ក្រុមហ៊ុនស្ករ មិត្រផូល ត្រូវតែផ្តល់យុត្តិធម៌ដល់សហគមន៍ដែលបានផ្លាស់ទីលំនៅ
ចេញផ្សាយ ថ្ងៃទី១៩ ខែវិច្ឆិកា ឆ្នាំ២០២០; ក្រុមសង្គមស៊ីវិល
នៅពេលដែលវេទិកាអង្គការសហប្រជាជាតិស្តីពីធុរកិច្ចនិងសិទ្ធិមនុស្សលើកទី៩ ជួបប្រជុំគ្នានៅទីក្រុងហ្សឺណែវ អង្គការសមធម៌កម្ពុជា អង្គការ អាយឌីអាយ និងអង្គការលីកាដូ សូមអំពាវនាវសាជាថ្មី ដើម្បីទាមទារឲ្យមានការផ្តល់ដំណោះស្រាយជូនសហគមន៍ រងគ្រោះ នៅកម្ពុជាដែលត្រូវបានក្រុមហ៊ុនស្កររបស់ប្រទេសថៃឈ្មោះមិត្រផូល ជម្លៀសចេញពីផ្ទះដោយបង្ខំ។
ក្នុងចន្លោះឆ្នាំ២០០៨ និង២០០៩ ក្រុមហ៊ុនមិត្រផូល សហការជាមួយកងកម្លាំងប្រដាប់អាវុធកម្ពុជា ក្នុងការកម្ទេចផ្ទះរបស់ប្រជាជន រឹបអូសយកដីធ្លីរបស់ ពួកគាត់ដោយបង្ខំ ព្រមទាំងដកហូតផលដំណាំស្រូវរបស់ពួកគាត់ថែមទៀតផង ដើម្បីធ្វើចំការអំពៅនៅក្នុងខេត្តឧត្តមានជ័យ នៃប្រទេសកម្ពុជា។ ក្រុមហ៊ុនបន្តកាន់កាប់ទ្រព្យដែលរឹបអូសដោយខុសច្បាប់ទាំងនេះអស់រយៈពេល៥ឆ្នាំ ខណៈពេលដែលប្រជាសហគមន៍ ទទួលរងការរំលោភបំពានសិទ្ធិមនុស្សជាបន្តបន្ទាប់ដែលបណ្តាលមកពីការបាត់បង់ផ្ទះសម្បែង ដីធ្លី និងជីវភាពរស់នៅរបស់ខ្លួន។ ការរំលោភបំពានសិទ្ធិមនុស្សធ្ងន់ធ្ងរទាំងនេះ ត្រូវបានទទួលការស៊ើបអង្កេត និងបញ្ជាក់យ៉ាងច្បាស់ ដោយស្ថាប័នជាច្រើន ដោយរួមមានទាំង ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា គណៈកម្មាធិការសិទ្ធិមនុស្សជាតិថៃ និងអង្គការមិនមែនរដ្ឋាភិបាលក្នុងវិស័យសិទ្ធិមនុស្សជាច្រើនទៀត។
មកដល់ថ្ងៃនេះ អស់រយៈពេលជាងដប់ឆ្នាំ បន្ទាប់ពីការបាត់បង់ដីធ្លី និងជីវភាពរស់នៅ សហគមន៍ដែលរងផលប៉ះពាល់ មិនទាន់បានទទួលនូវដំណោះស្រាយណាមួយនៅឡើយទេ ហើយក្រុមហ៊ុនមិត្រផូលនេះ នៅតែបន្តបដិសេធពីការទទួលខុសត្រូវចំពោះសកម្មភាពរបស់ខ្លួន ។
បច្ចុប្បន្ននេះ សហគមន៍ដែលរងផលប៉ះពាល់ កំពុងស្វែងរកយុត្តិធម៌ពីក្រុមហ៊ុនមិត្រផូល នៅក្នុងតុលាការប្រទេសថៃ។
ក្នុងខែកក្កដា ឆ្នាំនេះ បណ្តឹងផ្លូវច្បាប់របស់សហគមន៍ ដែលបានដាក់កាលពីខែមីនា ឆ្នាំ២០១៨ បានទទួលឋានៈបណ្តឹងជាសមូហភាព ដែលធ្វើឲ្យបណ្តឹងនេះក្លាយទៅជាបណ្តឹងសមូហភាព ទាក់ទងនឹងសិទ្ធិមនុស្សឆ្លងដែនដំបូងគេនៅក្នុងប្រវត្តិសាស្ត្រផ្លូវច្បាប់ក្នុងទ្វីបអាស៊ី។ ជាលទ្ធផល នៅទីបំផុតពេលនេះ ប្រជាពលរដ្ឋជាង៧០០គ្រួសារ នឹងទទួលបានការបើកសវនាការទៅលើសំណុំរឿងរបស់ពួកគាត់ នៅចំពោះមុខតុលាការតាមផ្លូវច្បាប់។
ទោះបីមានការគួរឲ្យកោតសរសើរថាតុលាការប្រទេសថៃ បានផ្តល់ឋានៈបណ្តឹងជាសមូហភាព សហគមន៍មិនគួរទទួលរងការស៊ូទ្រាំចំពោះដំណើរការក្តីដែលអូសបន្លាយពេលដ៏វែងនៅក្នុងតុលាការបរទេស ដើម្បីធានាបាននូវសិទ្ធិរបស់ពួកគេក្នុងការទទួលបានដំណោះស្រាយប្រកបដោយប្រសិទ្ធភាពនោះទេ។ ស្ថាប័នផ្តល់វិញ្ញាបន ប័ត្របញ្ជាក់អំពីនិរន្តរភាពសម្រាប់វិស័យស្ករ ឈ្មោះបុនស៊ូក្រូ គួរតែជំរុញឲ្យក្រុមហ៊ុនមិត្រផូល ចូលខ្លួនមកក្នុងដំណើរការដោះស្រាយបណ្តឹងក្រៅផ្លូវតុលាការ ជាមួយសហគមន៍។ នៅចំពោះមុខ មានភស្តុតាងដ៏ច្រើនសន្ធឹកសន្ទាប់អំពីការទទួលខុសត្រូវរបស់ក្រុមហ៊ុនមិត្រផូល ចំពោះការរំលោភបំពានសិទ្ធិមនុស្ស ដោយរួមបញ្ចូលទាំងការស៊ើបអង្កេតដោយគណៈកម្មាធិការសិទ្ធិមនុស្សជាតិថៃ ដែលបានអំពាវនាវ ជាពិសេសដល់ក្រុមហ៊ុនដើម្បីផ្តល់សំណងដល់គ្រួសាររងគ្រោះកម្ពុជា ក្រុមហ៊ុនមិត្រផូល នៅតែជាសមាជិករបស់ស្ថាប័នបុនស៊ូក្រូ ក្នុងឋានៈល្អដដែល។ ស្ថាប័នបុនស៊ូក្រូ បែរជាសុខចិត្តទទួលយកទង្វើរបស់ក្រុមហ៊ុនមិត្រផូល និងខកខានក្នុងការបំពេញតាមការទទួលខុសត្រូវផ្នែកសិទ្ធិមនុស្សរបស់ខ្លួនផ្ទាល់ទៅវិញ។
ការខកខានជាប្រចាំរបស់ក្រុមហ៊ុនមិត្រផូល ក្នុងការផ្តល់ដំណោះស្រាយដល់សហគមន៍ដែលរងផលប៉ះពាល់ ក៏ទទួលបានការជំរុញដោយសារតែការខកខានរបស់អតិថិជនសាជីវកម្មចម្បងៗរបស់ខ្លួន ក្នុងការគោរពអនុលោមទៅតាមការទទួលខុសត្រូវផ្នែកសិទ្ធិមនុស្សរបស់ខ្លួនដែរ។ ក្រុមហ៊ុនមិត្រផូល លក់ស្ករទៅឲ្យក្រុមហ៊ុនម៉ាកដែលមានគេស្គាល់ច្រើនបំផុតក្នុងពិភពលោករួមទាំង ក្រុមហ៊ុនកូកាកូឡា ណេស្លេ និង ម៉ាសរ៉ិកឡី។ ក្រុមហ៊ុននីមួយៗនេះ មានចំណងដោយផ្ទាល់ទៅនឹងការរំលោភបំពានសិទ្ធិមនុស្សជាបន្តបន្ទាប់ សហគមន៍ដែលរងផលប៉ះពាល់ កំពុងជួបប្រទះ ដោយសារតែរបៀបទំនាក់ទំនងធុរកិច្ចជាមួយក្រុមហ៊ុនមិត្រផូលនេះ។ ដូច្នេះហើយ ពួកគេមានភារកិច្ចគោរព គោលការណ៍ណែនាំស្តីពីធុរកិច្ចនិងសិទ្ធិមនុស្សរបស់អង្គការសហប្រជាជាតិ និងគោលការណ៍ណែនាំស្តីពីសហគ្រាសពហុជាតិ OECD ក្នុងការប្រើប្រាស់ឥទ្ធិពលរបស់ខ្លួនជាមួយក្រុមហ៊ុនមិត្រផូល ដើម្បីសម្រួលដល់ការទទួលបានដំណោះស្រាយសម្រាប់សហគមន៍។
យើងខ្ញុំសូមអំពាវនាវដល់ក្រុមហ៊ុនមិត្រផូល ឲ្យទទួលស្គាល់ការបង្កការឈឺចាប់ដែលក្រុមហ៊ុនបានបណ្តាលឲ្យកើតមានឡើង និងអំពាវនាវឲ្យបំពេញការទទួលខុសត្រូវផ្នែកសិទ្ធិមនុស្សរបស់ខ្លួន តាមរយៈការចូលខ្លួនជាបន្ទាន់មកពិភាក្សាស្វែងរកដំណោះស្រាយជាមួយអ្នកតំណាងគ្រួសារដែលរងផលប៉ះពាល់ និងចាត់វិធានការដំណោះស្រាយឲ្យបានសមស្រប។
យើងខ្ញុំក៏សូមអំពាវនាវដល់ស្ថាប័នបុនស៊ូក្រូ និងម៉ាកល្បីៗទាំងឡាយ ដែលបន្តទិញស្ករពីក្រុមហ៊ុនមិត្រផូល រួមមានក្រុមហ៊ុនកូកាកូឡា ណេស្លេ និង ម៉ាស និង ខូប៊ីយ៉ន់ រួបរួមគ្នា និងប្រើប្រាស់ឥទ្ធិពលរួមគ្នា ក្នុងការទាមទារឲ្យក្រុមហ៊ុនមិត្រផូល ផ្តល់យុត្តិធម៌ដែលហួសពេលជាយូរមកហើយនោះ និងជាយុត្តិធម៌ដែលសហគមន៍សក្តិសមនឹងទទួលបាន។
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
