នៅក្នុងទិវាសិទិ្ធកុមារអន្តរជាតិ អង្គការ លីកាដូ សូមអំពាវនាវដល់រាជរដ្ឋាភិបាល មេត្តាជួយគាំទ្រសិទិ្ធរបស់កុមារ និងមេត្តាការពារយុវជននៅក្នុងពន្ធនាគារ
ចេញផ្សាយ ថ្ងៃទី៣១ ខែឧសភា ឆ្នាំ២០១៥ការិយាល័យសិទិ្ធកុមាររបស់អង្គការ លីកាដូ ដោយមានសហការជាមួយបណ្តាញក្រុមការពារកុមារ (CPG) នឹងប្រារព្ធទិវាកុមារអន្តរជាតិឆ្នាំ ២០១៥ នៅទីកន្លែងមួយចំនួន។ នៅថ្ងៃទី២៨ ខែឧសភា ការប្រារព្ធពិធីនេះ បានធ្វើឡើងនៅក្នុងអនុវិទ្យាល័យដង្កោ រាជធានីភ្នំពេញ។ នៅថ្ងៃទី១ ខែមិថុនា ដែលជាថ្ងៃនៃទិវាកុមារអន្តរជាតិ ការប្រារព្ធទិវានេះនឹងធ្វើឡើងនៅពេលព្រឹក (ម៉ោង ៨ និង ៣០នាទី ដល់ម៉ោង ១១ ព្រឹក) នៅសង្កាត់នគរធំនៃខេត្តសៀមរាប សាលមហោស្រពនៃខេត្តកោះកុង និងនៅអគារនៃសាកលវិទ្យាល័យបៀលប្រាយ ក្នុងខេត្តព្រះសីហនុ។ នៅតាមទីកន្លែងទាំងនេះ ការិយាល័យសិទិ្ធកុមាររបស់អង្គការ លីកាដូ និងក្រុមការពារកុមារ នឹងធ្វើការរៀបចំវេទិការសាធារណៈ និងការសំដែងល្ខោនអប់រំបែបចូលរួមស្តីពីសិទិ្ធកុមារ។ ហើយក្នុងឱកាសនោះដែរ យើងក៏នឹងចែកចាយជំនួយជាតម្រូវការចាំបាច់មួយចំនួនទៅដល់គ្រួសាររបស់កុមារ និងយុវជនដែលងាយរងគ្រោះ។ មនុស្សប្រមាណ ២.៣៥០ នាក់ នឹងគ្រោងមកចូលរួមក្នុងកម្មវិធីនេះ។
នៅថ្ងៃទី១ ខែមិថុនា ការិយាល័យសិទិ្ធកុមារ (CRO) ក៏នឹងចូលរួមជាមួយការិយាល័យគម្រោងពន្ធនាគាររបស់អង្គការ លីកាដូ រៀបចំការលេងល្បែង និងចែកចាយសម្ភារៈនានាដល់យុវជន ស្ត្រីមានផ្ទៃពោះដែលជាប់ពន្ធនាគារ និងកូនរបស់ឆ្មាំពន្ធនាគារ នៅក្នុងមណ្ឌលអប់រំកែប្រែទី២ (ម២) នៅព្រៃស រាជធានីភ្នំពេញ និងពន្ធនាគារក្រុងតាខ្មៅ ខេត្តកណ្តាល។
លើសពីនេះ ការិយាល័យសិទិ្ធកុមារ (CRO) នឹងចេញផ្សាយនូវវីដេអូចម្រៀងដែលត្រូវបាន និពន្ធឡើងដោយក្រុមយុវជនការពារកុមារនៅរាជធានីភ្នំពេញ (CPG) ដោយធ្វើការសង្ខេបនូវសិទិ្ធចំបងទាំងបួនរបស់កុមារ គឺ៖ សិទិ្ធក្នុងការរស់រានមានជីវិត សិទិ្ធទទួលបានការការពារ សិទិ្ធក្នុងការអភិវឌ្ឍ និងសិទិ្ធក្នុងការចូលរួម។ វីដេអូនេះ នឹងត្រូវបានចេញផ្សាយ ដើម្បីបង្កើនការយល់ដឹង និងអំពាវនាវដល់រាជរដ្ឋាភិបាលកម្ពុជាក្នុងការបន្តកិច្ចខិតខំប្រឹងប្រែងឲ្យកាន់តែខ្លាំងក្នុងការលើកកំពស់ និងការពារសុខុមាលភាព សុភមង្គល និងការរីកចម្រើនលូតលាស់ជាទូទៅរបស់កុមារ។
លោក គង់ សុជាតិ អ្នកសម្របសម្រួលការិយាល័យសិទិ្ធកុមារនៃអង្គការ លីកាដូ បានមានប្រសាសន៍ថា៖ “ភាពក្រីក្រ ផ្តល់ផលប៉ះពាល់អវិជ្ជមានដល់សុខភាព ការអប់រំ និងសុភមង្គលរបស់កុមារជាច្រើននៅកម្ពុជា”។ លោកបានបន្តទៀតថា៖ “ដើម្បីការពារសុខុមាលភាព និងសិទិ្ធរបស់កុមារ អាជ្ញាធររដ្ឋមិនត្រឹមតែគួរតែបង្កើនការយល់ដឹងប៉ុណ្ណោះទេ ប៉ុន្តែគួរតែថែមទាំងជួយគ្រួសាររបស់កុមារដែលងាយរងគ្រោះដើម្បីឲ្យសម្រេចបាននូវនិន្តរភាពផ្នែកសង្គមសេដ្ឋកិច្ចរបស់អ្នកទាំងនោះផងដែរ។ មួយផ្នែកនៃចំនុចនេះ គឺមានន័យថាបញ្ឈប់នូវការបណ្តេញចេញដោយបង្ខំ ដែលធ្វើឲ្យគ្រួសារទាំងនោះរឹតតែជួបនឹងភាពក្រីក្រកាន់តែខ្លាំងឡើង។”
លើសពីសកម្មភាពនានានៅក្នុងមណ្ឌលអប់រំកែប្រែទី២ (ម២) នៅពន្ធនាគារព្រៃស និងពន្ធនាគារក្រុងតាខ្មៅ ការិយាល័យគម្រោងពន្ធនាគារនៃអង្គការ លីកាដូ នឹងផ្តល់នូវសម្ភារៈនានាដល់យុវជន ស្ត្រីមានផ្ទៃពោះ និងកុមារដែលបានជាប់ពន្ធនាគារជាមួយម្តាយអ្នកទាំងនោះ ហើយនិងកូនរបស់ឆ្នាំពន្ធនាគារជាច្រើននៅក្នុងពន្ធនាគារចំនួន ១២កន្លែងផ្សេងទៀត នៅទូទាំងប្រទេស។1 អង្គការ លីកាដូ ក៏នឹងធ្វើការរៀបចំនូវការលេងល្បែង និងទម្រង់នៃការកំសាន្តផ្សេងៗទៀតនៅក្នុងពន្ធនាគារមួយចំនួន ក្នុងចំណោមពន្ធនាគារទាំងនេះផងដែរ។
នៅចុងខែមេសា ឆ្នាំ២០១៥ អនីតិជនចំនួន ៣៤២នាក់ ត្រូវបានឃុំខ្លួននៅក្នុងពន្ធនាគារជាច្រើន ដែលត្រូវបានតាមដានដោយអង្គការ លីកាដូ ដែលរួមមាន ក្មេងប្រុស ៣២២នាក់ និង ក្មេងស្រី ២០នាក់។ ព្រះរាជទានលើកលែងទោស ត្រូវបានចេញអំឡុងពេលទិវាសិទិ្ធនារីអន្តរជាតិ និងពិធីបុណ្យចូលឆ្នាំថ្មីប្រពៃណីជាតិ កាលពីដើមឆ្នាំនេះ ដែលធ្វើឲ្យមានការដោះលែងស្ទើរតែទាំងអស់នូវស្ត្រីមានផ្ទៃពោះ និងកុមារដែលរស់នៅជាមួយម្តាយរបស់អ្នកទាំងនោះនៅក្នុងពន្ធនាគារកម្ពុជា។ បច្ចុប្បន្ននេះ នៅក្នុងពន្ធនាគារ ដែលអង្គការ លីកាដូ បានតាមដានមើល មានស្ត្រីមានផ្ទៃពោះចំនួន ១៨នាក់ និងកុមារ ២នាក់ ដែលរស់នៅជាមួយម្តាយរបស់អ្នកទាំងនោះក្នុងពន្ធនាគារទាំងនេះ។
អនីតិជនជាច្រើនដែលជាប់ពន្ធនាគារ មានតម្រូវការពិសេសជាច្រើនពាក់ព័ន្ធនឹងការរីកចម្រើនលូតលាស់ផ្នែកផ្លូវកាយ ផ្លូវចិត្ត និងសង្គម ប៉ុន្តែតម្រូវការទាំងនេះ គឺកម្រត្រូវបានគេយកមកពិចារណាណាស់។ ជាលទ្ធផលអនីតិជនជាច្រើនដែលជាប់ឃុំ ត្រូវបានរងគ្រោះដោយការរំលោភបំពាន ការប្រមាថ និងការបន្ទាបបន្ថោក ដូចអ្នកពេញវ័យដែរ។ ដូចជាអ្នកពេញវ័យដែរ អនីតិជន ហាក់ដូចជាត្រូវបានគេប្រព្រឹត្តិចំពោះអ្នកទាំងនោះទៅតាមស្ថានភាពហិរញ្ញវត្ថុ ជាជាងអាយុរបស់អ្នកទាំងនោះ ដែលជាការបង្កើននូវគ្រោះថ្នាក់នៃការកេងប្រវ័ញ្ច និងការស្ថិតនៅក្រោមបញ្ជារបស់អ្នកជាប់ពន្ធនាគារដែលមានអាយុច្រើនជាង។ កុមារីនៅក្នុងពន្ធនាគារកម្ពុជា គឺជាក្រុមភាគតិច ហើយជាពិសេសជាក្រុមងាយរងគ្រោះ ដែលអ្នកទាំងនោះត្រូវបានដាក់ឲ្យនៅក្នុងកន្លែងដែលត្រូវបានធ្វើឡើងពីមុនសម្រាប់ដាក់អ្នកជាប់ពន្ធនាគារជាមនុស្សប្រុសពេញវ័យ។
ណាលី ពីឡូក នាយិកាអង្គការ លីកាដូ បានមានប្រសាសន៍ថា៖ “យើងអាចនិយាយបានថា នេះជាការសោកស្តាយណាស់ដែលកុមារីនៅក្នុងពន្ធនាគារកម្ពុជា ហាក់ដូចជាមិនបានទទួលនូវការថែរក្សាជាពិសេសនោះទេ”។ អ្នកនាង បានបន្តទៀតថា៖ “ចំនួនកុមារីដែលជាប់ពន្ធនាគារ មានចំនួនតិចតូច ដូចនេះមិនមានហេតុផលទាល់តែសោះក្នុងការមិនយកចិត្តទុកដាក់ទៅលើអ្នកទាំងនោះ ជាពិសេសលើតម្រូវការសុខភាព និងអនាម័យរបស់កុមារីទាំងនោះ ឬលក្ខខណ្ឌទូទៅនៃការឃុំខ្លួនរបស់អ្នកទាំងនោះ”។
អនីតិជនជាច្រើន ត្រូវបានរាយការណ៍ថា ត្រូវបានគេវាយដំ ទះ និងទាត់ដោយអ្នកជាប់ពន្ធនាគារផ្សេងទៀត (ពេលខ្លះនៅក្រោមការបញ្ជាពីឆ្មាំពន្ធនាគារ) ប៉ុន្តែអ្នកទាំងនោះមិនមានការការពារ ឬយន្តការដែលមានប្រសិទិ្ធភាព ដើម្បីអនុញ្ញាតឲ្យមានការប្តឹងពីការធ្វើទារុណកម្ម និងការធ្វើបាបនោះទេ។ លើសពីនេះ ពួកគេនៅតែបន្តត្រូវបានគេដាក់ឲ្យជាប់ឃុំខ្លួនបណ្តោះអាសន្នរង់ចាំសវនាការ និងជាប់ទោសដាក់ពន្ធនាគារពីបទល្មើសតូចតាចជាច្រើន ដោយមិនបានគិតដល់ផលប៉ះពាល់អវិជ្ជមានសំខាន់ៗរយៈពេលវែង ដែលមានមកលើអនាគតរបស់កុមារទាំងអស់នោះ។
អង្គការ លីកាដូ សូមសំណូមពរដ៏ទទូច ដល់រាជរដ្ឋាភិបាលកម្ពុជា សូមលោកមេត្តា បង្កើតនូវប្រព័ន្ធយុត្តិធម៌សម្រាប់អនីតិជនដាច់ដោយឡែកមួយ ដោយបញ្ចប់នូវសេចក្តីព្រាងច្បាប់ស្តីពី “កុមារទំនាស់នឹងច្បាប់” និងអនុវត្តច្បាប់នោះដោយមិនមានការពន្យាពេល។ ច្បាប់នេះ ត្រូវតែស្របទៅតាមស្តង់ដារអន្តរជាតិ ឬក៏ប្រសើរជាងស្តង់ដាររបស់អន្តរជាតិ ហើយជាពិសេសគួរតែធានាថាអ្នកជាប់ពន្ធនាគារជាស្ត្រីវ័យក្មេង ត្រូវបានផ្តល់នូវការថែរក្សាជាពិសេសទៅតាមតម្រូវការរបស់កុមារទាំងអស់នោះ។
អង្គការ លីកាដូ សូមសំណូមពរដ៏ទទូច ដល់ចៅក្រម សូមលោកមេត្តា ពិចារណាអំពីផលប៉ះពាល់អវិជ្ជមានរយៈពេលវែង ទៅដល់អនាគតរបស់អនីតិជនម្នាក់ ដែលត្រូវបានដាក់ឲ្យជាប់ពន្ធនាគារ និងធានាថាការឃុំខ្លួនបណ្តោះអាសន្នរង់ចាំសវនាការ គឺត្រូវបានប្រើប្រាស់តែនៅពេលចាំបាច់បំផុតប៉ុណ្ណោះទេ ហើយជម្រើសទោសផ្សេងទៀតដោយមិនបាច់ដាក់ឲ្យជាប់ក្នុងពន្ធនាគារ គឺត្រូវបានប្រើប្រាស់លើអ្នកដែលមានពិរុទ្ធពីបទល្មើសតូចតាចនានា។
សម្រាប់ព័ត៌មានបន្ថែម សូមទាក់ទង៖
▪ អ្នកនាង ណាលី ពីឡូក នាយិកាអង្គការ លីកាដូ ទូរស័ព្ទលេខ៖ ០១២ ៨០៣ ៦៥០ (ភាសាបារាំង និងអង់គ្លេស)
▪ លោក គង់ សុជាតិ អ្នកសម្របសម្រួលការិយាល័យសិទិ្ធកុមារនៃអង្គការ លីកាដូ ទូរស័ព្ទលេខ៖ ០១២ ៥៣៦ ៣០០ (ភាសាខ្មែរ)
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- បញ្ហាកុមារ បញ្ហាពន្ធនាគារ