អ្នកចំរៀងរ៉េប ត្រូវបានផ្ដន្ទាទោសពីបទញុះញង់
ចេញផ្សាយ ថ្ងៃទី២២ ខែធ្នូ ឆ្នាំ២០២០នាថ្ងៃនេះ សាលាដំបូងខេត្តសៀមរាប បានសម្រេចផ្ដន្ទាទោសអ្នកចម្រៀងរ៉េបពីរនាក់គឺយុវជន គា សុគុណ និងយុវជន ឡុង ពុទ្ធារ៉ា ពីបទញុះញង់ឱ្យប្រព្រឹត្តបទឧក្រិដ្ឋ ជាអាទិ៍ តាមមាត្រា ៤៩៥ នៃក្រមព្រហ្មទណ្ឌ ។ សុគុណ ត្រូវបានផ្ដន្ទាទោសឱ្យជាប់ពន្ធនាគារ ១ឆ្នាំ ៦ខែ ដោយត្រូវអនុវត្តទោសជាប់ពន្ធនាគារ ១ឆ្នាំ និងទោសនៅសល់ត្រូវបានព្យួរ ។ ពុទ្ធារ៉ា ត្រូវបានផ្ដន្ទាទោសឱ្យជាប់ពន្ធនាគារ ៥ខែ ដោយកំពុងអនុវត្តទោស ៣ខែ ១១ថ្ងៃ និងទោសនៅសល់ត្រូវបានព្យួរ ។
គិតត្រឹមពេលចាប់ខ្លួន សុគុណ ដែលមានអាយុ ២២ឆ្នាំ និង ពុទ្ធារ៉ា ដែលមានអាយុ ១៧ឆ្នាំ ត្រូវបានចាប់ខ្លួនកាលពីខែកញ្ញា ឆ្នាំ២០២០ និងត្រូវដាក់ឱ្យស្ថិតក្រោមការឃុំខ្លួនបណ្ដោះអាសន្នរង់ចាំសវនាការ ពាក់ព័ន្ធនឹងទំនុកច្រៀងក្នុងបទចម្រៀងរ៉េប ដែលពួកគេបានផលិតឡើងដោយបានរិះគន់ទៅលើបញ្ហាសង្គមដូចជា សេដ្ឋកិច្ច និងព្រំដែនប្រទេសកម្ពុជា ជាដើម ។ ពាក្យបណ្ដឹងប្រឆាំងនឹងអ្នកទាំងពីរ ត្រូវបានធ្វើឡើងដោយក្រសួងវប្បធម៌ និងវិចិត្រសិល្បៈ ។
អំឡុងពេលសវនាការរបស់អ្នកទាំងពីរ យុវជន ពុទ្ធារ៉ា បានយល់ស្របជាមួយមេធាវីតំណាងក្រសួងថា វាជាកំហុសរបស់ខ្លួននៅពេលចេញផ្សាយចម្រៀងអំពីបញ្ហាសង្គមទាំងនេះ ខណៈដែលយុវជន សុគុណ នៅតែរក្សាជំហររបស់ខ្លួនថា លោកគ្មានអ្វីត្រូវសុំទោសនោះទេ និងបានបដិសេធនូវការលើកឡើងរបស់មេធាវីតំណាងក្រសួងវប្បធម៌ និងវិចិត្រសិល្បៈ ផងដែរ ។ ពុទ្ធារ៉ា ត្រូវបានកំណត់ឱ្យដោះលែងពីពន្ធនាគារនៅថ្ងៃនេះវិញ ខណៈដែលសុគុណ នឹងត្រូវដោះលែងឱ្យមានសេរីភាពវិញនៅខែកញ្ញា ឆ្នាំ២០២១ ឯណោះ ៕
- ចំណងជើង & មូលបទ
- តុលាការ និង នីតិរដ្ឋ សិទិ្ធបញ្ចេញមតិ និងចូលរួម