កម្ពុជា៖ សហភាពអឺរ៉ុបទាមទារឲ្យបញ្ឃប់ការធ្វើទុក្ខបុកម្នេញលើគណបក្សជំទាស់អំឡុងពេលកិច្ចពិភាក្សាពីបញ្ហាសិទ្ធិមនុស្ស
ចេញផ្សាយ ថ្ងៃទី២៩ ខែមេសា ឆ្នាំ២០១៦; ក្រុមសង្គមស៊ីវិលអង្គការសហព័ន្ធសិទ្ធិមនុស្សអន្តរជាតិ (FIDH) និងសមាជិករួមមាន សមាគមអាដហុក ការពារសិទិ្ធមនុស្សនិងអភិវឌ្ឍន៍នៅកម្ពុជា (ADHOC) និងអង្គការសម្ព័ន្ធខ្មែរជំរឿននិងការពារសិទ្ធិមនុស្ស លីកាដូ (LICADHO) បានលើកឡើងថា សហភាពអឺរ៉ុបត្រូវតែប្រើបា្រស់ការជួបពិភាក្សាពីបញ្ហាសិទ្ធិមនុស្សជាមួយកម្ពុជានាពេលខាងមុខនេះដើម្បីទាមទារអោយអាជ្ញាធរបញ្ឍប់ការធ្វើទុក្ខបុកម្នេញ ការចាប់ខ្លួនដោយមិនត្រឹមត្រូវ និង ការឃុំខ្លួនតំណាងរាស្រ្ត សមាជិក និង អ្នកគាំទ្រគណបក្សប្រឆាំង ។ កិច្ចសន្ទនាពីបញ្ហាសិទ្ធិមនុស្សរវាងកម្ពុជានិងសហភាពអឺរ៉ុបនៅឆ្នាំនេះ ត្រូវបានកំណត់ថានឹងត្រូវធ្វើឡើងនៅរាជធានីភ្នំពេញចាប់ពី ថ្ងៃទី២ ដល់ ទី៤ ខែឧសភា។
លោក ការីម ឡាហីដឌី (Karim Lahidji) ប្រធានអង្គការ FIDH បានមានប្រសាសន៍ថា៖ “សហភាពអឺរ៉ុបគួរតែផ្ញើរសារឲ្យបានច្បាស់ជូនទៅរាជរដ្ឋាភិបាលសម្តេចនាយករដ្ឋមន្ត្រីថា ការធ្វើទុក្ខបុកម្នេញអ្នកប្រឆាំងផ្នែកនយោបាយត្រូវតែបញ្ឃប់ ហើយអ្នកជាប់ឃុំទាំងអស់ ត្រូវតែត្រូវបានដោះលែងជាបន្ទាន់ និងដោយគ្មានលក្ខខណ្ឌ”។
ជាមួយនឹងការអំពាវនាវនេះ អង្គការ FIDH អាដហុក និង លីកាដូ បានចេញផ្សាយនូវ កម្រងព្រឹត្តិការណ៍ ដែលនិយាយអំពីការរំលោភបំពានឥតឈប់ឈរទៅលើតំណាងរាស្រ្ត សមាជិក និងអ្នកគាំទ្រគណបក្សជំទាស់របស់អាជ្ញាធរកម្ពុជា និងគណបក្សកាន់អំណាច។
ចាប់តាំងពីខែកក្កដា ឆ្នាំ២០១៥ សមាជិក អ្នកគាំទ្រ និងតំណាងរាស្រ្តជាប់ឆ្នោតនៃគណបក្សជំទាស់ដ៏សំខាន់នៅកម្ពុជា គឺគណបក្សសង្គ្រោះជាតិ (CNRP) និងគណបក្សសមរង្ស៊ី បានប្រឈមនឹងការរំលោភបំពាន ការវាយប្រហារ ការចាប់ខ្លួនមិនត្រឹមត្រូវ និងការឃុំខ្លួនកាន់តែច្រើនឡើងៗ។ មកទល់ពេលនេះ មនុស្សចំនួន ១៧នាក់ ក្នុងចំណោមអ្នកទាំងនោះ កំពុងជាប់ក្នុងពន្ធនាគារ (នៅក្នុងនោះ ១១នាក់ កំពុងជាប់ឃុំក្នុងពន្ធនាគារពីចន្លោះ៧ទៅ២០ឆ្នាំ បន្ទាប់ពីត្រូវបានផ្តន្ទាទោសក្រោមហេតុផលនយោបាយ)។
លោក ធន សារាយ ប្រធានអង្គការ អាដហុក បានមានប្រសាសន៍ថា៖ “ការគាំទ្ររបស់សហភាពអឺរ៉ុបមកលើប្រទេសកម្ពុជាក្នុងដំណើរការលទ្ធិប្រជាធិបតេយ្យឆ្ពោះទៅរកការបោះឆ្នោតនាពេលខាងមុខគឺមានសារសំខាន់ណាស់។ នេះជាហេតុផលដែលការបន្តរំលោភបំពាន និងការវាយប្រហារទៅលើគណបក្សជំទាស់កាន់តែខ្លាំងឡើងៗ ត្រូវតែយកទៅជជែកនៅក្នុងរបៀបវារៈនៃជំនួបពិភាក្សារវាងសហភាពអឺរ៉ុបនិងកម្ពុជា”។
ណាលី ពីឡូក នាយិកាអង្គការលីកាដូ បានមានប្រសាសន័ថា៖ “សហភាពអឺរ៉ុបត្រូវតែធានាថាការជួបពិភាក្សាជាមួយរាជរដ្ឋាភិបាល គឺត្រឹមតែការនិយាយពាក្យសម្តីនោះទេ ប៉ុន្តែត្រូវនាំឲ្យមានសកម្មភាពប្រកបដោយអត្ថន័យពីសំណាក់អាជ្ញាធរផងដែរ។ អ្វីដែលតិចជាងការដោះលែងតំណាងរាស្រ្ត សមាជិក និងអ្នកគាំទ្រគណបក្សប្រឆាំងទាំង១៧រូប នឹងធ្វើឲ្យមានឥទ្ធិពលអវិជ្ជមានទៅដល់ដំណើរការរីកចម្រើនឆ្ពោះទៅរកលទ្ធិប្រជាធិបតេយ្យនៅកម្ពុជា។”
សម្រាប់ព័ត៌មានបន្ថែម សូមទាក់ទង៖
▪ សហព័ន្ធសិទ្ធិមនុស្សអន្តរជាតិ (FIDH)៖ លោក អ៊ិនឌ្រៀ ចោជហ្គេតា (Andrea Giorgetta), +66 886 117 722 (បាងកក)
▪ លីកាដូ (LICADHO)៖ លោកស្រី ណាលីពីឡូគ (Naly Pilorge), +855 012 803 650