សកម្មជនដីធ្លី ត្រូវបានចោទប្រកាន់ និងឃុំខ្លួននៅខេត្តកំពង់ស្ពឺ
ចេញផ្សាយ ថ្ងៃទី១១ ខែមីនា ឆ្នាំ២០១៦នាព្រឹកនេះ សកម្មជនដីធ្លីជាស្ត្រីពីរនាក់ ត្រូវបានគេចោទប្រកាន់តាមច្បាប់ភូមិបាល និងបញ្ជូនទៅកាន់ពន្ធនាគារខេត្តកំពង់ស្ពឺដើម្បីឃុំខ្លួនបណ្តោះអាសន្នរង់ចាំសវនាការ។ អ្នកទាំងពីរអាចនឹងប្រឈមមុខនឹងការជាប់ពន្ធនាគាររយៈពេលដល់ទៅ ២ឆ្នាំ។
អ្នកស្រី យូរ រុន អាយុ ៥១ឆ្នាំ និងអ្នកស្រី អ៊ិត រុំ អាយុ ៥៦ឆ្នាំ ត្រូវបានឃុំខ្លួននៅក្នុងពន្ធនាគារខេត្តកំពង់ស្ពឺ បន្ទាប់ពីអ្នកទាំងពីរត្រូវបានតុលាការចោទប្រកាន់ជាមួយនឹងសកម្មជនដីធ្លីជាស្ត្រីម្នាក់ទៀត គឺអ្នកស្រី អ៊ិត មុំ អាយុ ៤៧ឆ្នាំ។ បទចោទជាច្រើនដែលត្រូវបានចោទ គឺពាក់ព័ន្ធនឹងជម្លោះដីធ្លីដែលបានចាប់ផ្តើមនៅក្នុងឆ្នាំ ២០១១ នៅស្រុកភ្នំស្រួច ខេត្តកំពង់ស្ពឺ នៅពេលដែលទាហានជាច្រើននាក់មកពីកងរថក្រោះ “អាសេអូ” បានរំលោភយកដីធ្លីរបស់ប្រជាពលរដ្ឋប្រមាណ ១០០គ្រួសារ។ ក្រុមគ្រួសារជាច្រើន បានធ្វើស្រែចំការលើដីទាំងនោះតាំងពីឆ្នាំ ១៩៧៩។ នៅក្នុងឆ្នាំ ២០១១ សកម្មជនម្នាក់ ក្នុងចំណោមសកម្មជនដែលត្រូវបានឃាត់ខ្លួន (អ្នកស្រី យូរ រុន) ត្រូវបានទាហានជាច្រើននាក់វាយដំឲ្យសន្លប់ នៅពេលដែលអ្នកស្រីព្យាយាមបញ្ឈប់ការឈូសឆាយដីធ្លី។
នៅក្នុងឆ្នាំ ២០១៣ ក្រុមនិស្សិតស្ម័គ្រចិត្តដែលត្រូវបានបញ្ជូនទៅតំបន់នោះនៅក្នុងបរិបទផែនការណ៍នៃការផ្តល់ប័ណ្ណកម្មសិទិ្ធដីធ្លីរបស់រាជរដ្ឋាភិបាលនៅក្នុងឆ្នាំ ២០១២ (បទបញ្ជាលេខ ០១) បានបរាជ័យក្នុងការផ្តល់ប័ណ្ណកម្មសិទិ្ធដីធ្លីដល់ក្រុមគ្រួសារដែលរងគ្រោះជាច្រើននាក់។ ផ្ទុយទៅវិញ ក្រុមនិស្សិតស្ម័គ្រចិត្តទាំងនោះ បានចេញប័ណ្ណកម្មសិទិ្ធដល់ពលរដ្ឋ ៨៣គ្រួសារ ដោយក្នុងនោះមានគ្រួសារមួយចំនួនពាក់ព័ន្ធនឹងកងទាហាន ដែលមិនបានមករស់នៅក្នុងតំបន់នោះពីមុនមកទេ។ ក្រោយមក ដីធ្លីនោះត្រូវបានលក់ទៅឲ្យក្រុមហ៊ុនជាច្រើន។ នៅក្នុងឆ្នាំ ២០១៥ អ្នកតំណាងនៃពលរដ្ឋទាំង ៨៣គ្រួសារ បានដាក់ពាក្យបណ្តឹងទៅលើអ្នកតំណាងសហគមន៍ចំនួន ៦នាក់ រួមទាំងស្ត្រីទាំងបីនាក់ ដែលត្រូវបានចោទប្រកាន់នាថ្ងៃនេះផងដែរ។
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី