ស្វែងរក
អត្ថបទ | ឯកឧត្ដម កឹម សុខា ត្រូវបានផ្ដន្ទាទោសឱ្យជាប់ពន្ធនាគារ ២៧ឆ្នាំ ពីបទក្បត់ជាតិ និងបទសន្ទិដ្ឋិភាពជាមួយបរទេសថ្ងៃទី៣ ខែមីនា ឆ្នាំ២០២៣
នាព្រឹកនេះ សាលាដំបូងរាជធានីភ្នំពេញ បានសម្រេចផ្ដន្ទាទោស ឯកឧត្ដម កឹម សុខា អតីតប្រធានគណបក្សសង្គ្រោះជាតិដែលត្រូវបានរំលាយ (CNRP) ពីបទក្បត់ជាតិ និងបទសន្ទិដ្ឋិភាពជាមួយបរទេស តាមបញ្ញត្តិមាត្រា៤៣៩ និងមាត្រា៤៤៣នៃក្រមព្រហ្មទណ្ឌ ។ ឯកឧត្ដម ត្រូវបានផ្ដន្ទាទោស ២៧ឆ្នាំ ក្នុងពន្ធនាគារ និងភ្លាមៗត្រូវបានបញ្ជូនទៅឃុំខ្លួនក្នុងផ្ទះ ក្រោយពីត្រូវបាននាំចេញពីបន្ទប់សវនាការដោយសន្តិសុខ និងនគរបាល៥នាក់ ។ ការផ្ដន្ទាទោសនេះ ធ្វើឡើងនៅរយៈពេលត្រឹមតែ៥ខែប៉ុណ្ណោះ មុនពេលឈានដល់ការបោះឆ្នោតជាតិឆ្នាំ២០២៣ ឆាប់ៗខាងមុខនេះ ។
តុលាការ ក៏បានបង្គាប់ឱ្យដកសិទ្ធិនយោបាយជាអចិន្រ្តៃយ៍ចំពោះឯកឧត្ដម កឹម សុខា ក្នុងការឈរឈ្មោះ ឬចូលរួមបោះឆ្នោត ដែលជាទណ្ឌកម្មបន្ថែម តាមបញ្ញត្តិមាត្រា ៤៥០ នៃក្រមព្រហ្មទណ្ឌ ។ សាលក្រម បានរៀបរាប់ថា ទំហំគ្រោះថ្នាក់ គឺពុំទាន់ត្រូវបានវាយតម្លៃនៅឡើយ ដែលទំនងជាពាក់ព័ន្ធនឹងវិធានការរដ្ឋប្បវេណី ដែលអាចនឹងត្រូវបានប្ដឹង ស្របតាមមាត្រា២២នៃក្រមនីតិវិធីព្រហ្មទណ្ឌ ។
ថ្ងៃទី២៣ ខែឧសភា ឆ្នាំ២០២២
នាព្រឹកនេះសាលាឧទ្ធរណ៍រាជធានីភ្នំពេញ បានតម្កល់សាលក្រមសាលាដំបូងរាជធានីភ្នំពេញដែលត្រូវបានតុលាការសម្រេចកាលពីខែកញ្ញា ឆ្នាំ២០១៨ ដោយផ្តន្ទាទោសដោយមិនសមហេតុផល លើបុគ្គលិក និងអតីតបុគ្គលិកសមាគមអាដហុក ការពារសិទិ្ធមនុស្សនិងអភិវឌ្ឍន៍នៅកម្ពុជា (ADHOC) ចំនួន ៤នាក់ ដែលរួមមានលោក នី សុខា លោក យី សុខសាន្ត លោក ណៃ វ៉ង់ដា អ្នកស្រី លឹម មុនី និងមន្ត្រីគណៈកម្មាធិការជាតិរៀបចំការបោះឆ្នោត លោក នី ចរិយា ។ អ្នកទាំងប្រាំ ធ្លាប់ត្រូវបានតុលាការផ្តន្ទាទោសឱ្យជាប់ក្នុងពន្ធនាគារ និងរងការចោទប្រកាន់ពីបទ សូកប៉ាន់សាក្សី ។
លោក សុខា លោក វ៉ង់ដា លោក សុខសាន្ត និងអ្នកស្រី មុនី ត្រូវបានតុលាការកាត់ទោសកាលពីថ្ងៃទី២៦ ខែកញ្ញា ឆ្នាំ ២០១៨ ពីបទ សូកប៉ាន់សាក្សី ដោយយោងតាមមាត្រា ៥៤៨ នៃក្រមព្រហ្មទណ្ឌ ។ ចំណែកឯលោក ចរិយា ដែលជាអគ្គលេខាធិការងនៃគណៈកម្មាធិការជាតិរៀបចំការបោះឆ្នោតនៅមុនពេលចាប់ខ្លួន និងក្រោយពេលដោះលែង ត្រូវបានតុលាការកាត់ទោសពីបទ សមគំនិត ដោយយោងតាមមាត្រា ២៩ និងមាត្រា ៥៤៨ នៃក្រមព្រហ្មទណ្ឌ ។ ការចាប់ខ្លួន ត្រូវបានធ្វើឡើងអំឡុងពេលមានការបង្ក្រាបយ៉ាងច្រើនមកលើក្រុមសង្គមស៊ីវិល និងសមាជិកអតីតគណបក្សជំទាស់ ។ អ្នកការពារសិទិ្ធមនុស្សទាំង ៥ នាក់ បានជាប់ឃុំខ្លួនបណ្តោះអាសន្នក្នុងពន្ធនាគារអស់ ១៤ ខែ មុនពេលត្រូវបានតុលាការដោះលែងឱ្យនៅក្រៅឃុំបណ្តោះអាសន្ន កាលពីខែមិថុនា ឆ្នាំ ២០១៧ ហើយក្រោយមកត្រូវបានតុលាការផ្តន្ទាទោសពន្ធនាគារចំនួន ៥ឆ្នាំ ប៉ុន្តែអនុវត្តទោស ១៤ ខែ ហើយទោសនៅសល់ត្រូវបានព្យួរ ។
ថ្ងៃទី៣០ ខែមករា ឆ្នាំ២០១៩
របាយការណ៍ស្តីពីស្ថានភាពសិទិ្ធមនុស្សនៅកម្ពុជា ត្រូវបានដាក់ចូលទៅក្រុមប្រឹក្សាសិទិ្ធមនុស្សនៃអង្គការសហប្រជាជាតិនាថ្ងៃនេះ ដើម្បីធ្វើការត្រួតពិនិត្យ ដែលនេះជាផ្នែកមួយនៃនីតិវិធីនៃការត្រួតពិនិត្យ ជាសាកល និងជាទៀងទាត់ (UPR)។
អង្គការ លីកាដូ បានចូលរួមចំណែក នៅក្នុងរបាយការណ៍រួមចំនួនពីរ ដែលរៀបរៀងឡើងដោយអង្គការសហព័ន្ធសិទ្ធិមនុស្សអន្តរជាតិ (FIDH) និង វេទិកាអាស៊ានសម្រាប់សិទិ្ធមនុស្ស និងការអភិវឌ្ឍន៍ (FORUM-ASIA)ដោយបានបង្ហាញនូវការបង្ក្រាបរបស់អាជ្ញាធររដ្ឋមកលើអ្នកការពារសិទិ្ធមនុស្ស សារព័ត៌មាន និងក្រុមសង្គមស៊ីវិល ហើយនិងផលវិបាកនៃការរំលោភសិទិ្ធដីធ្លី។
ថ្ងៃទី២៦ ខែវិច្ឆិកា ឆ្នាំ២០១៨
ដើម្បីប្រារព្ធយុទ្ធនាការ១៦ថ្ងៃទប់ស្កាត់អំពើហិង្សាលើស្រ្តីភេទ អង្គការលីកាដូ ផ្តោតសំខាន់ទៅលើអ្នកធ្វើយុទ្ធនាការសិទិ្ធដីធ្លី និងអ្នកការពារសិទ្ធិមនុស្សជាស្រ្តី ដែលបានប្រឈមមុខ និងទទួលរងអំពើហិង្សាពីសំណាក់អាជ្ញាធររដ្ឋនៅកម្ពុជា។
ប្រជាពលរដ្ឋកម្ពុជាប្រហែលជាងកន្លះលាននាក់បានបាត់បង់ដីធ្លី និងផ្ទះសម្បែង ដោយសារការបណ្តេញដោយបង្ខំ ក្នុងរយៈពេលជាងពីរទសវត្សរ៍មកនេះ។ ពលរដ្ឋទាំងនោះ ដែលភាគច្រើនជាស្រ្តី បានចេញមុខក្នុងការតវ៉ាដោយអហិង្សា ដើម្បីទាមទារយុត្តិធម៌ និងសំណងសមរម្យ។ ភាពសកម្មនិយមរបស់អ្នកទាំងនោះ ជាញឹកញាប់ត្រូវបានទទួលរងដោយការបង្រ្កាបយ៉ាងហិង្សាពីសំណាក់កងសន្តិសុខ ក៏ដូចជាការគំរាមកំហែងដោយប្រើប្រាស់ប្រព័ន្ធតុលាការ និងការឃុំខ្លួនដោយមិនត្រឹមត្រូវផងដែរ។
នៅក្នុងរយៈពេលពីរសប្តាហ៍ខាងមុខ (១៦ថ្ងៃ) អង្គការលីកាដូ នឹងចេញផ្សាយពីប្រវត្តិតស៊ូ និងវីដេអូខ្លីមួយចំនួន ស្តីពីស្រ្តីកម្ពុជា ដែលកំពុងបន្តទាមទារយុត្តិធម៌ ទោះបីអ្នកទាំងនោះបានជួបប្រទះនឹងផលលំបាកយ៉ាងណាក្តី។
យើងចាប់ផ្តើមបរិយាអំពីអ្នកស្រី ទេព វន្នី ដែលបច្ចុប្បន្នមានអាយុ ៣៨ឆ្នាំ និងដែលជាស្ត្រីឈរជួរមុខតំណាងឲ្យពលរដ្ឋនៅសហគមន៍បឹងកក់ ក្នុងការតវ៉ាជំទាស់នឹងការបណ្តេញចេញដោយបង្ខំនៅរាជធានីភ្នំពេញ។ អ្នកស្រីក៏ជាអ្នកការពារសិទិ្ធមនុស្សដ៏សកម្មមួយរូបផងដែរ។
ថ្ងៃទី២៦ ខែកញ្ញា ឆ្នាំ២០១៨
បុគ្គលិកចំនួនបួនរូប របស់សមាគមន៍សមាគមការពារសិទិ្ធមនុស្សនិងអភិវឌ្ឍន៍នៅកម្ពុជា (អាដហុក) និងបុគ្គលិកម្នាក់របស់គណៈកម្មាធិការជាតិរៀបចំការបោះឆ្នោត (គជប) ត្រូវបានសាលាដំបូងរាជធានីភ្នំពេញ សម្រេចផ្តន្ទាទោសនាថ្ងៃនេះ ពីបទសូកប៉ាន់សាក្សី ដែលពាក់ព័ន្ធទៅនឹងករណីមួយផ្សេងទៀតដែលត្រូវដាក់ទៅលើមេដឹកនាំអតីតគណបក្សជំទាស់ ឯកឧត្តម កឹម សុខា។
បុគ្គលិកទាំងបួនរូប ដែលរួមមានអ្នកស្រី លីម មុន្នី លោក នី សុខា លោក យី សុខសាន្ត និងលោក ណៃ វង់ដា ត្រូវបានផ្តន្ទាទោសពន្ធនាគារចំនួន ៥ឆ្នាំ ដោយចៅក្រមចំនួនបីរូប ប៉ុន្តែទោសដែលនៅសល់ចំនួនជិត ៤ឆ្នាំ ត្រូវបានព្យួរ។ រយៈពេលដែលអ្នកទាំងប្រាំ បានជាប់ឃុំឃាំងក្នុងពន្ធនាគារ ក៏ត្រូវបានរាប់បញ្ចូលនៅក្នុងទោសពន្ធនាគារ ដែលសម្រេចដោយចៅក្រមនាព្រឹកនេះផងដែរ ដូចនេះអ្នកទាំងប្រាំនឹងមិនត្រឡប់ចូលក្នុងពន្ធនាគារវិញនោះទេ។
ថ្ងៃទី១៥ ខែសីហា ឆ្នាំ២០១៧
អ្នកគាំទ្ររបស់សកម្មជនដីធ្លីនិងអ្នកការពារសិទ្ធិមនុស្ស អ្នកស្រី ទេព វន្នី បានរំលឹកខួប១ឆ្នាំនៃការឃុំខ្លួនអ្នកស្រីដ៏អយុត្តិធម៌ ដោយបានធ្វើការអំពាវនាវដល់អន្តរជាតិឱ្យជួយអន្តរាគមន៍ ដើម្បីឱ្យមានការដោះលែងអ្នកស្រីមកវិញ។
ប្រជាពលរដ្ឋមួយចំនួនមកពីសហគមន៍បឹងកក់ បានដាក់ញត្តិទៅកាន់ស្ថានទូតនិងអង្គការអន្តរជាតិមួយចំនួន ដែលចាប់ផ្ដើមពីថ្ងៃច័ន្ទម្សិលមិញ នៅការិយាល័យឧត្ដមស្នងការនៃអង្គការសហប្រជាជាតិទទួលបន្ទុកផ្នែកសិទ្ធិមនុស្សនៅកម្ពុជានិងស្ថានទូតនៃប្រទេសសមាជិកអាស៊ានចំនួន៦។ នៅថ្ងៃអង្គារ៍នេះ អ្នកទាំងនោះបានបន្តដាក់ញត្តិទៅស្ថានទូតនៃបណ្ដាប្រទេសនៅសហគមន៍អ៊ឺរ៉ុបចំនួន៩ផ្សេងទៀត រួមមាន ស្ថានទូតសហរដ្ឋអាមេរិក ជប៉ុន អាឡឺម៉ង់ និងស្ថានទូតអ៊ឺរ៉ុបផងដែរ។
អ្នកស្រី ទេព វន្នី ត្រូវបានចាប់ខ្លួននិងចោទប្រកាន់រយៈពេល១ឆ្នាំមកហើយ ដោយសារអ្នកស្រីចូលរួមក្នុងការតវ៉ាដោយសន្តិវិធី ដើម្បីទាមទារឱ្យមានការដោះលែងអ្នកការពារសិទ្ធិមនុស្សទាំង៥នាក់ដែលនៅពេលនោះកំពុងតែជាប់ឃុំ (អ្នកទាំង៥នាក់ត្រូវបានដោះលែងឱ្យនៅក្រៅឃុំវិញហើយ)។ សាលាដំបូងរាជធានីភ្នំពេញបានផ្តន្ទាទោសអ្នកស្រីពីបទ ‘ប្រមាថមន្ត្រីរាជការសាធារណៈ’ និងត្រូវជាប់ពន្ធនាគាររយៈពេលប្រាំមួយថ្ងៃ។ ប៉ុន្តែអ្នកស្រីមិនត្រូវបានដោះលែងវិញទេក្រោយពីបានអនុវត្តទោសរួច ដោយអាជ្ញាធរបានសើរើសំណុំរឿងចាស់ចំនួន៣ផ្សេងទៀតពាក់ព័ន្ធនឹងការតវ៉ាអហិង្សារឿងបញ្ហាដីធ្លី នៅក្នុងសវនាការដែលប្រជាពលរដ្ឋមួយចំនួនយល់ថា មានចរិតលក្ខណៈនយោបាយនិងមានភាពខ្វះចន្លោះក្នុងការអនុវត្តតាមបទដ្ឋានច្បាប់។ បច្ចុប្បន្ន អ្នកស្រីកំពុងអនុវត្តទោសនៃការផ្តន្ទាទោសឱ្យអ្នកស្រីជាប់ពន្ធនាគាររយៈពេល៣០ខែ។ ការផ្តន្ទាទោសឱ្យអ្នកស្រីជាប់ពន្ធនាគាររយៈពេល៦ខែផ្សេងទៀត មិនទាន់អាចអនុវត្តទេដោយត្រូវរង់ចាំសាលក្រមស្ថាពរពីតុលាការកំពូល ហើយនៅពេលនេះអ្នកស្រីកំពុងដំណើរការសំណុំរឿងទី៣ដែលត្រូវបានសើរើឡើងវិញ។
ថ្ងៃទី១៥ ខែសីហា ឆ្នាំ២០១៧
អ្នកស្រី ទេព វន្នី សកម្មជនដីធ្លីនិងអ្នកការពារសិទ្ធិមនុស្សម្នាក់ក្នុងចំណោមអ្នកការពារសិទ្ធិមនុស្ស លេចធ្លោជាច្រើនទៀតនៅកម្ពុជា នឹងត្រូវបានជាប់ឃុំក្នុងពន្ធនាគារអស់រយៈពេល ១ ឆ្នាំហើយ គិតត្រឹមថ្ងៃទី១៥ ខែសីហា ស្អែកនេះ ដោយសារកិច្ចការពារសហគមន៍ និងការអនុវត្តសិទ្ធិមនុស្សរបស់អ្នកស្រី។ យើងខ្ញុំ ដែលជាអង្គការសង្គមស៊ីវិលមានរាយនាមខាងក្រោម ខកចិត្តចំពោះការបន្តឃុំខ្លួនអ្នកស្រី។ យើងខ្ញុំសូមស្នើឱ្យអាជ្ញាធរបដិសេធសេចក្តីសម្រេចផ្តន្ទាទោសលើអ្នកស្រី ព្រមទាំងទម្លាក់ចោលរាល់បទចោទដែលមានចរិតលក្ខណៈនយោបាយ និងពុំមានភស្តុតាងជាក់លាក់ណាមួយ ដែលកើតមានជាបន្តបន្ទាប់លើអ្នកស្រី និងស្នើឱ្យដោះលែងអ្នកស្រីឱ្យមានសេរីភាពវិញ។
ថ្ងៃទី៨ ខែសីហា ឆ្នាំ២០១៧
នាព្រឹកនេះ សាលាឧទ្ធរណ៍បានសម្រេចតម្កល់សាលក្រមរបស់សាលាដំបូងរាជធានីភ្នំពេញទុកជាបានការ ដោយផ្ដន្ទាទោសសកម្មជនដីធ្លី អ្នកស្រី ទេព វន្នី លើសំណុំរឿងចាស់ដែលត្រូវបានសើរើឡើងវិញ បន្ទាប់ពីអ្នកស្រីចូលរួមក្នុងយុទ្ធនាការអហិង្សាថ្ងៃច័ន្ទពណ៌ខ្មៅ កាលពីឆ្នាំមុន។ ការប្រកាសសាលដីកាថ្ងៃនេះ ធ្វើឡើងបន្ទាប់ពីសវនាការឧទ្ធរណ៍កាលពីថ្ងៃទី២៧ ខែកក្កដា ដោយមិនមានវត្តមានរបស់ភាគីដើមចោទ (ដូចសវនាការនៅសាលាដំបូងរាជធានីភ្នំពេញកាលពីខែកុម្ភៈដែរ) ដែលនាំឲ្យភាគីចុងចោទគ្មានឱកាសជជីកសួរដេញដោលបាន ហើយតំណាងមហាអយ្យការក៏មិនបានលើកយកភស្ដុតាងគួរឲ្យជឿទុកចិត្តណាមួយមកបង្ហាញនៅក្នុងសវនាការនោះផងដែរ។
អ្នកស្រី ទេព វន្នី ត្រូវបានសាលាដំបូងរាជធានីភ្នំពេញផ្ដន្ទាទោសពីបទប្រើអំពើហិង្សាដោយចេតនា មានស្ថានទម្ងន់ទោស កាលពីថ្ងៃទី២៣ ខែកុម្ភៈ ឆ្នាំ២០១៧ នៅក្នុងសវនាការដែលមានភាពខ្វះចន្លោះនៃការអនុវត្តតាមបទដ្ឋានច្បាប់។ សំណុំរឿងនេះពាក់ព័ន្ធនឹងការតវ៉ាកាលពីឆ្នាំ២០១៣ក្នុងរាជធានីភ្នំពេញ ដើម្បីទាមទារឲ្យដោះលែងសកម្មជនបឹងកក់មួយរូបផ្សេងទៀត ដែលអំឡុងពេលនោះ អ្នកស្រី ទេព វន្នី និងសមាជិកសហគមន៍មួយចំនួនទៀត ត្រូវបាននគរបាលនិងកងសន្ដិសុខជាច្រើននាក់ វាយដំបណ្ដាលឲ្យរងរបួស។
សាលដីកាសាលាឧទ្ធរណ៍ថ្ងៃនេះ បានសម្រេចតម្កល់សាលក្រមរបស់សាលាដំបូងរាជធានីភ្នំពេញទុកជាបានការ ដោយផ្ដន្ទាទោសអ្នកស្រី ទេព វន្នី ឲ្យជាប់ពន្ធនាគាររយៈពេល២ឆ្នាំ៦ខែ និងពិន័យជាប្រាក់និងសំណងទៅដើមបណ្ដឹង សរុបទាំងអស់ចំនួន ១៤លានរៀល (ប្រហែល ៣,៥០០ ដុល្លារអាមេរិក)។ គិតចាប់តាំងពីពេលចាប់ខ្លួនអ្នកស្រីកាលពីថ្ងៃទី១៥ ខែសីហា ឆ្នាំ២០១៦ អ្នកស្រី ទេព វន្នី ត្រូវបានឃុំខ្លួនក្នុងពន្ធនាគារអស់រយៈពេល៣៥៨ថ្ងៃមកហើយ។
ថ្ងៃទី២៧ ខែកក្កដា ឆ្នាំ២០១៧
នារសៀលនេះ សាលាឧទ្ធរណ៍បានបើកសវនាការលើបណ្ដឹងឧទ្ធរណ៍របស់សកម្មជនដីធ្លី អ្នកស្រី ទេព វន្នី ដែលត្រូវបានផ្ដន្ទាទោសដោយសាលាដំបូងរាជធានីភ្នំពេញ ពាក់ព័ន្ធនឹងការចូលរួមរបស់អ្នកស្រីក្នុងការតវ៉ាដោយសន្ដិវិធី ខណៈដែលអ្នកគាំទ្រអ្នកស្រីប្រមាណជា ១០០នាក់ បានប្រមូលផ្ដុំគ្នានៅខាងមុខតុលាការ។ អំឡុងពេលសវនាការ ភាគីដើមចោទនិងសាក្សីដាក់បន្ទុកមិនបានបង្ហាញវត្តមាន ដូចសវនាការនៅសាលាដំបូងរាជធានីភ្នំពេញកាលពីខែកុម្ភៈដែរ ដែលនាំឲ្យភាគីចុងចោទគ្មានឱកាសជជីកសួរដេញដោលបាន ហើយមិនមានភស្ដុតាងគួរឲ្យជឿទុកចិត្តណាមួយ ត្រូវបានបង្ហាញឡើងនៅក្នុងសវនាការនោះទេ។
អំឡុងពេលតវ៉ាកាលពីឆ្នាំ២០១៣ក្នុងរាជធានីភ្នំពេញដើម្បីទាមទារឲ្យដោះលែង សកម្មជនបឹងកក់មួយរូបផ្សេងទៀត នគរបាលនិងកងសន្ដិសុខជាច្រើននាក់ បានវាយដំអ្នកស្រី ទេព វន្នី និងសមាជិកសហគមន៍មួយចំនួនទៀត បណ្ដាលឲ្យរងរបួស។ ប៉ុន្តែអ្នកស្រី បែរជាត្រូវបានតុលាការផ្ដន្ទាទោសពីបទប្រើអំពើហិង្សាដោយចេតនា មានស្ថានទម្ងន់ទោស នៅក្នុងសវនាការថ្ងៃទី២៣ ខែកុម្ភៈទៅវិញ ដែលនេះបញ្ជាក់ពីភាពខ្វះចន្លោះនៃការអនុវត្តតាមស្តង់ដាច្បាប់ ដោយសារគ្មានការជជីកសួរដេញដោលទៅលើដើមចោទទាំងពីរនាក់ដែលជាសន្ដិសុខខណ្ឌដូនពេញ។
អ្នកស្រី ទេព វន្នី ត្រូវបានសាលាដំបូងរាជធានីភ្នំពេញផ្ដន្ទាទោស ឲ្យជាប់ពន្ធនាគាររយៈពេល២ឆ្នាំ៦ខែ និងពិន័យជាប្រាក់និងសំណងទៅដើមបណ្ដឹង សរុបទាំងអស់ចំនួន ១៤លានរៀល (ប្រហែល ៣,៥០០ ដុល្លារអាមេរិក)។ អ្នកស្រី ត្រូវបានឃុំខ្លួនក្នុងពន្ធនាគារអស់រយៈពេល៣៤៦ថ្ងៃមកហើយ។ សាលដីកានៃសវនាការសាលាឧទ្ធរណ៍ថ្ងៃនេះ នឹងត្រូវប្រកាសនៅថ្ងៃទី៨ ខែសីហា ឆ្នាំ២០១៧។
ថ្ងៃទី២៧ ខែកក្កដា ឆ្នាំ២០១៧
យើងខ្ញុំ ជាអង្គការសង្គមស៊ីវិលដែលមានរាយនាមដូចខាងក្រោម សូមសំណូមពរដោយទទូចឲ្យសាលាឧទ្ធរណ៍បដិសេធចោលសាលក្រមរបស់សាលាដំបូងរាជធានីភ្នំពេញចុះថ្ងៃទី២៣ ខែកុម្ភៈ ឆ្នាំ២០១៧ ដែលបានសម្រេចផ្តន្ទាទោសដ៏អយុត្តិធម៌មកលើអ្នកស្រី ទេព វន្នី ពីបទប្រព្រឹត្តអំពើហិង្សាដោយចេតនា មានស្ថានទម្ងន់ទោស និងត្រូវជាប់ពន្ធនាគាររយៈពេល ២ឆ្នាំកន្លះ ដោយសារសកម្មភាពតវ៉ាអហិង្សារបស់អ្នកស្រី កាលពីឆ្នាំ២០១៣។ សាលាឧទ្ធរណ៍នឹងបើកសវនាការបណ្ដឹងឧទ្ធរណ៍របស់ អ្នកស្រី ទេព វន្នី ប្រឆាំងនឹងការផ្តន្ទាទោសនេះ នៅថ្ងៃស្អែក ទី២៧ ខែកក្កដា ឆ្នាំ២០១៧។ នៅថ្ងៃទី១៥ ខែសីហា ឆ្នាំ២០១៧ ខាងមុខនេះ គឺជាខួបមួយឆ្នាំ ដែលអ្នកស្រី ទេព វន្នី ត្រូវបានជាប់ក្នុងពន្ធនាគារ ហើយការជាប់ពន្ធនាគាររបស់អ្នកស្រី ទំនងជាការប៉ុនប៉ង ក្នុងការបំបិទសំឡេងអ្នកការពារសិទ្ធិមនុស្សដែលហ៊ាននិយាយរិះគន់មិនសំចៃមាត់នៅកម្ពុជា មុនពេលការបោះឆ្នោតថ្នាក់ជាតិខែកក្កដា ឆ្នាំ២០១៨ ចូលមកដល់។
ថ្ងៃទី៣ ខែកក្កដា ឆ្នាំ២០១៧
នៅខណៈដែលស្ថានភាពសិទិ្ធមនុស្សនៅកម្ពុជាហាក់ដូចជាមិនដើរទៅមុខ ការនិយាយរិះគន់ទៅលើការរំលោភបំពានរបស់អាជ្ញាធរ គឺកាន់តែមានសារសំខាន់ខ្លាំងឡើង។ នៅក្នុងរយៈពេលពីរឆ្នាំចុងក្រោយនេះ អ្នកការពារសិទិ្ធមនុស្ស បុគ្គលឯករាជ្យ និងបុគ្គលសំខាន់ៗមួយចំនួនទៀត បានក្លាយជាជនរងគ្រោះក្នុងចំណោមជនរងគ្រោះដទៃទៀត នៅក្នុងស្ថានភាពនយោបាយដ៏ផុយស្រួយនៅកម្ពុជា។ នៅខែកក្កដា ឆ្នាំ២០១៦ អ្នកការពារសិទិ្ធមនុស្សបានទទួលរងនូវបទពិសោធន៍យ៉ាងជូរចត់សម្រាប់ការបញ្ចេញគំនិតរិះគន់របស់អ្នកទាំងនោះ។ អ្នកវិភាគនយោបាយ លោកបណ្ឌិត កែម ឡី ត្រូវបានគេលួចបាញ់ប្រហារទាំងកណ្តាលថ្ងៃ ហើយក្រោយមក ទោះជាជនសង្ស័យចំបងត្រូវបានតុលាការផ្តន្ទាទោសបន្ទាប់ពីបើកសវនាការអស់រយៈពេលបួនម៉ោងក៏ដោយ ក៏រហូតមកដល់សព្វថ្ងៃ នៅមិនទាន់មានការស៊ើបអង្កេតដែលគួរឲ្យជឿទុកចិត្តណាមួយ ត្រូវបានធ្វើឡើងទៅលើឃាតកម្មនេះនៅឡើយទេ។
នៅក្នុងរបាយការណ៍សង្ខេបចុងក្រោយបំផុតនេះ អង្គការ លីកាដូ បានលើកឡើងនូវការបំភិតបំភ័យជាច្រើន ដែលអ្នកការពារសិទិ្ធមនុស្សកំពុងប្រឈមមុខនៅក្នុងសង្គមកម្ពុជាសព្វថ្ងៃ។ វិធីសាស្ត្រដ៏យូរអង្វែងជាច្រើន ដែលនៅតែត្រូវបានប្រើប្រាស់ដើម្បីបំបិទសំឡេងអ្នកការពារសិទិ្ធមនុស្ស (ដូចជា៖ ការប្រើប្រាស់ប្រព័ន្ធតុលាការដែលមានលក្ខណៈលំអៀង ការប្រើប្រាស់អំពើហិង្សាដែលគាំទ្រដោយអាជ្ញាធរ និងការបង្ក្រាបលើការតវ៉ាដោយអហិង្សានានា) ត្រូវបានបន្ថែមទម្ងន់តាមរយៈការអនុម័តច្បាប់ថ្មីមួយចំនួនដែលមានលក្ខណៈគាបសង្កត់ ហើយនិងការត្រួតពិនិត្យចាប់ពិរុទ្ធតាមរយៈប្រព័ន្ធអ៊ិនធើណេត។ ទោះបីជាករណីជាច្រើនដែលត្រូវបានលើកឡើងនៅក្នុងរបាយការណ៍នេះ មិនទាន់គ្រប់គ្រាន់ពេញលេញ តែទិន្នន័យទាំងនេះអាចផ្តល់នូវរូបភាពមួយផ្នែកដែលបង្ហាញពីអំពើរំលោភបំពានជាច្រើន ដែលតែងតែកើតមកលើអ្នកការពារសិទិ្ធមនុស្សនៅកម្ពុជា អស់រយៈពេលជាងពីរឆ្នាំចុងក្រោយមកនេះ។
ថ្ងៃទី៩ ខែឧសភា ឆ្នាំ២០១៧
យើងខ្ញុំ ដែលជាអង្គការសង្គមស៊ីវិលជាតិ និងអន្តរជាតិមានរាយនាមខាងក្រោម សូមសម្តែងការសោកស្តាយចំពោះសកម្មភាពរបស់អាជ្ញាធរនគរបាលឃុំ និងស្រុកនៅក្នុងខេត្តកោះកុង ដែលបានចុះទៅរុះរើបដាអំពាវនាវឲ្យមានការដោះលែងអ្នកការពារសិទ្ធិមនុស្សទាំង៦នាក់។ បដាទាំងនេះត្រូវបានដកហូតចេញពីទីស្នាក់ការរបស់សមាគមការពារសិទ្ធិមនុស្ស និងអភិវឌ្ឍន៍ (“អាដហុក”) អង្គការសម្ព័ន្ធខ្មែរជំរឿន និងការពារសិទ្ធិមនុស្ស (“លីកាដូ”) និងអង្គការមាតាធម្មជាតិ ដែលបានកើតឡើងនៅឃុំស្មាច់មានជ័យ កាលពីថ្ងៃទី២ ខែឧសភា ឆ្នាំ២០១៧ ព្រមទាំងការរុះរើបដាចេញពីមុខផ្ទះរបស់ប្រជាពលរដ្ឋចំនួនបីនៅស្រុកស្រែអំបិល ខេត្តកោះកុង កាលពីថ្ងៃទី៣ ខែឧសភា ឆ្នាំ២០១៧ ផងដែរ។
ថ្ងៃទី២៧ ខែមីនា ឆ្នាំ២០១៧
នាព្រឹកនេះ អ្នកស្រី ស ស៊ន និងអ្នកស្រី ណាត់ ស្រីណាក់ ដែលរស់នៅក្នុងសហគមន៍បុរីកីឡា ត្រូវបានចាប់ខ្លួន ខណៈពេលដែលអ្នកទាំងពីរបានរៀបចំការប្រមូលផ្ដុំគ្នាមួយដោយអហិង្សា ដើម្បីធ្វើយុទ្ធនាការថ្ងៃច័ន្ទពណ៌ខ្មៅ នៅខាងមុខផ្ទះរបស់ខ្លួន។ អ្នកទាំងពីរត្រូវបានដោះលែងមកវិញនៅម៉ោង៧និង១៥នាទីល្ងាច បន្ទាប់ពីត្រូវបានឃាត់ខ្លួនអស់រយៈពេលជិត១១ម៉ោង នៅក្នុងអធិការដ្ឋាននគរបាលខណ្ឌ៧មករា។
ស្រ្តីទាំងពីរនាក់ដែលកំពុងពាក់អាវពណ៌ខ្មៅត្រូវបានចាប់ខ្លួនដោយនគរបាលនិងសន្តិសុខ នៅក្នុងសហគមន៍បុរីកីឡា តាំងពីម៉ោងប្រហែលជា៨និង៤៥នាទីព្រឹកនេះ ខណៈពេលដែលអ្នកទាំងពីរបានរៀបចំការជួបជុំគ្នាដោយសន្តិវិធីមួយ ដើម្បីអំពាវនាវឲ្យមានការដោះលែងអ្នកការពារសិទ្ធិមនុស្សដែលកំពុងជាប់ឃុំក្នុងពន្ធនាគារ រួមបញ្ចូលទាំងតំណាងសហគមន៍បឹងកក់អ្នកស្រី ទេព វន្នី ដែលត្រូវបានចាប់ខ្លួនក្នុងយុទ្ធនាការអហិង្សាថ្ងៃច័ន្ទពណ៌ខ្មៅ កាលពីថ្ងៃទី១៥ ខែសីហា ឆ្នាំ២០១៦។ ចាប់តាំងពីយុទ្ធនាការនេះបានចាប់ផ្ដើមក្នុងខែឧសភា ឆ្នាំ២០១៦ មានការឃាត់ខ្លួនអ្នកចូលរួមក្នុងយុទ្ធនាការនេះចំនួន៣៨លើកមកហើយ ដែលភាគច្រើនអ្នកទាំងនោះត្រូវបានឃាត់ខ្លួនជាច្រើនម៉ោងមុនពេលដោះលែងមកវិញ បើទោះបីជាគ្មានការចោទប្រកាន់ក៏ដោយ។ ការចាប់ខ្លួនថ្ងៃនេះគឺជាការចាប់ខ្លួនលើកទី៥របស់អ្នកស្រី ស ស៊ន និងជាការចាប់ខ្លួនលើកទី២របស់អ្នកស្រី ណាត់ ស្រីណាក់ផងដែរ ដោយសារអ្នកទាំងពីរបានចូលរួមក្នុងការប្រមូលផ្ដុំនៃយុទ្ធនាការអហិង្សាថ្ងៃច័ន្ទពណ៌ខ្មៅ។
ថ្ងៃទី២៥ ខែមករា ឆ្នាំ២០១៧
សវនាការសុំនៅក្រៅឃុំរបស់សកម្មជនដីធ្លី អ្នកស្រី ទេព វន្នី ដែលបានធ្វើឡើងកាលពីសប្តាហ៍មុន ដោយចៅក្រម លោកស្រី គឹម សត្ថាវី នៅតុលាការកំពូល ត្រូវបានប្រកាសបដិសេធ។
អ្នកស្រី វន្នី ត្រូវបានឃុំខ្លួនបណ្តោះអាសន្នចាប់តាំងពីខែសីហា ដោយត្រូវបានចោទប្រកាន់ពីបទហិង្សាដោយចេតនាមានស្ថានទម្ងន់ទោស ទាក់ទងនឹងការតវ៉ាដែលរៀបចំដោយសហគមន៍បឹងកក់ក្នុងឆ្នាំ២០១៣ នៅមុខផ្ទះសម្តេចនាយករដ្ឋមន្រ្តី។ រហូតមកដល់ថ្ងៃនេះ អ្នកស្រីត្រូវបានឃុំខ្លួនអស់រយៈពេល ១៦៣ ថ្ងៃហើយ។ សវនាការរបស់ អ្នកស្រី ទេព វន្នី នឹងប្រព្រឹត្តទៅនៅថ្ងៃទី ០៣ ខែកុម្ភៈ ខាងមុខនេះ។
ថ្ងៃទី២១ ខែមករា ឆ្នាំ២០១៧
នៅឱកាសគម្រប់ពីរខែនៃការអនុម័តលើសេចក្តីសម្រេចរបស់ក្រុមការងារអង្គការសហប្រជាជាតិទទួលបន្ទុកបញ្ហាឃុំខ្លួនតាមអំពើចិត្តរបស់ (“ក្រុមការងារទទួលបន្ទុកបញ្ហាឃុំខ្លួនតាមអំពើចិត្ត”) ដែលសម្រេចថា ការបន្តឃុំខ្លួនលើបុគ្គលិកសមាគមអាដហុក រួមមាន អ្នកស្រី លឹម មុនី លោក នី សុខា លោក ណៃ វ៉ង់ដា និងលោក យី សុខសាន្ត ហើយនិងលោក នី ចរិយា អគ្គលេខាធិការរងនៃគណៈកម្មាធិការជាតិរៀបចំការបោះឆ្នោត (គ.ជ.ប) (អ្នកទាំង៥) គឺធ្វើឡើងតាមអំពើចិត្ត។1 យើងខ្ញុំជាអង្គការសង្គមស៊ីវិលដែលមានរាយនាមខាងក្រោម (“អង្គការសង្គមស៊ីវិល”) អំពាវនាវជាថ្មីម្តងទៀតដល់អាជ្ញាធរកម្ពុជាសូមអនុវត្តតាមសេចក្តីសម្រេចរបស់ក្រុមការងារទទួលបន្ទុកបញ្ហាឃុំខ្លួនតាមអំពើចិត្ត និងដោះលែងអ្នកទាំង៥ជាបន្ទាន់។ រយៈពេលជិតប្រាំបួនខែបន្ទាប់ពីអ្នកទាំង៥ត្រូវបានឃុំខ្លួនតាំងពីដំបូង កម្ពុជាពុំទាន់បានចាត់វិធានការដើម្បីបញ្ឈប់ ឬប៉ះប៉ូវចំពោះការអនុវត្តពុំត្រឹមត្រូវទៅលើអ្នកទាំង៥នៅឡើយទេ ហើយកម្ពុជានៅតែបន្តមិនគោរពតាមកាតព្វកិច្ចផ្លូវច្បាប់របស់ខ្លួនក្រោមកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ (ក.អ.ស.ព.ន)។ អង្គការយើងខ្ញុំ សូមសម្តែងការមិនពេញចិត្តជាខ្លាំងចំពោះការខកខានរបស់អាជ្ញាធរកម្ពុជា ក្នុងការអនុវត្តតាមអនុសាសន៍របស់ក្រុមការងារទទួលបន្ទុកបញ្ហាឃុំខ្លួនតាមអំពើចិត្ត។
ថ្ងៃទី១៨ ខែមករា ឆ្នាំ២០១៧
នៅព្រឹកនេះ សកម្មជនដីធ្លី អ្នកស្រី ទេព វន្នី មានវត្តមានរយៈពេល ៤៥នាទី នៅក្នុងសវនាការសុំនៅក្រៅឃុំ នៅតុលាការកំពូល។ នៅខាងក្រៅតុលាការកំពូល សមាជិកសហគមន៍នានាបានមកប្រមូលផ្តុំគ្នាដើម្បីគាំទ្រដល់អ្នកស្រី។ លោកស្រី គឹម សត្ថាវី ចៅក្រមតុលាការកំពូលនឹងធ្វើការប្រកាសសាលក្រមនៃសវនាការនេះ នៅថ្ងៃទី ២៥ ខែមករា។
អ្នកស្រី វន្នី ត្រូវបានឃុំខ្លួនបណ្តោះអាសន្នចាប់តាំងពីខែសីហា ដោយត្រូវបានចោទប្រកាន់ពីបទហិង្សាដោយចេតនាមានស្ថានទម្ងន់ទោស ទាក់ទងនឹងការតវ៉ាដែលរៀបចំដោយសហគមន៍បឹងកក់ក្នុងឆ្នាំ២០១៣ នៅមុខផ្ទះសម្តេចនាយករដ្ឋមន្រ្តី។ ករណីនេះ ជាករណីមួយក្នុងចំណោមប្រវត្តិករណីចំនួនបី ដែលត្រូវបានសើរើឡើងវិញនៅខែសីហា ឆ្នាំ២០១៦ ខណៈពេលដែលអ្នកស្រី វន្នី កំពុងរង់ចាំសវនាការករណីចោទប្រកាន់ដាច់ដោយឡែកផ្សេងទៀត ទាក់ទងទៅនឹងយុទ្ធនាការថ្ងៃចន្ទពណ៌ខ្មៅ។
រហូតមកដល់ថ្ងៃនេះ អ្នកស្រីត្រូវបានឃុំខ្លួនអស់រយៈពេល ១៥៦ថ្ងៃហើយ។
ថ្ងៃទី៣០ ខែវិច្ឆិកា ឆ្នាំ២០១៦
នាព្រឹកនេះ អ្នកស្រី លឹម មុនី លោក នី សុខា លោក ណៃ វ៉ង់ដានិង លោក យី សុខសាន្ត ជាបុគ្គលិកសមាគមការពារសិទ្ធិមនុស្សនិងអភិវឌ្ឍន៍នៅកម្ពុជា (អាដហុក) និង លោក នី ចរិយា អគ្គលេខាធិការរងនៃគណៈកម្មាធិការជាតិរៀបចំការបោះឆ្នោត (គ.ជ.ប) ត្រូវបានសវនាការនៃតុលាការកំពូលសម្រេចបដិសេធចោលនូវបណ្ដឹងសុំនៅក្រៅឃុំ ដែលបានជំនុំជម្រះដោយលោកចៅក្រម គីម សូថាវី កាលពីសប្ដាហ៍មុន។
អ្នកការពារសិទ្ធិមនុស្សទាំង៥នាក់ ត្រូវបានឃុំខ្លួនពីបទសូកប៉ាន់សាក្សី កាលពីថ្ងៃទី២ ខែឧសភា ខណៈដែលមានការរិះគន់ជាសាធារណៈពីសំណាក់មតិជាតិ និងអន្តរជាតិ។ ប្រសិនបើអ្នកទាំងនោះត្រូវបានផ្តន្ទាទោស នោះអ្នកទាំងនោះនឹងត្រូវជាប់ពន្ធនាគារចន្លោះពី ៥ឆ្នាំ ទៅ ១០ឆ្នាំ។
ថ្ងៃទី២២ ខែកញ្ញា ឆ្នាំ២០១៦
នាថ្ងៃនេះ យើងខ្ញុំជាអង្គការសង្គមស៊ីវិលដែលមានរាយនាមដូចខាងក្រោម សូមថ្កោលទោសចំពោះការផ្តន្ទាទោសដែលមិនសមហេតុផលរបស់សាលាដំបូងរាជធានីភ្នំពេញទៅលើ លោក នី ចរិយា អតីតប្រធានផ្នែកសិទ្ធិមនុស្សនិងឃ្លាំមើលរបស់សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (អាដហុក) និងជាអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត (“គ.ជ.ប”)។ បន្ទាប់ពីសវនាការរយៈពេលប្រមាណ ៤ ម៉ោងកន្លះ លោក ឃី ឆៃ ចៅក្រមជំនុំជម្រះបានចូលទៅក្នុងបន្ទប់ពិភាក្សាប្រហែល ១៥ នាទី មុននឹងសម្រេចផ្តន្ទាទោស លោក នី ចរិយា ពីបទបរិហារកេរ្តិ៍ជាសាធារណៈតាមមាត្រា ៣០៥ បទប្តឹងបរិហារបង្កាច់កេរ្តិ៍តាមមាត្រា ៣១១ និងបទផ្សព្វផ្សាយនូវការអត្ថាធិប្បាយដើម្បីធ្វើសម្ពាធលើយុត្តាធិការតាមមាត្រា ៥២២ នៃក្រមព្រហ្មទណ្ឌនៃព្រះរាជាណាចក្រកម្ពុជា។ លោក នី ចរិយា ត្រូវបានផ្តន្ទាទោសដាក់ពន្ធនាគាររយៈពេលប្រាំមួយខែ និងពិន័យជាប្រាក់ចំនួនប្រាំមួយលានរៀល (ប្រមាណ ១.៥០០ដុល្លារអាមេរិក)។
ថ្ងៃទី១៤ ខែកញ្ញា ឆ្នាំ២០១៦
នាព្រឹកនេះ តំណាងសហគមន៍បឹកកក់ បានដាក់ញត្តិទៅការិយាល័យធនាគារពិភពលោក និងស្ថានទូតសហភាពអឺរ៉ុបប្រចាំនៅកម្ពុជា សូមអំពាវនាវឲ្យធ្វើអន្តរាគមន៍រកដំណោះស្រាយមួយដែលអាចទទួលយកបាន ដើម្បីបញ្ចប់ជម្លោះដីធ្លីដែលនៅសេសសល់ និងសូមអំពាវនាវឲ្យមានការដោះលែង អ្នកស្រី ទេព វន្នី ដែលកំពុងជាប់ឃុំ ព្រមទាំងសូមឲ្យទម្លាក់ចោលការចោទប្រកាន់ទាំងអស់ទៅលើសមាជិកសហគមន៍បឹងកក់។
សន្តិសុខមួយក្រុមប្រហែលជា ៣០នាក់ បានប្រឈមមុខជាមួយនឹងតំណាងសហគមន៍បឹងកក់ទាំងនោះ នៅខាងមុខការិយាល័យធនាគារពិភពលោក។ ក្រោយមក សន្តិសុខទាំងនោះបានរុញច្រានអ្នកតំណាងទាំងនោះមិនឲ្យប្រមូលផ្ដុំគ្នា នៅមុខការិយាល័យធនាគារពិភពលោក ដោយចោទថា ការប្រមូលផ្ដុំនោះ បានធ្វើឲ្យរាំងស្ទះច្រកចូលការិយាល័យធនាគារ។ បន្ដិចក្រោយមក អ្នកតំណាងធនាគារពិភពលោកម្នាក់បានចេញមកទទួលញត្តិ។
ចំណែកនៅស្ថានទូតសហភាពអឺរ៉ុបវិញ ខាងស្ថាតទូតបានអនុញ្ញាតឲ្យតំណាងសហគមន៍បឹងកក់ អ្នកស្រី បូវ សោភា និងកញ្ញា សុង ស្រីលាភ ចូលទៅក្នុងនិងប្រគល់ញត្តិជូនទៅជំនួយការឯកអគ្គរាជទូត។ ភ្លាមៗបន្ទាប់ពីចេញពីស្ថានទូតសហភាពអឺរ៉ុប កញ្ញា សុង ស្រីលាភ បានមានប្រសាសន៍ដោយសង្ខេបទៅកាន់អ្នកសារព័ត៌មាន ដោយសូមអំពាវនាវឲ្យរាជរដ្ឋាភិបាលកម្ពុជាដោះស្រាយបញ្ហាជម្លោះដីធ្លីដែលនៅសេសសល់ និងទម្លាក់ចោលការចោទប្រកាន់ទាំងអស់ទៅលើសមាជិកសហគមន៍។ អ្នកតំណាងទាំងនោះបានសន្យាថា នឹងមកតាមដានលទ្ធផលដាក់ញត្តិថ្ងៃនេះ នៅពេលក្រោយទៀត។
ថ្ងៃទី៥ ខែកញ្ញា ឆ្នាំ២០១៦
សកម្មជនដីធ្លីចំនួនប្រាំមួយនាក់ដែលត្រូវបានជាប់ឃុំក្នុងអធិការរដ្ឋាននគរបាលខណ្ឌដង្កោ កាលពីម្សិលមិញ ត្រូវបានដោះលែងមកវិញនៅរសៀលនេះ ខណៈដែលប្រជាពលរដ្ឋមួយចំនួនបានប្រារព្ធយុទ្ធនាការអហិង្សាថ្ងៃច័ន្ទពណ៌ខ្មៅសប្ដាហ៍ទី១៨។
ស្រ្តីទាំង៦រូប (ក្នុងនោះមានស្រ្តីចំណាស់អាយុ ៧៦ឆ្នាំម្នាក់ ដែលបានរងរបួសក្នុងពេលចាប់ខ្លួន) ដែលត្រូវបានឃុំខ្លួនរយៈពេលមួយយប់ក្នុងអធិការរដ្ឋាននគរបាលខណ្ឌដង្កោក្រោយពីអ្នកទាំងនោះត្រូវបានចាប់ខ្លួនកាលពីម្សិលមិញ អំឡុងពេលការប្រមូលផ្ដុំគ្នាមួយដើម្បីអំពាវនាវសូមឲ្យមានការដោះលែងអ្នកការពារសិទ្ធិមនុស្សមួយចំនួនដែលកំពុងជាប់ឃុំ រួមទាំងតំណាងសហគមន៍បឹងកក់គឺ អ្នកស្រី ទេព វន្នី ដែលត្រូវបានចាប់ខ្លួនក្នុងព្រឹត្តិការណ៍អហិង្សាថ្ងៃច័ន្ទពណ៌ខ្មៅ កាលពីថ្ងៃទី១៥ ខែសីហា។
កាលពីព្រឹកមិញនេះ មន្រ្តីនគរបាល និងសន្តិសុខជាច្រើនបានបំបែកការតវ៉ាក្នុងយុទ្ធនាការអហិង្សាថ្ងៃច័ន្ទពណ៌ខ្មៅ ដោយបានហែកបំផ្លាញ និងដុតចោលបដា រួមទាំងស្លាកសញ្ញាមួយចំនួនដែលបានធ្វើឡើងដោយសហគមន៍បូរីកីឡា។