អង្គការ លីកាដូ អំពាវនាវឲ្យមានការបើកទូលាយឡើងវិញនូវព័ត៌មានអំពីការចុះបញ្ជីក្រុមហ៊ុន
ចេញផ្សាយ ថ្ងៃទី២៥ ខែមិថុនា ឆ្នាំ២០១៥
អង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ មានការសោកស្តាយចំពោះការសម្រេចចិត្តរបស់ក្រសួងពាណិជ្ជកម្ម ដែលទំនងជាធ្វើឡើង ដើម្បីកាត់បន្ថយទំហំនៃព័ត៌មានអំពីក្រុមហ៊ុនដែលក្រសួងបានដាក់បង្ហាញនៅលើគេហទំព័ររបស់ខ្លួន។ បន្ទាប់ពីការធ្វើបច្ចុប្បន្នភាពលើគេហទំព័ររបស់ក្រសួងព័ត៌មាន អំពីក្រុមហ៊ុនដែលមាននៅលើគេហទំព័រទាំងនោះ គឺមានត្រឹមតែឈ្មោះក្រុមហ៊ុន ឈ្មោះប្រធានក្រុមហ៊ុន និងលេខទូរស័ព្ទទំនាក់ទំនង។ ភ្លាមៗបន្ទាប់ពីការស្នើសុំរបស់អង្គការ លីកាដូ ឲ្យមាននូវតម្លាភាពពាក់ព័ន្ធនឹងការផ្តល់ដីសម្បទានសេដ្ឋកិច្ច ការវិវឌ្ឍបែបនេះគឺពិតជាគួរឲ្យសោកស្តាយយ៉ាងខ្លាំង។
ណាលី ពីឡូក នាយិកាអង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ បានមានប្រសាសន៍ថា៖ “បច្ចុប្បន្ននេះ និងក្នុងសម័យនេះ មិនមានហេតុផលណាមួយសម្រាប់អាជ្ញាធររដ្ឋក្នុងការមិនឲ្យទទួលបាន និងស្វែងរកនូវព័ត៌មានពេញលេញអំពីក្រុមហ៊ុនដែលចុះបញ្ជីនោះទេ”។ អ្នកនាងបានបន្តទៀតថា៖ “នៅខណៈដែលអ្នកតស៊ូមតិនានាជុំវិញពិភពលោក កំពុងអំពាវនាវឲ្យមាននូវតម្លាភាពពីរដ្ឋនិងរាជរដ្ឋាភិបាល ប្រទេសកម្ពុជាបែរជាជ្រើសរើសយកការចាត់វិធានការ ក្នុងការកាត់បន្ថយទំហំព័ត៌មានដែលសាធារណៈជនគួរតែទទួលបានទៅវិញ”។
អស់រយៈពេលជាច្រើនឆ្នាំ ក្រសួងពាណិជ្ជកម្មបានដាក់ឲ្យអាចស្វែងរកបាននៅលើគេហទំព័ររបស់ខ្លួន នូវទិន្នន័យអំពីក្រុមហ៊ុនដែលបានចុះបញ្ជី។ ការណ៍នេះ អនុញ្ញាតឲ្យអ្នកប្រើប្រាស់ ទទួលបាននូវព័ត៌មានមូលដ្ឋានអំពីក្រុមហ៊ុន ដូចជាសញ្ជាតិរបស់ប្រធានក្រុមហ៊ុន អាសយដ្ឋាននៃការចុះបញ្ជី និងការធ្វើវិសោធនកម្មនានានៅពេលក្រោយមកដំណោះស្រាយស្តីពីម្ចាស់ភាគហ៊ុន និងអ្វីផ្សេងៗទៀត។ ព័ត៌មានទាំងនេះ មានតម្លៃខ្លាំងណាស់សម្រាប់ក្រុមនានា រួមមានអ្នកសារព័ត៌មាន និងអង្គការនានាដែលធ្វើសេចក្តីរាយការណ៍ស្តីពីកម្ពុជា។ ឧទារហណ៍៖ អង្គការ លីកាដូ បានប្រើប្រាស់ព័ត៌មានទាំងនេះសម្រាប់ធ្វើការវិភាគអំពីការផ្តល់ដីសម្បទាន ដែលត្រូវបានចេញផ្សាយកាលពីខែមុន ក៏ដូចជាអង្គការ Global Witness ក៏បានប្រើប្រាស់ព័ត៌មានទាំងនេះនៅពេលធ្វើការសិក្សាស្រាវជ្រាវ និងចេញរបាយការណ៍ស៊ើបអង្កេតរបស់ខ្លួនស្តីពី “អ្នកជំនួញកៅស៊ូ” ឬ “Rubber Barons” ដែលត្រូវបានចេញផ្សាយកាលពីឆ្នាំ ២០១៣។
ក៏ប៉ុន្តែ កាលពីខែមេសា ឆ្នាំ២០១៥ ក្រសួងបានធ្វើបច្ចុប្បន្នភាពគេហទំព័ររបស់ខ្លួន ដោយបែរជាកាត់បន្ថយនូវតម្លាភាពនៃព័ត៌មានអំពីក្រុមហ៊ុនដែលបានចុះបញ្ជីរបស់ខ្លួនទៅវិញ។ គេហទំព័រនេះ បានរឹតត្បិតទិន្នន័យនៃការចុះបញ្ជី ដោយបង្កើតឲ្យមានការចុះឈ្មោះអ្នកចូលប្រើប្រាស់ និងមានដំណើរការចុះឈ្មោះដែលមិនមានការគិតកម្រៃ ហើយកាត់បន្ថយទំហំព័ត៌មានដែលមានបានមកពីការស្វែងរកក្នុងគេហទំព័រនេះ នៅត្រឹមតែបីចំនុចប៉ុណ្ណោះគឺ៖ ឈ្មោះក្រុមហ៊ុន ឈ្មោះប្រធានក្រុមហ៊ុន និងលេខទូរស័ព្ទ។ ការធ្វើបែបនេះ អាជ្ញាធររដ្ឋរឹតតែធ្វើឲ្យបាត់បង់នូវតម្លាភាព ដែលមានតិចតួចស្រាប់ក្នុងកិច្ចការងាររបស់ខ្លួនថែមទៀត។
ការចុះបញ្ជីក្រុមហ៊ុន គួរតែបង្ហាញជាសាធារណៈ និងងាយស្រួលស្វែងរក។ ក្រុមហ៊ុនគឺជាស្ថាប័នស្របច្បាប់ ដែលមានទំនាក់ទំនងនិងមានឥទ្ធិលដល់សង្គម អញ្ចឹងហើយបុគ្គលគ្រប់គ្នាគួរតែអាចស្វែងរកបានថាតើគួរទាក់ទងក្រុមហ៊ុនទាំងនោះនៅឯណា និងតើអ្នកណាជាម្ចាស់ក្រុមហ៊ុនពិតប្រាកដ។ ដូចគ្នាដែរ ក្រុមអ្នកដែលធ្វើការស្រាវជ្រាវដើម្បីប្រយោជន៍សាធារណៈ តែងតែត្រូវការព័ត៌មានលំអិតជាមូលដ្ឋានអំពីក្រុមហ៊ុន ដើម្បីកំណត់អំពីភាពស្របច្បាប់ និងសកម្មភាពនានារបស់ក្រុមហ៊ុនទាំងនោះ។ លើសពីនេះ ការសម្រេចចិត្តរបស់ក្រសួងក្នុងការកាត់បន្ថយកម្រិតនៃតម្លាភាពរបស់ខ្លួន នឹងមិនត្រឹមតែមានផលប៉ះពាល់ដល់វិស័យដែលធ្វើការងារមិនយកប្រាក់កម្រៃប៉ុណ្ណោះទេ ហើយថែមទាំងធ្វើឲ្យអ្នកវិនិយោគិនឯកជនចាកចេញនៅពេលមានការស៊ើបអង្កេតម៉ត់ចត់ទៀតផង។
អង្គការ លីកាដូ បានសរសេរលិខិតមកកាន់ក្រសួងពាណិជ្ជកម្ម កាលពីថ្ងៃទី២៧ ខែឧសភា ឆ្នាំ២០១៥ ដើម្បីសាកសួរអំពីមូលហេតុនៃការដកចេញនូវព័ត៌មាន។ មកទល់ពេលនេះ អង្គការ លីកាដូ មិនទាន់បានទទួលលិខិតឆ្លើយតបណាមួយនៅឡើយទេ។
លោក អំ សំអាត អ្នកសម្របសម្រួលបច្ចេកទេសស៊ើបអង្កេតនៃអង្គការ លីកាដូ បានមានប្រសាសន៍ថា៖ “សេចក្តីសម្រេចរបស់ក្រសួងពាណិជ្ជកម្ម ក្នុងការកាត់បន្ថយព័ត៌មានដែលអាចស្វែងរកបានជាសាធារណៈអំពីការចុះបញ្ជីក្រុមហ៊ុននៅក្នុងគេហទំព័រក្រសួង គឺជាស្ថានភាព ចាញ់-ចាញ់ ដែលធ្វើឲ្យប៉ះពាល់ទាំងវិស័យមិនរកប្រាក់ចំណេញ និងវិស័យឯកជន”។ លោកបានបន្តទៀតថា៖ “ការមិនសូវមានការត្រួតពិនិត្យ កង្វះតម្លាភាព និង គណនេយ្យភាពរបស់ក្រុមហ៊ុន រួមចំណែកធ្វើឲ្យមានការរំលោភបំពាននៅក្នុងវិស័យដីធ្លី ការងារ និងវិស័យផ្សេងទៀត ហើយនឹងធ្វើឲ្យថយចុះនូវចំនួននៃក្រុមហ៊ុនវិនិយោគដែលគេមានការគ្រប់គ្រងបានល្អសមស្រប”។
អង្គការ លីកាដូ សូមសំណូមពរដល់ក្រសួង សូមលោកមេត្តាពិចារណាឡើងវិញ ហើយយ៉ាងហោចណាស់ គួរតែត្រឡប់ទៅរកកម្រិតនៃតម្លាភាព និងការដាក់បង្ហាញនូវព័ត៌មានដែលក្រសួងមានលើគេហទំព័រពីមុនមក។
សម្រាប់ព័ត៌មានបន្ថែម សូមទាក់ទង៖
▪ ណាលី ពីឡូក នាយិកាអង្គការ លីកាដូ ទូរស័ព្ទលេខ៖ ០១២ ៨០៣ ៦៥០
▪ លោក អំ សំអាត អ្នកសម្របសម្រួលបច្ចេកទេសស៊ើបអង្កេតនៃអង្គការ លីកាដូ ទូរស័ព្ទលេខ៖ ០១២ ៣២៧ ៧៧០
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ឯកសារទាក់ទង
