សកម្មជនបឹងកក់ដែលចូលរួមធ្វើយុទ្ធនាការថ្ងៃច័ន្ទពណ៌ខ្មៅកំពុងត្រូវបានជំនុំជម្រះនៅតុលាការ
ចេញផ្សាយ ថ្ងៃទី១៧ ខែសីហា ឆ្នាំ២០១៦
សកម្មជនបឹងកក់ចំនួនពីរនាក់កំពុងតែត្រូវបាននាំខ្លួនចូលសវនាការក្រោមការចោទប្រកាន់ពីបទញុះញង់ បន្ទាប់ពីអ្នកទាំងពីរត្រូវបានចាប់ខ្លួនកាលពីថ្ងៃច័ន្ទ អំឡុងពេលអ្នកទាំងនោះធ្វើការតវ៉ាដោយអហិង្សាមួយនៅក្នុងសហគមន៍ដើម្បីរៀបចំធ្វើយុទ្ធនាការ “ថ្ងៃច័ន្ទពណ៌ខ្មៅ” សប្តាហ៍ទី១៥។
អ្នកស្រី ទេព វន្នី និងអ្នកស្រី បូវ សោភា ដែលអ្នកទាំងពីរជាសកម្មជនសហគមន៍បឹងកក់យូរមកហើយនោះ ត្រូវបានឃុំខ្លួនក្នុងអធិការដ្ឋានខណ្ឌដូនពេញរយៈពេលពីរយប់ បន្ទាប់ពីក្រុមសន្តិសុខបានបំបែកយុទ្ធនាការអហិង្សានៅថ្ងៃច័ន្ទនោះ ដែលរៀបចំឡើងដោយសហគមន៍ដើម្បីអំពាវនាវឲ្យមានការដោះលែងអ្នកការពារសិទ្ធិមនុស្សទាំង៥រូបដែលកំពុងជាប់ពន្ធនាគារ និងអំពាវនាវរកយុត្តិធម៌ចំពោះករណីឃាតកម្ម លើលោកបណ្ឌិត កែម ឡី កាលពីពេលថ្មីៗនេះ។ លោកបណ្ឌិត កែម ឡី ជាអ្នកវិភាគ នយោបាយឯករាជ្យ និងជាអ្នកគាំទ្រយុទ្ធនាការថ្ងៃច័ន្ទពណ៌ខ្មៅផងដែរ។ អ្នកទាំងពីរត្រូវបាន លោក កែវ សុជាតិ ដែលជាព្រះរាជអាជ្ញារងចោទប្រកាន់ពីបទញុះញង់នារសៀលនេះ យោងតាមមាត្រា៤៩៥នៃក្រមព្រហ្មទណ្ឌនៃព្រះរាជាណាចក្រកម្ពុជាក្រោយពីត្រូវបានសាកសួរអស់រយៈពេលមួយថ្ងៃនៅសាលាដំបូងរាជធានីភ្នំពេញ ហើយត្រូវបានបញ្ចូនទៅសវនាការភ្លាមៗតែម្ដង។
ការចោទប្រកាន់នេះជាវិធានការដ៏ធំមួយឆ្លើយតបពីសមត្ថកិច្ចទៅនឹងការតវ៉ាក្នុងយុទ្ធនាការអហិង្សាថ្ងៃច័ន្ទពណ៌ខ្មៅ។ សរុបមក ការតវ៉ាក្នុងយុទ្ធនាការអហិង្សាថ្ងៃច័ន្ទពណ៌ខ្មៅបានបង្ហាញថា យ៉ាងតិចណាស់ មានការឃាត់ខ្លួនចំនួន៣៦លើក ចាប់តាំងពីអ្នកទាំងនោះចាប់ផ្ដើមធ្វើយុទ្ធនាការអហិង្សាថ្ងៃច័ន្ទពណ៌ខ្មៅនេះក្នុងខែឧសភា។ ថ្ងៃនេះជាលើកដំបូងហើយដែលអ្នករៀបចំយុទ្ធនាការថ្ងៃច័ន្ទពណ៌ខ្មៅត្រូវបានចោទប្រកាន់។
សវនាការត្រូវបានផ្អាក និងត្រូវបន្តជំនុំជម្រះនៅថ្ងៃច័ន្ទ ទី២២ ខែសីហា វេលាម៉ោង៨ព្រឹក។ សកម្មជនទាំងពីរនាក់ត្រូវបានបញ្ចូនទៅឃុំខ្លួនបណ្ដោះអាសន្ននៅមណ្ឌលកែប្រែទី២នៃពន្ធនាគារព្រៃសរង់ចាំសវនាការ។
- ឯកសារទាក់ទង
- ចំណងជើង & មូលបទ
- យុទ្ធនាការថ្ងៃច័ន្ទពណ៌ខ្មៅ តុលាការ និង នីតិរដ្ឋ សិទិ្ធបញ្ចេញមតិ និងចូលរួម សិទ្ធិដីធ្លី
