"ទឹកភ្នែកជាកម្លាំងរបស់យើង": អ្នកការពារសិទ្ធិមនុស្សជាស្រ្តីភេទ
ចេញផ្សាយ ថ្ងៃទី១០ ខែធ្នូ ឆ្នាំ២០១៨វីដេអូនេះ គឺជាផ្នែកមួយនៃយុទ្ធនាការ១៦ថ្ងៃទប់ស្កាត់អំពើហិង្សាលើស្រ្តីភេទ ដែលបង្ហាញពីការប្ដេជ្ញាចិត្ត និងការក្រោកឈរឡើងនៃអ្នកការពារសិទ្ធិមនុស្សជាស្រ្តីភេទ ដើម្បីជំទាស់ទៅនឹងអំពើហិង្សាពីសំណាក់អាជ្ញាធររដ្ឋដែលមានគោលបំណងចង់ឱ្យពួកគាត់នៅស្ងៀមស្ងាត់។
អ្នកស្រី ផាវ ញើង បានដើរតួយ៉ាងសំខាន់នៅជួរមុខគេក្នុងការតស៊ូជាច្រើនឆ្នាំប្រឆាំងនឹងការរំលោភយកដីធ្លីនៅក្នុងខេត្តកោះកុង ដោយមិនខ្លាចពីការធ្វើទុក្ខបុកម្នេញតាមផ្លូវតុលាការ ការគំរាមកំហែង និងការឃុំខ្លួន ដោយភាពសកម្មរបស់អ្នកស្រីគឺធ្វើឡើងក្នុងនាមសហគមន៍។
អ្នកស្រី អ៊ុំ សុភី បានប្រឈមនឹងការធ្វើទុក្ខបុកម្នេញ សំណុំរឿងក្ដីព្រហ្មទណ្ឌជាច្រើន និងសូម្បីតែបាត់បង់ការងាររបស់អ្នកស្រី ដោយសារតែភាពសកម្មដោយមិនខ្លាចនឿយហត់របស់អ្នកស្រី ក្នុងការការពារដីសហគមន៍ ប្រឆាំងនឹងក្រុមហ៊ុនដែលមានទំនាក់ទំនងផ្នែកនយោបាយ។
អ្នកស្រី ទេព វន្នី បានដើរតួយ៉ាងសំខាន់នៅជួរមុខគេនៃការតវ៉ារបស់សហគមន៍បឹងកក់ ប្រឆាំងនឹងការបណ្ដេញចេញដោយបង្ខំនិងការរំលោភបំពានសិទ្ធិផ្សេងៗនៅក្នុងរាជធានីភ្នំពេញ និងជាអ្នកការពារសិទ្ធិមនុស្សដ៏ក្លាហានមួយរូបនៅក្នុងប្រទេសកម្ពុជា។ អ្នកស្រីត្រូវបានដោះលែងនៅក្នុងខែកញ្ញា បន្ទាប់ពីត្រូវបានឃុំខ្លួន២ឆ្នាំក្នុងពន្ធនាគារលើបទចោទមិនត្រឹមត្រូវមួយចំនួន។ ក្រោយពីការដោះលែង អ្នកស្រីនៅតែបន្តការសម្ដែងមតិដើម្បីសិទ្ធិមនុស្ស។