ចំណងជើង

សិទិ្ធបញ្ចេញមតិ និងចូលរួម

សេចក្តីថ្លែងការណ៍
ដោយសារ​មិនទាន់មាន​ឆន្ទៈ​ធ្វើវិសោធនកម្ម​ ច្បាប់ស្ដីពីសមាគម​និងអង្គការ​មិនមែន​រដ្ឋាភិបាល​ គួរ​ត្រូវបាន​និរាករណ៍

ថ្ងៃទី​១០ ខែកុម្ភៈ ឆ្នាំ២០២០audio available

យើងខ្ញុំ​ ជាសហគមន៍​និងអង្គការសង្គមស៊ីវិល​ ដែល​មានរាយនាម​ដូចខាងក្រោម​ សូមសំណូមពរ​ដោយទទូច​ឱ្យរាជរដ្ឋាភិបាលកម្ពុជា​ ធ្វើការ​និរាករណ៍​​ច្បាប់ស្ដីពី​សមាគម​និង​អង្គការ​មិនមែន​រដ្ឋាភិបាល​ឱ្យបានឆាប់​រហ័ស។​ កិច្ចប្រជុំ​លើកទី៤​ថ្ងៃនេះ​រវាង​ ក្រសួងមហាផ្ទៃ ​និង​អង្គការ​មិនមែន​រដ្ឋាភិបាល​ក្នុងស្រុក​មួយចំនួន​ បានបញ្ចប់ទៅ​ដោយមិនមានលទ្ធផល​ជាវិជ្ជមាន​ ចំពោះការធ្វើវិសោធនកម្ម​ច្បាប់ស្ដីពី​​សមាគម​និងអង្គការ​មិនមែន​រដ្ឋាភិបាល​ឱ្យមាន​ភាពល្អប្រសើរ​នោះទេ។ នេះគឺជា​សកម្មភាព​​ចុងក្រោយ​មួយនៃសកម្មភាពផ្សេងៗទៀតដែល​បង្ហាញថា​ រដ្ឋាភិបាល​ខ្វះឆន្ទៈ​ក្នុងការ​ធ្វើវិសោធនកម្ម​ច្បាប់នេះ ដែលមិន​ត្រឹមតែ​ប៉ះពាល់​ដល់អង្គការ​មិនមែនរដ្ឋាភិបាល​ប៉ុណ្ណោះទេ ​ប៉ុន្តែ​ក៏ប៉ះពាល់​ដល់សមាគម​ និងក្រុម​សហគមន៍​មូលដ្ឋាន​ផងដែរ។​

អត្ថបទខ្លីៗ
សាលដីកា​សាលាឧទ្ធរណ៍​នាំឱ្យអតីត​អ្នកយក​ព័ត៌មាន​វិទ្យុអាស៊ីសេរី​ប្រឈម​នឹងការ​ស៊ើបអង្កេត​ឡើងវិញ​ដោយគ្មានកំណត់​ពេលវេលា

ថ្ងៃទី​២៨ ខែមករា ឆ្នាំ២០២០ អតីតអ្នកយក​ព័ត៌មាន​វិទ្យុអាស៊ី​សេរី គឺលោក​ អ៊ួន ឈិន​ និងលោក​ យាង សុធារិន​ នៅតែមិនទាន់​ទទួលបាន​សេរីភាព​ពេញលេញ​នៅក្នុងដំណើរ​ការតស៊ូតាម​ផ្លូវច្បាប់​ដោយគ្មានកំណត់​ពេលវេលា នេះ​ បន្ទាប់ពី​សាលាឧទ្ធរណ៍​នាព្រឹកនេះ ​បានបដិសេធ ​បណ្ដឹង​ជំទាស់​នឹងការស៊ើបអង្កេត​ឡើងវិញ​ពាក់ព័ន្ធនឹង​ បទចារកម្ម​ ប្រឆាំង​នឹងអ្នកទាំងពីរ​ ដែលត្រូវបាន​សាធារណជន​យល់ឃើញថា​ ជារឿងនយោបាយ។​​

មិនមាន​ការពន្យល់​ទៅលើការ​សម្រេចសេចក្ដី​នេះទេ ​ហើយសេចក្ដី​សំអាងហេតុ​ជាលាយលក្ខណ៍​អក្សរ​របស់​តុលាការ​ អាចផ្ដល់​ទៅឱ្យភាគី​ម្ចាស់បណ្ដឹង​ឧទ្ធរណ៍បាន​ លុះត្រាតែមាន​សំណើសុំសាលដីកា។​ ​មកទល់ពេលនេះ ​មិនទាន់​មានការ​កំណត់ពេលវេលា​ជាក់លាក់​ ឬកាលបរិច្ឆេទ​ សវនាការស្ដីពី​ការស៊ើបអង្កេត​ឡើងវិញ​នៅឡើយទេ។​

សាលដីកា​នាព្រឹកនេះ​ធ្វើឡើងបន្ទាប់ពី​សាលាដំបូង​រាជធានីភ្នំពេញ​បានចេញសាលក្រម​ចាត់របៀប​កាលពីខែតុលា ​ឆ្នាំ២០១៩​ ដើម្បីបន្តការ​ស៊ើបអង្កេត​ទៅលើការ​ចោទប្រកាន់​ដែលថា ​អ្នកយកព័ត៌មាន​ទាំងពីរនាក់​ “ប្រគល់​ឱ្យរដ្ឋបរទេស​នូវព័ត៌មាន​ ជាអាទិ៍ ​ដែលអាចធ្វើឱ្យ​អន្តរាយ​ដល់ការការពារជាតិ”។​ បណ្ដឹងឧទ្ធរណ៍​ដែលអ្នកសារ​ព័ត៌មានពីររូបនេះ​បានប្ដឹងប្រឆាំង​នឹងការស៊ើបអង្កេត​ឡើងវិញ​ទៅលើបទចោទ​តាមបញ្ញត្តិ​មាត្រា៣៨​ និងមាត្រា៣៩​នៃច្បាប់ស្ដីពី​ការបង្ក្រាបអំពើ​ជួញដូរមនុស្ស​ និងអំពើធ្វើ​អាជីវកម្មផ្លូវភេទ​ ក៏ត្រូវបាន​បដិសេធចោលកាល​ពីខែធ្នូ ឆ្នាំ២០១៩​ផងដែរ។

លោក ឈិន​ និងលោក ​សុធារិន ​ត្រូវបាន​អាជ្ញាធរ​ចាប់ខ្លួន​ កាលពី ខែវិច្ឆិកា ​ឆ្នាំ២០១៧ ​និងត្រូវបានឃុំខ្លួន​បណ្ដោះអាសន្ន​រង់ចាំសវនាការ​អស់រយៈពេលជាង​ ៩ខែ ​មុនពេលតុលាការ​ដោះលែងឱ្យនៅក្រៅឃុំ​បណ្ដោះអាសន្នវិញ​។ អ្នកទាំងពីរ​បានបម្រើ​ការងារ​ឱ្យវិទ្យុអាស៊ីសេរី​ មុនពេលស្ថាប័ននេះ ​សម្រេចបិទ​ការិយាល័យ​របស់ខ្លូន​ក្នុងរាជធានីភ្នំពេញ​ ដោយសារ​ការធ្វើទុក្ខបុកម្នេញពី​សំណាក់អាជ្ញាធររដ្ឋ​ទៅលើសារព័ត៌មាន​ឯករាជ្យ​មួយចំនួន​ ដែលរួមមាន​ស្ថានីយវិទ្យុដែល​ផ្សាយព័ត៌មាន​បន្តពីវិទ្យុអាស៊ីសេរី ។​ លោក សុធារិន​ មានកូនតូចពីរនាក់​ ហើយលោក ឈិន ​មានកូនស្រី​អាយុ៣ឆ្នាំម្នាក់ ​និងចៅជាច្រើននាក់​ផ្សេងទៀត។​

អតីតអ្នក​យកព័ត៌មាន​ទាំងពីររូប​បានបដិសេធចោល​ចំពោះការចោទ​ប្រកាន់របស់​អាជ្ញាធរ ហើយក្រុម​អ្នកធ្វើការ​លើបញ្ហា​សិទ្ធិមនុស្សជាតិ​ និងអន្តរជាតិ ​ក៏ដូចជា​អ្នកតស៊ូមតិ​លើសេរីភាព​សារព័ត៌មាន​ បានអំពាវនាវ​ម្ដងហើយ​ម្ដងទៀត​សូមឱ្យ​ទម្លាក់ចោល​ការចោទប្រកាន់​លើអ្នកទាំងពីរ​ដោយគ្មានលក្ខខណ្ឌ៕​

ឯកសារទាក់ទង:

សេចក្តីថ្លែងការណ៍
សវនាការ​អតីត​ប្រធាន​គណបក្ស​ជំទាស់​ គួរត្រូវបាន​អនុញ្ញាតឱ្យ​មានការចូលរួម​ពីក្រុមគ្រួសារ​ អ្នកសារព័ត៌មាន​ និងអង្គការ​សង្គមស៊ីវិល​

ថ្ងៃទី​១៦ ខែមករា ឆ្នាំ២០២០audio available

យើងខ្ញុំ​ ជាអង្គការ​សង្គមស៊ីវិល​មានរាយនាម​ដូចខាងក្រោម​ សូមស្នើសុំ​ឱ្យសាលា​ដំបូងរាជធានី​ភ្នំពេញ​ ធានាថា ​សវនាការ​របស់​ឯកឧត្តម​ កឹម សុខា​អតីត​ប្រធាន​គណបក្ស​ជំទាស់​ដែលត្រូវបាន​រង់ចាំអស់​រយៈពេល​ជាយូរមកហើយ​ គួរតែ​បើកទូលាយ​ដល់​សាធារណជន​ ​សារព័ត៌មាន​ ​និងការចូលរួម​ពេញលេញ​ពីសំណាក់​អង្គការ​សង្គមស៊ីវិល។​ យើងខ្ញុំ​ក៏ស្នើសុំ​ដល់តុលាការ​ឱ្យផ្ដិត​យកទិដ្ឋភាព​ និងផ្សាយបន្ត​ផ្ទាល់ពី​ដំណើរការ​សវនាការនេះ ​ដូចដែលបាន​ធ្វើឡើង​កាលពីលើកមុន​។ សវនាការ​របស់ឯកឧត្តម​ កឹម សុខា​ លើការ​ចោទប្រកាន់​ពី “បទសន្ទិដ្ឋិភាព​ជាមួយ​បរទេស”​ មិនទាន់បាន​បង្ហាញ​ជាសាធារណៈ​នូវភស្ដុតាង​គួរឱ្យជឿទុកចិត្ត​ណាមួយ​នៅឡើយទេ​ ហើយករណី​នេះអាចប្រឈម​នឹងការផ្ដន្ទាទោស​ឱ្យជាប់ពន្ធនាគារ​រហូតដល់​៣០ឆ្នាំ ​ដែលមានការ​ចាប់អារម្មណ៍យ៉ាងខ្លាំង​ពីសំណាក់​សាធារណជន​ទាំងក្នុង​ និងក្រៅប្រទេស។

អត្ថបទ
គ្រួសារជន​រងគ្រោះ​ និង​សកម្មជន​សិទ្ធិមនុស្ស​ ប្រារព្ធ​ខួបលើកទី៦​នៃអំពើហិង្សា​នៅផ្លូវវេងស្រេង​

ថ្ងៃទី​៣ ខែមករា ឆ្នាំ២០២០audio available

នាព្រឹកនេះ​ មនុស្ស​ប្រមាណ​ជា៧០នាក់​ រួមមាន​សកម្មជនដីធ្លី​ កម្មករ​ និងសកម្មជន​សិទ្ធិមនុស្ស​ បានជួបជុំគ្នា​នៅរាជធានី​ភ្នំពេញ​ ដើម្បីប្រារព្ធ​ខួបលើកទី៦​នៃវាយប្រហារ​ពីសំណាក់​កងកម្លាំង​ប្រដាប់អាវុធ​ទៅលើហ្វូង​កម្មករ​ដែលកំពុង​ធ្វើកូដកម្ម​នៅលើ​មហាវិថី​វេងស្រេងក្នុង​រាជធានីភ្នំពេញ​ កាលពីថ្ងៃទី៣​ ខែមករា​ ឆ្នាំ២០១៤​ ដែលបណ្ដាល​ឱ្យមានមនុស្ស​៤នាក់ស្លាប់​បាត់បង់ជីវិត​ ម្នាក់បាត់ខ្លួន​ និងរាប់សិបនាក់​ផ្សេងទៀត​រងរបួស។

អ្នកចូលរួម​បានរៀបចំ​ពិធីតាមបែប​ព្រះពុទ្ធសាសនា​ និងជាការ​រំលឹកដល់ការ​ស្លាប់របស់​ជនរងគ្រោះ ​នៅមជ្ឈមណ្ឌល​សម្ព័ន្ធភាពការងារ​ និងសិទ្ធិមនុស្ស ​(សង់ត្រាល់)​ ដោយមាន​ការចូលរួម​ពីគ្រួសារ​ជនរងគ្រោះ​ដែលត្រូវបាន​បាញ់សម្លាប់​ និងបាត់ខ្លួន​ផងដែរ។

សេចក្តីថ្លែងការណ៍
ការចាប់ខ្លួន​សកម្មជន២នាក់​បង្ហាញទៅកាន់សាធារណជនថា​ អាជ្ញាធរខ្វះ​ការគោរពសេរីភាព​​ក្នុងការបញ្ចេញមតិ ​និងជួបជុំគ្នា

ថ្ងៃទី​១២ ខែកក្កដា ឆ្នាំ២០១៩audio available

យើងខ្ញុំ ​ជាក្រុមសង្គមស៊ីវិល​មានរាយនាម​ដូចខាងក្រោម​ សូមសម្ដែង​ការសោកស្ដាយ​យ៉ាង​ខ្លាំង ចំពោះ​ការប្រើប្រាស់កងកម្លាំងសន្ដិសុខដោយ​មិនសមហេតុផល​ ​ អំឡុងពេល​ប្រារព្វពិធី​រំលឹក​ខួប​៣ឆ្នាំ​នៃឃាតកម្មលើ​អ្នកវិភាគ​នយោបាយ​ លោកបណ្ឌិត ​កែម ឡី ​និងសូមស្នើសុំ​ដោយទទូច​ឱ្យអាជ្ញាធរ​ដោះលែង​សកម្មជន​លោក គង់ រ៉ៃយ៉ា​ និងលោក​ សួង នាគព័ន្ធ ​ពីការឃុំខ្លួន​ឱ្យបានឆាប់រហ័ស​ដោយគ្មាន​លក្ខខណ្ឌ​ និងទម្លាក់ចោល​បទចោទលើ​អ្នកទាំងពីរ។​ យុរជនទាំងពីរ​ត្រូវបានចាប់ខ្លួន ​ដោយសារប្រើប្រាស់​សេរីភាព​នៃការបញ្ចេញមតិ​ដោយ​អហិង្សា អំឡុងពេល​ចូលរួមពិធី​រំលឹកខួប​នៃឃាតកម្ម​លើអ្នកវិភាគ​នយោបាយ​ លោកបណ្ឌិត​ កែម ឡី​ ដែលត្រូវបាន​ឃាតករបាញ់​សម្លាប់ ​កាលពីថ្ងៃទី១០​ ខែកក្កដា ​ឆ្នាំ២០១៦។​ ភ្លាមៗបន្ទាប់ពី​ការចាប់ខ្លួន​ អ្នកទាំងពីរ​ត្រូវបានចោទប្រកាន់​ពីបទញុះញង់ ​តាមបញ្ញត្តិ​មាត្រា៤៩៤​ និងមាត្រា៤៩៥​ នៃក្រមព្រហ្មទណ្ឌ​ ហើយកំពុង​ត្រូវបាន​ឃុំខ្លួន​បណ្ដោះអាសន្ន​រង់ចាំ​សវនាការ​ក្នុងមណ្ឌល​អប់រំកែ​ប្រែទី១​ (ព្រៃស)​ ក្នុងរាជធានី​ភ្នំពេញ។

អត្ថបទ
អាជ្ញាធរ​ឃាត់ខ្លួន​មនុស្ស៧នាក់​ ពាក់ព័ន្ធនឹង​ការរំលឹក​ខួប៣ឆ្នាំ​នៃឃាតកម្ម​លើលោកបណ្ឌិត​ កែម ឡី

ថ្ងៃទី​១០ ខែកក្កដា ឆ្នាំ២០១៩audio available

អាជ្ញាធរ​បានឃាត់ខ្លួន​មនុស្សចំនួន៧នាក់​នៅថ្ងៃទី០៩​ និងថ្ងៃទី១០​ ខែកក្កដា ឆ្នាំ២០១៩​នេះ ពាក់ព័ន្ធនឹង​ការសម្ដែងក្ដីរំលែកទុក្ខ​ និងការគាំទ្រ​ចំពោះ​អ្នកវិភាគនយោបាយ​ ដែលត្រូវបាន​ឃាតករ​បាញ់សម្លាប់​ គឺលោក​បណ្ឌិត កែម ឡី​ ខណៈដែល​ប្រជាពលរដ្ឋ​រំលឹកខួប៣ឆ្នាំ​នៃឃាតកម្ម​លើ​លោកបណ្ឌិត​ នៅទីតាំង​នៃអំពើឃាតកម្ម​ក្នុងរាជធានី​ភ្នំពេញ ​ត្រូវបាន​ហ៊ុមព័ទ្ធ​ដោយកងកម្លាំងចម្រុះ​ជាច្រើន។ ​ការឃាត់ខ្លួន​មនុស្ស​ទាំងនេះ​បង្ហាញពី​ការបង្ក្រាប​ឥតឈប់ឈរ​នៃការប្រើប្រាស់​កម្លាំងអាជ្ញាធរ​ច្រើនលើសលុប​ ដើម្បីរារាំង​ប្រជាពលរដ្ឋ​កម្ពុជាពីការ​សម្ដែងសិទ្ធិ​ក្នុងការ​បញ្ចេញមតិ​ និង​សិទ្ធិជួបជុំគ្នា។​

នាព្រឹកនេះ​ សកម្មជន៣នាក់​ ត្រូវបានឃាត់ខ្លួន​នៅខាងក្រៅ​ស្ថានីយ​ប្រេងឥន្ធនៈ​កាល់តិច​ស្ដុបបូកគោ​ក្នុង​រាជធានីភ្នំពេញ​ បន្ទាប់ពី​អ្នកទាំង៣​បានចូលរួម​ជាមួយយុវជន​ មេដឹកនាំ​សហជីព​ និងសមាជិក​សង្គមស៊ីវិល​ដទៃទៀត​ ដើម្បី​ធ្វើពិធីរំលឹក​ខួបនេះ។​ ស្ថានីយ​ប្រេងឥន្ធនៈនេះ​ ជាទីតាំង​ដែលលោក​បណ្ឌិត កែម ឡី​ ត្រូវបាន​ឃាតករបាញ់​សម្លាប់​ កាលពីថ្ងៃទី១០​ ខែកក្កដា ​ឆ្នាំ២០១៦។​ យុរជន​ដែលត្រូវបាន​ឃាត់ខ្លួន​ទាំង៣នាក់​ក្នុងនោះ​ក៏មាន​ សកម្មជន​ការពារបរិស្ថាន ​លោក ជុំ ហួត​ និងលោក ជុំ ហួរ​ ផងដែរ។

សេចក្តីថ្លែងការណ៍
រយៈពេល ៣ ឆ្នាំ​ហើយនៅតែមិនទាន់​មានកាស៊ើបអង្កេត​ប្រកបដោយ​ប្រសិទ្ធភាព​ចំពោះឃាតកម្ម​លោកបណ្ឌិត កែម ឡី

ថ្ងៃទី​៩ ខែកក្កដា ឆ្នាំ២០១៩audio available

នៅថ្ងៃគម្រប់ខួប៣ឆ្នាំ​ នៃឃាតកម្មទៅលើ​អ្នកអត្ថាធិប្បាយ​នយោបាយនិង​អ្នកការពារសិទ្ធិមនុស្ស​ បណ្ឌិត កែម ឡី ​អង្គការមិនមែន​រដ្ឋាភិបាលចំនួន ២៤ ​ដែល​មាន​ឈ្មោះ​ដូច​ខាងក្រោម​ អំពាវនាវ​ឡើងវិញ​ឱ្យរដ្ឋាភិបាល​កម្ពុជា​បង្កើត​គណៈកម្មការ​ស៊ើបអង្កេត​ឯករាជ្យ​និង​មិនលម្អៀង​ ដើម្បី​ស៊ើបអង្កេតឱ្យ​បានហ្មត់ចត់​និងមាន​ប្រសិទ្ធភាព​ចំពោះឃាតកម្ម​លើ​រូបលោក។ នៅថ្ងៃទី១០​ ខែកក្កដា​ ឆ្នាំ២០១៦​ លោក កែម ឡី​ ត្រូវបានឃាតករ​បាញ់សម្លាប់​ខណៈពេល​ដែល​លោកកំពុងទទួល​ទានកាហ្វេ​ពេលព្រឹក​នៅស្ថានីយ៍​ប្រេងឥន្ធនៈ​ដែលមានទីតាំង​នៅលើមហាវិថី​ព្រះមុន្នីវង្ស​នៅកណ្តាល​រាជធានីភ្នំពេញ។​ ឃាតកម្មនេះ​បានកើតឡើង​ចំពេលដែល​មានការវាយប្រហារ​ទៅលើ​អ្នកការពារ​សិទ្ធិមនុស្ស​និងសមាជិក​គណបក្សជំទាស់​និងកំណត់ត្រា​នៃឃាតកម្ម​ទៅលើ​អ្នកការពារ​សិទិ្ធមនុស្ស​ជាច្រើន​កន្លងមក​ដោយបន្សល់​នៅនិទណ្ឌភាព​នៅក្នុង​ប្រទេសកម្ពុជា។

កម្រង​រូបភាព
ការប្រារព្ធ​ទិវា​ពលកម្ម​អន្តរជាតិ​ឆ្នាំ២០១៩

ថ្ងៃទី​១ ខែឧសភា ឆ្នាំ២០១៩

ប្រជាពលរដ្ឋ​ប្រមាណជាង​ ២០០០នាក់ ​នៅរាជធានី​ភ្នំពេញ ​និង​ខេត្តចំនួន៤​ បាននាំ​គ្នាប្រារព្ធ​ទិវាពលកម្ម​អន្តរជាតិ​ ចាប់តាំង​ពីសប្ដាហ៍មុន​ ដែល​ជារឿយៗ​ត្រូវបាន​ឃ្លាំមើល​ពីសំណាក់​កងកម្លាំង​សន្តិសុខ​ជាច្រើន។​ នៅរាជធានី​ភ្នំពេញ ​កងកម្លាំង​សន្តិសុខ​ចម្រុះ​ប្រមាណ​៥០០នាក់​ ត្រូវបាន​ដាក់ពង្រាយ ​ខណៈដែល​កម្មករ​ និង​សមាជិក​សង្គមស៊ីវិល​បានជួបជុំគ្នា​នៅទីលាន​ប្រជាធិបតេយ្យ​ និង​នៅមុខ​ក្រុមប្រឹក្សា​អភិវឌ្ឍន៍​កម្ពុជា។​ អាជ្ញាធរ​រាជធានី​ភ្នំពេញ​បានរារាំង​មិនឱ្យ​កម្មករ​ធ្វើការ​ហែក្បួន​ទៅរដ្ឋសភាជាតិ​ ហើយ​គ្រាន់តែ​អនុញ្ញាត​ឱ្យមានការ​ហែក្បួន​នៅជិត​វត្តភ្នំ តែប៉ុណ្ណោះ ​ជាមួយ​នឹងវត្តមាន​មន្រ្តីអាជ្ញាធរ​ និង​កងសន្តិសុខជា​ច្រើន។

វីដេអូ
សិទ្ធិ​មនុស្ស​ឆ្នាំ២០១៨​៖ ឆ្នាំស្ថិត​ក្នុងការ​ពិនិត្យ​ឡើងវិញ

ថ្ងៃទី​១២ ខែកុម្ភៈ ឆ្នាំ២០១៩audio available

ស្ថានភាព​សិទ្ធិមនុស្សនៅកម្ពុជា​នៅតែបន្ត​ធ្លាក់ចុះ​ក្នុងឆ្នាំ​២០១៨​ រួមមាន​ការរឹតត្បិត​យ៉ាងខ្លាំង​ជាបន្ត​បន្ទាប់​ចំពោះ​លំហ​សង្គមស៊ីវិល​ និង​លទ្ធិ​ប្រជាធិបតេយ្យ​នៅកម្ពុជា​ ក៏ដូចជា​ការបំបិទ​សំឡេង​អ្នក​រិះគន់​រាជរដ្ឋាភិបាល​ និង​​ប្រព័ន្ធ​ផ្សព្វផ្សាយ​ឯករាជ្យ​ជាដើម។​

អត្ថបទ
អាជ្ញាធរ​បាញ់​ប្រហារ​លើអ្នក​តវ៉ារឿង​ដីធ្លី​ ដោយ​ប្រើប្រាស់​កម្លាំង​ប្រដាប់​អាវុធ​ច្រើនលើស​លុប​

ថ្ងៃទី​២៦ ខែមករា ឆ្នាំ២០១៩audio available

បុរសម្នាក់ត្រូវបានកងកម្លាំងសមត្ថកិច្ចចម្រុះបាញ់បណ្ដាលឱ្យរងរបួសយ៉ាងធ្ងន់ធ្ងរ បន្ទាប់ពីមានកងកម្លាំងនគរបាល កងរាជអាវុធហត្ថនិងយោធា ប្រមាណជាង១០០នាក់ បានបើកការបាញ់ប្រហារ នៅភូមិគគីរ ខេត្តព្រះសីហនុ នៅព្រឹកថ្ងៃព្រហស្បតិ៍ ដើម្បីអនុវត្តសាលដីការបស់តុលាការកំពូលដែលបានសម្រេចផ្តល់ដីទំនាស់នេះទៅឱ្យប្រជាពលរដ្ឋចំនួន៩គ្រួសារ។

នៅពេលដែលកងកម្លាំងប្រដាប់អាវុធព្យាយាមចូលទៅកាន់ដីទំនាស់ក្នុងឃុំបិតត្រាំង អ្នកតវ៉ាដែលមួយចំនួនកាន់ដំបង បានដុតកង់ឡាន និងគប់ដុំថ្ម ដើម្បីរារាំងកងកម្លាំងទាំងនោះ។ កងកម្លាំង ដែលរួមទាំងទាហានមកពីភូមិភាគខេត្តព្រះសីហនុ បានដកថយ ហើយប្រមូលផ្ដុំគ្នាម្តងទៀត រួចចូលទៅកាន់ដីទំនាស់ម្តងទៀត។ លើកនេះ កងកម្លាំងទាំងនោះ បានបាញ់កាំភ្លើងគ្រាប់ពិតឡើងលើមេឃ និងទៅកាន់ក្រុមអ្នកតវ៉ា ដែលបង្ហាញពីការប្រើប្រាស់កងកម្លាំងច្រើនលើសលុប។

អត្ថបទ
សង្គមស៊ីវិល​ប្រារព្ធពិធី​រំលឹក​ខួប​៥ឆ្នាំ​នៃការ​បាញ់​ប្រហារ​នៅផ្លូវ​វេងស្រេង

ថ្ងៃទី​៣ ខែមករា ឆ្នាំ២០១៩audio available

នារសៀលនេះ​ សហជីព​ កម្មករ​ និង​សកម្មជន​សិទ្ធិ​មនុស្ស​ ប្រមាណជា ១០០នាក់​ បានជួប​ជុំគ្នា​ ដើម្បី​ប្រារព្ធ​ពិធី​រំលឹក​ខួប៥ឆ្នាំ​ដែល​កង​កម្លាំង​ប្រដាប់​អាវុធ​បាន​បើកការ​បាញ់ប្រហារ​ទៅលើ​កម្មករ​ដែល​កំពុង​ធ្វើ​កូដកម្ម​នៅលើ​ផ្លូវវេងស្រេង​ក្នុងរាជធានី​ភ្នំពេញ​ ដែល​បណ្ដាល​ឱ្យមាន​អ្នកស្លាប់​ចំនួន៤នាក់​ ម្នាក់​បាត់ខ្លួន​ និង​រងរបួស​រាប់សិប​នាក់ផ្សេងទៀត​។

ការរំលឹក​ខួប​នៅថ្ងៃនេះ​ ត្រូវបាន​រៀបចំ​ឡើងនៅ​សម្ព័ន្ធ​សមាគម​និង​សហជីព​ “ផ្ទះសាមគ្គី” ​ដែល​ចូលរួម​ដោយ​កម្មករ​រោងចក្រ​កាត់ដេរ​ សហជីព​ និង​ក្រុម​គ្រួសារ​ជនរងគ្រោះ។​ អ្នកទាំងនោះ​បាន​ចូលរួម​ក្នុង​ពិធី​សូត្រមន្ត​តាមបែប​សាសនា​ និង​ការពិភាក្សា​ពីការតវ៉ា​អំពី​ប្រាក់​ឈ្នួល​អប្បបរមា ​ក៏ដូចជា​ហេតុនៃអំពើហិង្សា​។​

ជនរងគ្រោះ​នៃ​អំពើហិង្សាបាន​ស្នើ​សុំឱ្យ​មានការ​ចាត់​វិធានការ​និងទំនួលខុសត្រូវ​ចំពោះ​អ្នកបាត់បង់​ជីវីត និង​ទម្លាក់ចោល​បទចោទ​ប្រឆាំងនឹង​កម្មករនិងមេដឹកនាំសហជីព​ពាក់ព័ន្ធនឹង​ការតវ៉ានេះ។

វីដេអូ
"ទឹកភ្នែកជាកម្លាំងរបស់យើង": អ្នកការពារសិទ្ធិមនុស្សជាស្រ្តីភេទ

ថ្ងៃទី​១០ ខែធ្នូ ឆ្នាំ២០១៨audio available

វីដេអូនេះ​ គឺជាផ្នែកមួយ​នៃយុទ្ធនាការ១៦ថ្ងៃ​ទប់ស្កាត់​អំពើហិង្សា​លើស្រ្តីភេទ​ ដែលបង្ហាញ​ពីការប្ដេជ្ញាចិត្​ត និងការ​ក្រោកឈរ​ឡើងនៃ​អ្នកការពារ​សិទ្ធិមនុស្ស​ជាស្រ្តីភេទ​ ដើម្បីជំទាស់​ទៅនឹង​អំពើហិង្សា​ពីសំណាក់​អាជ្ញាធរ​រដ្ឋដែលមាន​គោលបំណង​ចង់ឱ្យពួកគាត់​នៅស្ងៀមស្ងាត់។​

អ្នកស្រី​ ផាវ ញើង​ បានដើរ​តួយ៉ាង​សំខាន់​នៅជួរមុខ​គេក្នុងការ​តស៊ូជាច្រើន​ឆ្នាំប្រឆាំង​នឹងការ​រំលោភ​យកដីធ្លី​នៅក្នុង​ខេត្តកោះកុង​ ដោយមិនខ្លាច​ពីការ​ធ្វើទុក្ខបុក​ម្នេញតាម​ផ្លូវតុលាការ​ ការគំរាមកំហែង ​និងការឃុំខ្លួន​ ដោយភាព​សកម្មរបស់​អ្នកស្រី​គឺធ្វើឡើង​ក្នុងនាម​សហគមន៍។​

អត្ថបទ
ការ​រឹតត្បិត​ទៅលើ​សង្គមស៊ីវិល​នៅថ្ងៃ​ទិវា​សិទ្ធិមនុស្ស​នៅតែ​កើតមាន​ឡើង

ថ្ងៃទី​១០ ខែធ្នូ ឆ្នាំ២០១៨audio available

សាលា​រាជធានី​ភ្នំពេញ​បានហាមឃាត់​ទៅលើ​ការហែក្បួន​នៃ​ថ្ងៃទិវា​សិទ្ធិមនុស្ស​នាព្រឹកនេះ​ ប៉ុន្តែ​ការប្រារព្ធ​ទិវានេះ​នៅតែ​អាច​ប្រព្រឹត្ត​ទៅបាន​ ទោះបីជា​មានកងកម្លាំង​ប្រដាប់​អាវុធ​ជាច្រើន​ ត្រូវបាន​ដាក់ពង្រាយ​នៅទីតាំង​ប្រារព្ធទិវា​ (ប្រហែល​៤គីឡូម៉ែត្រ​ពីកណ្ដាល​រាជធានី​ភ្នំពេញ)​ ដែល​អាជ្ញាធរ​បាន​អនុញ្ញាត។​ កងកម្លាំង​ប្រដាប់​អាវុធ​ដែល​មាន​ពាក់មួក​ការពារ​សុវត្ថិភាព​ទាំងនោះ​គឺមាន​ចំនួន​ច្រើន​ជាង​អ្នក​ចូលរួម​ទៅទៀត​ ដែល​ត្រូវបាន​ដាក់ពង្រាយ​នៅព័ទ្ធជុំវិញ​ទីតាំង​ប្រារព្ធទិវា​។

កម្មករ​រោងចក្រ​កាត់ដេរ​ កសិករ​ គ្រូបង្រៀន​ សហជីព​ តំណាង​សហគមន៍​ និង​ក្រុមយុវជន​ រាប់រយនាក់​ បាន​ចូលរួម​ប្រារព្ធ​ទិវា​សិទ្ធិមនុស្ស​អន្តរជាតិ​នៅទីលាន​ប្រជាធិបតេយ្យ​ថ្មី ស្ថិត​ក្នុង​ខណ្ឌ​ឬស្សីកែវ​ ដែល​ត្រូវបាន​រៀបចំ​ឡើង​ដោយ​សហជីព​និង​សមាគម​មួយចំនួន។​ សាលា​រាជធានី​ភ្នំពេញ​បាន​ព្រមាន​ចាត់វិធានការ​ផ្លូវច្បាប់​ ប្រសិន​បើអ្នក​រៀបចំ​កម្មវិធី​នៅតែ​ធ្វើការ​ហែក្បួន​ដែល​អាច​ “ប៉ះពាល់​ដល់សន្តិសុខ​ សុវត្ថិភាព​ សណ្ដាប់ធ្នាប់​ និង​របៀប​រៀបរយ​សាធារណៈ ​” ទោះបីជា​ថ្ងៃទី១០​ ខែធ្នូនេះ​ជាថ្ងៃ​ឈប់សម្រាក​ ដែល​មិនសូវ​មាន​ប្រជាពលរដ្ឋ​ធ្វើដំណើរ​តាមដងផ្លូវ​ក្នុងរាជធានី​ក៏ដោយ។

ទោះបីជា​មានការ​ប្រកាស​របស់​រាជរដ្ឋាភិបាល​នាពេលថ្មីៗ​នេះអំពី​ការឈប់​រឹតត្បិត​លើ​ក្រុម​សង្គម​ស៊ីវិល​ក្ដី ក៏អាជ្ញាធរ​នៅតែត្រូវបានចោទប្រកាន់ថា នៅតែ​បន្តការ​រឹតត្បិត​លើ​ចលនា​របស់​សហគមន៍​នៅទូទាំង​ប្រទេស ​ដោយ​ហាមឃាត់​អ្នកទាំងនោះ​មិនឱ្យ​ជួបជុំគ្នា​ជាសាធារណៈ​ និងទាមទារ​ឱ្យមាន​លិខិត​អនុញ្ញាត​ ថែមទាំង​ចាត់ចែង​កំណត់ទីតាំង​ជួបជុំគ្នា​របស់​អ្នកទាំងនោះទៀត។

អត្ថបទ
យុទ្ធនាការ​១៦ថ្ងៃ​ក្នុងការ​ទប់ស្កាត់​អំពើហិង្សា​លើស្រ្តី​ភេទ៖​ អ្នកស្រី ​ស ស៊ន​

ថ្ងៃទី​៧ ខែធ្នូ ឆ្នាំ២០១៨audio available

ដើម្បី​ប្រារព្ធ​យុទ្ធនាការ​១៦ថ្ងៃ​ជា​អន្តរជាតិ​ក្នុង​ការ​ទប់ស្កាត់​អំពើហិង្សា​លើ​ស្រ្តីភេទ​ ដែល​ប្រព្រឹត្តទៅ​ជា​រៀង​រាល់​ឆ្នាំ​ចាប់​ពីថ្ងៃ​ទី២៥​ ខែវិច្ឆិកា​ រហូត​ដល់​ ថ្ងៃ​ទី​១០​ ខែធ្នូ​ សម្ព័ន្ធ​ខ្មែរ​ជំរឿន​និង​ការពារ​សិទ្ធិ​មនុស្ស​ លីកាដូ គឺបាន​បង្ហាញ​ឯកសារ​ស្ដីពី​អ្នកធ្វើយុទ្ធនាការ​ និង​អ្នកការពារ​សិទ្ធិមនុស្ស​ជាស្រ្តីភេទ​ ដែល​កំពុង​ប្រឈម​នឹង​អំពើហិង្សា​នៅកម្ពុជា។

យ៉ាងតិចណាស់​ ប្រជាពលរដ្ឋ​កម្ពុជា​ប្រមាណជា​កន្លះលាននាក់​ បាន​បាត់បង់​ដីធ្លី​និងផ្ទះសំបែង​ ដោយសារ​ការ​បណ្ដេញ​ចេញ​ដោយបង្ខំ​ក្នុងរយៈពេល​២ទសវត្សរ៍​ចុងក្រោយ​នេះ ​ហើយស្រ្តី​បាន​ដើរ​តួជាសំខាន់​នៅជួរមុខ​នៃការតវ៉ា​ដោយអហិង្សា​ក្នុងការ​ទាមទារ​រកយុត្តិធម៌​និង​សំណង​សមរម្យ។ ភាពសកម្ម​​របស់ស្រ្តី​ទាំងនោះ ​បានទទួល​រង​អំពើហិង្សា​ពីសំណាក់​កងរក្សា​សន្ដិសុខ​ ក៏ដូចជា​ការធ្វើ​ទុក្ខបុក​ម្នេញ​តាមផ្លូវ​តុលាការ​ និង​ការឃុំខ្លួន​ដោយ​មិនត្រឹមត្រូវ​ជាដើម។

ស្ថិត​ក្នុង​រយៈពេល​១៦ថ្ងៃនេះ​ យើង​កំពុង​ផ្សព្វផ្សាយ​អត្ថបទ​អំពីស្រ្តី​ដែល​នៅតែ​បន្តភាព​ក្លាហាន​ក្នុងការ​បញ្ចេញ​មតិ​ដោយ​សាមគ្គីភាព​ជាមួយ​អ្នកដទៃ​ទៀត​ ដើម្បី​ទាមទារ​រកយុត្តិធម៌​ ទោះបីជា​មាន​បញ្ហា​ប្រឈម​ច្រើន​ប៉ុណ្ណា​ក៏ដោយ។​

អ្នកស្រី ស​ ស៊ន​ អាយុ ​៥៨ឆ្នាំ​ បាន​ប្រឈម​នឹងការ​ធ្វើទុក្ខបុកម្នេញ​ ការឃាត់ខ្លួន​ និង​ការឃុំខ្លួន​ជាច្រើន​ដង ដោយសារ​អ្នកស្រី​តែងតែ​ធ្វើការ​តវ៉ាប្រឆាំង​នឹងការ​បណ្តេញចេញ​ដោយបង្ខំ​បែបហិង្សា​ នូវពលរដ្ឋ​សហគមន៍​បុរីកីឡា​ ក្នុង​រាជធានី​ភ្នំពេញ។​

អត្ថបទ
យុទ្ធនាការ​១៦ថ្ងៃ​ ទប់​​ស្កាត់​​អំពើ​​ហិង្សា​​លើ​​ស្រី្ត​​ភេទ៖ អ្នកស្រី​ អ៊ុំ សុភី

ថ្ងៃទី​៥ ខែធ្នូ ឆ្នាំ២០១៨audio available

ដើម្បី​ប្រារព្ធ​យុទ្ធនាការ​១៦​ថ្ងៃ​ទប់​ស្កាត់​អំពើ​ហិង្សា​លើ​ស្រ្តី​ភេទ អង្គការ​លីកាដូ ផ្តោត​សំខាន់​ទៅ​លើ​អ្នក​ធ្វើ​យុទ្ធនាការ​សិទិ្ធ​ដីធ្លី និង​អ្នក​ការពារ​សិទ្ធិ​មនុស្ស​ជាស្រ្តី ដែល​បាន​ប្រឈម​មុខ និង​ទទួល​រង​អំពើ​ហិង្សា​ពី​សំណាក់​អាជ្ញាធរ​រដ្ឋ​នៅ​កម្ពុជា។

ប្រជា​ពលរដ្ឋ​កម្ពុជា​ប្រហែល​ជាង​កន្លះ​លាន​នាក់​បាន​បាត់បង់​ដីធ្លី និង​ផ្ទះ​សម្បែង ដោយ​សារ​ការ​បណ្តេញ​ដោយ​បង្ខំ ក្នុង​រយៈពេល​ជាង​ពីរ​ទសវត្សរ៍​មក​នេះ។ ពលរដ្ឋ​ទាំង​នោះ ដែល​ភាគ​ច្រើន​ជាស្រ្តី បាន​ចេញ​មុខ​ក្នុង​ការ​តវ៉ា​ដោយ​អហិង្សា ដើម្បី​ទាមទារ​យុត្តិធម៌ និង​សំណង​សមរម្យ។ ភាព​សកម្ម​និយម​របស់​អ្នក​ទាំង​នោះ ជា​ញឹក​ញាប់​ត្រូវ​បាន​ទទួល​រង​ដោយ​ការ​បង្រ្កាប​យ៉ាង​ហិង្សា​ពី​សំណាក់​កង​សន្តិសុខ ក៏​ដូចជា​ការ​គំរាម​កំហែង​ដោយ​ប្រើប្រាស់​ប្រព័ន្ធ​តុលាការ និង​ការ​ឃុំខ្លួន​ដោយ​មិន​ត្រឹមត្រូវ​ផង​ដែរ។

នៅក្នុង​រយៈពេល​ពីរ​សប្តាហ៍​ខាង​មុខ (១៦​ថ្ងៃ) អង្គការ​លីកាដូ នឹងចេញ​ផ្សាយ​ពី​ប្រវត្តិ​តស៊ូ និង​វីដេអូ​ខ្លី​មួយ​ចំនួន ស្តី​ពី​ស្រ្តី​កម្ពុជា ដែល​កំពុង​បន្ត​ទាមទារយុត្តិធម៌ ទោះ​បី​អ្នក​ទាំង​នោះ​បាន​ជួប​ប្រទះ​នឹង​ផល​លំបាក​យ៉ាង​ណា​ក្តី។

អ្នកស្រី អ៊ុំ សុភី ដែល​មាន​អាយុ ៣៩ ឆ្នាំ បាន​ទទួល​រង​នូវ​ការ​រំលោភ​បំពាន​ធ្ងន់ធ្ងរ រួម​ទាំង​ការ​រំលោភ​បំពាន​តាម​ផ្លូវ​តុលាការ​ជា​ច្រើន​លើក​ច្រើន​សារ ហើយ​ថែម​ទាំង​បាត់បង់​ការងារ​ជា​គ្រូ​បង្រៀន​ទៀត​ផង ដោយសារ​តែ​ភាព​សកម្ម​និយម​របស់​អ្នក​ស្រី ដើម្បី​ការពារ​ដីធ្លី​របស់​អ្នកស្រី និង​សហគមន៍​អ្នកស្រី ពីការ​រំលោភ​បំពាន​ពី​សំណាក់​ក្រុមហ៊ុន​ដែល​មាន​ខ្នង​បង្អែក​ជា​អ្នក​មាន​អំណាច។