ការិយាល័យឃ្លាំមើលសិទ្ធិមនុស្ស
ការិយាល័យឃ្លាំមើលរបស់អង្គការលីកាដូ កំណត់ ស្រាវជ្រាវ និងចងក្រងករណីរំលោភសិទ្ធិមនុស្ស នៅក្នុងប្រទេសកម្ពុជា ។ អ្នកឃ្លាំមើលដែលមានបទពិសោធន៍ គឺមាននៅទូទាំងប្រទេស ដែលធ្វើឱ្យអង្គការលីកាដូ អាចភ្ជាប់ទំនាក់ទំនងជាមួយសហគមន៍មូលដ្ឋាននៅតាមជនបទ និងប្រជាពលរដ្ឋ ដែលត្រូវរាយការណ៍អំពីការរំលោភបំពាន និងស្វែងរកយុត្តិធម៌ នៅក្នុងបរិបទនៃបរិយាកាសសិទ្ធិមនុស្ស ដែលកាន់តែមានភាពតានតឹង ។
អ្នកឃ្លាំមើលរបស់អង្គការលីកាដូ ស្ថិតនៅជួរមុខនៃការចងក្រងការរំលោភសិទ្ធិដោយរដ្ឋ ឥស្សរជននយោបាយ និងមុខជំនួញក្ដោបក្ដាប់ដោយអ្នកមានអំណាច ។ គម្រោងឃ្លាំមើល ធ្វើការយ៉ាងជិតស្និទ្ធជាមួយការិយាល័យ និងអង្គការដៃគូដទៃទៀត ដើម្បីផ្តល់សេវាផ្នែកច្បាប់ ការប្រឹក្សាយោបល់ផ្នែកច្បាប់ និងសេវាវេជ្ជសាស្ត្រ ដល់ប្រជាពលរដ្ឋដែលទទួលរងការរំលោភបំពានសិទ្ធិ ។ ការងាររបស់ពួកគេរួមមាន ការវាយតម្លៃដើម្បីផ្ដល់ការគាំទ្រជាសម្ភារៈ សម្រាប់អ្នកការពារសិទ្ធិមនុស្ស និងគ្រួសាររបស់ពួកគេ និងការផ្តល់អនុសាសន៍អំពី គោលដៅយុទ្ធសាស្ត្រក្នុងការតស៊ូមតិ ដើម្បីផ្សព្វផ្សាយអំពីស្ថានភាពសិទ្ធិមនុស្សនៅកម្ពុជា ។
ការិយាល័យសិទ្ធិស្ត្រី
ស្ត្រីនៅក្នុងប្រទេសកម្ពុជា នៅតែបន្តប្រឈមនឹងអំពើហិង្សាផ្អែកលើយេនឌ័រ និងភាពមានកម្រិតនៃការទទួលបានយុត្តិធម៌ ដោយសារតែភាពចាក់ស្រេះនៃផ្នត់គំនិតយេនឌ័រ ប្រព័ន្ធតុលាការដែលគ្មានប្រសិទ្ធភាព និងការរីករាលដាលនៃអំពើពុករលួយ ។ ការិយាល័យសិទ្ធិស្ត្រីនៃអង្គការលីកាដូ គាំទ្រស្ត្រីដែលរងគ្រោះនៅក្នុងអំពើហិង្សាក្នុងគ្រួសារ ការរំលោភសេពសន្ថវៈនិងប្រទូស្ដកេរខ្មាស ការវាយប្រហារដោយទឹកអាស៊ីត ការជួញដូរមនុស្ស និងការរំលោភបំពានផ្សេងទៀត តាមរយៈការស្រាវជ្រាវ ការគាំទ្រផ្នែកច្បាប់ និងសម្របសម្រួលឱ្យមានការផ្តល់សេវាសំខាន់ៗជាច្រើនបន្ថែមទៀត ។
អ្នកឃ្លាំមើល ធ្វើការស្រាវជ្រាវករណី គាំទ្រស្រ្តីឱ្យដាក់ពាក្យអន្តរាគមន៍ផ្លូវច្បាប់ អមដំណើរពួកគេតាមនីតិវិធីរបស់តុលាការ ឬជួបប្រជុំជាមួយអាជ្ញាធរមូលដ្ឋាន និងតាមដានសំណុំរឿងដែលជាប់គាំងជាមួយមន្ត្រីរដ្ឋាភិបាល ឬមន្ត្រីតុលាការ ។ អ្នកឃ្លាំមើល ក៏ធ្វើការសម្របសម្រួលឱ្យមានការផ្ដល់សេវាផ្សេងៗ តាមរយៈការិយាល័យរបស់អង្គការលីកាដូផ្សេងទៀត និងជួយដល់ស្ត្រីក្នុងការស្វែងរកសេវាផ្សេងៗជាមួយអង្គការដៃគូ ដើម្បីធានាថាពួកគេទទួលបានការគាំទ្រដែលពួកគេត្រូវការ អំឡុងពេលស្វែងរកយុត្តិធម៌ និងសុវត្ថិភាព ។
នៅក្នុងប្រព័ន្ធមួយ ដែលអាជ្ញាធរ និងប្រជាពលរដ្ឋ តែងតែជាប់ពាក់ព័ន្ធនឹងការស្តីបន្ទោសជនរងគ្រោះ និងជនប្រព្រឹត្តបទល្មើសរីករាយនឹងនិទណ្ឌភាព អង្គការលីកាដូ ឈរជាមួយស្ត្រី ហើយនឹងបន្តផ្តល់ការគាំទ្រ និងសេវាកម្មផ្សេងៗ ដើម្បីឱ្យពួកគេទទួលបានយុត្តិធម៌ ។
ការិយាល័យសិទ្ធិកុមារ
កុមារនៅកម្ពុជា នៅតែបន្តប្រឈមនឹងការរំលោភបំពានទៅលើសិទ្ធិរបស់ពួកគេ ។ ការិយាល័យសិទ្ធិកុមារនៃអង្គការលីកាដូ ធ្វើការស្រាវជ្រាវទៅលើការរំលោភសិទ្ធិកុមារ ដូចជាឃាតកម្ម អំពើហិង្សាលើរាងកាយ ការរំលោភសេពសន្ថវៈនិងប្រទូស្ដកេរខ្មាស អំពើហិង្សាក្នុងគ្រួសារ ការជួញដូរមនុស្ស ពលកម្មកុមារ និងការរំលោភបំពានផ្សេងៗទៀត ។
អ្នកឃ្លាំមើល ផ្ដល់ការគាំទ្រសម្រាប់កុមារ និងគ្រួសាររបស់ពួកគេអំឡុងពេលស្វែងរកយុត្តិធម៌ តាមរយៈការចែករំលែកព័ត៌មានទៅកាន់ពួកគេអំពីជម្រើសផ្នែកច្បាប់ ការគ្រាំទ្រពួកគេឱ្យដាក់ពាក្យបណ្តឺង និងការអន្តរាគមន៍ជាមួយអាជ្ញាធរពាក់ព័ន្ធ ដើម្បីធានាឱ្យមានចំណាត់ការរបស់អាជ្ញាធរ ។ អ្នកឃ្លាំមើល ក៏ធ្វើការសម្របសម្រួលឱ្យមានការផ្ដល់ជំនួយផ្នែកច្បាប់ ការគាំទ្រផ្នែកសេវាសង្គម និងការថែទាំសុខភាព តាមរយៈបណ្តាការិយាល័យផ្សេងៗទៀតរបស់អង្គការលីកាដូ និងបញ្ជូនករណីទៅអង្គការដៃគូ ដើម្បីទទួលបានសេវាកម្មផ្សេងៗដែលពួកគេត្រូវការ ។
អាជ្ញាធរ នៅតែបន្តការទម្លាក់ចោលនីតិវិធីព្រហ្មទណ្ឌដោយមិនត្រឹមត្រូវ បន្ទាប់ពីបានដាក់សម្ពាធក្រុមគ្រួសាររបស់កុមារឱ្យយល់ព្រមលើការដោះស្រាយក្រៅប្រព័ន្ធតុលាការ ដោយធ្វើឱ្យកុមារគ្មានសិទ្ធិទទួលបានយុត្តិធម៌ និងប្រឈមនឹងគ្រោះថ្នាក់បន្ថែមទៀត ។ អង្គការលីកាដូ ផ្ដល់ការគាំទ្រសម្រាប់កុមារ និងគ្រួសាររបស់ពួកគេ ក្នុងការយកឈ្នះលើបញ្ហាប្រឈមទាំងនេះ និងបញ្ហាផ្សេងទៀត អំឡុងពេលពួកគេស្វែងរកយុត្តិធម៌ ។
ការិយាល័យពេទ្យ
ប្រជាពលរដ្ឋកម្ពុជាជាច្រើន ដែលស្ថិតក្នុងហានិភ័យ និងមនុស្សដែលមិនត្រូវបានគេអើពើ ខ្វះលទ្ធភាពទទួលបានសេវាថែទាំសុខភាពដែលអាចទុកចិត្តបាន និងតម្លៃសមរម្យ ។ ការិយាល័យពេទ្យនៃអង្គការលីកាដូ បំពេញចំណុចខ្វះចន្លោះនេះ ដោយផ្ដល់ការពិគ្រោះ និងព្យាបាលជំងឺ ដូចជា នៅក្នុងពន្ធនាគារ នៅអំឡុងពេលដែលមានការតវ៉ា នៅសហគមន៍ដែលរងផលប៉ះពាល់ដោយការរំលោភយកដីធ្លី នៅទីកន្លែងបណ្តេញចេញនិងតំបន់តាំងទីលំនៅថ្មី និងនៅការិយាល័យពេទ្យនៃទីស្នាក់ការកណ្ដាលអង្គការលីកាដូក្នុងរាជធានីភ្នំពេញ ជាដើម ។
ក្រុមគ្រូពេទ្យ ដែលអមដំណើរជាមួយអ្នកឃ្លាំមើលសិទ្ធិមនុស្សរបស់អង្គការលីកាដូនៅក្នុងព្រឹត្តិការណ៍នានា មិនត្រឹមតែផ្តល់ការព្យាបាលប៉ុណ្ណោះទេ ប៉ុន្តែថែមទាំងចងក្រងឯកសារអំពីផលប៉ះពាល់សុខភាពនៃអំពើហិង្សាផងដែរ ។ ភស្តុតាងនេះ ត្រូវបានប្រើប្រាស់ជាការចែករំលែកព័ត៌មាន ការតស៊ូមតិ និងពេលខ្លះនៅក្នុងសំណុំរឿងតុលាការ ។
ការិយាល័យពេទ្យ ប្រើប្រាស់ក្រុមវេជ្ជបណ្ឌិត និងឱសថការី ដើម្បីផ្តល់សេវាពិគ្រោះ និងព្យាបាលជំងឺទូទៅ ដល់ជនរងគ្រោះនៃការរំលោភសិទ្ធិមនុស្ស សកម្មជនជួរមុខ អ្នកការពារសិទ្ធិមនុស្ស ប្រជាពលរដ្ឋរស់នៅតំបន់តាំងទីលំនៅថ្មី ឬអ្នកដែលត្រូវបានបណ្តេញចេញពីផ្ទះសម្បែងរបស់ពួកគេ និងមនុស្សដែលជាប់ឃុំនៅក្នុងពន្ធនាគារ ។
ការិយាល័យសេវាសង្គម
ការិយាល័យសេវាសង្គម ផ្តល់សេវាចាំបាច់និងជំនួយសំខាន់ៗដល់អ្នកការពារសិទ្ធិមនុស្ស និងអ្នកដែលបានជួបប្រឈមនឹងការរំលោភសិទ្ធិមនុស្ស ។ សេវាទាំងនេះ ព្យាយាមបំពេញចន្លោះខ្វះខាតនៃសេវាសុខុមាលភាពសង្គមដែលផ្តល់ដោយរដ្ឋ ។ សេវាទាំងនេះរួមមានការគាំទ្រផ្នែកសម្ភារៈដូចជា អាហារ ផលិតផលអនាម័យ សម្ភារៈប្រើប្រាស់ក្នុងផ្ទះ និងសម្ភារៈចាំបាច់សម្រាប់ទារក និងកុមារ ។
ក្រុមការងារសេវាសង្គម ធ្វើការយ៉ាងជិតស្និទ្ធជាមួយការិយាល័យឃ្លាំមើល ការិយាល័យច្បាប់ និងការិយាល័យតស៊ូមតិ ដើម្បីកំណត់អំពីប្រជាពលរដ្ឋ និងសហគមន៍ដែលរងផលប៉ះពាល់ដោយការរំលោភសិទ្ធិ ក៏ដូចជាធានាឱ្យបានពីការបំពេញតម្រូវការមូលដ្ឋានរបស់ពួកគេ និងអាចឱ្យពួកគេធ្វើការតស៊ូមតិបន្តទៀត ។
ការិយាល័យច្បាប់
ការិយាល័យច្បាប់ ផ្តល់ការប្រឹក្សា និងការពារផ្នែកច្បាប់ សម្រាប់អ្នកការពារសិទ្ធិមនុស្ស ជនរងគ្រោះនៃការរំលោភយកដីធ្លីនិងការបណ្តេញចេញ ក៏ដូចជាអ្នកដែលជួបប្រឈមនឹងអំពើហិង្សាក្នុងគ្រួសារ ការរំលោភសេពសន្ថវៈ និងការជួញដូរមនុស្ស ជាដើម ។ ការគាំទ្រនេះ មានសារៈសំខាន់ណាស់ក្នុងការការពារសិទ្ធិរបស់ប្រជាពលរដ្ឋ និងភាពទទួលខុសត្រូវ និងដំណោះស្រាយតាមរយៈប្រព័ន្ធតុលាការនៅប្រទេសកម្ពុជា ដែលមានលក្ខណៈពុករលួយ និងមិនមានឯករាជ្យភាព ។
ដោយបានសហការជាមួយការិយាល័យដទៃទៀត ក្រុមការងារផ្នែកច្បាប់រួមមាន មេធាវី និងជំនួយការមេធាវី ធ្វើការផ្តល់សេវាផ្លូវច្បាប់ និងការប្រឹក្សាយោបល់ ឬការការពារក្ដី សម្រាប់ប្រជាពលរដ្ឋដែលប្រឈមនឹងបណ្ដឹង ពាក់ព័ន្ធនឹងការរំលោភសិទ្ធិមនុស្សរបស់ពួកគេ ។ ក្រុមការងារនេះ ប្រឹក្សាយោបល់ជូនអតិថិជន ឬកូនក្តីរបស់អង្គការលីកាដូ តាមគ្រប់ដំណាក់កាលនៃដំណើរការផ្លូវច្បាប់រួមមាន ការដាក់ពាក្យសុំនៅក្រៅឃុំ ការចូលឆ្លើយបំភ្លឺនៅចំពោះមុខព្រះរាជអាជ្ញា និងចៅក្រមស៊ើបសួរ ការប្រមូលនិងដាក់បញ្ជូនភស្តុតាង ការការពារកូនក្តីនៅក្នុងសវនាការ និងការប្តឹងឧទ្ធរណ៍ និងសារទុក្ខប្រឆាំងនឹងការផ្តន្ទាទោសដោយមិនត្រឹមត្រូវ ។
នៅក្នុងដំណើរការការងារនៃប្រព័ន្ធតុលាការកម្ពុជា ក្រុមការងារផ្នែកច្បាប់ បានតាមដានសំណុំរឿងសំខាន់ៗ ដើម្បីឃ្លាំមើលការរំលោភសិទ្ធិស្មើគ្នាចំពោះមុខច្បាប់ វិភាគបទប្បញ្ញត្តិ និងច្បាប់ជាតិ និងលើកកម្ពស់ចំណេះដឹងរបស់សហគមន៍អំពីការវិវឌ្ឍន៍ផ្នែកច្បាប់ដែលអាចប៉ះពាល់ដល់សិទ្ធិរបស់ពួកគេ ។
ការិយាល័យឃ្លាំមើលពន្ធនាគារ
ពន្ធនាគារជាច្រើននៅក្នុងប្រទេសកម្ពុជា មានសភាពចង្អៀតណែនខ្លាំង ហើយស្ថានភាពរស់នៅមិនសមរម្យ ។ មនុស្សនៅក្នុងពន្ធនាគារ ត្រូវធ្វើការបង់ប្រាក់ក្រៅផ្លូវការជាប្រចាំ ដើម្បីទទួលបានតម្រូវការជាមូលដ្ឋានដូចជាអាហារ កន្លែងសម្រាប់គេង និងការចូលសួរសុខទុក្ខពីគ្រួសារ ។ អ្នកជាប់ឃុំក្នុងពន្ធនាគារនៅកម្ពុជា មានក្រុមជនដែលងាយទទួលរងគ្រោះបំផុតនៅក្នុងប្រទេស ដែលប្រឈមនឹងការរំលោភសិទ្ធិម្តងហើយម្តងទៀត ខណៈពេលដែលស្ថិតនៅក្រោមកាតព្វកិច្ចរបស់រដ្ឋ ។
អង្គការលីកាដូ ឃ្លាំមើលជាងពាក់កណ្តាលនៃពន្ធនាគារសរុបចំនួន២៨ នៅកម្ពុជា ។ អ្នកស្រាវជ្រាវគម្រោងពន្ធនាគារ តែងចុះជួបអ្នកជាប់ឃុំក្នុងពន្ធនាគារជាទៀងទាត់ និងធ្វើការសម្ភាសន៍ ដើម្បីតាមដានក្នុងករណីមានការធ្វើទារុណកម្ម ស្រាវជ្រាវករណីអំពើហិង្សាក្នុងពន្ធនាគារនិងអំពើពុករលួយ ជួយអតិថិជនក្នុងដំណើរការផ្លូវច្បាប់ ដូចជាការដាក់ពាក្យសុំនៅក្រៅឃុំ និងបណ្តឹងឧទ្ធរណ៍ឬបណ្ដឹងសាទុក្ខ និងស្រាវជ្រាវការរំលោភសិទ្ធិមនុស្សផ្សេងទៀត ។ អ្នកស្រាវជ្រាវ ក៏ជួយដល់អ្នកដែលមិនត្រូវបានគេអើពើនៅក្នុងពន្ធនាគារផងដែរ រួមមាន អ្នកការពារសិទ្ធិមនុស្ស ស្ត្រីមានផ្ទៃពោះ កុមារតាមម្តាយរបស់ពួកគេដែលកំពុងជាប់ឃុំ និងអ្នកទោសដែលជាអនីតិជន ដោយធ្វើការតស៊ូមតិជំទាស់ទៅនឹងការឃុំខ្លួនដោយមិនសមហេតុផល និងមិនមានការជំនុំជម្រះឱ្យបានត្រឹមត្រូវ ។
អ្នកស្រាវជ្រាវគម្រោងពន្ធនាគារ ជារឿយៗតែងធ្វើការជាមួយក្រុមពេទ្យ និងក្រុមការងារសេវាសង្គម ដើម្បីផ្តល់ការគាំទ្រផ្នែកសម្ភារៈ និងការព្យាបាលជំងឺ ដល់អ្នកជាប់ឃុំក្នុងពន្ធនាគារ រួមមាន ការគាំទ្រសម្រាប់អ្នកជាប់ឃុំដែលមានផ្ទៃពោះ និងកូនៗរបស់ពួកគេ ជាដើម ។
ការិយាល័យតស៊ូមតិ ធនធានឯកសារ និងស្រាវជ្រាវ
ការិយាល័យតស៊ូមតិ ធនធានឯកសារ និងស្រាវជ្រាវនៃអង្គការលីកាដូ ចងក្រងឯកសារ និងប្រើប្រាស់ព័ត៌មានពីការិយាល័យឃ្លាំមើល និងការិយាល័យផ្សេងៗទៀត ដើម្បីលើកកម្ពស់ និងបន្លឺសំឡេងរបស់អ្នកការពារសិទ្ធិមនុស្ស សកម្មជន អ្នកសារព័ត៌មាន និងប្រជាពលរដ្ឋកម្ពុជា ដែលព្យាយាមតស៊ូមតិ ដើម្បីសង្គមមួយប្រកបដោយសុវត្ថិភាព និងយុត្តិធម៌ ។
ក្រុមការងារស្រាវជ្រាវ ផលិតរបាយការណ៍ស្រាវជ្រាវរយៈពេលវែងដោយផ្អែកលើភស្តុតាង បន្ថែមទៅលើយុទ្ធសាស្រ្តតស៊ូមតិដែលមានស្រាប់ ដោយការប្រមូលផ្ដុំ និងការបន្លឺសំឡេងរបស់ប្រជាពលរដ្ឋដែលរងការរំលោភបំពានសិទ្ធិមនុស្ស ដើម្បីជំរុញឱ្យមានកំណែទម្រង់នៅថ្នាក់ជាតិ និងអន្តរជាតិ ។ ក្រុមនេះ ត្រូវបានបង្កើតឡើង ដើម្បីស្រាវជ្រាវអំពីការរំលោភសិទ្ធិមនុស្ស នៅក្នុងវិស័យមីក្រូហិរញ្ញវត្ថុនៅកម្ពុជា តាមរយៈការផលិតរបាយការណ៍ របាយការណ៍សង្ខេប និងឯកសារចេញផ្សាយជាសាធារណៈផ្សេងទៀត ក៏ដូចជាការតស៊ូមតិ និងការដាក់ពាក្យបណ្ដឹងជាមួយនឹងស្ថាប័នអភិវឌ្ឍន៍ផ្នែកហិរញ្ញវត្ថុជាលក្ខណៈទ្វេភាគី និងពហុភាគី ពាក់ព័ន្ធនឹងការវិនិយោគទុនបែបគ្រោះថ្នាក់លើវិស័យមីក្រូហិរញ្ញវត្ថុ ។ ពួកគេ ធ្វើការយ៉ាងជិតស្និទ្ធជាមួយអង្គការដៃគូ អ្នកស្រាវជ្រាវ ភ្នាក់ងារអភិវឌ្ឍន៍ ស្ថាប័នអភិវឌ្ឍន៍ផ្នែកហិរញ្ញវត្ថុ និងអ្នកសារព័ត៌មានផ្សេងទៀត ដើម្បីលើកកម្ពស់ចំណេះដឹង និងអំពាវនាវឱ្យចាត់វិធានការ ដើម្បីដោះស្រាយការរំលោភសិទ្ធិមនុស្ស នៅកម្ពុជា ។
បុគ្គលិកធនធានឯកសាររក្សាទុកឯកសារសំណុំរឿង និងព័ត៌មានពីបណ្តាការិយាល័យផ្សេងៗ ហើយធ្វើការយ៉ាងជិតស្និទ្ធជាមួយក្រុមការងារតស៊ូមតិ ដើម្បីចេញផ្សាយរបាយការណ៍សង្ខេប របាយការណ៍ យុទ្ធនាការសាធារណៈ និងឯកសារតស៊ូមតិផ្សេងទៀត ស្តីពីការរំលោភសិទ្ធិមនុស្សនៅក្នុងប្រទេសកម្ពុជា ។ ការតស៊ូមតិនេះ ពាក់ព័ន្ធនឹងការធ្វើការយ៉ាងជិតស្និទ្ធជាមួយសហគមន៍មូលដ្ឋាន និងក្រុមសកម្មជន ដើម្បីជួយផ្សព្វផ្សាយសាររបស់ពួកគេ និងជួយបន្លឺសំឡេងរបស់ពួកគេឱ្យបានលឺទាំងនៅថ្នាក់ជាតិ និងអន្តរជាតិ ។ ពួកគេក៏ធ្វើការបណ្តុះបណ្តាលផ្នែកឌីជីថលផងដែរ ដើម្បីធានាថា សកម្មជន និងសហគមន៍ ត្រូវបានការពារពីការតាមដាន និងអាចតស៊ូមតិដោយសុវត្ថិភាព ៕