សង្គមស៊ីវិលខកចិត្តចំពោះសកម្មភាពរំខាន រារាំង បង្អាក់ទៅលើយុទ្ធនាការ ផ្សព្វផ្សាយអំពីការចុះឈ្មោះបោះឆ្នោត អំឡុងពេលព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ
ចេញផ្សាយ ថ្ងៃទី២៥ ខែវិច្ឆិកា ឆ្នាំ២០១៦; ក្រុមសង្គមស៊ីវិលយើងខ្ញុំ ជាអង្គការសង្គមស៊ីវិលមានរាយនាមដូចខាងក្រោម សូមសម្ដែងការខកចិត្តយ៉ាងខ្លាំង ចំពោះទង្វើរបស់អាជ្ញាធរដែលបានធ្វើការរំខាន រារាំង និងបង្អាក់ម្តងហើយម្តងទៀតទៅលើសកម្មភាពអប់រំ ផ្សព្វផ្សាយ អំពីការចុះឈ្មោះបោះឆ្នោតនៅរាជធានីភ្នំពេញ និងតាមបណ្ដាខេត្តមួយចំនួន។ ជាពិសេស សកម្មភាពយុវជន យុវតី ក្នុងយុទ្ធនាការអប់រំផ្សព្វផ្សាយជំរុញឲ្យប្រជា-ពលរដ្ឋទៅចុះឈ្មោះបោះឆ្នោត នាព្រះរាជពិធីបុណ្យអុំទូក បណ្តែតប្រទីប អកអំបុកនិងសំពះព្រះខែ ដែលជាបុណ្យប្រពៃណីជាតិខ្មែរ។ យុវជន យុវតី ប្រមាណជាង ៦០នាក់ មកពីអង្គការ PEP-CENTER, YRDP, KYSD, NICFEC, CPWP, SEPY និង ក្រុមនិសិត្សស្ម័គ្រចិត្តមួយចំនួនទៀត បានជួបបញ្ហាមួយចំនួនក្នុងអំឡុងពេលធ្វើសកម្មភាពអប់រំ ផ្សព្វផ្សាយជំរុញឲ្យប្រជាពលរដ្ឋទៅចុះឈ្មោះបោះឆ្នោត រយៈពេល ៣ថ្ងៃ (ថ្ងៃទី១៣-១៤-១៥ ខែវិច្ឆិកា) ដូចជា៖
▪ អាជ្ញាធរដែលរក្សាសន្តិសុខសណ្តាប់ធ្នាប់នៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ បានធ្វើការរំខាន រារាំងសកម្មភាពអប់រំ ផ្សព្វផ្សាយនេះ បើទោះបីជាក្រុមយុវជន យុវតី មានលិខិតអនុញ្ញាត(ដីកាអម) របស់សាលារាជធានីភ្នំពេញ លេខ ១០១៣/១៦ ដែលជម្រាបជូនទៅលោកអភិបាលនៃគណៈអភិបាលខណ្ឌទាំង១២ក្នុងរាជធានីភ្នំពេញក៏ដោយ ក៏នៅតែមានការបង្ខំ យុវជន យុវតី ទាំងនោះមិនឲ្យប្រើប្រាស់ឧបករណ៍បំពងសំឡេង សម្រាប់ជួយក្នុងការផ្សព្វផ្សាយជំរុញឲ្យប្រជាពលរដ្ឋទៅចុះឈ្មោះបោះឆ្នោត។
▪ មិនត្រឹមតែប៉ុណ្ណោះ នៅថ្ងៃចុងក្រោយនៃព្រះរាជពិធីបុណ្យអុំទូក បណ្តែតប្រទីប អក-អំបុកនិងសំពះព្រះខែ ក្រុមអាជ្ញាធរ កងកម្លាំងសន្តិសុខនៅទីតាំងវាលព្រះមេរុ បានឃាត់ខ្លួនក្រុមយុវជន យុវតី ស្ម័គ្រចិត្តចំនួន៧នាក់ អស់រយៈពេលប្រមាណជាងបីម៉ោង ដោយបានបង្ខំអ្នកទាំងនោះឲ្យផ្តិតមេដៃធ្វើកិច្ចសន្យាបញ្ឈប់សកម្មភាពអប់រំ ផ្សព្វផ្សាយរបស់ខ្លួន និងបានដកហូតទូរស័ព្ទរបស់មេក្រុមចំនួន២គ្រឿងទុកមួយរយៈ រហូតទាល់តែអ្នកទាំងនោះយល់ព្រមផ្តិតមេដៃបញ្ឈប់សកម្មភាពរបស់ខ្លួន ទើបសមត្ថកិច្ចប្រគល់ទូរស័ព្ទដៃឲ្យវិញ។
ជាមួយគ្នានេះដែរ អង្គការសង្គមស៊ីវិល សូមសម្ដែងនូវការកោតសរសើរចំពោះកិច្ចខិតខំប្រឹងប្រែងសហការ និងអន្តរាគមន៍របស់ គណៈកម្មាធិការជាតិរៀបចំការបោះឆ្នោត (គ.ជ.ប) ព្រមទាំងបានជួយផ្គត់ផ្គង់ឯកសារមួយចំនួនសម្រាប់យុទ្ធនាការអប់រំ ផ្សព្វផ្សាយនេះ។ ប៉ុន្តែអ្វីដែលជាការសោកស្តាយបំផុតនោះគឺថាគ.ជ.ប មិនអាចការពារយុទ្ធនាការអប់រំ ផ្សព្វផ្សាយ ជាមួយការប្រើប្រាស់ឧបករណ៍បំពងសំឡេងដែលជាមធ្យោបាយដ៏មានប្រសិទ្ធភាពបំផុត។
យើងខ្ញុំជាអង្គការសង្គមស៊ីវិល សូមស្នើអាជ្ញាធរគ្រប់លំដាប់ថ្នាក់ទូទាំងប្រទេសផ្តល់កិច្ចសហការឲ្យបានទូលំទូលាយជាមួយ គ.ជ.ប អង្គការសង្គមស៊ីវិល និងគណបក្សនយោបាយ ក្នុងការជំរុញយុទ្ធនាការអប់រំ ផ្សព្វផ្សាយផ្តល់ព័ត៌មានអំពីការចុះឈ្មោះបោះឆ្នោត ព័ត៌មានជុំវិញការបោះឆ្នោតតាមរយៈការប្រើប្រាស់ឧបករណ៍បំពងសំឡេង ឲ្យដូចគ្នានឹងរយៈពេលនៃការចាប់ផ្តើម ការចុះឈ្មោះបោះឆ្នោតនៅខែកញ្ញាឡើងវិញ ប្រយោជន៍ដើម្បីជំរុញឲ្យប្រជាពលរដ្ឋទៅចុះឈ្មោះបោះឆ្នោតឲ្យបានច្រើនជាអតិបរមា។
អង្គការសង្គមស៊ីវិលដែលគាំទ្រសេចក្តីប្រកាសព័ត៌មាននេះ រួមមាន ៖
១. គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (COMFREL)
២. មជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព (PDP-Center)
៣. គណៈកម្មាធិការអព្យាក្រឹត និងមិនលំអៀងសម្រាប់ការបោះឆ្នោតដោយសេរី និងយុត្តិធម៌នៅកម្ពុជា (NICFEC)
៤. កម្មវិធីអភិវឌ្ឍន៍ធនធានយុវជន (YRDP)
៥. មជ្ឈមណ្ឌលសិទ្ធិមនុស្សកម្ពុជា (CCHR)
៦. សម្ព័ន្ធខ្មែរជំរឿននិងការពារសិទ្ធិមនុស្ស លីកាដូ (LICADHO)
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- សិទិ្ធបញ្ចេញមតិ និងចូលរួម