ម្តាយនៅក្នុងពន្ធនាគារ៖ ផលប៉ះពាល់នៃការឃុំខ្លួនស្ត្រី និងកូនរបស់អ្នកទាំងនោះ
ចេញផ្សាយ ថ្ងៃទី២៦ ខែឧសភា ឆ្នាំ២០១៥នាថ្ងៃនេះ អង្គការ លីកាដូ ចេញផ្សាយនូវរបាយការណ៍មួយស្តីពី “ម្តាយនៅក្នុងពន្ធនាគារ៖ ផលប៉ះពាល់នៃការឃុំខ្លួនស្ត្រី និងកូនរបស់អ្នកទាំងនោះ” ក្នុងបំណងបង្កើនការយល់ដឹងអំពីផលប៉ះពាល់អវិជ្ជមានយ៉ាងខ្លាំងអាចធ្លាក់ទៅលើកូនៗ ដោយសារតែការឃុំខ្លួនម្តាយក្នុងពន្ធនាគារ។
របាយការណ៍នេះ បានរកឃើញថាអាជ្ញាធរនានា ជាពិសេសចៅក្រម និងព្រះរាជអាជ្ញាមួយចំនួន អាចធ្វើឲ្យជីវិតកុមារជាច្រើននាក់ល្អប្រសើរជាងមុន ដោយគ្រាន់តែអនុវត្តតាមនីតិវិធីច្បាប់ដែលមានស្រាប់ឲ្យបានត្រឹមត្រូវ ដើម្បីកាត់បន្ថយចំនួនម្តាយដែលត្រូវបានឃុំខ្លួននៅក្នុងពន្ធនាគារដោយមិនមានភាពចាំបាច់។
លោកស្រីវេជ្ជបណ្ឌិត ពុង ឈីវកេក ប្រធានអង្គការ លីកាដូ បានមានប្រសាសន៍ថា៖ “ជារៀងរាល់ឆ្នាំ កុមាររាប់រយនាក់ត្រូវបានបំបែកពីម្តាយរបស់ខ្លួន ដោយមិនមានមូលហេតុសមរម្យទាល់តែសោះ ហើយជាលទ្ធផលជីវិតរបស់ក្មេងៗទាំងនោះកាន់តែធ្លាក់ដុនដាប។ ប៉ុន្តែ ការទទួលរងទុក្ខឈឺចាប់ជាច្រើនបែបនេះ គឺងាយស្រួល អាចនឹងជៀសវាងបាន”។
របាយការណ៍នេះ ត្រូវបានធ្វើឡើងនៅក្នុងពេលដែលមានព្រះរាជទានលើកលែងទោសត្រូវបានផ្តល់ដល់ស្ត្រីដែលមានផ្ទៃពោះ និងស្ត្រីដែលមានកូនតូចៗជាច្រើននាក់នៅជាមួយម្តាយនៅក្នុងពន្ធនាគារ កាលពីខែមិនា និងមេសា ឆ្នាំ២០១៥។ ការដោះលែងនេះ ត្រូវបានធ្វើឡើងដោយមានការបញ្ជារបស់សម្តេចនាយករដ្ឋមន្ត្រី បន្ទាប់ពីអង្គការ លីកាដូ បានចេញផ្សាយនូវរបាយការណ៍ស្តីពី៖ “កុមារភាពក្នុងពន្ធនាគារ៖ ការចម្រើនវ័យក្នុងពន្ធនាគារកម្ពុជា៖ រឿងរ៉ាវរបស់ដារ៉ា” ដែលបានរៀបរាប់យ៉ាងលំអិតអំពីរឿងរ៉ាវរបស់កុមារាម្នាក់រងទុក្ខយ៉ាងធ្ងន់ធ្ងរដោយការរីកចម្រើនលូតលាស់យឺតជាងក្មេងធម្មតា បន្ទាប់ពីបានចំណាយរយៈពេលអស់ ៣ ឆ្នាំ ដំបូងនៃជីវិតរបស់ក្មេងនោះដែលបានរស់នៅក្នុងពន្ធនាគារជាមួយម្តាយ។
របាយការណ៍ស្តីពី “រឿងរ៉ាវរបស់ដារ៉ា” បានផ្តោតទៅលើផលប៉ះពាល់នៃជីវិតនៅក្នុងពន្ធនាគារទៅលើការចម្រើនលូតលាស់របស់កុមារម្នាក់ ចំណែកឯរបាយការណ៍ថ្មីនេះពិនិត្យទៅលើផលប៉ះពាល់អវិជ្ជមានទៅលើការរស់នៅរបស់កូនៗដែលនៅក្រៅពន្ធនាគារ នៅពេលដែលមានការឃុំខ្លួនម្តាយម្នាក់នៅក្នុងពន្ធនាគារ។ ការសិក្សាស្រាវជ្រាវរបស់អង្គការ លីកាដូ បានបង្ហាញថា សុខុមាលភាពរបស់កុមារគឺមិនត្រូវបានយកចិត្តទុកដាក់ មិនត្រឹមតែនៅពេលចាប់ខ្លួនប៉ុណ្ណោះទេ ហើយថែមទាំងក្នុងអំឡុងពេលពេញមួយនីតិវិធីតុលាការទៀតផង។
នៅពេលដែលម្តាយម្នាក់ត្រូវបានបញ្ជូនទៅកាន់ពន្ធនាគារ ផលវិបាកផ្នែកចិត្តសាស្ត្រ និងផ្នែកការលូតលាស់របស់កូននាង នឹងមានភាពធ្ងន់ធ្ងរក្នុងរយៈពេលយូរអង្វែង។ ជាលទ្ធផល ការអប់រំ និងសុខភាពរបស់កុមារ ស្ទើរតែទទួលរងផលប៉ះពាល់ជាដរាប ហើយបងប្អូនបង្កើតតែងតែត្រូវបានបំបែកចេញពីគ្នា។ ថ្លៃចាយវាយដែលពាក់ព័ន្ធនឹងការជាប់ពន្ធនាគារ ក៏អាចធ្វើឲ្យអ្នកទាំងនោះរឹតតែជួបបញ្ហាផងដែរ ដែលធ្វើឲ្យគ្រួសារខ្លះបាត់បង់នូវរបរចិញ្ចឹមជីវិតទាំងស្រុងក៏មាន។
ការរកឃើញរបស់អង្គការ លីកាដូ ធ្វើឲ្យមានការភ្ញាក់ផ្អើល ដោយស្ត្រីជាច្រើនត្រូវបានឃុំខ្លួនដោយគ្មានភាពចាំបាច់ ក្នុងខណៈដែលជំហាននានាត្រូវបានដាក់ឲ្យអនុវត្តនាពេលប៉ុន្មានឆ្នាំថ្មីៗនេះ ដើម្បីលើកកំពស់ការស្តានីតិសម្បទានៅក្នុងពន្ធនាគារ ជម្រើសផ្សេងពីការឃុំខ្លួនបណ្តោះអាសន្នរង់ចាំសវនាការ និងការដាក់ទោសនានាដែលមិនចាំបាច់ជាប់ពន្ធនាគារ ដែលការអនុវត្តវិធានការទាំងនេះនៅតែមានសភាពយឺតខ្លាំង។
ប្រព័ន្ធនៃការអនុវត្តក្រមព្រហ្មទណ្ឌកម្ពុជា បន្តចាត់ទុកការឃុំខ្លួនបណ្តោះអាសន្នរង់ចាំសវនាការ គឺជាបទដ្ឋាន (ជាការប្រើប្រាស់ទូទៅ) ជាជាងការប្រើប្រាស់ក្នុងករណីលើកលែង ផ្ទុយពីក្រមនីតិវិធីព្រហ្មទណ្ឌរបស់កម្ពុជាខ្លួនឯងផ្ទាល់។ ពលរដ្ឋជាច្រើនជាពិសេសស្ត្រីជាម្តាយ និងស្ត្រីមានផ្ទៃពោះ ត្រូវបានផ្តន្ទាទោសពីបទល្មើសស្រាលៗមួយចំនួន ត្រូវបានបញ្ជូនទៅកាន់ពន្ធនាគារដោយមិនបានពិចារណាអំពីជម្រើសផ្សេងៗក្រៅពីការដាក់ទោសពន្ធនាគារនោះទេ។
អង្គការ លីកាដូ ក៏បានរកឃើញថា ប្រព័ន្ធនៃការអនុញ្ញាតឲ្យសួរសុខទុក្ខអ្នកជាប់ពន្ធនាគារនៅកម្ពុជា ត្រូវតែធ្វើការផ្លាស់ប្តូរជាបន្ទាន់ ដើម្បីអនុញ្ញាតឲ្យកុមារទៅសួរសុខទុក្ខម្តាយបានទៀងទាត់ និងមានភាពឯកជនឲ្យបានច្រើនតាមដែលអាចធ្វើបាន ដោយមិនចាំបាច់មានការរឹតត្បិតលើភាពជិតស្និតរវាងអ្នកទាំងពីរនោះទេ (ម្តាយមានសិទិ្ធយកកូនមកអោបនឹងខ្លួនប្រាណ)។ ស្ថានភាពបច្ចុប្បន្ន កុមារជាច្រើនមិនអាចទៅសួរសុខទុក្ខម្តាយរបស់ខ្លួនបានទេ ដោយសារតែត្រូវចំណាយច្រើនពេកទៅលើការសួរសុខទុក្ខនោះ។
អ្នកស្រី នូ សំអន អ្នកគ្រប់គ្រងគម្រោងពន្ធនាគារនៃអង្គការ លីកាដូ មានប្រសាសន៍ថា៖ “ទោះបីជាមានការលើកលែងទោសថ្មីៗនេះ ដោយបានធ្វើឲ្យកុមារជាច្រើនរួចផុតពីការរស់នៅក្នុងពន្ធនាគារក៏ដោយ ក៏ដំណោះស្រាយរយៈពេលវែងស្ថិតស្ថេរ មិនអាចសម្រេចបានតាមរយៈការធ្វើការលើកលែងទោសជារៀងរាល់ឆ្នាំនោះទេ។ ដើម្បីដោះស្រាយបញ្ហានេះ គឺត្រូវការផ្លាស់ប្តូរប្រព័ន្ធមួយចំនួន ជាពិសេសនៅក្នុងនីតិវិធីតុលាការ។”
សម្តេចនាយករដ្ឋមន្ត្រី ក៏បានទទួលស្គាល់នូវតម្រូវការនៃកំណែទម្រង់ដែលទូលំទូលាយមួយចំនួន ដោយបានបញ្ជាដល់ក្រសួងយុត្តិធម៌ ក្រសួងមហាផ្ទៃ និងក្រសួងកិច្ចការនារី ឲ្យធ្វើការពិភាក្សារកដំណោះស្រាយរយៈពេលវែង ដើម្បីការពារសុខុមាលភាពកុមារដែលមានម្តាយជាប់ក្នុងពន្ធនាគារ។ ប៉ុន្តែ អង្គការ លីកាដូ បានកត់សម្គាល់ឃើញថាក្រសួងទាំងអស់នេះ បានធ្វើការងារលើការលើកលែងទោសយ៉ាងឆាប់រហ័ស ប៉ុន្តែមិនទាន់បានធ្វើការងារលើដំណោះស្រាយរយៈពេលវែងណាមួយនៅឡើយទេ។
អង្គការ លីកាដូ សូមសំណូមពរដោយទទូចដល់អាជ្ញាធរ សូមលោកមេត្តាពិចារណាលើផលប៉ះពាល់នៃការដាក់ម្តាយក្នុងពន្ធនាគារ ដែលមានកូនរស់នៅក្រៅពន្ធនាគារ និងសូមលោកមេត្តាយកចិត្តទុកដាក់ឲ្យបានខ្លាំងលើជម្រើសផ្សេងទៀតក្រៅពីការដាក់ទោសពន្ធនាគារលើក្រុមមនុស្សអាទិភាពមួយនេះ។ បើមានការអនុវត្តឲ្យបានត្រឹមត្រូវនូវនីតិវិធីតុលាការដែលមានស្រាប់ អាជ្ញាធរទាំងនោះអាចអនុញ្ញាតឲ្យកុមាររស់នៅក្រៅពន្ធនាគារជាមួយម្តាយរបស់អ្នកទាំងនោះ ដែលជាការរក្សានូវភាពជាគ្រួសារ និងជាការការពារឱកាសរបស់កុមារក្នុងការទទួលបានការអប់រំល្អមួយ។ បើមិនមានវិធានការដែលជាជម្រើសផ្សេងៗទៀតក្រៅពីការដាក់ពន្ធនាគារនេះ ធ្វើឲ្យកុមារជាច្រើនពាន់នាក់នៅទូទាំងប្រទេសកម្ពុជា នឹងបន្តរងទុក្ខដោយសារគោលការណ៍ឃុំខ្លួននានាដែលមិនចាំបាច់ និងផ្តល់ផលអវិជ្ជមានជាច្រើនទៅដល់កុមារទាំងនោះ។
សម្រាប់ព័ត៌មានបន្ថែម សូមទាក់ទង៖
▪ លោកស្រី វេជ្ជបណ្ឌិត ពុង ឈីវកេក ប្រធានអង្គការ លីកាដូ ទូរស័ព្ទលេខ៖ ០១២ ៨០២ ៥០៦ (ភាសាខ្មែរ អង់គ្លេស និងបារាំង)
▪ អ្នកនាង នូ សំអន អ្នកគ្រប់គ្រងគម្រោងពន្ធនាគារនៃអង្គការ លីកាដូ ទូរស័ព្ទលេខ៖ ០១២ ៤៩៣ ២៨៧។
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ