ការបន្តទង្វើរខុសច្បាប់របស់អាជ្ញាធរខេត្តឧត្តរមានជ័យមកលើបុគ្គលិករបស់អង្គការសមធម៌កម្ពុជា
ចេញផ្សាយ ថ្ងៃទី១៦ ខែតុលា ឆ្នាំ២០១៤; ក្រុមសង្គមស៊ីវិល
យើងខ្ញុំទាំងអស់គ្នាជាក្រុមអង្គការសង្គមស៊ីវិលដូចដែលបានរាយនាមខាងក្រោមសូមថ្កោលទោសចំពោះអាជ្ញាធរខេត្តឧត្តរមានជ័យ ដែលចាប់តាំងពីខែកញ្ញា ឆ្នាំ២០១៤មក បានធ្វើ ការការរារាំង បំពារបំពាន និងគំរាមកំហែងដល់បុគ្គលិកសិទ្ធិមនុស្ស។ ថ្មីៗនេះបុគ្គលិករបស់អង្គការសមធម៌កម្ពុជាបួនរូបបានចុះទៅធ្វើការសិក្សាស្រាវជ្រាវដល់មូលដ្ឋាន ក្នុងខេត្តឧត្តរមានជ័យទាក់ទងទៅនឹងផលប៉ះពាល់នៃការបណ្តេញចេញដោយបង្ខំ ដែលបណ្ដាលមកពី គម្រោងដីសម្បទានសេដ្ឋកិច្ចសម្រាប់ការអភិវឌ្ឍន៏ចំការដំណាំអំពៅ។ ចំការអំពៅនេះ ត្រូវបាន គ្រប់គ្រងដោយក្រុមហ៊ុនមិត្រាផលគ្រុប (MitrPhol Group) ដែលជា ក្រុមហ៊ុនផ្គត់ផ្គង់ភេសជ្ជៈកូកាកូឡាធំទីបីក្នុងពិភពលោក។ ទិន្នន័យដែលប្រមូលបាននឹងត្រូវផ្តល់ទៅអោយគណៈ កម្មការជាតិដើម្បីសិទ្ធិមនុស្សរបស់ប្រទេសថៃ(NHRCT) ដែលជាស្ថាប័នមួយកំពុងធ្វើការ ស៊ើបអង្កេតទៅលើសកម្មភាពនានារបស់ក្រុមហ៊ុន មិត្រា ផលគ្រុប ក្នុងប្រទេសកម្ពុជា (ចំពោះ លំអិតបន្ថែមសូមអានឧបសម្ព័ន្ធ១)។
កាលពីខែកញ្ញាអាជ្ញាធរខេត្តបានរារាំងមិនអោយបុគ្គលិក២រូប របស់អង្គការសមធម៌កម្ពុជា ធ្វើកិច្ចសម្ភាសន៍នៅក្នុងភូមិបុស្ស។ ក្រុមការងារស្រាវជ្រាវត្រូវបានបញ្ជូន ទៅស្នងការ នគរបាលខេត្ត ក្នុងនោះលោកស្រីមែក ហ្វូគូសាវ៉ា(Meg Fukuzawa) ដែលជាទីប្រឹក្សាអន្តរជាតិ ត្រូវបានឃុំខ្លួននៅក្នុងស្នងការនគរបាលអស់ពេញ១យប់មុនពេល ដែលគាត់ត្រូវបានបញ្ជូន ត្រឡប់មកទីក្រុងភ្នំពេញវិញដោយកងកំលាំងប្រដាប់អាវុធ ។
អាជ្ញាធរអះអាងថា ក្រុមការងារត្រូវបានបណ្តេញចេញពីមូលដ្ឋានដោយសារមូលហេតុ សុវត្ថិភាពផ្ទាល់ខ្លួនរបស់ពួកគេ ហើយក៏ព្រោះតែលោកស្រីមែក ហ្វូគូសាវ៉ា(Meg Fukuzawa) ពុំមានលិខិតឆ្លងដែនច្បាប់ដើមនៅជាប់និងខ្លួន។ នៅថ្ងៃទី៨ ខែតុលា ឆ្នាំ២០១៤ នគរបាល ក៏បានរារាំង ក្រុមការងាររបស់អង្គការសមធម៌កម្ពុជាជាថ្មីម្តងទៀត ដែលលើកនេះគឺនៅក្នុង ភូមិបាក់នឹម ដោយ លោកឡុង សុគន្ធ ស្នងការរងនគរបាលខេត្តឧត្តរមានជ័យបញ្ជាអោយពួកគេចាកចេញជាបន្ទាន់។ លោកឡុង សុគន្ធបានលើកហេតុផលទាំងយល់ច្រឡំថាដោយ សារតែក្រុមការងាររបស់អង្គការសមធម៌កម្ពុជាមិនបានជូនដំណឹងជាមុនដល់អាជ្ញាធរមូលដ្ឋាន ទាក់ទងទៅនឹងការចុះសិក្សាស្រាវជ្រាវរបស់ខ្លួន ដូច្នេះ ពួកគេចាំបាច់ត្រូវសុំការអនុញ្ញាតពី លោកអភិបាលខេត្តដើម្បីបន្តការងារសម្ភាសន៏របស់ពួកគេ។
ក្រុមការងារ ក៏បានបន្តការងារសម្ភាសន៍នៅការិយាល័យរបស់អង្គការដៃគូក្នុងក្រុង សំរោង។ មន្រ្តីនគរបាលបានបន្តរារាំងការងារប្រមូលទិន្នន័យរបស់អង្គការសមធម៌កម្ពុជា ដោយព្រមានអ្នកភូមិមិនអោយធ្វើដំណើរទៅកាន់ទីប្រជុំជនក្រុង ហើយកុហកពួកគាត់ទៀតថាបុគ្គលិកអង្គការសមធម៌កម្ពុជាត្រូវបានចាប់ខ្លួន ព្រមទាំងបានសួរដេញដោលអ្នកភូមិដែលបាន ត្រឡប់មកពីទីប្រជុំជនក្រុងនៅត្រង់ចំនុចបិទផ្លូវទៀតផង។
នៅថ្ងៃទី១១តុលា ឆ្នាំ២០១៤ នគរបាលខេត្តបានឃុំខ្លូនបណ្តោះអាសន្ន និងប្រើអំពើហិង្សាលើរាងកាយដល់បុគ្គលិកអង្គការសមធម៌កម្ពុជា១រូប ខណៈដែលរូបគាត់កំពុងជូនដំណើរអ្នកភូមិត្រឡប់ទៅផ្ទះវិញតាមរថយន្តរបស់អង្គការ។ មន្រ្តីនគរបាលបានដាក់រនាំងបិទផ្លូវក្រោមលេសថាជាចំនុចត្រួតពិនិត្យចរាចរណ៍ ហើយបុគ្គលិកអង្គការសមធម៌កម្ពុជារូបនោះក៏បានចាប់ផ្តើមថតជាវីដេអូនូវសកម្មភាពរបស់មន្រ្តីនគរបាល។ ជាការឆ្លើយតបលោកញ៉ុល វុធដែលជានាយនគរបាលចរាចរណ៍ខេត្តបានព្យាយាមរឹបអូសយកម៉ាស៊ីនថតរបស់គាត់។ ដោយបុគ្គលិកអង្គការសមធម៌កម្ពុជា មិនព្រមប្រគល់ម៉ាស៊ីនថត នាយនគរបាលចរាចររូបនោះបានដាល់ពោះរបស់គាត់។
អង្គការដែលជាដៃគូររបស់អង្គការសមធម៌កម្ពុជាបាននិងកំពុងទាក់ទងជាមួយក្រសួងមហាផ្ទៃ អំពីឧប្បត្តិហេតុទាំងឡាយដែលបន្តកើតមានក្នុងខេត្តឧត្តរមានជ័យ។ ដោយយោង ទៅលើក្រសួងមហាផ្ទៃ អង្គការសមធម៌កម្ពុជាពុំមានសិទ្ធិធ្វើការសិក្សាស្រាវជ្រាវក្នុងខេត្តឧត្តរមានជ័យទេ ដោយហេតុថាការចុះឈ្មោះរបស់អង្គការជាមួយក្រសួងពុំរាប់បញ្ចូលនូវ សកម្មភាព ដែលទាក់ទងនឹងសម្បទានដីសេដ្ឋកិច្ចឡើយ។ "ការទាមទារ" ចំពោះអង្គការមិនមែនរដ្ឋាភិបាលដែលពុំមានការិយាល័យរបស់ខ្លួននៅខេត្តត្រូវតែសុំការអនុញ្ញាត្តពីអាជ្ញាធរដែនដីយ៉ាងហោចណាស់១សប្តាហ៍មុននិងជួបជាមួយអ្នកភូមិនោះ គឺមិនមានចែងនៅក្នុងច្បាប់ របស់ប្រទេសកម្ពុជាទេ។
ទង្វើខុសឆ្គងខាងលើនេះបណ្តាលមកពីចេតនាមួយ ដែលរារាំងនូវការប្រមូលព័ត៌មាន កំឡុងពេលនៃការស៊ើបអង្កេតរបស់គណៈកម្មាការជាតិដើម្បីសិទ្ធិមនុស្ស របស់ប្រទេសថៃ។ អង្គការសមធម៌កម្ពុជាបាននិងកំពុងធ្វើការយ៉ាងជិតស្និទ្ធជាមួយសហគមន៍ ដែលរងផលប៉ះពាល់ដោយសារដំណាំអំពៅក្នុងខេត្តឧត្តរមានជ័យតាំងពីឆ្នាំ២០១២មកម៉្លេះ។ នៅមុនបេសកកម្មស្វែងរកពត៌មាន ដែលធ្វើឡើងដោយគណៈកម្មការជាតិដើម្បីសិទ្ធិមនុស្សរបស់ប្រទេសថៃក្នុងខេត្តឧត្តរមានជ័យថ្ងៃទី១១សីហា ឆ្នាំ២០១៤ អង្គការសមធម៌កម្ពុជាបានធ្វើការ ស្រាវជ្រាវស្រដៀងគ្នាដែលពេលនោះមិនមានការរំខានពីមន្រ្តីនគរបាល ឬរដ្ឋបាលអ្វីឡើយ ។
យើងសូមធ្វើការថ្កោលទោសចំពោះការរំលោភសិទ្ធិដ៏ជាក់ស្តែង របស់អាជ្ញាធរខេត្ត មកលើសិទ្ធិរបស់បុគ្គលិកសិទ្ធិមនុស្សនិងសហគមន៍ដែលរងផលប៉ះពាល់ ដែលត្រូវរួចផុតពីរាល់ហិង្សាលើរាងកាយ(ជាពិសេសនៅពេលជាប់ឃុំ) និងចំពោះការឃុំខ្លូនបណ្តោះអាសន្នដូចមានចែងក្នុងច្បាប់រដ្ឋធម្មនុញនៃព្រះរាជាណាចក្រកម្ពុជា។ អាជ្ញាធរខេត្តក៏បានល្មើសចំពោះច្បាប់រដ្ឋធម្មនុញ្ញស្តីពីសេរីភាពបំលាស់ទីភាពឯកជនរបស់ពលរដ្ឋ និងសេរីភាពនៃការប្រមូលផ្តុំនៅពេលដែលពួកគេត្រូវបានហាមឃាត់ ឬចាត់ទុកថាត្រូវបានហាមឃាត់ពីការធ្វើដំណើររវាងភូមិសំរោង ភូមិបុស្ស និងភូមិបាក់នឹម និងរៀបចំនូវកិច្ចប្រជុំដ៏ស្ងប់ស្ងាត់នៅក្នុងលំនៅដ្ឋានឯកជនក្នុងភូមិបាក់នឹមនោះ។
យើងខ្ញុំសូមអំពាវនាវដល់អាជ្ញាធរមានសមត្ថកិច្ចរួមទាំងក្រសួងមហាផ្ទៃ និងតុលាការខេត្តអោយធ្វើការស៊ើបអង្កេត និងផ្តន្ទាទោសចំពោះបុគ្គលដែលបានប្រព្រឹត្តនូវទង្វើមិនគប្បី ចំពោះសមាជិកសហគមន៍និងបុគ្គលិកអង្គការសមធម៌កម្ពុជា រួមមានការឆែកឆេនិងរឹបអូស ដោយគ្មានដីការ ការបំបែកនូវការជួបជុំដែលស្ងប់ស្ងាត់ ការឃុំខ្លួនបណ្តោះអាសន្ន ការគំរាម កំហែងដែលបណ្តាលអោយមានការភ័យខ្លាចចំពោះសុវត្ថិភាពផ្ទាល់ខ្លួន ព្រមទាំងអំពើហិង្សានានាដោយគ្មានមូលហេតុមកលើពលរដ្ឋ។ បរាជ័យក្នុងការអនុវត្តន៍ច្បាប់ចំពោះទង្វើអសកម្មខាងលើនឹងបណ្តាលអោយបញ្ហារ៉ាំរ៉ៃបន្តកើតមាននៅក្នុងប្រពន្ធ័យុត្តិធម៌របស់ ប្រទេសកម្ពុជា ដែលរាប់ទាំងនិទន្ទភាពចំពោះអាជ្ញាធរ ព្រមទាំងកង្វះខាតតម្លាភាព និងមធ្យោបាយស្វែងរកជំនួយនៅពេលជនរងគ្រោះត្រូវការ។
សេចក្តីថ្លែងការណ៍នេះធ្វើឡើងដោយៈ Equitable Cambodia, Cambodian Human Rights and Development Association (ADHOC), Cambodian League for the Promotion and Defense of Human Rights (LICADHO), Sahmakum Teang Tnaut (STT), Cambodian Center for Human Rights (CCHR), LICADHO Canada, People's Action for Change (PAC), Inclusive Development International (IDI), Cambodian Human Rights Action Committee (CHRAC), Community Peace-Building Network (CPN), Coalition of Cambodian Farmer Community (CCFC), Diakonia, Indigenous Community Support Organization (ICSO), Building Community Voices (BCV), Cambodian Food and Service Workers' Federation (CFSWF), Cooperation Committee for Cambodia (CCC), Housing Rights Task Force (HRTF), Norwegian People’s Aid (NPA), The NGO Forum on Cambodia (NGOF), Banteay Srei, Cambodia Indigenous Youth Association (CIYA), Highlander Association (HA), Asian NGO Coalition for Agrarian Reform and Rural Development (ANGOC), Heinrich Böll Stiftung.
សេចក្តីថ្លែងការណ៍នេះគាំទ្រដោយ៖
១. Equitable Cambodia
២. Cambodian Human Rights and Development Association (ADHOC)
៣. Cambodian League for the Promotion and Defense of Human Rights (LICADHO)
៤. Sahmakum Teang Tnaut (STT)
៥. Cambodian Center for Human Rights (CCHR)
៦. LICADHO Canada
៧. People's Action for Change (PAC)
៨. Inclusive Development International (IDI)
៩. Cambodian Human Rights Action Committee (CHRAC)
១០. Community Peace-Building Network (CPN)
១១. Coalition of Cambodian Farmer Community (CCFC)
១២. Diakonia
១៣. Indigenous Community Support Organization (ICSO)
១៤. Building Community Voices (BCV)
១៥. Cambodian Food and Service Workers' Federation (CFSWF)
១៦. Cooperation Committee for Cambodia (CCC)
១៧. Housing Rights Task Force (HRTF)
១៨. Norwegian People’s Aid (NPA)
១៩. The NGO Forum on Cambodia (NGOF)
២០. Banteay Srei
២១. Cambodia Indigenous Youth Association (CIYA)
២២. Highlander Association (HA)
២៣. Asian NGO Coalition for Agrarian Reform and Rural Development (ANGOC)
២៤. Heinrich Böll Stiftung
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី
