សមាជិកព្រឹទ្ធសភាគណបក្សជំទាស់ ត្រូវបានឃុំខ្លួននៅស្នងការដ្ឋាននគរបាលរាជធានី
ចេញផ្សាយ ថ្ងៃទី១៥ ខែសីហា ឆ្នាំ២០១៥
សមាជិកព្រឹទ្ធសភាមកពីគណបក្សសមរង្ស៊ី ឯកឧត្តម ហុង សុខហួរ ដែលត្រូវបានចាប់ខ្លួនកាលពីព្រឹកព្រលឹមថ្ងៃនេះ ត្រូវបានបញ្ជូនខ្លួនទៅកាន់ស្នងការដ្ឋាននគរបាលរាជធានីភ្នំពេញ បន្ទាប់ពីធ្វើការសាកសួរនៅឯសាលាដំបូងរាជធានីភ្នំពេញនៅរសៀលនេះ។
ឯកឧត្តម ត្រូវបានចោទប្រកាន់ពីបទ ក្បត់ជាតិ ដោយសម្តេចនាយករដ្ឋមន្ត្រី នៅក្នុងអំឡុងពេលសម្តេច លោកធ្វើការថ្លែងសុន្ទរកថាកាលពីថ្ងៃព្រហស្បតិ៍។ សម្តេចនាយករដ្ឋមន្ត្រី បានមានប្រសាសន៍ថាឯកឧត្តមបានផ្សព្វផ្សាយឯកសារសន្ធិសញ្ញាឆ្នាំ ១៩៧៩ រវាងប្រទេសកម្ពុជា និងវៀតណាម ដែលត្រូវបានគេកែប្រែ នៅលើគេហទំព័របណ្តាញទំនាក់ទំនងសង្គម ហ្វេសប៊ុក របស់ឯកឧត្តម។ តាមបណ្តាញព័ត៌មានក្នុងស្រុក ឯកឧត្តមត្រូវបានចាប់ខ្លួន ដោយកងនគរបាលមួយក្រុមដែលប្រដាប់ដោយអាវុធ កាលពីម៉ោង ៦ ព្រឹកនេះ ពីគេហដ្ឋានរបស់សមាជិករដ្ឋសភាមកពីគណបក្សសង្គ្រោះជាតិ ឯកឧត្តម យន្ត ថារ៉ូ។ មានវត្តមានរបស់កងនគរបាលប្រដាប់ដោយអាវុធជាច្រើននៅជុំវិញតុលាការនាថ្ងៃនេះ នៅពេលដែលឯកឧត្តមកំពុងបង្ហាញខ្លួននៅក្នុងតុលាការ។ លោកត្រូវបានឃុំខ្លួនមួយយប់នៅឯស្នងការដ្ឋាននគរបាលរាជធានីភ្នំពេញ មុននឹងត្រូវបានសាកសួរបន្តដោយព្រះរាជអាជ្ញានៅថ្ងៃស្អែក។
- ចំណងជើង & មូលបទ
- តុលាការ និងនីតិរដ្ឋ
