្ចុប្បន្ន មានការកាត់បន្ថយស្ទើរតែ ៥០% នៃចំនួនកុមារនៅក្នុងពន្ធនាគារចាប់តាំងពីច្បាប់នេះត្រូវបានគេប្រកាសឲ្យប្រើប្រាស់ជាលើកដំបូង។
សម្រាប់ព័ត៌មានបន្ថែម សូមទាក់ទង៖
▪ អ្នកនាង ណាលី ពីឡូក នាយិកាអង្គការសិទិ្ធមនុស្ស លីកាដូ ទូរស័ព្ទលេខ៖ ០១២ ៨០៣ ៦៥០ (ភាសាបារាំង និងអង់គ្លេស)
▪ កញ្ញា ង៉ែត សុគន្ធ អ្នកគ្រប់គ្រងគម្រោងពន្ធនាគារនៃអង្គការសិទិ្ធមនុស្ស លីកាដូ ទូរស័ព្ទលេខ៖ ០១៦ ៧៩៧ ៣០៥ (ភាសាខ្មែរ)
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ