អង្គការ លីកាដូ សូមថ្កោលទោសការប្រើប្រាស់អំពើហិង្សាកាលពីព្រឹកមិញនៅទីលានប្រជាធិបតេយ្យ
ចេញផ្សាយ ថ្ងៃទី១៥ ខែកក្កដា ឆ្នាំ២០១៤
អង្គការ លីកាដូ មានការសោកស្តាយជាខ្លាំងចំពោះការប្រើប្រាស់អំពើហិង្សាកាលពីព្រឹកមិញនេះ រវាង អាជ្ញាធរ និងបាតុករ នៅពេលមានការប្រមូលផ្តុំគ្នានៅក្បែរទីលានប្រជាធិបតេយ្យក្នុងរាជធានីភ្នំពេញ។ ការប្រមូលផ្តុំនាព្រឹកនេះ ដែលត្រូវបានរៀបចំឡើងដោយគណបក្សសង្គ្រោះជាតិ បានប្រែក្លាយជាមានអំពើហិង្សាភ្លាមៗបន្ទាប់ពីមានការរំខានពីកងសន្តិសុខជាច្រើន ហើយបណ្តាលឲ្យមនុស្សជាច្រើនរងរបួស ដោយអ្នកដែលរងរបួសធ្ងន់ធ្ងរបំផុតគឺក្រុមសន្តិសុខខណ្ឌ ដែលត្រូវបានពង្រាយនៅទីនោះដើម្បីរារាំងពីការជួបជុំរបស់បាតុករទាំងអស់នៅទីនោះ។
ការជួបជុំតវ៉ា គឺក្នុងគោលបំណងទាញការចាប់អារម្មណ៍របស់ប្រជាពលរដ្ឋទៅលើទីលានប្រជាធិបតេយ្យដែលត្រូវបានបិទអស់រយៈពេលជាច្រើនខែមកហើយ ហើយអំពាវនាវឲ្យមានការបញ្ឈប់ការហាមឃាត់ការជួបជុំជាសាធារណៈ ដែលការហាមឃាត់នេះត្រូវបានដាក់ចាប់តាំងពីដើមខែមករា បន្ទាប់ពីមានការបង្ក្រាបដែលបណ្តាលឲ្យមានមនុស្សស្លាប់ទៅលើបាតុកម្មរបស់ក្រុមកម្មកររោងចក្រ និងការបញ្ឈប់ការប្រមូលផ្តុំអហិង្សារបស់អ្នកគាំទ្រគណបក្សសង្គ្រោះជាតិនៅក្នុងទីលានប្រជាធិបតេយ្យ កាលពីថ្ងៃទី២ និងទី៤ ខែមករា។ ចាប់តាំងពីការដាក់បម្រាមមក ការតវ៉ាជាច្រើននៅជុំវិញទីលានប្រជាធិបតេយ្យ ត្រូវបានបំបែកយ៉ាងហិង្សាដោយកងសន្តិសុខខណ្ឌរបស់អាជ្ញាធររដ្ឋជាច្រើន។ បាតុករ និងអ្នកសារព័ត៌មានជាច្រើននាក់ ត្រូវបានវាយឲ្យរបួសធ្ងន់ធ្ងរ។ តំណាងរាស្ត្រដែលបានជាប់ឆ្នោតមកពីគណបក្សសង្គ្រោះជាតិ អ្នកស្រី មួរ សុខហួរ បានទៅកាន់ទីលានប្រជាធិបតេយ្យជាច្រើនដង ជាមួយនឹងអ្នកគាំទ្ររបស់អ្នកស្រីជាច្រើននាក់ និងអំពាវនាវឲ្យមានការជួបជុំដូចនេះជាច្រើនដងផងដែរ។ នាថ្ងៃនេះ ការប្រមូលផ្តុំមានសភាពធំជាការប្រមូលផ្តុំកាលពីពេលមុន ដោយរួមមានសមាជិកតំណាងរាស្ត្រគណបក្សសង្គ្រោះជាតិជាច្រើននាក់ ហើយនិងអ្នកគាំទ្រប្រមាណជាង ៣០០ នាក់។
នៅវេលាម៉ោង ៨ ព្រឹក អ្នកគាំទ្រគណបក្សសង្គ្រោះជាតិ ចាប់ផ្តើមប្រមូលផ្តុំគ្នានៅក្បែរទីលានប្រជាធិបតេយ្យ ក្នុងគោលបំណងធ្វើបាតុកម្ម។ អ្នកគាំទ្រទាំងនោះបានជួបជាមួយនឹងកងសន្តិសុខខណ្ឌប្រមាណ ៦០ នាក់ ដែល បានប្រើប្រាស់នូវពាក្យសំដីបែបហិង្សាមិនគប្បី និងរុញច្រានអ្នកគាំទ្រទាំងនោះចេញពីកន្លែងដែលគ្រោងនឹងឈរធ្វើបាតុកម្ម។ នៅម៉ោងប្រហែល ៨ កន្លះព្រឹក តំណាងរាស្ត្រគណបក្សសង្គ្រោះជាតិជាច្រើននាក់ បានមកដល់ចុងម្ខាងនៃទីលានប្រជាធិបតេយ្យជាមួយនឹងអ្នកគាំទ្រយ៉ាងច្រើន ដោយមានកាន់ទង់ជាតិ និងបដាជាច្រើន។
មួយសន្ទុះក្រោយមក នៅពេលដែលបាតុករមួយក្រុមធ្វើដំណើរទៅកាន់ផ្នែកខាងជើងនៃទីលានប្រជាធិបតេយ្យ ដើម្បីដាក់បដាយ៉ាងធំវែងមួយ សរសេរថា “ដោះលែងទីលានប្រជាធិបតេយ្យ” នៅលើរបងបន្លាលួស ដែលត្រូវបានដាក់បិទទីលានប្រជាធិបតេយ្យ កងសន្តិសុខខ័ណ្ឌបានដើរទៅកាន់អ្នកទាំងនោះបែបហិង្សា ដើម្បីទៅដកនូវបដានោះចេញ ហើយចាប់ផ្តើមវាយទៅលើបាតុករទាំងនោះដោយដំបងឈើជាច្រើន។ បាតុករជាច្រើនបានដកថយយ៉ាងលឿន ហើយក៏ចាប់ផ្តើមវាយទៅលើក្រុមសន្តិសុខទាំងនោះវិញ ដោយមនុស្សមួយចំនួនបានរើសដំបងឈើដែលក្រុមសន្តិសុខទាំងនោះប្រើប្រាស់ ទៅវាយលើក្រុមសន្តិសុខទាំងនោះវិញ។ បាតុករមួយចំនួន ទៀតបានព្យាយាមការពារ ដោយមិនឲ្យមានអំពើហិង្សាកើតឡើង ហើយអ្នកនយោបាយមកពីគណបក្សសង្គ្រោះជាតិជាច្រើននាក់ ក៏ព្យាយាមបញ្ចុះបញ្ចូលអ្នកគាំទ្ររបស់អ្នកទាំងនោះ មិនឲ្យប្រើប្រាស់អំពើហិង្សាតបតវិញដែរ។
នគរបាលនៅក្នុងទីលានប្រជាធិបតេយ្យ បានបាញ់គ្រាប់បែកផ្សែងជាច្រើនទៅកាន់ក្រុមបាតុករ និងសន្តិសុខខណ្ឌ ដើម្បីបំបែកក្រុមទាំងពីរមួយរយៈពេលខ្លី។ កងសន្តិសុខជាច្រើន បានរត់គេចពីក្រុមបាតុករ ប៉ុន្តែកងសន្តិសុខជាច្រើន ត្រូវបានដេញតាម និងវាយឲ្យរបួសយ៉ាងធ្ងន់ធ្ងរ។ អំពើហិង្សាបានថមថយ ដោយបាតុករ អ្នកសង្កេតការណ៍ និងសមាជិកគណបក្សសង្គ្រោះជាតិបានអំពាវនាវឲ្យមានការអត់ធ្មត់ និងបញ្ឈប់អំពើហិង្សា។
ភ្លាមៗបន្ទាប់ពីនោះ ការប្រើប្រាស់អំពើហិង្សាជាលើកទីពីរ បានចាប់ផ្តើម ដែលបណ្តាលឲ្យទាំងកងសន្តិសុខខណ្ឌ និងបាតុកររងរបួសរៀងៗខ្លួន។ អ្នកសង្កេតការណ៍អង្គការ លីកាដូ បានបញ្ជាក់ថា យ៉ាងតិចណាស់មានកងសន្តិសុខ ១០ នាក់ និងបាតុករ ៦នាក់ បានរងរបួស។ អ្នកដែលរងរបួសខ្លាំងបំផុត គឺខាងកងសន្តិសុខខណ្ឌ។
នៅខណៈដែលអំពើហិង្សាកំពុងកើតឡើង អ្នកស្រី មួរសុខហួ និងតំណាងរាស្ត្រគណបក្សសង្គ្រោះជាតិពីរនាក់ទៀត គឺលោក មៀន ថាវរិទិ្ធ និងលោក កែវ ភារម្យ ត្រូវបានចាប់ខ្លួន។ អ្នកទាំងនោះ ត្រូវបានបញ្ជូនទៅកាន់ស្នងការដ្ឋាននគរបាលរាជធានីភ្នំពេញ។ ក្រោយមក លោក ហូ វណ្ណ តំណាងរាស្ត្រគណបក្សសង្គ្រោះជាតិ ក៏ត្រូវបានឃាត់ខ្លួន បន្ទាប់ពីលោកបានចូលទៅក្នុងស្នងការនគរបាលដោយស្ម័គ្រចិត្ត។
អំពើហិង្សានាព្រឹកនេះ បានកើតឡើងបន្ទាប់ពីមានការរឹតត្បិតយ៉ាងតឹងរ៉ឹងអស់រយៈពេល ប្រាំមួយខែ ទៅលើសេរីភាពនៃការជូបជុំដោយអហិង្សា ដែលជារឿយៗមានការបង្ក្រាបយ៉ាងហិង្សាទៅលើប្រជាពលរដ្ឋ ដោយក្រុមកងកម្លាំងរបស់អាជ្ញាធររដ្ឋ ជាពិសេសក្រុមកងសន្តិសុខខណ្ឌ ដែលតែងតែឈរនៅជួរមុខក្នុងការបង្កអំពើហិង្សា។ រហូតមកដល់ថ្ងៃនេះ មិនទាន់មានសន្តិសុខ ឬអាជ្ញាធរដែលបញ្ជាឲ្យប្រើប្រាស់ហិង្សាបំបែកការប្រមូលផ្តុំដោយអហិង្សាណាមួយ ត្រូវបានចាប់ខ្លួន និងផ្តន្ទាទោសចំពោះមុខច្បាប់នៅឡើយទេ។
ណាលី ពីឡូក នាយិកា អង្គការសិទិ្ធមនុស្ស លីកាដូ បានមានប្រសាសន៍ថា៖ “ខ្ញុំមានការភ្ញាក់ផ្អើលយ៉ាងខ្លាំងចំពោះព្រឹត្តិការណ៍កាលពីព្រឹកមិញនេះ។ ការជួបជុំតូចមួយដែលនឹងត្រូវធ្វើឡើងដោយសន្តិវិធី ដែលបានប្រែក្លាយជាអំពើហិង្សាយ៉ាងលឿននេះ គឺជាការណ៍មួយគួរឲ្យព្រួយបារម្ភជាទីបំផុត។ អង្គការ លីកាដូ សូមអំពាវនាវយ៉ាងទទូចថា ទោះជាអំពើហិង្សាត្រូវបានបង្កឡើងដោយភាគីណាក៏ដោយ ក៏សូមឲ្យមានការស៊ើបអង្កេតឲ្យបានពេញលេញ តម្លាភាព និងយុត្តិធម៌ ឲ្យបានកាន់តែឆាប់កាន់តែល្អ ហើយក៏សូមអំពាវនាវ សូមឲ្យមានការអត់ធ្មត់ពីគ្រប់ភាគីទាំងអស់។
សម្រាប់ព័ត៌មានបន្ថែម សូមទាក់ទង៖
▪ នាយិកាអង្គការ លីកាដូ អ្នកនាង ណាលី ពីឡូក, ទូរស័ព្ទលេខ៖ ០១២ ៨០៣ ៦៥០ (ភាសាបារាំង និង អង់គ្លេស)
▪ អ្នកគ្រប់គ្រងបច្ចេកទេសអង្គការលីកាដូ លោក អំ សំអាត, លេខទូរស័ព្ទ៖ ០១២ ៣២៧ ៧៧០ (ជាភាសាខ្មែរ)
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- សិទិ្ធបញ្ចេញមតិ និងចូលរួម អំពើនៅទីលានប្រជាធិបតេយ្យ ២០១៤
