អ្នកស្រី ទេព វន្នី ត្រូវបានបញ្ជូនទៅកាន់ពន្ធនាគារ ម២ វិញ ក្រោយពីសកម្មជនទាំងពីរត្រូវបានផ្តន្ទាទោស
ចេញផ្សាយ ថ្ងៃទី២២ ខែសីហា ឆ្នាំ២០១៦
នាព្រឹកនេះ សកម្មជនសហគមន៍បឹងកក់ អ្នកស្រី ទេព វន្នី និងអ្នកស្រី បូវ សោភា ត្រូវបានផ្តន្ទាទោសពីបទ "ប្រមាថមន្ត្រីរាជការសាធារណៈ" ពាក់ព័ន្ធនឹងការតវ៉ាអហិង្សាក្នុងយុទ្ធនាការថ្ងៃច័ន្ទពណ៌ខ្មៅមួយកាលពីសប្ដាហ៍មុន ហើយត្រូវបានតុលាការផ្ដន្ទាទោសឲ្យជាប់ពន្ធនាគារចំនួន៦ថ្ងៃ និងត្រូវពិន័យជាប្រាក់ម្នាក់ៗចំនួន ៨ម៉ឺនរៀល។ អ្នកស្រី ទេព វន្នី កំពុងតែប្រឈមនឹងការឃុំខ្លួនបណ្ដោះអាសន្នរង់ចាំសវនាការក្រោមបទចោទថ្មីមួយទៀតគឺបទហិង្សាដោយចេតនា ដែលទើបតែត្រូវបានតុលាការលើកយកមកជំនុំជម្រះកាលពីសប្ដាហ៍មុនទាក់ទងនឹងការតវ៉ាមួយកាលពីឆ្នាំ២០១៣។ អ្នកស្រី ទេព វន្នី ត្រូវបានបញ្ជូនទៅឃុំខ្លួនបណ្ដោះអាសន្នរង់ចាំសវនាការក្នុងមណ្ឌលអប់រំកែប្រែទី២នៃពន្ធនាគារព្រៃសវិញ។ ឯអ្នកស្រី បូវ សោភា នឹងត្រូវបានដោះលែងក្នុងថ្ងៃនេះ។
បន្ទាប់ពីការពិភាក្សាប្រហែលជា១៨នាទី ក្រោយពីការជំនុំជម្រះរយៈពេលជាង ៩០នាទី លោក ពេជ្រ វិជ្ជាធម៌ ចៅក្រមជំនុំជម្រះបានសម្រេចប្ដូរការចោទប្រកាន់ដោយចោទពីបទប្រមាថមន្រ្តីរាជការសាធារណៈវិញ ដោយមិនមានការព្រៀងទុកជាមុន (តាមមាត្រា៥០២ នៃក្រមព្រហ្មទណ្ឌនៃព្រះរាជាណាចក្រកម្ពុជា)។ ចៅក្រមជំនុំជម្រះបានប្តូរបទចោទនេះក្នុងពេលប្រកាសសាលក្រម។ ក្រោយមក ចៅក្រមបានសម្រេចផ្ដន្ទាទោស អ្នកស្រី ទេព វន្នី និងអ្នកស្រី បូវ សោភា ឲ្យជាប់ពន្ធនាគារចំនួន៦ថ្ងៃ និងត្រូវពិន័យជាប្រាក់ម្នាក់ៗចំនួន៨ម៉ឺនរៀល។ បន្ទាប់ពីការធ្វើបទបង្ហាញការពារកូនក្ដី ជំទាស់នឹងការចោទប្រកាន់ដំបូងទៅលើបទញុះញង់ មេធាវីការពារមិនត្រូវបានផ្ដល់ឱកាសដើម្បីការពារជំទាស់នឹងបទប្រមាថមន្រ្តីរាជការសាធារណៈ ដែលចៅក្រមទើបត្រូវបានផ្លាស់ប្ដូរនេះទេ។ នេះជាការរំលោភសិទ្ធិជនជាប់ចោទ ដែលចៅក្រមត្រូវតែផ្ដល់ពេលវេលាគ្រប់គ្រាន់ និងភស្តុតាងទៅដល់មេធាវីដើម្បីរៀបចំការការពារកូនក្ដី។
កាលពីថ្ងៃសុក្រកន្លងទៅ អ្នកស្រី ទេព វន្នី ត្រូវបាននាំខ្លួនពីកន្លែងឃុំខ្លួនបណ្ដោះអាសន្នរង់ចាំសវនាការនៃមណ្ឌលអប់រំកែប្រែទី២ ទៅកាន់សាលាដំបូងរាជធានីភ្នំពេញដើម្បីសាកសួរពាក់ព័ន្ធនឹងការតវ៉ាមួយនៅខាងក្រៅគេហដ្ឋានរបស់សម្ដេចនាយករដ្ឋមន្រ្តី កាលពីឆ្នាំ២០១៣។ ក្រោយមក អ្នកស្រីត្រូវបានចោទប្រកាន់ថាបានប្រព្រឹត្តអំពើហិង្សាដោយចេតនា។ ការតវ៉ាកាលពីឆ្នាំ២០១៣នោះ គឺស្ថិតក្នុងការតវ៉ាផ្សេងទៀតដែលរងការបង្រ្កាបដោយហិង្សាជាងគេទៅលើសហគមន៍។ ការបង្រ្កាបកាលពីពេលនោះ នាំឲ្យមានអ្នករបួសរហូតទៅដល់ប្រាំនាក់ ហើយក្នុងនោះមានអ្នកខ្លះត្រូវបានបាក់ឆ្អឹងផងដែរ។
- ឯកសារទាក់ទង
- ចំណងជើង & មូលបទ
- យុទ្ធនាការថ្ងៃច័ន្ទពណ៌ខ្មៅ តុលាការ និងនីតិរដ្ឋ សិទិ្ធបញ្ចេញមតិ និងចូលរួម សិទ្ធិដីធ្លី
