សេចក្តីថ្លែងការណ៍រួម៖ អង្គការសង្គមស៊ីវិលទាមទារឲ្យមានការស៊ើបអង្កេតឯករាជ្យជុំវិញឃាតកម្មលើលោក កែម ឡី ក្រោយពីការប្រកាសសាលក្រមផ្តន្ទាទោស

ចេញផ្សាយ ថ្ងៃទី២៣ ខែមីនា ឆ្នាំ២០១៧; ក្រុមសង្គមស៊ីវិល

បីសប្តាហ៍បន្ទាប់ពីសវនាការជំនុំជម្រះរយៈពេល ៤ ម៉ោង នៅថ្ងៃនេះ សាលាដំបូងរាជធានីភ្នំពេញបានសម្រេចផ្តន្ទាទោសជនជាប់ចោទឈ្មោះ អឿត អាង ដែលហៅក្រៅថា ‘ជួប សម្លាប់’ ពីបទមនុស្សឃាតគិតទុកជាមុនលើលោក កែម ឡី ដែលជាអ្នកវិភាគនយោបាយ និងពីបទកាន់កាប់អាវុធដោយគ្មានការអនុញ្ញាត តាមមាត្រា ២០០ និងមាត្រា ៤៩០ នៃក្រមព្រហ្មទណ្ឌកម្ពុជា។ ប្រធានក្រុមប្រឹក្សាជំនុំជម្រះ លោកចៅក្រម លាង សំណាត់ បានប្រកាសសាលក្រមផ្តន្ទាទោសជនជាប់ចោទ អឿត អាង ឲ្យជាប់ពន្ធនាគារអស់មួយជីវិត។

ថ្វីបើមានភស្តុតាងគួរឲ្យជឿជាក់ថា អឿត អាង គឺជាខ្មាន់កាំភ្លើង ដែលបានបាញ់ និងសម្លាប់លោក កែម ឡី យ៉ាងណាក្តី កង្វះតម្លាភាពក្នុងការស៊ើបអង្កេតលើការស្លាប់របស់លោក កែម ឡី នីតិវិធីជំនុំជម្រះខ្លីពេក និងការខកខានក្នុងការស៊ើបអង្កេតឲ្យបានពេញលេញជុំវិញមូលហេតុ អ្នកសមគំនិត និងស្ថានភាពនៃការចាប់ខ្លួន អឿត អាង ដែលបញ្ហាទាំងអស់នេះបង្កជាក្តីបារម្ភជាខ្លាំងអំពីភាពពេញលេញនៃដំណើរការព្រហ្មទណ្ឌលើករណីមួយនេះ។ ដោយសារតែការស៊ើបអង្កេតមិនគ្រប់គ្រាន់ជុំវិញឃាតកម្មលោក កែម ឡី ក៏ដូចជានីតិវិធីសវនាការជំនុំជម្រះ យើងខ្ញុំជាអង្គការសង្គមស៊ីវិលដែលមានរាយនាមខាងក្រោម សូមអំពាវនាវឲ្យបង្កើតគណៈកម្មការស៊ើបអង្កេតឯករាជ្យមួយ ក្នុងការស៊ើបអង្កេតពីស្ថានភាពទាំងមូលនៃឃាតកម្មនេះ ដើម្បីឲ្យស្របតាមការអនុវត្តល្អបំផុតជាអន្តរជាតិ។

លោក កែម ឡី ដែលជាអ្នកវិភាគនយោបាយដ៏លេចធ្លោ ត្រូវបានបាញ់សម្លាប់នៅព្រឹកថ្ងៃទី១០ ខែកក្កដា នៅក្នុងហាងកាហ្វេនៃស្ថានីយ៍ប្រេងឥន្ធនៈមួយនៅកណ្តាលរាជធានីភ្នំពេញ។ ភ្លាមៗក្រោយការបាញ់សម្លាប់ ជនសង្ស័យ អឿត អាង ត្រូវបានចាប់ខ្លួន នៅចម្ងាយប្រហែលជាពីរគីឡូម៉ែត្រពីកន្លែងកើតហេតុ និងក្រោយមកត្រូវបានចោទប្រកាន់ពីបទមនុស្សឃាតគិតទុកជាមុននៅថ្ងៃទី១២ ខែកក្កដា។ ក្រោយពីការចាប់ខ្លួនដំបូង អឿត អាង បានប្រាប់ថាខ្លួនឈ្មោះ ‘ជួប សម្លាប់’ និងបានសារភាពចំពោះឃាតកម្មនេះ។ អឿត អាង បានអះអាងថាការសម្លាប់នេះកើតឡើងដោយសារតែជនរងគ្រោះជំពាក់បំណុលមិនសងចំនួន ៣.០០០ ដុល្លារ ដែលការលើកឡើងនេះត្រូវបានក្រុមគ្រួសាររបស់លោក កែម ឡី និងភរិយារបស់ អឿង អាង បដិសេធចោល។ នៅក្នុងខែធ្នូ អ្នកនាំពាក្យក្រសួងមហាផ្ទៃមួយរូបបានលើកឡើងថា ក្រសួងផ្ទាល់ក៏មិនជឿថាការលើកឡើងរបស់ អឿត អាង នេះជាការពិតដែរ។ ទោះជាយ៉ាងណាក្តី ការស៊ើបអង្កេតលើឃាតកម្លោក កែម ឡី ត្រូវបានបិទបញ្ចប់នៅក្នុងខែធ្នូ ឆ្នាំ២០១៦ ដោយមានជនសង្ស័យតែម្នាក់គត់គឺ អឿត អាង។

លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា មានប្រសាសន៍ថា៖ ‹‹កង្វះឯករាជ្យនៃការស៊ើបអង្កេតបង្កើតបានជាវប្បធម៌និទណ្ឌភាពដែលចេះតែកើតមាននៅក្នុងប្រព័ន្ធយុត្តិធម៌កម្ពុជា។ ដូចជាមិនមែនជារឿងគួរឲ្យភ្ញាក់ផ្អើលទេដែលករណីបែបនេះនឹងធ្វើឲ្យមានការបាត់បង់ទំនុកចិត្តជាបន្តទៀតលើស្ថាប័ននានានោះ។››

នៅក្នុងសវនាការជំនុំជម្រះលើ អឿត អាង រយៈពេល ៤ ម៉ោងកាលពីថ្ងៃទី១ ខែមីនា អឿត អាង នៅតែថាខ្លួនមានឈ្មោះ ជួប សម្លាប់ ដដែល។ នៅអំឡុងសក្ខីកម្ម អឿត អាង ក៏នៅតែអះអាងថាខ្លួនបានបាញ់សម្លាប់លោក កែម ឡី ដោយសារជំពាក់បំណុលមិនសង។ ចៅក្រមជំនុំជម្រះមិនបានដេញដោលការអះអាងនេះទេ ហើយចៅក្រមហាក់ដូចជាបានទទួលស្គាល់ថា អឿត អាង គឺជាជនដៃដល់តែម្នាក់គត់ ថ្វីបើការលើកឡើងរបស់ជននេះខ្វះភាពគួរឲ្យជឿជាក់ និងថ្វីបើមានសេចក្តីថ្លែងការណ៍ផ្សេងៗពីគ្រួសារ និងមិត្តភ័ក្តិរបស់ អឿត អាង នៅក្នុងរយៈពេលជាច្រើនខែមុនដល់សវនាការជំនុំជម្រះដែលបានបង្កឲ្យមានមន្ទិលសង្ស័យជាច្រើនជុំវិញការការពន្យល់ និងការលើកឡើងរបស់ជនសង្ស័យ។

សវនាការជំនុំជម្រះបានបង្ហាញពីខ្សែវីដេអូដកស្រង់ចេញពីវីដេអូកាមេរ៉ាសុវត្ថិភាព ដែលយកមកពីស្ថានីយ៍ប្រេងឥន្ធនៈកាល់តិច ដែលបង្ហាញត្រឹមតែព្រឹត្តិការណ៍ខ្លីក្នុងអំឡុងពេល និងក្រោយការបាញ់សម្លាប់ ប៉ុន្តែមិនបានបង្ហាញអំឡុងពេលភ្លាមៗមុនពេលបាញ់ប្រហារនោះទេ។ នៅក្នុងសវនាការក៏មានបង្ហាញវីដេអូកាមេរ៉ាសុវត្ថិភាពបន្ថែមទៀត ដែលបានបង្ហាញពីការរត់របស់ជនសង្ស័យ អឿត អាង តាមចិញ្ចើមមហាវិថីម៉ៅសេទុង ក្រោយពីការបាញ់ប្រហារ ដោយមានម៉ូតូមួយគ្រឿងដឹកបុរសម្នាក់ដែលមានកាន់កាំភ្លើងវែងមួយដើមយ៉ាងចំហតាមពីក្រោយជនសង្ស័យពេលកំពុងរត់។ ដល់កន្លែងមួយនៅក្នុងវីដេអូកាមេរ៉ាសុវត្ថិភាព ក៏ឃើញមានម៉ូតូធំមួយទៀត ដែលមានស្លាកសញ្ញានគរបាលជាតិ បានជិះផ្លាស់ប្តូរទិសដៅរបស់ខ្លួនដើម្បីបកមកតាម អឿត អាង ផងដែរ។ អឿត អាង ក៏លោតឡើងជិះម៉ូតូធំនេះមួយភ្លែតមុនចុះមកវិញ និងបន្តរត់តាមផ្លូវទៀត។ ឥរិយាបថដ៏ចម្លែកបែបនេះនៅមិនទាន់មានការពន្យល់ណាមួយសោះ។

អឿត អាង បានផ្តល់សក្ខីកម្មថា ខ្លួនបានជួបលោក កែម ឡី តែម្តងគត់នៅភោជនីយដ្ឋានមួយក្នុងរាជធានីភ្នំពេញ ដែលបានរៀបចំដោយអ្នកស្គាល់ម្នាក់មកពីប្រទេសថៃ ហើយដែល អឿត អាង ប្រាប់ថាជននោះឈ្មោះ ‘ពូ លីស’ ដែលនៅគ្រានោះហើយ ខ្លួនបានឲ្យលុយចំនួន ៣.០០០ ដុល្លារទៅលោក កែម ឡី។ អឿត អាង ក៏បានអះអាងដែរថា ខ្លួនបានទិញកាំភ្លើងដែលប្រើសម្រាប់បាញ់សម្លាប់លោក កែម ឡី ពីជនជាតិថៃម្នាក់ឈ្មោះ ‘ចាក់’ នៅប្រទេសថៃ។ បុរសទាំងពីរនេះមិនត្រូវបានកោះហៅឲ្យមកធ្វើជាសាក្សីទេ ទោះបីមានសេចក្តីរាយការណ៍ថាអ្នកទាំងពីរនេះក៏ស្ថិតនៅក្រោមការស៊ើបអង្កេតពាក់ព័ន្ធនឹងឃាតកម្មនេះដែរ។

សាក្សីជាច្រើន ភាគច្រើននគរបាល បានអានសេចក្តីថ្លែងការណ៍របស់សាក្សីយ៉ាងសង្ខេប។ នៅក្នុងសវនាការ ពុំមានការសួរដេញដោលឲ្យបានស៊ីជម្រៅទេ។

លោក មឿន តុលា នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស មានប្រសាសន៍ថា៖ ‹‹តុលាការគួរតែជជីកសួរឲ្យបានដិតដល់ក្នុងការលាតត្រដាងការពិត។ ប៉ុន្តែភស្តុតាងដែលបានបង្ហាញ និងវីដេអូកាមេរ៉ាសុវត្ថិភាពដែលអយ្យការមិនបានលើកយកមកបង្ហាញ បង្កើតបានជាសំណួរច្រើនសម្រាប់សាធារណជន ជាជាងចម្លើយដែលតុលាការមិនបានជជីកសួរឲ្យអស់លើបញ្ហានោះ។››

លោកស្រី ណាលី ពីឡូក នាយិការងអង្គការលីកាដូ មានប្រសាសន៍ថា៖ ‹‹ការស៊ើបអង្កេតនេះនៅមិនទាន់គ្រប់គ្រាន់នៅឡើយទេ ហើយសវនាការជំនុំជម្រះនេះគឺគ្រាន់តែជាការបង្គ្រប់កិច្ច។ យើងខ្ញុំទាមទារឲ្យមានការស៊ើបអង្កេតឯករាជ្យដោយមានជំនួយពីអន្តរជាតិក្នុងការស៊ើបអង្កេតលើឃាតកម្មលោក កែម ឡី ដែលនឹងជាមធ្យោបាយតែមួយគត់ក្នុងការស្វែងរកឲ្យបាននូវយុត្តិធម៌ដល់គ្រួសារ និងមិត្តភ័ក្តិរបស់ជនរងគ្រោះ។››

កាតព្វកិច្ចក្នុងការស៊ើបអង្កេតប្រកបដោយប្រសិទ្ធភាព ក៏ដូចជាដើម្បីធានា ចារីទាំងអស់នឹងត្រូវទទួលទោសចំពោះមុខច្បាប់ គឺជាធាតុផ្សំដ៏សំខាន់នៃកាតព្វកិច្ចរបស់រដ្ឋក្នុងការគោរពសិទ្ធិរស់រានមានជីវិត ដែលមានចែងក្នុងមាត្រា ៣២ នៃរដ្ឋធម្មនុញ្ញនៃព្រះរាជាណាចក្រកម្ពុជា មាត្រា ៣ នៃសេចក្តីប្រកាសជាសកលស្តីពីសិទ្ធិមនុស្ស និងនិងមាត្រា ៦ នៃកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ ដែលកម្ពុជាជារដ្ឋភាគី។ ដោយសារតែ កង្វះចន្លោះជាច្រើនទាក់ទិននឹងការទទួលខុសត្រូវរបស់តុលាការក្នុងការពិនិត្យភស្តុតាងទាំងឡាយឲ្យបានហ្មត់ចត់នៅចំពោះមុខ និងដើម្បីធានាពីភាពស្របគ្នាជាមួយនឹងការអនុវត្តល្អបំផុតជាអន្តរជាតិ យើងខ្ញុំជាអង្គការសង្គមស៊ីវិលដែលមានរាយនាមខាងក្រោម សូមអំពាវនាវឲ្យបង្កើតគណៈកម្មការស៊ើបអង្កេតឯករាជ្យមួយ ដើម្បីស៊ើបអង្កេតលើឃាតកម្មលោកបណ្ឌិត កែម ឡី។ គណៈកម្មការស៊ើបអង្កេតនេះគួរមានសមាសភាពមកពីអ្នកជំនាញអន្តរជាតិក្រៅពីប្រទេសកម្ពុជា ហើយមានសិទ្ធិពិនិត្យមើលលើភស្តុតាងទាំងអស់ដែលមាន រួមទាំងវីដេអូកាមេរ៉ាសុវត្ថិភាពដែលថតពីសកម្មភាពនៃអំពើឃាតកម្មនេះទាំងអស់។ ដោយសារតែការស៊ើបអង្កេតដំបូង និងសវនាការដំណើរការទៅមិនទាន់គ្រប់គ្រាន់ដូចដែលបានរៀបរាប់ខាងលើ ឥឡូវនេះ គណៈកម្មការស៊ើបអង្កេតឯករាជ្យគឺផ្តល់ជាមធ្យោបាយតែមួយគត់ ដែលអាចការពារឯករាជ្យភាព និងតម្លាភាពនៃការស៊ើបអង្កេត ដោយស្របតាមកាតព្វកិច្ចរបស់កម្ពុជាក្នុងការស៊ើបអង្កេតឲ្យបានពេញលេញពាក់ព័ន្ធនឹងការរំលោភបំពានសិទ្ធិរស់រានមានជីវិត និងចុងក្រោយដើម្បីស្វែងរកយុត្តិធម៌ពិតប្រាកដជូនដល់ក្រុមគ្រួសាររបស់លោកបណ្ឌិត កែម ឡី។

សេចក្តីថ្លែងការណ៍នេះគាំទ្រដោយ៖
1. សហគមន៍កៅពីរ
2. ក្រុមការងារដើម្បីដោះស្រាយទំនាស់ (ACT)
3. សហគមន៍អារ៉ែង
4. សហគមន៍បន្ទាយស្រី
5. សហគមន៍បឹងប្រាំ
6. សហគមន៍បឹងកក់
7. សហគមន៍បឹងត្របែក
8. សហគមន៍បុរីកីឡា
9. អង្គការព្រះពុទ្ធសាសនាសម្រាប់សន្តិភាព (BPO)
10. សហព័ន្ធសហជីពកម្មករសំណង់ និងព្រៃឈើកម្ពុជា (BWTUC)
11. អង្គការអភិវឌ្ឍន៍សម្លេងសហគមន៍ (BCV)
12. អនាគតយុវជនកម្ពុជាអាស៊ាន
13. សមាគមអភិវឌ្ឍន៍ជីវភាពពលរដ្ឋកម្ពុជា
14. មជ្ឈមណ្ឌលសិទ្ធិមនុស្សកម្ពុជា (CCHR)
15. បណ្តាញកម្មករការងារតាមផ្ទះកម្ពុជា (CDWN)
16. សហព័ន្ធសហជីព កម្មករចំណីអាហារ និងសេវាកម្មកម្ពុជា (CFSWF)
17. សមាគមអាដហុក (ADHOC)
18. សមាគមមន្រ្តីរាជការកម្ពុជា (CICA)
19. សមាគមគ្រូបង្រៀនកម្ពុជាឯករាជ្យ (CITA)
20. សម្ព័ន្ធខ្មែរជំរឿន និងការពារសិទ្ធិមនុស្ស លីកាដូ (LICADHO)
21. សហភាពការងារកម្ពុជា (CLC)
22. សហព័ន្ធសហជីពវិស័យទេសចរណ៍សេវកម្មកម្ពុជា (CTSWF)
23. បណ្តាញយុវជនកម្ពុជា (CYN)
24. មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL)
25. សហគមន៍ឆេកូ
26. សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (C.CAWDU)
27. សម្ព័ន្ធដើម្បីសុចរិតភាព និងគណនេយ្យភាពសង្គម (CISA)
28. សម្ព័ន្ធសហគមន៍កសិករកម្ពុជា (CCFC)
29. សមធម៌កម្ពុជា (EC)
30. សមាគមកសិករដើម្បីសន្តិភាព និងការអភិវឌ្ឍន៍ (FAPD)
31. សហគមន៍បណ្តាញអតីតស្ត្រីបឹងកក់
32. សមាគមខ្មែរលើ
33. ក្រុមការងារពិសេសសិទ្ធិលំនៅដ្ឋាន (HRTF)
34. IFEX
35. សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA)
36. បណ្តាញព្រះសង្ឃឯករាជ្យដើម្បីយុត្តិធម៌សង្គម (IMNSJ)
37. យុវជនជនជាតិដើមភាគតិច ឃុំប្រមេ ស្រុកត្បែងមានជ័យ ខេត្តព្រះវិហារ
38. សមាគឥន្ទ្រទេវី (IDA)
39. សមាគមយុវជនខ្មែរ (KYA)
40. សហគមន៍កោះស្រឡៅ
41. សហគមន៍ដីធ្លី ភូមិ១ ក្រុងព្រះសីហនុ
42. លីកាដូ កាណាដា
43. សហគមន៍ឡពាង
44. អង្គការមាតាធម្មជាតិ (MN)
45. អង្គការស្ពានសន្តិភាព (PBO)
46. មជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព
47. សហគមន៍ភ្នំបាត
48. សហគមន៍ភូមិ២១
49. សហគមន៍ភូមិ២២
50. សហគមន៍ភូមិ២៣
51. អង្គការពន្លកខ្មែរ
52. សហគមន៍ព្រែកតាគង់
53. សហគមន៍ព្រែកតានូ
54. សហគមន៍ព្រៃឡង់
55. បណ្តាញសហគមន៍ជនជាតិដើមភាគតិចខេត្តព្រះវិហារ
56. សហគមន៍ផ្លូវរថភ្លើង
57. សហគមន៍សាមគ្គី៤
58. សមាគមធាងត្នោត (STT)
59. សហគមន៍ SOS ព្រលានយន្តហោះអន្តរជាតិភ្នំពេញ
60. សហគមន៍ថ្មគោល
61. សហគមន៍ទួលសង្កែB
62. សហគមន៍ទួលរ៉ាដា
63. សហគមន៍ត្រពាំងអញ្ចាញថ្មី
64. សហគមន៍ទំនប់ពីរ
65. បណ្តាញព្រះសង្យយុវជនវត្តថាន់
66. គណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជា (COMFREL)

សេចក្តីថ្លែងការណ៍នេះគាំទ្រដោយ៖
១. 92 Community
២. Alliance for Conflict Transformation (ACT)
៣. Areng Valley Community
៤. Banteay Srey Community
៥. Beung Pram Land Community
៦. Boeung Kak Community
៧. Boeung Trabek Community
៨. Borei Keila Community
៩. Buddhism for Peace Organization (BPO)
១០. Building and Woodworker Trades Union Federation of Cambodia (BWTUC)
១១. Building Community Voice (BCV)
១២. CamASEAN Youth
១៣. Cambodian Development People Life Association
១៤. Cambodian Center for Human Rights (CCHR)
១៥. Cambodian Domestic Workers Network (CDWN)
១៦. Cambodian Food and Service Workers' Federation (CFSWF)
១៧. Cambodian Human Rights and Development Association (ADHOC)
១៨. Cambodian Independent Civil-Servants Association (CICA)
១៩. Cambodian Independent Teachers Association (CITA)
២០. Cambodian League for the Promotion & Defense of Human Rights (LICADHO)
២១. Cambodian Labour Confederation (CLC)
២២. Cambodian Tourism and Service Workers Federation (CTSWF)
២៣. Cambodian Youth Network (CYN)
២៤. Center for Alliance of Labor and Human Rights (CENTRAL)
២៥. Cheko Community
២៦. Coalition of Cambodian Apparel Workers Domestic Union (C.CAWDU)
២៧. Coalition for Integrity and Social Accountability
២៨. Coalition of Cambodian Farmer Community (CCFC)
២៩. Equitable Cambodia (EC)
៣០. Farmer Association for Peace and Development (FAPD)
៣១. Former Boeung Kak Women Network Community
៣២. Highlander Association
៣៣. Housing Rights Task Force (HRTF)
៣៤. IFEX
៣៥. Independent Democracy of Informal Economy Association (IDEA)
៣៦. Independent Monk Network for Social Justice
៣៧. Indigenous Youth at Brome Commune, Preah Vihear Province
៣៨. Indradevi Association
៣៩. Khmer Youth Association (KYA)
៤០. Koh Sralao Community
៤១. Land Community, I Village Preah Sihanouk Province
៤២. LICADHO Canada
៤៣. Lor Peang Community
៤៤. Mother Nature
៤៥. Peace Bridges Organization (PBO)
៤៦. People’s Centre for Development and Peace
៤៧. Phnom Bat Community
៤៨. Phum 21 Community
៤៩. Phum 22 Community
៥០. Phum 23 Community
៥១. Ponlok Khmer
៥២. Prek Takung Community
៥៣. Prek Tanou
៥៤. Prey Lang Community
៥៥. Preah Vihear Indigenous Community Network
៥៦. Railway Community
៥៧. Samaky 4 Community
៥៨. Sahmakum Teang Tnaut (STT)
៥៩. SOS International Airport Community
៦០. Thmor Kol Community (TK)
៦១. Toul Sangke B Community
៦២. Toul Rada Community
៦៣. Trapaing Anhchanh Thmey Community
៦៤. Tumnop II Community
៦៥. Wat Than Youth and Monk Network
៦៦. The Committee for Free and Fair Elections in Cambodia (COMFREL)

PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ

សេចក្តីថ្លែងការណ៍

ទំព័រសំខាន់ៗ