សិទិ្ធមនុស្សឆ្នាំ២០១៦៖ ឆ្នាំស្ថិតក្នុងការពិនិត្យឡើងវិញ
ចេញផ្សាយ ខែសីហា ឆ្នាំ២០១៦ ទាញយករបាយការណ៍នេះ (PDF, 12.5 MBs) |
ខណៈដែលការបោះឆ្នោតឃុំ/សង្កាត់ឆ្នាំ២០១៧ និងការបោះឆ្នោតថ្នាក់ជាតិឆ្នាំ២០១៨ កាន់តែខិតជិតចូលមកដល់ របាយការណ៍៦ខែដំបូងនៃឆ្នាំ២០១៦បានបង្ហាញថា រាជរដ្ឋាភិបាលកម្ពុជាបានកំពុងតែព្យាយាមបញ្ឈប់ដំណើរការនៃការសម្ដែងមតិបែបលទ្ធិប្រជាធិបតេយ្យ និងបញ្ឈប់មធ្យោបាយក្នុងការប្រើប្រាស់សំឡេងជំទាស់។
ការធ្វើទុក្ខបុកម្នេញលើអ្នកការពារសិទ្ធិមនុស្ស អ្នកនយោបាយគណបក្សជំទាស់ និងសង្គមស៊ីវិល មានការកើនឡើងជាច្រើន និងឈានដល់ដំណាក់កាលមួយគួរឲ្យព្រួយបារម្ភ។ បរិយាកាសការងាររបស់សង្គមស៊ីវិល (ក្លាយជារួមតូច) ត្រូវបានប្រឈមនឹងការធ្វើទុក្ខបុកម្នេញពីសំណាក់រាជរដ្ឋាភិបាលជាមួយនឹងច្បាប់ដែលមានលក្ខណៈរឹតត្បិតនិងការប្រើប្រាស់ប្រព័ន្ធតុលាការជាដើម។ អ្នកតវ៉ាអហិង្សាជាច្រើនត្រូវបានចាប់ខ្លួន ខណៈដែលការប្រមូលផ្ដុំដោយសន្ដិវិធីត្រូវបានបង្ក្រាបក្រោមហេតុផលនៃការទប់ស្កាត់ការធ្វើបដិវត្តន៍។ គិតត្រឹមចុងខែមិថុនានេះ អង្គការលីកាដូបានចងក្រងជាឯកសារដែលរកឃើញថា យ៉ាងតិចណាស់មានអ្នកទោសនយោបាយ២៩នាក់ត្រូវបានជាប់ឃុំក្នុងពន្ធនាគារ។
ភាពតានតឹងផ្នែកនយោបាយបានកើនឡើង ខណៈដែលការបោះឆ្នោតឃុំ/សង្កាត់នៅសល់ពេលមិនដល់១ឆ្នាំផង។ ក្រោយពីមេដឹកនាំគណបក្សជំទាស់ត្រូវបានបង្ខំចិត្តនិរទេសខ្លួនទៅក្រៅប្រទេសជាថ្មីម្ដងទៀតក្នុងឆ្នាំ២០១៥ នៅឆ្នាំនេះអនុប្រធានគណបក្សជំទាស់ក៏ត្រូវបង្ខំចិត្តឃុំខ្លួនឯងនៅក្នុងទីស្នាក់ការកណ្ដាលគណបក្ស បន្ទាប់ពីមានយុទ្ធនាការចោទប្រកាន់ផ្សេងៗនិងការប៉ុនប៉ងចាប់ខ្លួន។ បច្ចុប្បន្ននេះ យ៉ាងតិចណាស់អ្នកគាំទ្រនិងមន្ត្រីគណបក្សជំទាស់ចំនួន១៩នាក់ ត្រូវបានឃុំខ្លួនក្នុងពន្ធនាគារ ជាមួយនឹងការព្យាយាមបញ្ឈប់កំណែទម្រង់ប្រព័ន្ធបោះឆ្នោតដែលជាតម្រូវការចាំបាច់។
ទោះបីជាមានការគំរាមកំហែងជាបន្តបន្ទាប់ក៏ដោយ ក៏អ្នកការពារសិទ្ធិមនុស្សនិងសមាជិកសង្គមស៊ីវិលដទៃទៀត នៅតែបន្តសកម្មភាពការងារដើម្បីស្វែងរកយុត្តិធម៌។