សកម្មជនដីធ្លី និងអ្នកលក់ប៉េងប៉ោងមួយចំនួនត្រូវបានចាប់ខ្លួនអំឡុងពេលធ្វើការតវ៉ាដោយសន្តិវិធីដើម្បីគាំទ្រសកម្មជនដែលកំពុងជាប់ឃុំ
ចេញផ្សាយ ថ្ងៃទី៤ ខែកញ្ញា ឆ្នាំ២០១៦
ស្រ្តីចំនួន៦រូបមកពីសហគមន៍មួយចំនួនក្នុងរាជធានីភ្នំពេញ និងអ្នកលក់ប៉េងប៉ោងចំនួន៤រូបកំពុងស្ថិតនៅក្នុងអធិការដ្ឋាននគរបាលខណ្ឌដង្កោ ក្រោយពីអ្នកទាំងនោះត្រូវបានចាប់ខ្លួន កាលពីព្រឹកមិញនេះ អំឡុងពេលការប្រមូលផ្ដុំគ្នាមួយនៅខាងក្រៅមណ្ឌលអប់រំកែប្រែទី២នៃពន្ធនាគារព្រៃស។
កាលពីព្រឹកមិញនេះ មនុស្សប្រហែលជា១០០នាក់មកពីសហគមន៍បឹងកក់ និងសហគមន៍ដីធ្លីមួយចំនួនទៀតបានធ្វើការប្រមូលផ្ដុំគ្នានៅខាងក្រៅពន្ធនាគារព្រៃសដើម្បីអំពាវនាវឲ្យមានការដោះលែងអ្នកការពារសិទ្ធិមនុស្សមួយចំនួនរួមទាំងអ្នកតំណាងសហគមន៍បឹងកក់ អ្នកស្រី ទេព វន្នី។ ខណៈដែលប្រជាពលរដ្ឋទាំងនោះបានព្យាយាមប្រមូលផ្ដុំគ្នានៅខាងក្រៅខ្លោងទ្វារនៃមណ្ឌលអប់រំកែប្រែទី២ មន្ត្រីនគរបាល និងសន្តិសុខជាច្រើននាក់បានរឹបអូសយកប៉េងប៉ោងជាច្រើនពីប្រជាពលរដ្ឋទាំងនោះ។ អាជ្ញាធរទាំងនោះបានចាប់ខ្លួនមនុស្ស១០នាក់ (លោកយាយ ង៉ែត ឃុន មកពីសហគមន៍បឹងកក់ អ្នកស្រី ភួង សុភាព អ្នកស្រី មាស ស្រីពៅ អ្នកស្រី សុខ រស្មី អ្នកស្រី ខៀវ សារី និងអ្នកស្រី ជាវ ស្រីនិច មកពីសហគមន៍ថ្មគោល និងអ្នកលក់ប៉េងប៉ោងលោក សេង ធី រួមជាមួយកូនប្រុសឈ្មោះ ធឿន បញ្ញា និងក្មួយប្រុសពីរនាក់ឈ្មោះ ពៅ វិជ្ជា និង ជុំ សុបិន្តកែវ) មុនពេលអ្នកទាំងនោះត្រូវបាននាំខ្លួនទៅកាន់អធិការដ្ឋាននគរបាលខណ្ឌដង្កោ។
អ្នកស្រី ទេព វន្នី ត្រូវបានឃុំខ្លួនក្នុងមណ្ឌលអប់រំកែប្រែទី២នៃពន្ធនាគារព្រៃស តាំងពីថ្ងៃទី១៧ ខែសីហា។ អ្នកស្រីត្រូវបានចាប់ខ្លួនអំឡុងពេលការប្រមូលផ្ដុំគ្នាមួយក្នុងការប្រារព្ធយុទ្ធនាការអហិង្សាថ្ងៃច័ន្ទពណ៌ខ្មៅ មុនពេលអ្នកស្រីត្រូវបានជំនុំជម្រះយ៉ាងប្រញាប់ ហើយត្រូវបានផ្ដន្ទាទោសពីបទ "ប្រមាថមន្រ្ដីរាជការសាធារណៈ" ត្រឹមតែរយៈពេលមួយសប្ដាហ៍។ អ្នកស្រីត្រូវបានដាក់ឲ្យស្ថិតនៅក្រោមការឃុំខ្លួនបណ្ដោះអាសន្នរង់ចាំសវនាការ ដែលប្រឈមនឹងបទចោទនៃការប្រើអំពើហិង្សាដោយចេតនា ពាក់ព័ន្ធនឹងការតវ៉ាមួយ កាលពីខែមិនា ឆ្នាំ២០១៣ ក៏ដូចជា បទចោទពីការរារាំង និងប្រមាថមន្រ្តីរាជការសាធារណៈ ពាក់ព័ន្ធនឹងការតវ៉ាមួយចំនួន កាលពីឆ្នាំ២០១១។ សំណុំរឿងចាស់ទាំងនេះទើបតែត្រូវបានដំណើរការសារជាថ្មីទៀត កាលពីសប្ដាហ៍មុន។
អ្នកលក់ប៉េងប៉ោងចំនួនបួននាក់ត្រូវបានដោះលែងមកវិញនៅម៉ោងប្រហែល១២ថ្ងៃត្រង់នេះ ខណៈដែលសកម្មជនដីធ្លីទាំង៦រូបកំពុងនៅជាប់ឃុំនៅក្នុងអធិការដ្ឋាននគរបាលខណ្ឌដង្កោនៅឡើយ។
