ការដោះលែងស្ត្រីមានផ្ទៃពោះ និងស្ត្រីដែលមានកូននៅជាមួយក្នុងពន្ធនាគារ ផ្តល់នូវភាពធូរស្រាល ប៉ុន្តែមិនទាន់បានដោះស្រាយបញ្ហាជាចំបងនានានៅឡើយទេ
ចេញផ្សាយ ថ្ងៃទី២ ខែមីនា ឆ្នាំ២០១៥កាលពីចុងសប្តាហ៍មុន គណកម្មាការដែលដឹកនាំដោយក្រសួងយុត្តិធម៌ បានប្រកាសថា ស្ត្រីដែលជាប់ពន្ធនាគារចំនួន ១៦នាក់ ដែលក្នុងនោះរួមមាន ១៥ នាក់ ជាស្ត្រីដែលមានកូនរស់នៅជាមួយក្នុងពន្ធនាគារ និងម្នាក់ជាស្ត្រីដែលមានផ្ទៃពោះ នឹងត្រូវបានដោះលែង នៅមុនទិវាសិទិ្ធនារីអន្តរជាតិនាថ្ងៃទី៨ ខែមិនា ឆ្នាំ២០១៥។ គណកម្មាកានោះ ក៏បានជូនដំណឹងថារាជរដ្ឋាភិបាល ក៏មានផែនការដោះលែងស្ត្រីមានផ្ទៃពោះ និងស្ត្រីដែលមានកូននៅជាមួយក្នុងពន្ធនាគារជារៀងរាល់ឆ្នាំ។
លោកស្រី វេជ្ជបណ្ឌិត ពុង ឈីវកេក ប្រធានអង្គការសម្ព័ន្ធខ្មែរជំរឿន និងការពារសិទិ្ធមនុស្ស “លីកាដូ” បានមានប្រសាសន៍ថា៖ “យើងស្វាគមន៍ចំពោះការណ៍ដែលរាជរដ្ឋាភិបាលកម្ពុជា នឹងធ្វើការដោះលែងស្ត្រីមានផ្ទៃពោះមួយចំនួន និងម្តាយដែលមានកូនរស់នៅជាមួយក្នុងពន្ធនាគារ”។ លោកស្រី បានមានប្រសាសន៍បន្តថា៖ “ប៉ុន្តែយើងសង្ឃឹមថា គណកម្មាការនឹងធ្វើការដោះស្រាយនូវបញ្ហាចំបងនានា ដែលនឹងបន្តជះឥទ្ធិពលអវិជ្ចមានដល់ស្ត្រីដែលជាប់ពន្ធនាគារ និងក្រុមគ្រួសាររបស់អ្នកទាំងនោះនៅថ្ងៃអនាគត។”
សេចក្តីប្រកាសរបស់គណកម្មាការ ត្រូវបានធ្វើឡើងបន្ទាប់ពីមានសេចក្តីថ្លែងការណ៍ចំនួនពីរដែលធ្វើឡើងដោយសម្តេចនាយករដ្ឋមន្ត្រី កាលពីថ្ងៃទី១៦ និង២៣ ដែលលោកបានយោងទៅលើរបាយការណ៍របស់អង្គការ លីកាដូ ដែលមានចំណងជើងថា៖ “កុមារភាពនៅក្នុងពន្ធនាគារ ការចម្រើនវ័យក្នុងពន្ធនាគារកម្ពុជា៖ រឿងរ៉ាវរបស់ដារ៉ា” ហើយលោកបានអំពាវនាវដល់គណកម្មាការឲ្យផ្តល់នូវការលើកលែងទោសដល់ស្ត្រីដែលមានផ្ទៃពោះ និងម្តាយដែលមានកូននៅជាមួយក្នុងពន្ធនាគារ។ សម្តេចនាយករដ្ឋមន្ត្រី ក៏បានមានប្រសាសន៍ថាសកម្មភាពនេះ គួរតែជាជំហានដំបូងដើម្បីធានាថា មិនមានកុមាររស់នៅនៅក្នុងពន្ធនាគារកម្ពុជាទៀតទេ។
តុលាការ គួរតែពិចារណាអំពីផលប៉ះពាល់ទាំងឡាយពីការសម្រេចចិត្តរបស់តុលាការ និងវិធានការណ៍ផ្សេងទៀតមុនពេលចេញដីកាដាក់ម្តាយទាំងនោះនៅក្នុងពន្ធនាគារ
អង្គការ លីកាដូ បានចេញផ្សាយនូវករណីសិក្សាចំនួនពីរ ដើម្បីទាញនូវចំណាប់អារម្មណ៍ឲ្យមានការយល់ដឹងអំពីកុមារតូចៗដែលរស់នៅក្នុងពន្ធនាគារកម្ពុជា។ នៅក្នុងរបាយការណ៍ទាំងពីរនេះ អង្គការ លីកាដូ បានសំណូមពរដល់អាជ្ញាធរពាក់ព័ន្ធ រួមមានក្រសួងសង្គមកិច្ច អតីតយុទ្ធជន និងយុវនីតិសម្បទា និងអគ្គនាយកដ្ឋានពន្ធនាគារ សូមមេត្តាអនុវត្តនូវការផ្លាស់ប្តូរជាប្រព័ន្ធ ដើម្បីដោះស្រាយឲ្យបានត្រឹមត្រូវនូវបញ្ហានានាដែលកុមាររស់នៅក្នុងពន្ធនាគារជាមួយម្តាយបានជួបប្រទះ។
ដូចដែលបានកត់សម្គាល់នៅក្នុងករណីសិក្សាទាំងនោះ ការផ្លាស់ប្តូរជាប្រព័ន្ធដែលចាំបាច់ទាំងនេះ រួមមានការបង្កើត និងការអនុវត្តនូវការណែនាំនានាសម្រាប់កំណត់អំពីពេលវេលាដែលសមរម្យសម្រាប់កុមារក្នុងការរស់នៅក្នុងពន្ធនាគារ ឬថាតើត្រូវយកកុមារចេញពីម្តាយរបស់អ្នកទាំងនោះដោយរបៀបណានៅពេលអ្នកទាំងនោះមានអាយុ ៣ឆ្នាំ។ ការវាយតម្លៃបែបនេះ គួរតែគិតគូរទៅលើអាយុរបស់កុមារ ភេទ ភាពចាស់ទុំ សុខភាព ទំនាក់ទំនងជាមួយម្តាយ និងជម្រើសសមរម្យផ្សេងទៀតពីការរស់នៅក្នុងពន្ធនាគារ ក៏ដូចជាផលប៉ះពាល់នៃជីវិតក្នុងពន្ធនាគារលើសុខភាព និងការលូតលាស់របស់កុមារផងដែរ។
ប្រព័ន្ធយុត្តិធម៌ ក៏មានតួនាទីសំខាន់មួយផងដែរ ក្នុងការធានាថាម្តាយដែលរស់នៅជាមួយកូន និងស្ត្រីមានផ្ទៃពោះ មិនត្រូវបានដាក់ឲ្យជាប់ពន្ធនាគារដោយមិនចាំបាច់នោះទេ។ យោងតាមស្ថិតិរបស់អង្គការ លីកាដូ ជាង ៥០ ភាគរយ នៃស្ត្រីមានផ្ទៃពោះ និងស្ត្រីដែលមានកូនរស់នៅជាមួយ នៅក្នុងពន្ធនាគារ គឺស្ថិតនៅក្នុងការឃុំខ្លួនបណ្តោះអាសន្នរង់ចាំសវនាការ និងមិនអាចទទួលបានការលើកលែងទោសនោះទេ។ ដូចនេះ នៅតែមានកុមារជាច្រើន នឹងឋិតនៅក្នុងពន្ធនាគារ បន្ទាប់ពីលិខិតលើកលែងទោសត្រូវបានចេញ។
សេចក្តីសម្រេចដាក់ឲ្យជាប់ឃុំបណ្តោះអាសន្នរង់ចាំសវនាការ គួរតែជាជម្រើសចុងក្រោយ មិនគួរជាវិធានការណ៍នោះទេ ហើយគួរតែគិតពិចារណាទៅលើស្ថានភាពក្រុមគ្រួសារគ្រប់ពេលវេលា។ ទោសឃុំឃាំងនៅនគរបាល ក៏គួរតែត្រូវបានដាក់តែក្នុងករណីបទល្មើសធ្ងន់ធ្ងរតែប៉ុណ្ណោះ ហើយគួរតែគិតពិចារណាទៅលើផលប្រយោជន៍ច្រើនបំផុតរបស់កុមារ។
យើងខ្ញុំ សូមសំណូមពរដល់តុលាការ សូមមេត្តាពិនិត្យឡើងវិញនូវដីកាឃុំខ្លួនលើម្តាយ និងស្ត្រីមានផ្ទៃពោះនានា ដែលកំពុងរង់ចាំសវនាការ និងពិចារណាកាត់បន្ថយទោសដល់អ្នកដែលបានជាប់ពិរុទ្ធភាព ដោយពិចារណាលើអង្គហេតុនៃបទល្មើស និងស្ថានភាពគ្រួសារនានាផងដែរ។
អ្នកនាង នូ សំអន អ្នកគ្រប់គ្រងគម្រោងពន្ធនាគារនៃអង្គការ លីកាដូ បានមានប្រសាសន៍ថា៖ “បច្ចុប្បន្ននេះ ស្ត្រីជាច្រើននៅក្នុងពន្ធនាគារ ត្រូវបានចោទប្រកាន់ ឬផ្តន្ទាទោសពីបទល្មើសតូចតាច ឬបទល្មើសដែលទើបនឹងត្រូវបានប្រព្រឹត្តលើកទីមួយ”។ អ្នកនាងបានបន្តទៀតថា៖ “តុលាការ គួរតែពិចារណាអំពីផលប៉ះពាល់ទាំងឡាយពីការសម្រេចចិត្តរបស់តុលាការ និងវិធានការណ៍ផ្សេងទៀតមុនពេលចេញដីកាដាក់ម្តាយទាំងនោះនៅក្នុងពន្ធនាគារ”។
ជាទូទៅ អង្គការ លីកាដូ នៅតែបន្តគាំទ្រកិច្ចខិតខំប្រឹងប្រែងក្នុងការធានាថាទារកទើបកើត និងកុមារតូចៗ មានឱកាសនៅជាមួយម្តាយរបស់អ្នកទាំងនោះនៅក្នុងពន្ធនាគារកម្ពុជា ប៉ុន្តែត្រឹមតែក្នុងកាលៈទេសៈដែលការរស់នៅក្នុងពន្ធនាគារនោះ អាចផ្តល់ប្រយោជន៍ច្រើនបំផុតដល់កុមារប៉ុណ្ណោះ។ សម្រាប់កុមារ និងម្តាយរបស់អ្នកទាំងនោះ និងស្ត្រីមានផ្ទៃពោះ ដែលមិនទទួលបានប្រយោជន៍ពីការលើកលែងទោសឥឡូវនេះ អង្គការ លីកាដូ សូមសំណូមពរឲ្យមានវិធានការណ៍ជាបន្ទាន់ ដើម្បីធ្វើឲ្យប្រសើរឡើងនូវស្ថានភាពរបស់អ្នកទាំងនោះ រួមមានការបង្កើនថវិកាទិញម្ហូបអាហារសម្រាប់កុមារ និងស្ត្រីមានផ្ទៃពោះ ហើយធានាថាកុមារទាំងនោះទទួលបានថ្នាំបង្ការមេរោគស្របតាមបទដ្ឋានជាតិ។
បច្ចុប្បន្ន អង្គការ លីកាដូ កំពុងធ្វើការស្រាវជ្រាវអំពីផលប៉ះពាល់នៃការឃុំខ្លួនរបស់ម្តាយ ទៅលើកូនៗរបស់អ្នកទាំងនោះដែលរស់នៅក្រៅពន្ធនាគារ។ ការរកឃើញដំបូង បង្ហាញថាផលប៉ះពាល់អវិជ្ជមានយ៉ាងខ្លាំងទៅលើគ្រួសារមួយចំនួន នៅពេលម្តាយម្នាក់ត្រូវបានជាប់ពន្ធនាគារពីបទល្មើសតូចតាច។ ក្នុងករណីជាច្រើន នគរបាល និងអាជ្ញាធរតុលាការ មិនបានសួរថាតើស្ត្រីម្នាក់នោះមានកូនឬទេ ឬពិចារណាថាតើអ្នកណានឹងមើលថែរក្សាអ្នកទាំងនោះ មុនពេលសម្រេចចាប់ ឬឃុំខ្លួន។
សម្រាប់ព័ត៌មានបន្ថែម សូមទាក់ទង៖
▪ លោកស្រី វេជ្ជបណ្ឌិត ពុង ឈីវកេក ប្រធានអង្គការ លីកាដូ, ទូរស័ព្ទលេខ៖ ០១២ ៨០២ ៥០៦ (ភាសាខ្មែរ បារាំង និងអង់គ្លេស)
▪ អ្នកនាង នូ សំអន អ្នកគ្រប់គ្រងគម្រោងពន្ធនាគារនៃអង្គការ លីកាដូ, ទូរស័ព្ទលេខ៖ ០១២ ៤៩៣ ២៨៧ (ភាសាខ្មែរ)
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ បញ្ហាពន្ធនាគារ សិទ្ធិស្ត្រី