ឆ្លើយតបទៅនឹងការចោទប្រកាន់របស់ក្រុមហ៊ុនភ្នំពេញស៊ូហ្គើរ លើលោក អៀង វុទ្ធី នាយកប្រតិបត្តិ អង្គការសមធម៌កម្ពុជា
ចេញផ្សាយ ថ្ងៃទី២១ ខែសីហា ឆ្នាំ២០១៤; ក្រុមសង្គមស៊ីវិលកាលពីថ្ងៃទី១៨ ខែសីហា ឆ្នាំ២០១៤ ក្រុមហ៊ុនភ្នំពេញស៊ូហ្គើរ បានចេញផ្សាយអត្ថបទក្នុងសារព័ត៌មានក្នុងស្រុកមួយចំនួន ដោយបានចោទប្រកាន់នាយកប្រតិបត្តិ អង្គការសមធម៌កម្ពុជា លោក អៀង វុទ្ធី ពីបទធ្វើសេចក្តីថ្លែងការណ៍ក្លែងក្លាយ និងបន្លំ ទាក់ទងទៅនឹងលោកឧកញ៉ា លី យ៉ុងផាត់ ដែលបណ្តាល អោយមាន "ការខូចខាតដែលមិនអាចស្រោចស្រង់វិញបាន" លើកេរ្តិ៍ឈ្មោះរបស់ លោកឧកញ៉ា ក៏ដូចជា អាជីវកម្មរបស់ក្រុមហ៊ុនស៊ូហ្គើរភ្នំពេញ។
ប៉ុន្តែក្នុងពេលធ្វើសន្និសិទការសែត លោកអៀង វុទ្ធី មិនបាននិយាយអ្វីដែលបង្ហាញថា សមាជិកព្រឹទ្ធសភារូបនេះមានជាប់ពាក់ព័ន្ធក្នុងប្រតិបត្តិការបស់ក្រុមហ៊ុនទាំងពីរនេះក្នុងពេលបច្ចុប្បន្ននោះទេ។ វីដេអូដែលថតបានក្នុងអំឡុងពេលធ្វើសន្និសិទកាសែតអាចបញ្ជាក់ពីការអំណះអំណាងនេះបាន ។
អ្វីដែលសំខាន់គឺ ក្នុងសន្និសិទកាសែតមួយកាលពីថ្ងៃទី១៣ ខែសីហា ឆ្នាំ២០១៤ លោក អៀង វុទ្ធី បានបង្ហាញពីការជាប់ពាក់ព័ន្ធរបស់ លោក លី យ៉ុងផាត់ លើដីសម្បទានសេដ្ឋកិច្ចសម្រាប់ដាំអំពៅដើម្បីផលិត ស្ករសក្នុងខេត្តកោះកុង និងខេត្តឧត្តរមានជ័យ។ នៅក្នុងអត្ថបទចុះផ្សាយក្នុងសារព័ត៌មាន ក្រុមហ៊ុន ភ្នំពេញស៊ូហ្គើរ បានអះអាងថា "ការចោទប្រកាន់" បែបនេះ គឺមានលក្ខណៈ "មិនមានការទទួលខុសត្រូវ និងគ្មានមូលដ្ឋានច្បាស់លាស់ទាល់តែសោះ។"
ទោះបីជាពេលថ្មីៗនេះសមាជិកព្រឹទ្ធសភារួបនេះ ប្រហែលជាមិនជាប់ពាក់ព័ន្ធក្នុងការគ្រប់គ្រង ឬ កាន់កាប់ក្រុមហ៊ុន កនកែនស៊ូហ្គើរ ក្នុងខេត្តកោះកុង ឬ ក្រុមហ៊ុន មិត្រ ប៉ូលស៊ូហ្គើរ ក្នុងខេត្តឧត្តរមានជ័យ ក៏ដោយ ក៏មានភស្តុតាងដែលមិនអាចប្រកែកបាន ថាលោកឧកញ៉ា លី យ៉ុងផាត់ មានជាប់ពាក់ព័ន្ធជាមួយ ក្រុមហ៊ុនទាំងពីរនេះ រួមជាមួយនិងការបណ្តេញប្រជាពលរដ្ឋរាប់ពាន់នាក់ចេញ ដោយបង្ខំ។
ការជាប់ពាក់ព័ន្ធរបស់លោកឧកញ៉ា លី យ៉ុងផាត់ ក្នុងការទទួលបានដីសម្បទានសម្រាប់ដាំដំណាំអំពៅ ផលិតស្ករសក្នុងខេត្តកោះកុង
លោកឧកញ៉ា លី យ៉ុងផាត់ ត្រូវបានដាក់បញ្ចូលក្នុងបញ្ជីជាអតីតប្រធាន និងជាភ្នាក់ងារចុះបញ្ជី អោយក្រុមហ៊ុនដាំដុះក្នុងខេត្តកោះកុង លើគេហទំព័រផ្លូវការណ៍របស់ ក្រសួងពាណិជ្ជកម្ម នៃព្រះរាជាណាចក្រកម្ពុជា។ អាសយដ្ឋាននៃការិយាល័យកណ្តាលរបស់ក្រុមហ៊ុននេះ (ដូចដែលបានបង្ហាញក្នុងសេចក្តីប្រកាស នៃការបង្កើតសហគ្រាសពាណិជកម្ម សម្រាប់ក្រុមហ៊ុនដាំដុះខេត្តកោះកុង) គឺស្ថិតនៅជាមួយក្រុមហ៊ុន វាយ អិល ភី គ្រុប ដែលមានទីតាំងផ្ទះលេខ ២០៥-២០៧ មហាវិថីម៉ៅសេទុង។
លោកឧកញ៉ា លី យ៉ុងផាត់ បានចុះហត្ថលេខាលើកិច្ចព្រមព្រៀងផ្តល់ដីសម្បទានសម្រាប់ក្រុមហ៊ុន ដាំដុះខេត្តកោះកុង កាលពីថ្ងៃទី២ ខែសីហា ឆ្នាំ២០០៦ ហើយពេលនោះគាត់មានឈ្មោះជានាយកក្រុមហ៊ុនផងដែរ។
នៅថ្ងៃដែលក្រុមហ៊ុនដាំដុះខេត្តកោះកុងទទួលបានដីសម្បទាននោះ មានដីមួយកន្លែងទៀត ដែលមានទីតាំងក្បែរគ្នានោះត្រូវបានសម្បទានទៅអោយក្រុមហ៊ុន កោះកុង ស៊ូហ្គើរផងដែរ។ ដីសម្បទានទាំង ពីរនេះរួមបញ្ចូលគ្នាបង្កើតបានជាតំបន់ឧស្សាហកម្មដាំអំពៅ ដែលមានទំហំសរុប ២០,០០០ ហិចតា។ ក្រុមហ៊ុនទាំងពីរនេះត្រូវបានបង្កើតឡើងដោយការរួមបញ្ចូលរវាងក្រុមហ៊ុន ខេអេសអិល គ្រុប របស់ ប្រទេសថៃ ក្រុមហ៊ុន វ៉េ ហ្វុង សាជីវកម្មរបស់តៃវ៉ាន់ និងក្រុមហ៊ុន លី យ៉ុងផាត់ ។ បច្ចុប្បន្ន ក្រុមហ៊ុន ខេអេសអិល គ្រុប បានកាន់កាប់ភាគហ៊ុនចំនួន៧០% នៃក្រុមហ៊ុនទាំងពីរ ចំណែកក្រុមហ៊ុន វ៉េ ហ្វុង សហប្រតិបត្តការ កាន់កាប់ភាគហ៊ុនចំនួន ៣០% ។ យោងតាមគេហទំព័ររបស់ក្រសួងពាណិជ្ជកម្ម បានឲ្យដឹងថា ក្រុមហ៊ុនលី យ៉ុងផាត់ បានលក់ភាគហ៊ុន២០% របស់ខ្លួន ទៅអោយក្រុមហ៊ុន ខេអេសអិលគ្រុប ក្នុងឆ្នាំ២០១០។
សេចក្តីអំពាវនាវអោយមានចំណាត់ការបន្ទាន់របស់គណៈកម្មការសិទ្ធិមនុស្សអាស៊ី បានបង្ហាញយ៉ាងលំអិតអំពីការបណ្តេញប្រជាពលរដ្ឋចំនួន ២៥០ គ្រួសារចេញពីឃុំជីខរលើ ដើម្បីអោយក្រុមហ៊ុនធ្វើការដាំដុះ កាលពីថ្ងៃទី១៨ ខែកញ្ញា ឆ្នាំ២០០៦៖
នគរបាលបានបំផ្លាញដំណាំ និងលំនៅដ្ឋានរបស់ប្រជាពលរដ្ឋ ដោយប្រើប្រាស់គ្រឿងចក្រធំៗ ហើយបានវាយប្រហារយ៉ាងសាហាវយង់ឃ្នងលើក្រុមប្រជាពលរដ្ឋ ដែលប្រឆាំងតវ៉ានឹងការការបណ្តេញ ចេញនេះ។ មានសេចក្តីរាយការណ៍ថា ប្រជាពលរដ្ឋចំនួន៥ នាក់បានទទួលរងរបួសយ៉ាងធ្ងន់ធ្ងរ បន្ទាប់ពីការវាយដំពីនគរបាល ហើយពីរនាក់ផ្សេងទៀតទទួលរងរបួសពីការបាញ់កាំភ្លើងរបស់មន្រ្តី ប៉េអឹម។ បើយោងទៅតាមរបាយការណ៍ ប្រជាពលរដ្ឋ២នាក់រងរបួស ដោយសារគ្រាប់កាំភ្លើង ចំណែកសមាជិកសហគមន៍ផ្សេងទៀត ត្រូវបានវាយដំដោយស្នូកកាំភ្លើង។
របាយការណ៍ឆ្នាំ២០០៧ របស់តំណាងពិសេសអង្គការសហប្រជាជាតិ របស់អគ្គលេខាដើម្បីសិទ្ធិ មនុស្សក្នុងប្រទេសកម្ពុជា បានចងក្រង និងកត់ត្រាពីផលប៉ះពាល់លើកដំបូងនៃការផ្តល់ដីសម្បទាននេះ ៖
ការឈូសឆាយវាលស្រែ និងដីចំការដែលជាកម្មសិទ្ធិរបស់ប្រជាពលរដ្ឋក្នុងស្រុកស្រែអំបិលបានប៉ះពាល់ដល់ប្រជាពលរដ្ឋជាង ៤០០ គ្រួសារ។ អ្នកខ្លះសល់ដីបន្តិចបន្តួច ឬគ្មានដីសេស សល់បន្តិចសោះ ហើយពឹងផ្អែកលើផលដែលប្រមូលបានកាលពីឆ្នាំមុន។ ការផ្តល់ដីសម្បទាន ក៏បង្ក អោយមានការហាមឃាត់មិនអោយសត្វចិញ្ចឹមរបស់ប្រជាពលរដ្ឋចូលស៊ីស្មៅនៅក្នុងដីនោះដែរ ហើយមានសេចក្តីរាយការណ៍ថា សន្តិសុខរបស់ក្រុមហ៊ុន បានចាប់ ឬបាញ់សម្លាប់សត្វចិញ្ចឹមរបស់ ប្រជាពលរដ្ឋណាដែលចូលក្នុងតំបន់សម្បទាននេះ។
ការរំលោភបំពានសិទ្ធិមនុស្សទាំងនេះបានកើតមានឡើងក្នុងឆ្នាំ២០០៦ និងឆ្នាំ២០០៧នៅក្នុងអំឡុងពេលដែលលោកឧកញ៉ា លី យ៉ុងផាត់ ជាប្រធានក្រុមហ៊ុនមួយក្នុងចំណោមក្រុមហ៊ុនទាំងនេះ និងក្រុមហ៊ុនសហកម្មសិទ្ធិជាច្រើនទៀត។ បន្ទាប់ពីការទទួលរងផលប៉ះពាល់យ៉ាងធ្ងន់ធ្ងរ និងការឈឺចាប់ អស់រយៈពេលជាច្រើនឆ្នាំ ដែលបង្កឡើងដោយក្រុមហ៊ុនដំាណាំអំពៅទាំងនោះ គ្រួសារដែលទទួលរងផល ប៉ះពាល់នៅតែតស៊ូទាមទារសំណងសមស្របណាមួយសម្រាប់ពួកគាត់។
ការជាប់ពាក់ព័ន្ធរបស់លោកឧកញ៉ា លី យ៉ុងផាត់ ក្នុងការទទួលបានដីសម្បទានសម្រាប់ដាំដំណាំអំពៅ ផលិតស្ករសក្នុងខេត្តឧត្តរមានជ័យ
កាលពីឆ្នាំ២០០៧ ដីសម្បទានសេដ្ឋកិច្ចចំនួនបីកន្លែងក្នុងខេត្តឧត្តរមានជ័យត្រូវបានផ្តល់ទៅអោយក្រុមហ៊ុន អង្គរ ស៊ូហ្គើរ, ក្រុមហ៊ុនទន្លេ ស៊ូហ្គើរខេន, និងក្រុមហ៊ុន ខេន អេន ស៊ូហ្គើ វាឡេ។ ក្រុមហ៊ុនទាំងនេះ ត្រូវបានគេជឿជាក់ថាជាកម្មសិទ្ធិទាំងមូល ឬផ្នែកខ្លះរបស់ក្រុមហ៊ុនស្ករធំបំផុតរបស់ប្រទេសថៃ ដែលមានឈ្មោះថា មិត្រ ផូល។ ប៉ុន្តែ វាត្រូវបានគេមើលឃើញយ៉ាងច្បាស់ថា លោកឧកញ៉ា លី យ៉ុងផាត់ ពាក់ព័ន្ធនឹងសកម្មភាពអាជីវកម្មទាំងនេះ។ ដោយយោងទៅនឹងគេហទំព័ររបស់ក្រសួងពាណិជ្ជកម្ម ក្នុងអំឡុងពេលបង្កើតក្រុមហ៊ុនទាំងបីនេះ ការិយាល័យកណ្តាលរបស់ក្រុមហ៊ុនទាំងនេះ មានអាសយដ្ឋាននៅជាមួយនឹងក្រុមហ៊ុន អិលវាយភីគ្រុប។
នៅក្នុងឆ្នាំ២០០៧ អាជ្ញាធរមូលដ្ឋានបានប្រាប់ប្រជាពលរដ្ឋដែលទទួលរងផលប៉ះពាល់ពីការផ្តល់ដីសម្បទាននេះថា ប្រសិនបើពួកគេចង់ប្តឹងក្រុមហ៊ុនទាំងបីនេះ ពួកគេគួរតែប្តឹងទៅលោកឧកញ៉ា លី យ៉ុងផាត់ "ព្រោះគាត់ជាអ្នកទទួលខុសត្រូវលើក្រុមហ៊ុនទាំងនេះ"។
ក្នុងខែមេសា ឆ្នាំ២០០៨ បុគ្គលិករបស់ក្រុមហ៊ុនអង្គរ ស៊ូហ្គើរ ពាក់អាវយឺតដោយមាន សរសេរពាក្យថា "ជាអំណោយរបស់ឧកញ៉ា លី យ៉ុងផាត់" បានរុះរើបំផ្លាញលំនៅដ្ឋានប្រជាពលរដ្ឋចំនួន ១៥៤ ខ្នង ស្ថិតក្នុងភូមិបោះ/អូរបាត់មាន់ ក្រោមការចង្អុលបង្ហាញរបស់អាជ្ញាធរមូលដ្ឋាន។
ការបណ្តេញចេញបន្ថែមទៀតត្រូវបានអនុវត្តក្នុងខែតុលា ឆ្នាំ២០០៩ នៅពេលដែលលំនៅដ្ឋាន ជាកម្មសិទ្ធិរបស់១០០គ្រួសារ ដែលរស់នៅក្នុងភូមិបោះ/អូរបាត់មាន់ ត្រូវបានដុតបំផ្លាញ និងឈូស ឆាយដោយកងកំលាំងប្រហែលជាង១៥០នាក់ដែលក្នុងនោះរួមមាន នគរបាល ប៉េអឹម កម្មករស៊ីឈ្នួល និងទាហ៊ានកងយុទ្ធពលខេមរភូមិន្ទមកពីកងពលតូចលេខ ៤២។ កងពលតូចលេខ៤២នេះគឺជាកង ទាហ៊ាន ដែលទទួលបានការឧបត្ថមជាផ្លូវការណ៍ពីកាស៊ីណូអូស្មាច់របស់លោក លី យ៉ុងផាត់ ក្នុងខេត្តឧត្តរមាន ជ័យ។ ក្រុមកងកំលាំងនេះបិទផ្លូវ និងបន្តរការដុតបំផ្លាញនិងឈូសឆាយផ្ទះរបស់ប្រជាពលរដ្ឋ។
ប្រជាពលរដ្ឋដែលទទួលរងគ្រោះដោយការបណ្តេញចេញដោយបង្ខំ គឺរស់នៅដោយគ្មានផ្ទះសម្បែង គ្មានដីធ្លីហើយស្ថិតក្នុងស្ថានភាពដែលត្រូវការជំនួយមនុស្សធម៌ជាចាំបាច់។ តាំងពីត្រូវបានបណ្តេញចេញពីដីរបស់ ខ្លួនមក ពួកគាត់ភាគច្រើនគ្មានម្ហូបអាហារ មិនអាចទទួលបានការថែទាំសុខភាពជាមូលដ្ឋាន ឬជម្រក ជាអចិន្ត្រៃយ៍ណាមួយឡើយ។ មកដល់ពេលនេះ គ្រួសារដែលទទួលរងផលប៉ះពាល់ មិនទាន់ធ្លាប់បាន ទទួលសំណងណាមួយឡើយ។
លោក លី យ៉ុងផាត់ គួរតែបន្ទោសខ្លួនឯងសម្រាប់ការធ្វើឲ្យខូចកេរ្តិ៍ឈ្នោះ និងអាជីវកម្មក្រុមហ៊ុនភ្នំពេញស៊ូហ្គើររបស់ខ្លួន។ ប្រសិនបើគាត់ចង់កែលំអកេរ្តិ៍ឈ្មោះរបស់ខ្លួនឡើងវិញ គាត់គួរតែផ្តល់សំណង ប្រកបដោយភាពត្រឹមត្រូវតម្លាភាព និងយុត្តធម៌ជូនដល់គ្រួសារដែលទទួលរងផលប៉ះពាល់ ក្នុងខេត្តកោះកុង ខេត្តកំពង់ស្ពឺ និងខេត្តឧត្តរមានជ័យ ដែលជីវភាព របស់ពួកគាត់ត្រូវបានបំផ្លាញដោយសារសកម្មភាពអាជីវកម្មដែលគ្មានការកោតក្រែងរបស់គាត់។យើងនៅតែបើកចំហរសម្រាប់ការប្រជុំជាមួយនឹងសមាជិកព្រឹទ្ធិសភារូបនេះ នៅពេលណាដែលគាត់ត្រៀមខ្លួនរួចជាស្រេច ក្នុងការចូលរួមប្រជុំដើម្បីពិភាក្សាប្រកបដោយអត្ថន័យអំពីដំណោះស្រាយនានាជូនដល់គ្រួសាររងគ្រោះ។
សេចក្តីថ្លែងការណ៍នេះត្រូវបានចេញផ្សាយដោយអង្គការសមធម៌កម្ពុជា, អង្គការអភិវឌ្ឍន៍សម្លេងសហគមន៍ (BCV), ក្រុមការងារពិសេសសិទ្ធិលំនៅដ្ឋាន (HRTF), បណ្តាញកសាងសន្តិភាព (CPN) សម្ព័ន្ធខ្មែរជំរឿន និងការសិទ្ធិមនុស្ស លីកាដូ, មជ្ឈមណ្ឌលអប់រំច្បាប់សម្រាប់សហគមន៍ (CLEC), និង អង្គការ អភិវឌ្ឍន៍ដោយមានការចូលរួមអន្តរជាតិ (IDI)។
សម្រាប់ព័ត៌មានបន្ថែម សូមទាក់ទង៖
▪ Mr. Eang Vuthy, Executive Director of Equitable Cambodia (EC), Phone: (+855) 12 791 700 Email: vuthy@equitablecambodia.org
▪ Mr. Yeng Virak, Executive Director of Community Legal Education Center, Phone: (+855) 12 801 235 Email: virakyeng@clec.org.kh
▪ Ms. Naly Pilorge, Director of The Cambodian League for the Promotion and Defense of Human Rights (LICADHO), Phone: (+855) 12 803 650 Email: director@licadho-cambodia.org
▪ Ms. Pry Phally Phuong, Executive Director of Building Community Voices (BCV), Phone: (+855) 89 885 625 Email: phuongbcv@gmail.com
▪ Mr. Seng Sokheng, Secretariat Coordinator of Community Peace-Building Network (CPN), Phone: (+855) 92 324 668 Email: seng.sokheng@gmail.com
▪ Mr. Sia Phearum, Director of Housing Rights Task Force (HRTF), Phone: (+855) 60 313 451 Email: sd@hrtfcambodia.org
▪ David Pred, Managing Director of Inclusive Development International (IDI), Phone: +1 (917) 280-2705 Email: david@inclusivedevelopment.net
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- សិទ្ធិដីធ្លី លី យ៉ុងផាត់