៧ឆ្នាំកន្លងផុតទៅ គ្រួសារជនរងគ្រោះនៅតែទាមទាររកយុត្តិធម៌លើករណីបាញ់ប្រហារនៅផ្លូវវេងស្រេង
ចេញផ្សាយ ថ្ងៃទី៣ ខែមករា ឆ្នាំ២០២១
នាព្រឹកនេះ សមាជិកសហជីព សកម្មជនដីធ្លី និងសមាជិកសង្គមស៊ីវិលប្រមាណជា ៨០នាក់ បានជួបជុំគ្នានៅការិយាល័យផ្ទះសាមគ្គី នៅក្នុងរាជធានីភ្នំពេញ ដើម្បីប្រារព្ធពិធីរំលឹកខួប៧ឆ្នាំនៃការបាញ់ប្រហារនៅលើមហាវិថីវេងស្រេង ដែលកងកម្លាំងសមត្ថកិច្ចបានវាយប្រហារដោយគ្រាប់កាំភ្លើងបាញ់ទៅលើកម្មករ-កម្មការិនីដែលកំពុងធ្វើកូដកម្ម ដោយបានធ្វើឱ្យមនុស្សយ៉ាងតិច៤នាក់ស្លាប់ ម្នាក់បាត់ខ្លួន និងរងរបួសរាប់សិបនាក់ផ្សេងទៀត ។
ពិធីបែបព្រះពុទ្ធសាសនា និងរំលឹកការចងចាំ ត្រូវបានធ្វើឡើង ដើម្បីចងចាំការបាញ់ប្រហារនៅថ្ងៃទី០៣ ខែមករា ឆ្នាំ២០១៤ ខណៈសមាជិកគ្រួសាររបស់ជនរងគ្រោះដែលបានស្លាប់និងបាត់ខ្លួន នៅតែបន្តការអំពាវនាវឱ្យស្វែងរកយុត្តិធម៌សម្រាប់មនុស្សជាទីស្រឡាញ់របស់ពួកគាត់ ។
កម្មករ៤នាក់ ដែលត្រូវបានបាញ់សម្លាប់មានឈ្មោះ លោក គឹម ផាលាប លោក សាម រ៉ាវី លោក យាន រឹទ្ធី និងលោកផេង កុសល ។ កម្មករម្នាក់ទៀតឈ្មោះ លោក ខឹម សុផាត ត្រូវបានបាត់ខ្លួនតាំងពីពេលបាញ់ប្រហារនោះមក និងត្រូវបានឃើញចុងក្រោយនៅកន្លែងឃុំឃាំងរបស់កងកម្លាំងសមត្ថកិច្ច ដោយមានរងរបួសគ្រាប់កាំភ្លើងចំផ្នែកពោះ ។
អ្នកស្រី អ៊ីន លក្ខណា ម្ដាយរបស់សុផាត បានអំពាវនាវឱ្យអាជ្ញាធរជួយស្វែងរកយុត្តិធម៌ជូនកូនរបស់គាត់ ។ “អស់រយៈពេល៧ឆ្នាំមកហើយ ដែលខ្ញុំបានទន្ទង់រង់ចាំកូនរបស់ខ្ញុំ ប៉ុន្តែមិនទាន់ឃើញមានលទ្ធផលអ្វីទេ ។ ខ្ញុំសូមសំណូមពរឱ្យអង្គការក្រៅរដ្ឋាភិបាលទាំងអស់ ទាំងជាតិនិងអន្តរជាតិ ជួយរកយុត្តិធម៌សម្រាប់កូនខ្ញុំផង” ។
អ្នកស្រី ឈីវ សារុន ភរិយារបស់លោក យាន រឹទ្ធី បានសំណូមពរដូចគ្នាថា “ខ្ញុំសំណូមពរឱ្យអង្គការទាំងអស់ ទាំងជាតិនិងអន្តរជាតិ ជួយរកយុត្តិធម៌សម្រាប់ប្ដីខ្ញុំផង” ។
នៅមុនថ្ងៃបាញ់ប្រហារនៅលើមហាវិថីវេងស្រេងឆ្នាំ២០១៤ កងកម្លាំងទាហានប្រដាប់អាវុធមកពីអង្គភាពបញ្ជាការពិសេស៩១១ បានវាយដំកម្មករ និងចាប់ខ្លួន ប្រធានសហជីពនិងកម្មករចំនួន១០នាក់ នៅខាងមុខរោងចក្រយាកជីន ក្នុងរាជធានីភ្នំពេញ ។ អ្នកតវ៉ាពេលនោះកំពុងធ្វើការទាមទារឱ្យមានប្រាក់ឈ្នួលអប្បរមាចំនួន ១៦០ដុល្លារ ។ ក្រៅពីការស្លាប់របស់មនុស្ស៤នាក់ និងបាត់ខ្លួនម្នាក់ ការបង្រ្កាបនៅផ្លូវវេងស្រេង ដែលបានកើតឡើងអំឡុងពេលគណបក្សជំទាស់ធ្វើពហិកាមិនចូលរួមប្រជុំសភាដោយសារបញ្ហាចម្រូងចម្រាសនៃលទ្ធផលបោះឆ្នោតជាតិ បានធ្វើឱ្យមនុស្ស៣៨នាក់រងរបួសធ្ងន់និងស្រាល និងត្រូវបានបញ្ជូនទៅមន្ទីរពេទ្យ ។
ជាផ្នែកមួយនៃការបង្រ្កាបទាំងនេះ ប្រធានសហជីពនិងសកម្មជនចំនួន២៣នាក់ ក៏ត្រូវបានចាប់ខ្លួន ចោទប្រកាន់ និងឃុំខ្លួនក្នុងពន្ធនាគាររយៈពេល៥ខែផងដែរ ។ មកទល់ពេលនេះ គ្មានសមាជិកកងកម្លាំងសន្ដិសុខ ឬកងកម្លាំងប្រដាប់អាវុធណាម្នាក់ ត្រូវបានព្យួរពីការងារ ឬផ្ដន្ទាទោស ពាក់ព័ន្ធនឹងការស្លាប់របស់កម្មករទាំងនេះទេ ៕
- ចំណងជើង & មូលបទ
- អំពើហិង្សាវ៉េង ស្រេង
