ដំណោះស្រាយសម្រាប់រយៈពេលវែង គឺចាំបាច់សម្រាប់សុខុមាលភាពកូនរបស់ម្តាយជាប់ពន្ធនាគារ
ចេញផ្សាយ ថ្ងៃទី១៨ ខែមីនា ឆ្នាំ២០១៥ក្រោយពីមានការដោះលែងស្ត្រីចំនួន ២២នាក់ ពីក្នុងពន្ធនាគារ អង្គការ លីកាដូ ក៏សូមស្វាគមន៍ចំពោះព័ត៌មានអំពីការនឹងពិភាក្សាបន្តរកដំណោះស្រាយរយៈពេលវែងរបស់ក្រសួងយុត្តិធម៌ ដើម្បីធានានូវសុខុមាលភាពរបស់កុមារដែលមានម្តាយជាប់នៅក្នុងពន្ធនាគារ។
ថ្មីៗនេះ អង្គការ លីកាដូ បានធ្វើការស្រាវជ្រាវ1លំអិតមួយពាក់ព័ន្ធនឹងការចាប់ខ្លួន និងផ្តន្ទាទោសម្តាយដែលមានកូនតូចនៅជាមួយ ហើយបានរកឃើញថាសុខុមាលភាពរបស់កុមារ គឺកម្រនឹងត្រូវបានគេយកចិត្តទុកដាក់ណាស់ នៅពេលដែលម្តាយត្រូវបានដាក់ឲ្យនៅក្នុងការឃុំឃាំងបណ្តោះអាសន្នរង់ចាំសវនាការ ឬផ្តន្ទាទោសដាក់ពន្ធនាគារ។ ស្ត្រីជាច្រើនដែលត្រូវបានគេសម្ភាស បានប្រាប់អង្គការ លីកាដូ ថា ចៅក្រមថែមទាំងមិនដែលបានសួរអ្នកទាំងនោះថាតើពួកគេមានកូន ឬគ្មាននោះទេ មុនពេលបញ្ជូនអ្នកទាំងនោះទៅកាន់ពន្ធនាគារ។
ក៏ប៉ុន្តែនៅក្នុងប្រទេសកម្ពុជា នៅមាននីតិវិធីជាច្រើនផ្សេងទៀតដែលធានាថាអ្វីៗអាចនឹងត្រូវបានអនុវត្តផ្សេងពីនេះ។ សេចក្តីណែនាំរបស់ក្រសួងយុត្តិធម៌ លើកឡើងថាចៅក្រមស៊ើបសួរ គួរតែសាកសួរអំពីគ្រប់ព័ត៌មានដែលពាក់ព័ន្ធទាំងអស់អំពីបុគ្គលដែលត្រូវបានចោទប្រកាន់ មុនពេលសម្រេចចិត្តដាក់បុគ្គលនោះនៅក្នុងការឃុំខ្លួនបណ្តោះអាសន្នរង់ចាំសវនាការ។ ព័ត៌មានទាំងនេះរួមមានព័ត៌មានអំពីថាតើបុគ្គលដែលត្រូវបានចោទប្រកាន់ ជាស្ត្រីមានផ្ទៃពោះ ឬជាស្ត្រីដែលមានកូនតូចនៅជាមួយ។ សេចក្តីណែនាំនេះ បានបញ្ជាក់យ៉ាងច្បាស់ថាប្រសិនបើស្ត្រីម្នាក់មានផ្ទៃពោះ ឬមានកូនតូច ហើយមិនមានមធ្យោបាយសមរម្យផ្សេងទៀតក្នុងការរៀបចំនូវការមើលថែទាំនោះទេ ការដាក់ឲ្យនៅក្នុងការឃុំខ្លួនបណ្តោះអាសន្នរង់ចាំសវនាការ មិនគួរត្រូវបានអនុវត្តនោះទេ លើកលែងតែករណីចាំបាច់។
លោកស្រី វេជ្ជបណ្ឌិត ពុង ឈីវកេក ប្រធានអង្គការសម្ព័ន្ធខ្មែរជំរឿន និងការពារសិទិ្ធមនុស្ស “លីកាដូ” បានមានប្រសាសន៍ថា៖ “នៅពេលដែលស្ត្រីម្នាក់ត្រូវបានបញ្ជូនខ្លួនទៅពន្ធនាគារ ជាលទ្ធផលកូនរបស់នាងនឹងនៅឆ្ងាយពីនាង ប៉ុន្តែជាការអរគុណណាស់ដែលដំណោះស្រាយសម្រាប់រយៈពេលវែងអាចនឹងមាននៅក្នុងប្រទេសកម្ពុជាឆាប់ៗនេះ”។ លោកស្រី បានមានប្រសាសន៍បន្តទៀតថា៖ “ដោយការកាត់បន្ថយចំនួនម្តាយដែលជាប់ឃុំខ្លួនបណ្តោះអាសន្នរង់ចាំសវនាការ ដោយអនុលោមតាមសេចក្តីណែនាំរបស់ក្រសួង អាជ្ញាធរអាចធ្វើឲ្យកាន់តែប្រសើរឡើងយ៉ាងខ្លាំងនូវជីវិតរបស់កុមាររាប់រយនាក់។”
ទោះបីប្រសិនបើស្ត្រីដែលត្រូវបានចោទប្រកាន់ទាំងនោះ ក្រោយមកត្រូវបានផ្តន្ទាទោស និងដាក់ឲ្យជាប់ពន្ធនាគារនៅអំឡុងពេលសវនាការក៏ដោយ ក៏ផលប៉ះពាល់អវិជ្ជមានមកលើកូនរបស់អ្នកទាំងនោះនឹងត្រូវបានកាត់បន្ថយមួយចំនួនដែរ។ ក្នុងចំណោមលទ្ធផលមួយចំនួន ក្រុមគ្រួសារនឹងអាចមានពេលវេលារៀបចំនូវការថែទាំសមរម្យផ្សេងទៀត និងដាក់កុមារឲ្យទទួលការបណ្តុះបណ្តាល ប្រសិនបើកុមារត្រូវត្រលប់ទៅផ្ទះ។ កុមារ នឹងអាចត្រូវបានគេរៀបចំយ៉ាងល្អសម្រាប់អំឡុងពេលបំបែកចេញពីម្តាយ ទាំងផ្លូវកាយ និងផ្លូវចិត្ត ហើយក្រុមគ្រួសារនឹងមានការលំបាកតិចតួចផ្អែកហិរញ្ញវត្ថុ។ ការស្រាវជ្រាវថ្មីមួយរបស់អង្គការ លីកាដូ បង្ហាញថា នៅពេលដែលម្តាយម្នាក់ ត្រូវបានឃុំខ្លួនបណ្តោះអាសន្នរង់ចាំសវនាការ ជាលទ្ធផលការអប់រំរបស់កូនអ្នកទាំងនោះ ស្ទើរតែតែងតែទទួលរងផលប៉ះពាល់។ កុមារមួយចំនួន បោះបង់ការសិក្សា នៅខណៈដែលកុមារមួយចំនួនទៀតទៅរកការងារដែលទទួលបានប្រាក់កម្រៃធ្វើ អំឡុងពេលម៉ោងចេញពីសាលារៀន ដើម្បីជួយផ្គត់ផ្គង់គ្រួសារ។
នៅគ្រប់ពេលវេលា ចៅក្រមបានសម្រេចចិត្តបញ្ជូនជនសង្ស័យទៅឃុំខ្លួនបណ្តោះអាសន្នរង់ចាំសវនាការ ប៉ុន្តែនៅក្នុងទម្រង់ដែលចេញដោយក្រសួងយុត្តិធម៌កាលពីដើមឆ្នាំ ២០១៤ បានតម្រូវឲ្យចៅក្រមទាំងនោះបង្ហាញថាពួកគេបានពិចារណាដោយយកចិត្តទុកដាក់លើអង្គហេតុដែលពាក់ព័ន្ធទាំងឡាយ។ ចៅក្រមទាំងនោះ គួរតែពន្យល់ឲ្យបានច្បាស់លាស់នូវមូលហេតុទាំង ៦ ចំនុច សម្រាប់ធ្វើការដាក់ឲ្យនៅក្នុងការឃុំខ្លួនបណ្តោះអាសន្នរង់ចាំសវនាការ ដូចដែលបានចែងនៅក្នុងមាត្រា ២០៥ នៃក្រមនីតិវិធីព្រហ្មទណ្ឌកម្ពុជា ដើម្បីធានាថាការឃុំខ្លួននេះ គឺត្រឹមតែត្រូវបានប្រើប្រាស់ក្នុងវិធីចុងក្រោយប៉ុណ្ណោះ។ ប៉ុន្តែ ព័ត៌មានដែលអង្គការ លីកាដូ ទទួលបាន បង្ហាញថាមានតែចៅក្រមមួយចំនួនប៉ុណ្ណោះកំពុងប្រើប្រាស់ទម្រង់ថ្មី ហើយចៅក្រមទាំងនោះនៅតែមិនបានផ្តល់នូវមូលហេតុគ្រប់គ្រាន់សម្រាប់សេចក្តីសម្រេចរបស់អ្នកទាំងនោះនោះទេ។
អង្គការ លីកាដូ សូមស្វាគមន៍ចំពោះគំនិតផ្តួចផ្តើមនានាក្នុងការពន្លឿនសវនាការរបស់ស្ត្រីមានផ្ទៃពោះ ឬមានកូនរស់នៅជាមួយ ដែលជាប់ឃុំបណ្តោះអាសន្នរង់ចាំសវនាការ និងជឿជាក់ថាកំណែទម្រង់ដែលមាននិរន្តភាពនានា នឹងត្រូវបានអនុវត្តឲ្យបានទូលំទូលាយជាងមុន ហើយនៅថ្ងៃអនាគតគួរតែបញ្ចូលគ្រប់ស្រ្តីទាំងអស់ដែលមានកូននៅជាមួយ។ ដើម្បីកាត់បន្ថយផលប៉ះពាល់អវិជ្ជមានលើកូនរបស់អ្នកទាំងនោះ ឥឡូវអាជ្ញាធរអាចពិនិត្យឡើងវិញនូវដីកាឃុំខ្លួនបណ្តោះអាសន្នរង់ចាំសវនាការរបស់ស្ត្រីទាំងនោះ និងពិចារណាពីការកាត់បន្ថយទោសសម្រាប់អ្នកដែលត្រូវបានផ្តន្ទាទោសរួច។
អ្នកនាង នូ សមអន អ្នកគ្រប់គ្រងគម្រោងពន្ធនាគារនៃអង្គការ លីកាដូ បានមានប្រសាសន៍ថា៖ “ជាចុងក្រោយ ប្រសិនបើច្បាប់ និងនីតិវិធី ត្រូវបានអនុវត្តដោយត្រឹមត្រូវ នោះម្តាយជាច្រើន នឹងមិនត្រូវជាប់ពន្ធនាគារនោះទេ ហើយកូនរបស់អ្នកទាំងនោះអាចនឹងមិនត្រូវចំណោយពេលទទួលរងទុក្ខដែលមិនចាំបាច់ទាំងនោះផងដែរ។” អ្នកនាងបានបន្តទៀតថា៖ “ដើម្បីសម្រេចបាននូវកំណែទម្រង់ដ៏មានអត្ថន័យ និងពិតប្រាកដ យើងខ្ញុំសូមសំណូមពរដល់អ្នកដែលទទួលខុសត្រូវក្នុងការស្វែងរកដំណោះស្រាយរយៈពេលវែង សូមមេត្តាផ្តោតសំខាន់លើតុលាការ ជាកន្លែងដែលអាចធ្វើការផ្លាស់ប្តូរចុងក្រោយបាន។”
នៅពេលដែលធ្វើការផ្តន្ទាទោស អង្គការ លីកាដូ ជឿជាក់ថា បុគ្គលជាច្រើនដែលត្រូវបានផ្តន្ទាទោសលើបទល្មើសតូចតាច ជាពិសេសម្តាយ និងស្ត្រីមានផ្ទៃពោះ គួរតែត្រូវបានពិចារណាចំពោះទោសដែលមិនចាំបាច់ជាប់ឃុំឃាំង ដែលត្រូវបានចែងរួចជាស្រេចក្នុងក្រមនីតិវិធីព្រហ្មទណ្ឌ និងក្រមព្រហ្មទណ្ឌកម្ពុជា ដូចជាការដាក់ឲ្យស្ថិតក្រោមការត្រួតពិនិត្យរបស់តុលាការ ការព្យួរទោស និងទោសសហគមន៍។ ប៉ុន្តែយោងតាមក្រសួងយុត្តិធម៌ វិធានការណ៍ទាំងនេះ មិនទាន់ត្រូវបានអនុវត្តត្រឹមត្រូវ សមរម្យ និងមានប្រសិទិ្ធភាពនៅឡើយទេ។
ដូចនេះ អង្គការ លីកាដូ សូមសំណូមពរដល់អ្នកដែលពិនិត្យមើលលើផលប៉ះពាល់ពីការជាប់ពន្ធនាគាររបស់ម្តាយទៅលើកូន សូមពិចារណាលើសេចក្តីណែនាំដែលបានចុះកាលពីខែមករា ឆ្នាំ២០១៤ ស្តីពីការអនុវត្តទោសដែលមិនចាំបាច់ជាប់ឃុំឃាំងផ្សេងទៀត។ ចៅក្រមស៊ើបសួរ និងព្រះរាជអាជ្ញា គួរតែពិនិត្យឲ្យបានត្រឹមត្រូវលើអាកប្បកិរិយា និងស្ថានភាពផ្ទាល់ខ្លួនរបស់បុគ្គលដែលត្រូវបានចោទប្រកាន់ ក៏ដូចជាអង្គហេតុនៃបទល្មើសព្រហ្មទណ្ឌ នៅពេលពិចារណាថាតើចាំបាច់ដាក់ទោសពន្ធនាគារឬទេ។
នៅក្នុងករណីទាំងនោះ ដែលទោសពន្ធនាគារគ្រាន់តែជាជម្រើសមួយ អង្គការ លីកាដូ សូមធ្វើការលើកឡើងនូវអនុសាសន៍របស់ខ្លួនម្តងទៀតថា ការវាយតម្លៃត្រឹមត្រូវមួយ គួរតែត្រូវបានធ្វើឡើង ដើម្បីកំណត់ថាតើកុមារគួរតែស្នាក់នៅក្នុងពន្ធនាគារជាមួយម្តាយរបស់អ្នកទាំងនោះ ឬយ៉ាងណា ហើយសេចក្តីសម្រេចគួរតែធ្វើឡើងដោយផ្អែកលើផលប្រយោជន៍ច្រើនបំផុតរបស់កុមារ។ ប្រសិនបើកុមារ នឹងត្រូវបានបំបែកពីម្តាយ នោះអាជ្ញាធរពន្ធនាគារ គួរតែរៀបចំនូវការមកសួរសុខទុក្ខជាទៀងទាត់ និងមិនអស់កម្រៃដល់ក្រុមគ្រួសារ និងការទាក់ទងតាមទូរស័ព្ទ ប្រសិនបើអាច និងមិនមានគ្រោះថ្នាក់ដល់កុមារ។
សម្រាប់ព័ត៌មានបន្ថែម សូមទាក់ទង៖
▪ លោកស្រី វេជ្ជបណ្ឌិត ពុង ឈីវកេក ប្រធានអង្គការ លីកាដូ, ទូរស័ព្ទលេខ៖ ០១២ ៨០២ ៥០៦ (ភាសាខ្មែរ បារាំង និងអង់គ្លេស)
▪ អ្នកនាង នូ សមអន អ្នកគ្រប់គ្រងគម្រោងពន្ធនាគារនៃអង្គការ លីកាដូ, ទូរស័ព្ទលេខ៖ ០១២ ៤៩៣ ២៨៧ (ភាសាខ្មែរ)
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- សិទ្ធិកុមារ បញ្ហាពន្ធនាគារ សិទ្ធិស្ត្រី