ដំណើរឃ្លាតចេញពីអ៊ីនធឺណិត? ការគម្រាមកំហែងចំពោះសេរីភាពលើប្រព័ន្ធអ៊ីនធឺណិតដែលទើបរកឃើញថ្មីនៅកម្ពុជា
ចេញផ្សាយ ថ្ងៃទី១៧ ខែឧសភា ឆ្នាំ២០១៥
នៅក្នុងទិវាពិភពលោកស្តីពីព័ត៌មានសង្គម អង្គការ លីកាដូ បានចេញនូវរបាយការណ៍មួយដែលមានចំណងជើងថា៖ “ដំណើរឃ្លាតចេញពីអ៊ីនធឺណិត? ការគម្រាមកំហែងចំពោះសេរីភាពលើប្រព័ន្ធអ៊ីនធឺណិតដែលរកឃើញថ្មីនៅកម្ពុជា” ដោយពិពណ៌នាអំពីសារសំខាន់នៃអ៊ីនធឺណិតសម្រាប់សេរីភាពក្នុងការបញ្ចេញមតិនៅក្នុងប្រទេសកម្ពុជា និងការគម្រាមកំហែងដែលកំពុងកើតមានឡើងលើមធ្យោបាយក្នុងការបញ្ចេញមតិប្រភេទនេះ។
ចាប់តាំងពីឡើងដឹកនាំរាជរដ្ឋាភិបាល គណបក្សកាន់អំណាច បានគ្រប់គ្រង និងត្រួតពិនិត្យចាប់ពិរុទ្ធជាលក្ខណៈប្រព័ន្ធទៅលើប្រព័ន្ធផ្សព្វផ្សាយព័ត៌មានបែបប្រពៃណី។ អាជ្ញាប័ណ្ណផ្សព្វផ្សាយព័ត៌មានដែលត្រូវបានគ្រប់គ្រងដោយរាជរដ្ឋាភិបាល គឺមិនត្រូវបានចេញទៅឲ្យប្រព័ន្ធផ្សព្វផ្សាយព័ត៌មានឯករាជ្យ ខណៈពេលដែលអ្នកសារព័ត៌មានជាច្រើនត្រូវបានគេគម្រាមកំហែង ចោទប្រកាន់ ចាប់ដាក់ពន្ធនាគារ ហើយនៅក្នុងករណីមួយចំនួនត្រូវបានគេសម្លាប់ ដោយសារបានឆ្លងកាត់ខ្សែបន្ទាត់ដែលកំណត់ថាអ្វីដែលគូរចេញផ្សាយ និងអ្វីដែលមិនគួរចេញផ្សាយ។
ប្រទេសកម្ពុជា កំពុងរីកសាយភាយយ៉ាងខ្លាំងនូវការប្រើប្រាស់ប្រព័ន្ធអ៊ីនធឺណិត ដោយសារតែមានការកើនឡើងនូវប្រភេទទូរស័ព្ទស្មាតហ្វូនដែលមានតម្លៃទាប ងាយស្រួលភ្ជាប់អ៊ីនធឺណិត និងមានបណ្តាញទូរស័ព្ទចល័តយ៉ាងទូលំទូលាយ បានផ្តល់នូវសមត្ថភាពដល់ប្រជាពលរដ្ឋនានាដូចជា អ្នកបង្កើតគេហទំព័រ ព្រះសង្ឃ សកម្មជនសហគមន៍ និងអ្នកនយោបាយជំទាស់ ក្នុងការកាត់បន្ថយការប្រើប្រាស់ប្រព័ន្ធផ្សព្វផ្សាយដែលគ្រប់គ្រងដោយរាជរដ្ឋាភិបាល និងធ្វើការផ្សព្វផ្សាយព័ត៌មានអំពីការរំលោភយកដីធ្លី ការប្រើអំពើហិង្សារបស់នគរបាល និទណ្ឌភាព អំពើពុករលួយ និងការបំផ្លាញព្រៃឈើ ។ល។
ប៉ុន្តែសេរីភាពនៃការបញ្ចេញមតិប្រភេទនេះកំពុងស្ថិតនៅក្រោមការគម្រាមកំហែង។ រាជរដ្ឋាភិបាល បានបង្កើតក្រុមអ្នកជំនាញលើប្រព័ន្ធអ៊ីនធឺណិត (Cyber War Team) ដើម្បីត្រួតពិនិត្យ និងប្រមូលព័ត៌មានពីប្រព័ន្ធទំនាក់ទំនងសង្គម ហ្វេសប៊ុក និងគេហទំព័រផ្សេងៗទៀត ដើម្បី “ការពារជំហរ និងកិត្តិនាមរបស់រាជរដ្ឋាភិបាល”។ អាជ្ញាធររដ្ឋ បានទៅទស្សនកិច្ចនៅឯទីស្នាក់ការកណ្តាលនៃក្រុមហ៊ុនទូរគមនាគមន៍កម្ពុជា និងក្រុមហ៊ុនផ្តល់សេវាអ៊ីនធឺណិតនានានៅកម្ពុជា ដើម្បីពិនិត្យមើលឧបករណ៍បណ្តាញរបស់អ្នកទាំងនោះដែលត្រូវបានគេដឹងថា នឹងរៀបចំចាប់ផ្តើមតំឡើងឧបករណ៍តាមដានបែបអេឡិចត្រូនិច។ ជាពិសេស ការរាយការណ៍បែបនេះ គឺជាការបន្ថែមបញ្ហាពីលើការព្រមព្រៀងយ៉ាងស្រពិចស្រពិលថ្មីៗរវាងទូរគមនាគមន៍កម្ពុជា និងប្រទេសចិន ដែលជាប្រទេសមានការរឹតត្បិតយ៉ាងខ្លាំងបំផុតលើសេរីភាពក្នុងការប្រើប្រាស់អ៊ីនធឺណិត។
លោក អំ សំអាត អ្នកសម្របសម្រួលបច្ចេកទេសស៊ើបអង្កេតនៃអង្គការ លីកាដូ បានមានប្រសាសន៍ថា៖ “សេរីភាពក្នុងការបញ្ចេញមតិ គឺជាសិទិ្ធដែលប្រជាពលរដ្ឋកម្ពុជាភាគច្រើនមិនដែលមានពិតប្រាកដ”។ លោកបានបន្តទៀតថា៖ “មិនមានអ្វីគួរឲ្យភ្ញាក់ផ្អើលនោះទេ ដែលភ្លាមៗបន្ទាប់ពីប្រជាពលរដ្ឋកម្ពុជាបានរកឃើញមធ្យោបាយមួយថ្មីដែលអាចឲ្យអ្នកទាំងនោះបញ្ចេញនូវមតិរបស់ខ្លួនឲ្យគេបានលឺនោះ រាជរដ្ឋាភិបាលបានចាប់ផ្តើមព្យាយាមយ៉ាងខ្លាំងក្លាជាថ្មីម្តងទៀតដើម្បីបំបិទសម្លេងរបស់អ្នកទាំងនោះ”។
លើសពីនេះ សេចក្តីព្រាងច្បាប់ទាំងពីរ ប្រសិនបើត្រូវបានអនុម័ត នោះនឹងអនុញ្ញាតឲ្យរដ្ឋាភិបាល គ្រប់គ្រងនូវអ្វីៗដែលប្រជាពលរដ្ឋកម្ពុជានឹងដាក់បង្ហោះនៅក្នុងប្រព័ន្ធអ៊ីនធឺណិត បន្ថែមពីលើប្រព័ន្ធគ្រប់គ្រងដែលមានស្រាប់ដោយប្រព័ន្ធអ៊ីនធឺណិតខ្លួនឯង។
សេចក្តីព្រាងច្បាប់ស្តីពីឧក្រិដ្ឋកម្មព័ត៌មានវិទ្យា នឹងបង្កើតឲ្យមាននូវគណកម្មាធិការជាតិប្រឆាំងនឹងបទល្មើសតាមប្រព័ន្ធព័ត៌មានវិទ្យា(NACC) ដែលមានសម្តេចនាយករដ្ឋមន្ត្រីជាប្រធាន ដោយត្រូវបានផ្តល់អំណាចក្នុងការរឹបអូសនូវឧបករណ៍កុំព្យូទ័រ។ ច្បាប់នេះ ក៏នឹងផ្តល់អំណាចដល់អាជ្ញាធររដ្ឋក្នុងការសម្រេចចិត្តយ៉ាងទូលំទូលាយ ដើម្បីចាប់អ្នកប្រើប្រាស់ប្រព័ន្ធអ៊ីនធឺណិតដែលបានបង្កើតឬចែកចាយអត្ថបទដែលអាជ្ញាធរយល់ឃើញថា ជាការលើ្មសនឹងប្បញ្ញត្តិនានាដែលត្រូវបានចែងយ៉ាងស្រពិចស្រពិលនៅក្នុងច្បាប់នោះ។
សេចក្តីព្រាងច្បាប់ស្តីពីប្រព័ន្ធទូរគមនាគមន៍ ប្រសិនបើត្រូវបានអនុម័ត នឹងបន្ថែមអំណាចដល់អាជ្ញាធររដ្ឋ មិនត្រឹមតែគ្រប់គ្រងអ្វីៗដែលមានលើអ៊ីនធឺណិតប៉ុណ្ណោះទេ ថែមទាំងលើអ្នកផ្តល់សេវាកម្មអ៊ីនធឺណិតនានាទៀតផង។ ច្បាប់នេះ នឹងផ្តល់អំណាចដល់ក្រសួងប្រៃណីយ៍និងទូរគមនាគមន៍ ក្នុងការបញ្ជាទៅប្រតិបត្តិករទូរគមនាគមន៍ទាំងអស់ឲ្យផ្តល់នូវការគ្រប់គ្រងប្រព័ន្ធរបស់ខ្លួនទៅឲ្យក្រសួងដើម្បី “ថែរក្សាប្រយោជន៍ជាតិ សន្តិសុខ ស្ថេរភាព និងរបៀបរៀបរយសាធារណៈ”។ លើសពីនេះ បទប្បញ្ញត្តិនានា នឹងចាត់ទុកថាជាការល្មើសច្បាប់ចំពោះការតំឡើងនូវឧបករណ៍ទូរគមនាគមន៍នានាដែលអាច “ប៉ះពាល់ដល់របៀបរៀបរយសាធារណៈ ឬសុវត្ថិភាពនិងសន្តិសុខជាតិ”។ កថាខ័ណ្ឌស្រពិចស្រពិលមួយចំនួន អាចក្តោបយកគ្រប់ការហៅទូរស័ព្ទ ឬផ្ញើសារតាមអ៊ីម៉ែល បើត្រូវបានរាជរដ្ឋាភិបាលគិតថាអាក្រក់។
អ្នកនាង ណាលី ពីឡូក នាយិកាអង្គការ លីកាដូ បានមានប្រសាសន៍ថា៖ “សេចក្តីព្រាងច្បាប់ស្តីពីឧក្រិដ្ឋកម្មព័ត៌មានវិទ្យា និង សេចក្តីព្រាងច្បាប់ស្តីពីប្រព័ន្ធទូរគមនាគមន៍នេះ គឺជាការព្យាយាមយ៉ាងច្បាស់របស់គណបក្សកាន់អំណាច ក្នុងការបង្កើតឲ្យមានការគ្រប់គ្រងពេញលេញទៅលើប្រព័ន្ធអ៊ីនធឺណិត និងទូរគមនាគមន៍នៅក្នុងប្រទេសកម្ពុជា”។ អ្នកនាងបានបន្តទៀតថា៖ “ការប្រុងប្រយ័ត្នយ៉ាងខ្លាំងក្លាដែលរាជរដ្ឋាភិបាលកម្ពុជាបានធ្វើឡើងដោយយោងតាមច្បាប់ទាំងពីរនេះ នឹងអាច ហើយហាក់ដូចជា នឹងត្រូវបានប្រើប្រាស់ដើម្បីគាបសង្កត់គ្រប់ទម្រង់ទាំងអស់នៃអត្ថបទដែលរិះគន់អាជ្ញាធររដ្ឋ”។
អង្គការ លីកាដូ សំណូមពរយ៉ាងទទូចដល់រដ្ឋសភាជាតិ សូមលោកមេត្តាធ្វើការបដិសេធនូវសេចក្តីព្រាងច្បាប់ណាមួយ ដែលព្យាយាមធ្វើការរឹតត្បិតដល់សិទិ្ធសេរីភាពជាមូលដ្ឋានលើការបញ្ចេញមតិ។
អង្គការ លីកាដូ ក៏សូមអំពាវនាវដល់ម្ចាស់ជំនួយអន្តរជាតិ និងសហគមន៍អន្តរជាតិនានា សូមមេត្តាទទួលស្គាល់និងឆ្លើយតបទៅនឹងសិទិ្ធសេរីភាពនៃការបញ្ចេញមតិនៅកម្ពុជា ដែលកំពុងស្ថិតក្នុងការគម្រាមកំហែងធ្ងន់ធ្ងរ ហើយដែលសិទិ្ធនេះត្រូវការធ្វើការលើកកម្ពស់និងការពារឲ្យមានភាពប្រសើរឡើង។
សម្រាប់ព័ត៌មានបន្ថែម សូមទាក់ទង៖
▪ លោក អំ សំអាត អ្នកសម្របសម្រួលបច្ចេកទេសស៊ើបអង្កេតនៃអង្គការសិទិ្ធមនុស្ស លីកាដូ ទូរស័ព្ទលេខ០១២ ៣២៧ ៧៧០។
▪ អ្នកនាង ណាលី ពីឡូក នាយិកាអង្គការសិទិ្ធមនុស្ស លីកាដូ ទូរស័ព្ទលេខ ០១២ ៨០៣ ៦៥០៕
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម សេរីភាពអនឡាញ
