អង្គការ លីកាដូ អំពាវនាវឲ្យមានការបិទមណ្ឌលព្រៃស្ពឺជាបន្ទាន់បន្ទាប់ពីមនុស្សពីរនាក់បានទទួលមរណភាព
ចេញផ្សាយ ថ្ងៃទី៣ ខែវិច្ឆិកា ឆ្នាំ២០១៥អង្គការ លីកាដូ សូមអំពាវនាវដល់អាជ្ញាធរពាក់ព័ន្ធ សូមមេត្តាស៊ើបអង្កេតការស្លាប់របស់មនុស្សពីរនាក់ និងសូមអំពាវនាវម្តងហើយម្តងទៀត សូមមេត្តាបិទមណ្ឌលព្រៃស្ពឺ និងមណ្ឌលដទៃទៀត ដែលត្រូវបានប្រើប្រាស់ក្រៅប្រព័ន្ធច្បាប់ព្រហ្មទណ្ឌ បន្ទាប់ពីមានមនុស្សពីរនាក់នោះបានទទួលមរណភាព នៅពេលដែលត្រូវបានគេឃុំខ្លួនដោយខុសច្បាប់នៅក្នុងមណ្ឌលព្រៃស្ពឺ “មណ្ឌលសង្គមកិច្ច” ក្រោយពេលអ្នកទាំងពីរត្រូវបានចាប់ខ្លួនដោយមិនប្រក្រតីមុនពិធីបុណ្យភ្ជុំបិណ្ឌកន្លងទៅ។ នេះ ជាការស្លាប់លើកទីពីរ និងទីបីហើយ ដែលបានកើតឡើងតែក្នុងរយៈពេលតិចជាងមួយឆ្នាំប៉ុណ្ណោះ។
យោងតាមសាក្សីជាច្រើនដែលដឹងអំពីការស្លាប់មុនគេ បុរសម្នាក់ អាយុចន្លោះពី ៤០ ទៅ ៥០ឆ្នាំ ដែលត្រូវបានគេរាយការណ៍ថាគាត់កំពុងមានជំងឺ បានលង់ទឹកស្លាប់ក្នុងអំឡុងពេលពិធីបុណ្យភ្ជុំបិណ្ឌ (ថ្ងៃទី១១ ដល់ ១៣ ខែតុលា) នៅក្នុងស្រះតូចមួយក្នុងបរិវេណមណ្ឌលព្រៃស្ពឺនោះ។ ជាច្រើនថ្ងៃបន្ទាប់មក ស្ត្រីម្នាក់មានអាយុជាង ៣០ ឆ្នាំ (ដែលត្រូវបានឃុំខ្លួនជាមួយស្វាមីរបស់នាងនៅក្នុងមណ្ឌលនោះដែរ) បានទទួលមរណភាពនៅល្ងាចថ្ងៃទី ១៦ ខែតុលា។ ការស៊ើបអង្កេតរបស់អង្គការ លីកាដូ បានបង្ហាញថាមូលហេតុនៃការស្លាប់របស់នាង គឺមិនទាន់ត្រូវបានរកឃើញនៅមុនពេលបូជាសពរបស់នាងនៅឡើយនោះទេ។
ការរំលោភបំពានជាលក្ខណៈប្រព័ន្ធដែលត្រូវបានកត់ត្រាទុកយ៉ាងល្អ និងការមិនយកចិត្តទុកដាក់ដែលជាបទល្មើសព្រហ្មទណ្ឌ ដែលត្រូវបានកើតឡើងនៅក្នុងមណ្ឌលព្រៃស្ពី គឺជាមូលហេតុដោយផ្ទាល់លើការស្លាប់របស់មនុស្សបីនាក់នៅក្នុងអំឡុងពេល ១១ ខែចុងក្រោយនេះ
លោក អំ សំអាត អ្នកសម្របសម្រួលបច្ចេកទេសស៊ើបអង្កេតនៃអង្គការ លីកាដូ បានមានប្រសាសន៍ថា៖ “ការរំលោភបំពានជាលក្ខណៈប្រព័ន្ធដែលត្រូវបានកត់ត្រាទុកយ៉ាងល្អ និងការមិនយកចិត្តទុកដាក់ដែលជាបទល្មើសព្រហ្មទណ្ឌ ដែលត្រូវបានកើតឡើងនៅក្នុងមណ្ឌលព្រៃស្ពី គឺជាមូលហេតុដោយផ្ទាល់លើការស្លាប់របស់មនុស្សបីនាក់នៅក្នុងអំឡុងពេល ១១ ខែចុងក្រោយនេះ ប៉ុន្តែមណ្ឌលនេះនៅតែមានការបន្តបើកនៅឡើយ”។ លោក សំអាត បានបន្តទៀតថា៖ “ការមិនបានបិទមណ្ឌលនេះជាស្ថាពរ នឹងអាចបណ្តាលឲ្យមនុស្សដែលងាយរងគ្រោះបំផុតនៅក្នុងរាជធានីភ្នំពេញទទួលមរណភាពជាច្រើននាក់បន្តទៀត”។
អង្គការ លីកាដូ មិនអាចទទួលបានព័ត៌មានច្បាស់លាស់ថាតើមានមនុស្សប៉ុន្មាននាក់ ដែលត្រូវបានឃុំខ្លួនក្នុងមណ្ឌលព្រៃស្ពឺនោះទេ។ កាលពីដើមឆ្នាំនេះ នគរបាលបានប្រមូលមនុស្សគ្មានផ្ទះសម្បែងរាប់រយនាក់នៅក្នុងរាជធានីភ្នំពេញ និងឃុំខ្លួនអ្នកទាំងនោះនៅក្នុងមណ្ឌលព្រៃស្ពឺ នៅក្នុងយុទ្ធនាការ “បោសសំអាតផ្លូវ”។ អ្នកដែលត្រូវបាននគរបាលប្រមូល រួមមានអ្នកដែលគ្មានផ្ទះសម្បែង អ្នកសុំទាន អ្នកប្រើប្រាស់គ្រឿងញៀន និងអ្នកបំរើសេវាកំសាន្ត ដែលអ្នកទាំងនោះត្រូវបានបញ្ជូនទៅទីនោះដើម្បី “បណ្តុះបណ្តាល និងអប់រំ”។
ការប្រមូលមនុស្សទាំងនេះ ជាទូទៅត្រូវបានធ្វើឡើងដោយកម្លាំងនគរបាលចម្រុះ កងកម្លាំងសន្តិសុខ “រក្សាសណ្តាប់ធ្នាប់សាធារណៈ” និងកងរាជអាវុធហត្ថ ក្រោមបញ្ជាពីសាលារាជធានីភ្នំពេញ និងលោកអភិបាលក្រុងដែលមានអំណាចលើមណ្ឌលព្រៃស្ពឺ។ តាមការរាយការណ៍ ការប្រមូលមនុស្សទាំងនេះ អាចត្រូវបានធ្វើឡើងដោយមានការវាយដំ ការរំលោភបំពានផ្លូវភេទ និងការជំរិតយកប្រាក់ពីនគរបាល។
លោក អំ សំអាត បានមានប្រសាសន៍បន្តថា៖ “ការឃុំខ្លួននៅក្រៅប្រព័ន្ធតុលាការក្នុងមណ្ឌលព្រៃស្ពឺនេះ ត្រូវបានផ្អាកជាច្រើនដង ក្រោយពេលមានរបាយការណ៍ជាច្រើនអំពីការរំលោភបំពានកាលពីពេលមុន”។ លោក បានបន្តទៀតថា៖ “ដោយមិនយកចិត្តទុកដាក់ អាជ្ញាធរនៅតែបន្តប្រើប្រាស់មណ្ឌលនេះ ហើយការធ្វើឲ្យមានហេតុការណ៍នៃការស្លាប់មនុស្សដល់ទៅបីនាក់នេះ បង្ហាញថានេះជា ‘សកម្មភាពដូចសព្វដង’ ”។
សម្រាប់ព័ត៌មានបន្ថែម សូមទាក់ទង៖
▪ លោក អំ សំអាត អ្នកសម្របសម្រួលបច្ចេកទេសស៊ើបអង្កេតនៃអង្គការ លីកាដូ, ទូរស័ព្ទលេខ៖ ០១២ ៣២៧ ៧៧០
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- សិទិ្ធមនុស្សទូទៅ មណ្ឌលសង្គមកិច្ច និងកែប្រែ