អ្នកភូមិ១៩នាក់ ត្រូវបានចាប់ខ្លួនដាក់ពន្ធនាគារ ផ្ទះសម្បែងត្រូវបានដុតកម្ទេចក្នុងទំនាស់ដីធ្លីនៅខេត្តឧត្ដរមានជ័យ
ចេញផ្សាយ ថ្ងៃទី១៤ ខែធ្នូ ឆ្នាំ២០២២
អ្នកភូមិចំនួន១៩នាក់ ត្រូវបានចាប់ខ្លួនដាក់ពន្ធនាគារ ក្នុងពេលមានការចាប់ខ្លួនជាបន្តបន្ទាប់ ដែលចាប់ កើតមានឡើងក្នុងខែកញ្ញា ឆ្នាំ២០២២ ពាក់ព័ន្ធនឹងទំនាស់ដីធ្លីមួយដែលកំពុងកើតមានជាមួយក្រុមហ៊ុន សុខ សំណាង ក្នុងស្រុកត្រពាំងប្រាសាទ ខេត្តឧត្ដរមានជ័យ ។
កងកម្លាំងប្រដាប់ដោយអាវុធនិងដំបង ត្រូវបានដាក់ពង្រាយ ដើម្បីចាប់ខ្លួនអ្នកភូមិចំនួន ៨នាក់ និងដើម្បីត្រួតពិនិត្យការដុតកម្ទេចផ្ទះសម្បែង នៅក្នុងតំបន់ទំនាស់ នៅក្នុងហេតុការណ៍ហិង្សាចុងក្រោយ កាលពីថ្ងៃទី០៩ និងថ្ងៃទី១០ ខែធ្នូ ឆ្នាំ២០២២នេះ ។ ក្រុមអាវុធហត្ថ ដែលត្រូវបានស្គាល់ថាជា ប៉េអ៊ឹម បានចាប់ខ្លួនស្ត្រី៥នាក់ និងបុរស៣នាក់ ក្នុងរយៈពេលពីរថ្ងៃនោះ ។ វីដេអូមួយ ត្រូវបានថតនៅថ្ងៃទី១០ ខែធ្នូ ឆ្នាំ២០២២នេះ ដោយបង្ហាញថា កម្លាំងប៉េអ៊ឹម បានកាន់ដំបងវែង ក្នុងពេលចាប់ខ្លួនអ្នកភូមិម្នាក់ និងបានគំរាមកំហែង ប្រជាពលរដ្ឋផ្សេងទៀតមិនឱ្យថតយករូបភាព ។ វីដេអូផ្សេងទៀត ដែលអ្នកភូមិបានថតនៅថ្ងៃនោះ បង្ហាញថា ផ្ទះសម្បែងរបស់ពួកគេកំពុងត្រូវបានដុតបំផ្លាញ ។ ផ្សែងពណ៌សចេញពីបំណែកសេសសល់នៃផ្ទះដែលត្រូវបានដុតកម្ទេច នៅអាចមើលឃើញនៅឡើយ នៅពេលដែលអ្នកឃ្លាំមើលនៃអង្គការលីកាដូ បានទៅដល់កន្លែងកើតហេតុ នាល្ងាចថ្ងៃនោះ ។
អ្នកនាង ណាលី ពីឡូក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ បានមានប្រសាសន៍ថា “អាជ្ញាធរគួរតែបញ្ឈប់អំពើហិង្សាដោយមិនសមហេតុផលនេះ ។ បញ្ហាដីធ្លីទាំងនេះ គួរតែត្រូវដោះស្រាយដោយសន្តិវិធី មិនមែនតាមរយៈការចាប់ខ្លួន និងការបំផ្លិចបំផ្លាញ យ៉ាងអាក្រក់បែបនេះទេ” ។
បច្ចុប្បន្ន អ្នកភូមិចំនួន៨នាក់ខាងលើកំពុងស្ថិតក្រោមការឃុំខ្លួនបណ្ដោះអាសន្នរង់ចាំសវនាការ រួមជាមួយនឹងការកើនឡើងនៃចំនួនអ្នកភូមិផ្សេងទៀតដែលត្រូវបានចាប់ដាក់ពន្ធនាគារពាក់ព័ន្ធនឹងទំនាស់ដីធ្លីនេះ ។ បុរសចំនួន៧នាក់ ត្រូវបានចាប់ខ្លួនដោយកម្លាំងនគរបាល ប្រដាប់ដោយកាំភ្លើងបាញ់រះ ក្នុងខែកញ្ញា ឆ្នាំ២០២២ ។ បុរស២នាក់ និងស្រ្តី២នាក់ ផ្សេងទៀត ត្រូវបានចាប់ខ្លួនក្នុងខែវិច្ឆិកា ឆ្នាំ២០២២ ។ ពេលនេះ អ្នកភូមិទាំង ១៩នាក់ កំពុងជាប់ឃុំបណ្ដោះអាសន្ននៅក្នុងពន្ធនាគារខេត្តឧត្ដរមានជ័យ ដើម្បីរង់ចាំសវនាការ ។
ការបំផ្លាញព្រៃឈើ ឱកាស និងទំនាស់
ទំនាស់ដីធ្លីនេះ ពាក់ព័ន្ធនឹងប្រជាពលរដ្ឋប្រមាណ ៣៧០គ្រួសារ ដែលបានចាប់ផ្ដើមតាំងទីលំនៅនៅតំបន់នោះ ក្នុងឆ្នាំ២០១២ អំឡុងពេលដែលមានការបំផ្លាញព្រៃឈើ និងការឈូសឆាយដី ដោយក្រុមហ៊ុន សុខ សំណាង ដែលអះអាងថា ជាម្ចាស់នៃតំបន់ទំនាស់នោះ ។
ក្រុមហ៊ុននេះ បានទទួលដីសម្បទានសេដ្ឋកិច្ចចំនួន ១.៨៦៥ហិចតា នៃដីព្រៃក្នុងតំបន់ដែនជម្រកសត្វព្រៃគូលែនព្រហ្មទេព កាលពីខែមីនា ឆ្នាំ២០១២ ។ ក្រោយពីការបាត់បង់ដើមឈើមានតម្លៃជាច្រើនពីតំបន់ដីព្រៃ ក្រុមហ៊ុនមិនបានអភិវឌ្ឍតំបន់នោះទាំងស្រុងនោះទេ ដោយមានការដាំដុះដំណាំនៅផ្នែកមួយចំនួននៃដីសម្បទានតែប៉ុណ្ណោះ ។
ប្រជាពលរដ្ឋមកពីខេត្តចំនួន៥ បានចាប់ផ្ដើមធ្វើចំណាកស្រុកទៅកាន់អតីតតំបន់ដីព្រៃនេះនៃដោយសន្តិវិធី ដោយការតាំងទីលំនៅរបស់ពួកគេ ត្រូវបានសម្របសម្រួលដោយសាច់ញាតិរបស់អាជ្ញាធរក្នុងតំបន់ផងដែរ ។ ក្រោយមក ប្រជាពលរដ្ឋទាំងនោះ បានធ្វើកសិកម្មលើដីនោះ ឬធ្វើការនៅក្នុងចំការកៅស៊ូ ក្បែរនោះ ។
ទំនាស់ដីធ្លី បានកើតឡើងក្នុងឆ្នាំ២០២១ នៅពេលដែលអាជ្ញាធរខេត្តចាប់ផ្ដើមព្រមានដល់គ្រួសារទាំងនោះថា ពួកគេកំពុងតែទន្រ្ទានយកដីក្រុមហ៊ុន ព្រមទាំងបានដាក់សម្ពាធឱ្យពួកគេ បញ្ឈប់ការធ្វើកសិកម្ម ។ ចាប់ពីពេលនោះមក ភាពធ្ងន់ធ្ងរនៃអំពើហិង្សាក៏កើតមានឡើងកាន់តែខ្លាំងយ៉ាងឆាប់រហ័ស ដោយកងកម្លាំងប្រដាប់អាវុធធ្វើការដុតបំផ្លាញផ្ទះសម្បែង និងចាប់ខ្លួនអ្នកភូមិ ៕
MP3 format: ស្តាប់សំឡេងជាភាសាខ្មែរ
- ចំណងជើង & មូលបទ
- សិទ្ធិដីធ្លី
- ឯកសារទាក់ទង
