ការឆ្លើយតបរួមទៅនឹងលិខិតចំហរអំពីរបាយការណ៍មីក្រូហិរញ្ញវត្ថុ
ចេញផ្សាយ ថ្ងៃទី១៦ ខែកក្កដា ឆ្នាំ២០២០; ក្រុមសង្គមស៊ីវិល
ជម្រាបជូន
• ប្រធានសមាគមមីក្រូហិរញ្ញវត្ថុកម្ពុជា
• ប្រធានសមាគមធនាគារនៅកម្ពុជា
យើងខ្ញុំបានអាន លិខិតចំហររបស់សមាគមមីក្រូហិរញ្ញវត្ថុកម្ពុជា និងសមាគមធនាគារនៅកម្ពុជា ដែលបានផ្សព្វផ្សាយនៅលើទំព័រហ្វេសប៊ុកផ្លូវការរបស់សមាគមមីក្រូហិរញ្ញវត្ថុកម្ពុជា កាលពីយប់ថ្ងៃទី១៥ ខែកក្កដា ឆ្នាំ២០២០នេះ និងបានជម្រាបជូនមកអង្គការ និងសហជីពយើងខ្ញុំ ទាំង៤ស្ថាប័ន ។
ជាជំហររួមយើងខ្ញុំ សូមបដិសេធសំណើរបស់សមាគមមីក្រូហិរញ្ញវត្ថុកម្ពុជា និងសមាគមធនាគារនៅកម្ពុជា ក្នុងការកែប្រែទៅលើរបាយការណ៍ទាំង៣ ពាក់ព័ន្ធនឹងការរំលោភសិទ្ធិមនុស្សក្នុងវិស័យមីក្រូហិរញ្ញវត្ថុ និងកម្ចីឥណទានខ្នាតតូច នៅកម្ពុជា ។ ព័ត៌មាន និងរឿងរ៉ាវរបស់បុគ្គលនៅក្នុងរបាយការណ៍ដែលបានចុះផ្សាយទាំងនេះគឺនៅតែមានភាពច្បាស់លាស់ត្រឹមត្រូវដដែលដោយមិនអាចកែប្រែបាន ។ យើងខ្ញុំ នឹងបន្តការពារឯកជនភាពបុគ្គលដែលសម្រេចចិត្តចែករំលែករឿងរ៉ាវរបស់ពួកគាត់ជាមួយក្រុមអ្នកសិក្សាស្រាវជ្រាវយើងខ្ញុំ ក្នុងលក្ខខណ្ឌលាក់បាំងអត្តសញ្ញាណ ។ យើងខ្ញុំ សូមលើកទឹកចិត្ត សមាគមមីក្រូហិរញ្ញវត្ថុកម្ពុជា និងសមាគមធនាគារនៅកម្ពុជា ក៏ដូចជាភាគីពាក់ព័ន្ធ ឱ្យអានរបាយការណ៍ទាំងនេះ ឱ្យបានលម្អិត ដើម្បីឈ្វេងយល់កាន់តែច្បាស់អំពី គោលបំណង វិធីសាស្ត្រ និងការរកឃើញផ្សេងៗនៅក្នុងរបាយការណ៍ ។
សិទ្ធិមនុស្សគឺជាសិទ្ធិមានពីកំណើតរបស់មនុស្សគ្រប់រូប ហើយរឿងរ៉ាវរបស់មនុស្សគឺជាមូលដ្ឋានគ្រឹះសំខាន់នៃការស្រាវជ្រាវបែបគុណភាព ។ ការងារមួយក្នុងចំណោមការងារផ្សេងទៀតរបស់យើងខ្ញុំគឺ ដើម្បីជួយបន្លឺសំឡេងរបស់ប្រជាពលរដ្ឋ ដែលកំពុងរងគ្រោះពីការរំលោភសិទ្ធិមនុស្ស និងផ្សព្វផ្សាយរឿងរ៉ាវទាំងនោះឱ្យបានទូលំទូលាយ ក្នុងគោលបំណងដើម្បីឱ្យមានការកែប្រែជាវិជ្ជមាននៅក្នុងសង្គម និងដើម្បីការពារកុំឱ្យកើតមានការរំលោភបំពានផ្សេងៗ ។ យើងខ្ញុំ នឹងបន្តផ្សព្វផ្សាយ និងចែករំលែកទុក្ខកង្វល់របស់ប្រជាពលរដ្ឋ ទោះបីជាការរៀបរាប់ពីបញ្ហាសិទ្ធិមនុស្សទាំងនេះ ពាក់ព័ន្ធគ្នាទៅនឹងវិស័យមីក្រូហិរញ្ញវត្ថុ និងកម្ចីឥណទានខ្នាតតូចក៏ដោយ ។
ជាថ្មីម្ដងទៀត យើងខ្ញុំ សូមយកឱកាសនេះ លើកយកសំណើ និងអនុសាសន៍ ដែលក្រុមសង្គមស៊ីវិល បានផ្ញើជូនទៅ អ្នកផ្ដល់កម្ចីឥណទានខ្នាតតូចទាំងអស់ ដើម្បីទប់ស្កាត់កុំឱ្យកើតមានការរំលោភសិទ្ធិមនុស្សនៅក្នុងវិស័យនេះ ក្នុងនោះរួមមាន៖
▪ សូមកែប្រែបទបញ្ជាផ្ទៃក្នុងគ្រឹះស្ថានមីក្រូហិរញ្ញវត្ថុ ដើម្បីហាមឃាត់ការទាមទារដាក់ប័ណ្ណសម្គាល់កម្មសិទ្ធ ឬលិខិតបញ្ជាក់ការកាន់កាប់ដីធ្លី ធ្វើជាទ្រព្យធានា សម្រាប់កម្ចីឥណទានខ្នាតតូចថ្មីទាំងអស់ ។
▪ សូមគណនា និងចេញផ្សាយជាសាធារណៈនូវចំនួនប័ណ្ណសម្គាល់កម្មសិទ្ធ ឬលិខិតបញ្ជាក់ការកាន់កាប់ដីធ្លីដែលត្រូវបានដាក់តម្កល់ជាទ្រព្យធានា ។
▪ សូមបញ្ឈប់ការដាក់សម្ពាធលើអតិថិជនឱ្យលក់ដី ដើម្បីដោះបំណុល និងជំនួសវិញដោយការដោះស្រាយតាមរយៈការប្រើប្រាស់យន្តការផ្លូវច្បាប់ដែលមានស្រាប់ សម្រាប់អតិថិជនដែលគ្មានលទ្ធភាពសងបំណុល ។
▪ សូមបញ្ឈប់ការយកកម្រៃបង់មុន ដែលនាំឱ្យអត្រាការប្រាក់ពិតលើសពី ពិដានអត្រាការប្រាក់ ១៨ភាគរយក្នុងមួយឆ្នាំ ដែលបានកំណត់ដោយធនាគារជាតិកម្ពុជា កាលពីខែមីនា ឆ្នាំ២០១៧ ។
▪ សូមគាំទ្រ និងសម្របសម្រួលឱ្យមានការស៊ើបអង្កេតដោយឯករាជ្យលើគ្រប់វិស័យ ទៅលើការអនុវត្តនានារបស់គ្រឹះស្ថានមីក្រូហិរញ្ញវត្ថុ និងគ្រឹះស្ថានធនាគារ និងធានាថា ការសម្រាលបន្ទុក និងសំណងត្រូវបានផ្ដល់ឱ្យអតិថិជនអ្នកខ្ចីប្រាក់ នៅពេលដែលមានការរកឃើញកំហុស ។
▪ សូមផ្ដល់ការពន្យាពេលសងបំណុលមីក្រូហិរញ្ញវត្ថុ និងការប្រាក់ យ៉ាងតិចបំផុត៣ខែ ដោយផ្ដល់អាទិភាពដល់ក្រុមអ្នកខ្ចីប្រាក់ដែលងាយរងគ្រោះដូចជា គ្រួសារ និងសហគមន៍ក្រីក្រ កម្មករនិយោជិកគ្រប់វិស័យដែលត្រូវបានបាត់បង់ការងារ និងត្រូវបានព្យួរការងារ ជាពិសេសអ្នកដែលត្រូវបានសម្គាល់ដោយប័ណ្ណក្រីក្រ ដែលជាអ្នករងគ្រោះខ្លាំងជាងគេដោយសារវិបត្តិសេដ្ឋកិច្ចកើតចេញពីការរីករាលដាលនៃជំងឺកូវីដ១៩ ៕
ដោយក្ដីគោរពរាប់អានអំពីយើងខ្ញុំ!
សម្ព័ន្ធខ្មែរជំរឿន និងការពារសិទ្ធិមនុស្ស លីកាដូ (LICADHO)
អង្គការសមាគមធាងត្នោត (STT)
សម្ព័ន្ធសហជីពកម្ពុជា (CATU)
មជ្ឈមណ្ឌលសម្ព័ន្ធភាពការងារ និងការពារសិទ្ធិមនុស្ស (CENTRAL)
សេចក្តីថ្លែងការណ៍នេះគាំទ្រដោយ៖
១. Center for Alliance of Labor and Human Rights
២. Cambodian Alliance of Trade Unions
៣. The Cambodian League for the Promotion and Defense of Human Rights
៤. Sahmakum Teang Tnaut
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- សិទ្ធិការងារ សិទ្ធិដីធ្លី គ្រឹះស្ថានមីក្រូហិរញ្ញវត្ថុ និងបញ្ហាបំណុល